بزمِ کونین سجانے کے لیے آپ ﷺ آئے
اشاعت کی تاریخ: 29th, August 2025 GMT
جیسے ہی ربیع الاوّل شریف کے ماہِ مقدس کا آغاز ہوتا ہے تو عاشقانِ رسولِ عربی ﷺ خوشی سے جھوم اُٹھتے ہیں اور اِس پورے ماہِ مقدس کو انتہائی عقیدت و احترام اور شایانِ شان طریقے سے مناتے ہیں۔
محافلِ جشنِ عید میلادالنبی ﷺ کا انعقاد ہوتا ہے، گلیوں اور بازاروں کو دلھن کی طرح سجا دیا جاتا ہے، مساجد اور بلند و بالا عمارات پہ چراغاں کے خوب صورت مناظر آنکھوں کو فرحت آنگیں نظارے پیش کرتے ہیں، درود و سلام کی بے مثل اور خوب صورت صدائیں سماعتوں سے ٹکرا کر کانوں میں رس گھولتی ہیں، گھر، گھر صدقات و خیرات اور لنگر کا وسیع اہتمام و انتظام کیا جاتا ہے۔
سکول، کالجز اور جامعات میں تقاریر اور نعت خوانی کے مقابلے ہوتے ہیں۔ پوری دنیا میں سرکاری و غیر سرکاری سطح پر ’’سیرت النبی ﷺ‘‘ کے موضوع پر سیمینارز اور تقریبات منعقد کی جاتی ہیں، اخبارات خصوصی ایڈیشن شایع کرنے اور الیکٹرانک میڈیا خصوصی نشریات اپنے ناظرین کے لیے پیش کرنے کا اہتمام کرتا ہے۔ شکرانے کے نوافل ادا کیے جاتے ہیں اور ایک دوسرے کو خوشی کے اس موقع پر جشنِ آمدِ رسولؐ ﷺ کی مبارک باد دینے کا عظیم سلسلہ چل نکلتا ہے۔
یہ سارے اہتمام و انتظامات کس لیے ہوتے ہیںِ؟ اس لیے کہ آج کے دن ہی پروردگارِ عالم نے حضور سید ِعالمؐ، سرورِ کائناتؐ، فخر ِموجوداتؐ، ہادیٔ عالمؐ، رحمتِ عالمؐ، آقائے نام دارؐ، حبیبِ خدا حضرت محمد مصطفیٰ ﷺ کو اس دنیا میں مبعوث فرما کر امتِ مسلمہ پر ایک بہت بڑا احسان فرمایا۔ خداوند ِقدوس نے واضح ارشاد فرمایا جس کا مفہوم یہ ہے کہ اے حبیب ﷺ! آپ فرما دیں کہ جب تم پر اﷲ کا فضل اور اُس کی رحمت ہو تو، خوش ہُوا کرو، تمہارا خوشیاں منانا اس سے بہتر ہے، جو تم اپنے لیے جمع کیے رکھتے ہو۔
ربِ کائنات نے ارشاد فرمایا، مفہوم: ’’یاد کرو! تم اﷲ کی نعمتیں، تاکہ تم فلاح پاؤ۔‘‘
ربِ قدوس نے ارشاد فرمایا، مفہوم: ’’اور اپنے پروردگار کی نعمت کو خوب کھول کر بیان کرو۔،،
کیا آپ ﷺ سے بڑھ کر بھی کوئی نعمت کوئی فضل اور کوئی احسان ہوسکتا ہے۔۔۔۔؟ یقیناً نہیں!
حضور پُرنور ﷺ کی حیاتِ پاک کا ہر ایک لمحہ، نہ صرف امتِ مسلمہ کے لیے بل کہ پوری انسانیت کے لیے مینارۂ نور کی حیثیت رکھتا ہے۔ گویا رحمتِ عالم ﷺ کی اس دنیا میں آمد ایک بہت بڑا انقلاب تھا اور ایسا انقلاب کہ جس کے انتظار میں یہ سسکتی بِلکتی انسانیت صدیاں تڑپتی اور ترستی رہی کہ کوئی عظیم راہ نما، کوئی عظیم ہستی، کوئی عظیم مسیحا اس دنیا میں تشریف لائے اور ہماری تاریک اور اندھیروں میں ڈوبی ہوئی زندگی کو روشنی بخش دے، بے راہ روی سے ہٹا کر صراطِ مستقیم پہ چلادے، اﷲ رب العزت کا پتا دے، دلوں پہ لگے زنگ کو اتار دے اور گرد آلود روح کو نکھار دے۔
آخر کار ربِ کائنات کو انسانیت پر ترس آیا اور ذاتِ باری تعالیٰ نے12ربیع الاول کی صبح سعادت کو وہ نور ہدایت عطا فرمایا کہ جس کی تابندہ کرنوں سے پوری کائنات جگ مگا اُٹھی اور جس کی خوش بُو سے سارا عالم معطر ہوگیا، محبتوں کے بے مثل پھول کِھل اُٹھے، خلوص و پیار کے چراغ روشن ہوگئے، چاند، سورج اور ستاروں کو ضوفشائی نصیب ہوئی، دریاؤں اور سمندروں کو روانی ملی، خوش بوؤں کو پاکیزہ احساس ملا، گم کردہ منزل انسانیت کو جینے اور سنورنے کا سلیقہ آیا، تہذیب و تمدن پہ روپ آیا۔
محمد علی ظہوریؒ اپنے نعتیہ کلام میں بارگاہِ رسالت مآب ﷺ میں ہدیۂ عقیدت کے پھول نچھاور کرتے ہوئے، آپ ﷺ کی آمد کا یوں تذکرہ کرتے ہیں:
بزمِ کونین سجانے کے لیے آپ ؐ آئے
شمع توحید جلانے کے لیے آپؐ آئے
ایک پیغام جو ہر دل میں اُجالا کردے
ساری دنیا کو سنانے کے لیے آپؐ آئے
یہ ایک مسلمہ تاریخی حقیقت ہے کہ اﷲ تبارک و تعالیٰ کے خاص فضل و کرم سے آقائے نام دار، حبیبِ خدا حضرت محمد مصطفیٰ ﷺ نے جو عظیم انقلاب برپا کیا وہ ہمہ پہلو اور ہمہ گیر انقلاب تھا، یہ عقائد و افکار اور سیرت و کردار میں انقلاب تھا۔ معاشرت اور معیشت میں انقلاب تھا۔ قانون اور سیاست میں انقلاب تھا۔ تعلیم و تربیت میں انقلاب تھا۔ اخلاق و عبادات میں انقلاب تھا۔ اخلاص و ایثار اور محبت و پیار میں انقلاب تھا۔ مساوات و احساسات میں انقلاب تھا۔ انسانی زندگی کا کوئی ایسا گوشہ اور کوئی شعبہ ایسا نہ تھا کہ جس کے لیے حضور سیدِ عالم ﷺ نے راہ نما اور زریں اصول عطا نہ فرمائے ہوں۔
دعائے خلیلؑ کی قبولیت رسولِ رحمت ﷺ کی ذاتِ مقدس کے کیا کہنے کہ اﷲ تبارک و تعالیٰ نے اپنی اطاعت کو اپنے پیارے حبیب ﷺ کی اطاعت سے مشروط کردیا۔ اور اپنی محبت کو آپ ﷺ کی محبت سے لازم و ملزوم ٹھہرایا، تاکہ لوگ کوچۂ سرکارِ دو عالم ﷺ سے فیض یاب ہو کر مجھ تک پہنچیں، مجھ تک رسائی حاصل کریں، یعنی بارگاہِ خداوندِ قدوس میں حاضر ہونے سے پہلے اتباع سنت کا خوب صورت لباس زیب تن کرنا بے حد ضروری ہے۔
آپ ﷺ کا اس دنیا میں تشریف لانا ایک مقصد کے تحت ہی تو تھا، خدائے واحد کی ذاتِ کریمی کا ارشادِ پاک کا مفہوم ہے کہ وہ رسولؐ ﷺ، اﷲ کی آیاتِ مقدس کی تلاوت فرما کے انہیں سناتے، اُن کا تزکیہ فرماتے اور اُنھیں کتاب و حکمت کی تعلیم دیتے ہیں حالاں کہ اِس سے پہلے یہی لوگ صریح گم راہیوں میں پڑے ہوئے تھے۔
آپ ﷺ کی بعثت سے قبل کا نقشہ حضرت جعفر طیار رضی اﷲ تعالیٰ عنہ نے نجاشی کے دربار میں خطاب کرتے ہوئے یوں پیش کیا، آپؓ فرماتے ہیں:
’’اے بادشاہِ سلامت! ہم بے ین اور کم علم تھے، بتوں کی پرستش کرتے، مردار کھاتے اور بے حیائی کے دل دادہ تھے، اپنے بھائیوں پر ظلم ڈھاتے اور ہم سایوں کو تکلیف پہنچاتے تھے، ہم میں سے طاقت ور، کم زور پر ظلم و ستم کیا کرتا تھا، ہم میں انسانیت نام کی کوئی چیز نہ تھی اور مہمان داری کا نام و نشان نہ تھا، کوئی قائدہ اور قانون نہ تھا کہ ہم میں سے ایک پاکیزہ انسان کو اﷲ رب العزت نے آخری پیغمبر ﷺ بنا کر مبعوث فرمایا، جس کے حسب و نسب، سچائی، امانت، پاک دامنی، دیانت داری، تقویٰ و طہارت، ہم دردی و پاکیزگی کو ہم خوب جانتے ہیں۔
اُس درِیتیمؐ نے ہم کو بتایا کہ ہم سب کا پروردگار بس ایک اﷲ ہے، اُس کا کوئی شریک نہیں اور وہ ماں، باپ اور اولاد سے مُبّرا ہے، وہ اﷲ ہمیشہ سے ہے اور ہمیشہ ہی رہے گا، وہی سب کا خالق و مالک اور رازق ہے، نفع و نقصان اُس کے ہاتھ میں ہے، یہ بت کسی بھی چیز کے مالک نہیں ہیں، ایک اﷲ تعالیٰ کی ذاتِ کریمی ہی حجت روا اور مشکل کشا ہے، اِس کے ساتھ حضورِ اقدس ﷺ نے ہمیں یہ بھی ہدایات فرمائیں کہ ہمیشہ سچ بولا کرو، اپنا وعدہ پورا کیا کرو، تمام گناہوں سے الگ رہو، آپس میں صلۂ رحمی کرو، ہم سایوں کے ساتھ اچھا سلوک کرو، حرام باتوں سے بچو، خون ریزی اور یتیم کے مال کھانے سے دور رہو، کسی کا ناحق مال نہ کھاؤ، اِسی طرح پاک دامن عورتوں پر تہمت لگانے سے منع کیا اور ساتھ ہی نماز پڑھنے کا حکم بھی دیا، روزے رکھنے اور زکوٰۃ ادا کرنے کی تاکید فرمائی، مہمان نوازی کا درس دیا، ہم سب اُن پر ایمان لائے اور آپ ﷺ کی اتباع کرتے ہوئے آپ ﷺ پر دل و جان سے فدا ہوئے۔،،
قارئین محترم! یہ ایک مسلمہ حقیقت ہے کہ رسولِ مقبول ﷺ کے مقدس ارشاداتِ عالیہ حکمت و بصیرت کے ان بیش قیمت اور انمول موتیوں اور ہیروں پر مشتمل ہیں، جن سے زندگی کے نئے اُفق اور نئی راہوں کا سراغ ملتا ہے۔ اور انسان میں بھر طریقے سے جذبۂ عمل بیدار ہوتا ہے، پھر ان پر مستزاد یہ کہ ھادیٔ عالم ﷺ نے ان ارشاداتِ مقدسہ پر ہی اکتفا نہ فرمایا، بل کہ اپنے حسن عمل سے، سیرت و کردار سے اور اپنے اسوۂ حسنہ سے پوری عالمِ انسانیت کے لیے ایک دائمی اور عملی نمونہ پیش فرمایا، جیسا کہ ربِ کریم عزوجل نے ارشاد فرمایا: ’’درحقیقت! تم لوگوں کے لیے اﷲ کے رسول ﷺ کی زندگی میں ایک بہترین نمونہ ہے۔،،
آپ ﷺ سے سچی اور حقیقی محبت اِس بات کا تقاضا کرتی ہے کہ ہم سب آپ ﷺ کے ارشاداتِ گرامی کی روشنی میں ربِ غفور کی طرف سے عطا کردہ اپنی زندگی کے شب و روز گزاریں، اﷲ تبارک و تعالیٰ ہم سب کو اسلام میں پورا داخل ہونے کی توفیق عطا فرمائے، اور ہمارے ایمان کی سلامتی اور صغیرہ کبیرہ گناہوں کو اپنے پیارے حبیب ﷺ کے صدقے معاف فرمائے۔ آمین
.ذریعہ: Express News
کلیدی لفظ: میں انقلاب تھا ارشاد فرمایا اس دنیا میں کے لیے ا پ ا پ ﷺ کی عالم ﷺ اور ہم ﷺ کی ا
پڑھیں:
ماتلی ، ڈینگی اور ملیریا کے کیسز میں اضافہ ، کوئی اقدامات نہیں کیے گئے
data-id="863a0a8" data-element_type="widget" data-widget_type="theme-post-content.default">
ماتلی (نمائندہ جسارت)گزشتہ چند دنوں کے دوران ماتلی اور گرد و نواح میں ڈینگی اور ملیریا کے کیسز میں تشویشناک اضافہ دیکھنے میں آیا ہے۔ شہریوں نے شکایت کی ہے کہ محکمہ صحت کی جانب سے تاحال مؤثر اقدامات نہیں کیے گئے، جس کے باعث عوام میں شدید خدشات پائے جا رہے ہیں۔واضح رہے کہ حیدرآباد سمیت اندرونِ سندھ کے مختلف علاقوں میں ڈینگی کے کیسز میں بے تحاشا اضافہ ہو چکا ہے، جس کے اثرات ماتلی میں بھی نمایاں طور پر دیکھنے میں آ رہے ہیں۔ اسپتالوں میں روزانہ درجنوں مریض بخار، جسم درد اور خون میں پلیٹ لیٹس کی کمی کی علامات کے ساتھ پہنچ رہے ہیں۔شہریوں کا کہنا ہے کہ محکمہ صحت اور بلدیہ کی جانب سے اسپرے مہم، گندے پانی کی نکاسی، اور مچھروں کی افزائش روکنے کے اقدامات فوری طور پر کیے جائیں تاکہ حالات مزید خراب نہ ہوں۔عوامی حلقوں نے اسسٹنٹ کمشنر ماتلی اور ڈی ایچ او بدین سے مطالبہ کیا ہے کہ وہ صورتِ حال کا فوری نوٹس لیں اور ماتلی میں انسدادِ ڈینگی و ملیریا مہم کا آغاز کریں۔
وزیراعظم شہباز شریف 3 روزہ دورے پر سعودی عرب پہنچ گئے