وزیر اعلی خیبر پختونخوا علی امین خان گنڈاپور کی زیر صدارت صوبائی کابینہ کا 23 واں اجلاس ہوا، جس میں خیبرپختونخوا حکومت نے ماہ رمضان میں صوبے کے عوام کو رمضان پیکیج بصورت نقد دینے کا فیصلہ کیا۔
یہ بھی پڑھیں:کیا عمران خان علی امین گنڈاپور سے ناراض ہیں؟ وزیراعلیٰ خیبرپختونخوا نے خاموشی توڑ دی
اجلاس سے خطاب میں وزیر اعلیٰ خیبرپختونخوا علی امین خان گنڈاپور نے ہدایت کی کہ رمضان المبارک کے مہینے میں اشیائے ضروریہ کی قیمتوں کو کنٹرول کرنے کے لیے منتخب عوامی نمائندے اور مقامی انتظامیہ مل کر کام کریں۔
ان کا کہنا تھا کہ تمام کابینہ اراکین اپنے متعلقہ ڈویژنز اور اضلاع میں انتظامیہ کے ساتھ مل کر باقاعدگی سے فیلڈ وزٹس کریں۔صوبائی حکومت نے اس سلسلے میں پہلے ہی تمام ڈویژنل کمشنرز اور ڈپٹی کمشنرز کو تحریری احکامات جاری کیے ہیں۔
وزیراعلیٰ خیبرپختونخوا کے مطابق صوبائی حکومت اس رمضان میں مستحق خاندانوں کی بھر پور معاونت کرے گی۔ صوبائی حکومت کے رمضان پیکج کے تحت مستحق گھرانوں کو فی گھرانہ 10 ہزار روپے دیے جائیں گے۔
یہ بھی پڑھیں:خیبرپختونخوا کے ملازمین کی برطرفی کا قانون گورنر کنڈی کے تحفظات کے ساتھ منظور
علی امین گنڈا پور کا کہنا تھا کہ رمضان پیکج کے تحت صوبائی اسمبلی کے ہر حلقے میں 5 ہزار مستحق گھرانوں کی معاونت کی جائے گی۔
انہوں نے کہا کہ رمضان پیکج کی تقسیم ایک صاف اور شفاف طریقہ کار کے تحت کی جائے گی۔
اجلاس میں کیے گئے دیگر اہم فیصلے
کابینہ نے صوبے میں ہیموفیلیا کے مریضوں کے علاج کے لیے نان-اے ڈی پی اسکیم کے طور پر 1,212.96 ملین روپے کی فراہمی کی منظوری دی۔ یہ اسکیم 50 فیصد صوبائی حکومت اور 50 فیصد روش پاکستان کی مالی معاونت پر مشتمل ہو گی۔
یہ بھی پڑھیں:خیبر پختونخوا: وفات پانے والے سرکاری ملازمین کے بچوں کو ملازمت فراہمی کی پالیسی ختم
یبر پختونخوا میں اس وقت تقریباً 850 مریض ہیموفیلیا کے ساتھ رجسٹرڈ ہیں، جن میں سے65 بچے دوا کی مہنگی قیمت کے باعث علاج کروانے سے قاصر ہیں۔
ٹنل اور پُل کی منظوری
کابینہ نے ضلع بونیر میں بونیر-کڑاکڑ ٹنل اور ضلع تورغر میں دریائے سندھ پر پل کی تعمیر کے لیے 19.374 بلین روپے کی منظوری دی۔ یہ پل ہزارہ، مردان اور ملاکنڈ ڈویژن کے درمیان رابطے کو بہتر بنائے گا۔ جبکہ کڑاکر ٹنل کی تعمیر سے بونیر اور سوات کے درمیان سفر کے وقت میں نمایاں کمی آئے گی۔ مختص شدہ فنڈز 12 ماہ کے اندر خرچ کیے جائیں گے۔
سڑکوں کی بحالی کی منظوری
کابینہ نے خیبر پختونخوا میں سیاحتی مقامات کی ترقی کے لیے مختص فنڈز میں سے غیر خرچ شدہ رقم کو دیہی سیاحتی سڑکوں کی بحالی پر خرچ کرنے کی منظوری دی۔
یوتھ انڈومنٹ فنڈ
کابینہ نے یوتھ انڈومنٹ فنڈ کی بحالی کے لیے محکمہ کھیل اور امورِ نوجوانان کو100 ملین روپے گرانٹ کی فراہمی کی منظوری دی۔ یہ فنڈ نوجوانوں کی تنظیموں کی استعداد کار میں اضافے، قومی اور بین الاقوامی کانفرنسوں میں شرکت کے لیے مالی معاونت، نمایاں کامیابیاں حاصل کرنے والے نوجوانوں کے لیے نقد انعامات اور دیگر متعلقہ سرگرمیوں کے لیے استعمال کیا جائے گا۔
گرانٹ کی منظوری
کابینہ نے کیڈٹ کالج ممد گٹ (مہمند) کے لیے 80 ملین روپے جبکہ پشاور ماڈل سکول اینڈ کالج کے لیے 80ملین روپے گرانٹ ان ایڈ کی فراہمی کی منظوری دی۔
یہ بھی پڑھیں:خیبر پختونخوا، منشیات کے عادی افراد کا مفت علاج صحت کارڈ میں شامل
کابینہ نے فاٹا ٹریبونل کے چیئرمین اور ممبران کے لیے فکسڈ پے پیکیج میں اضافے کی منظوری دی، تاکہ اسے صوبے کے دیگر ٹریبونلز کے برابر لایا جا سکے۔
کابینہ کو بریفنگ
قبل ازیں کابینہ کو صوبائی حکومت کی مالی نظم ونسق اور کارکردگی بارے بریفنگ دی گئی۔ جس کے مطابق گزشتہ 6 مہینوں کے دوران صوبائی حکومت کا سر پلس بجٹ 169 ارب روپے رہا، جبکہ گزشتہ ایک سال کے دوران صوبائی حکومت نے اپنے ٹیکس اور نان ٹیکس آمدن میں ریکارڈ 49 فیصد کا اضافہ کیا۔
کابینہ کو آگاہ کیا گیا کہ موجودہ صوبائی حکومت نے گزشتہ حکومت کے دور کے مختلف بقایاجات کی مد میں 78.5 ارب روپے ادا کیے۔صوبائی حکومت نے قرض اتارنے کے لیے ڈیپٹ منیجمنٹ فنڈ قائم کیا ہے اور اب تک 30 ارب روپے اس فنڈ میں جمع کیے ہیں۔
