رمضان المبارک شروع ہوتے ہی دنیا بھر میں جہاں کھانے پینے کی قیمتوں میں کمی ہونا شروع ہو جاتی ہے، وہیں پاکستان میں اس بابرکت مہینے میں منافع خور اشیا خور و نوش کے دام بڑھا دیتے ہیں، جس کی وجہ سے اس مخصوص ماہ میں مہنگائی کی شرح میں اضافہ ہو جاتا ہے۔ ایسے میں بلوچستان کے دارالحکومت کوئٹہ کے جان محمد روڈ پر ایک ایسا قصاب بھی ہے جو 800 روپے فی کلو میں بڑے جانور کا گوشت فروخت کررہا ہے۔
قصاب عنایت اللہ نے وی نیوز سے بات کرتے ہوئے بتایا کہ رمضان المبارک کے بابرکت مہینے میں خدا کی خوشنودی کے لیے 800 روپے فی کلو میں بڑا گوشت فروخت کرنا شروع کیا ہے۔ ان کا کہنا تھا کہ اس کار خیر میں مجھے اپنے گاہک کی مدد حاصل ہے، جنہوں نے نام ظاہر کرنے سے منع کیا ہے۔ انہوں نے کہا کہ ماہ صیام کے دوران 11 سو والے بڑے گوشت میں 200 روپے میری طرف سے کم کردیں تو پھر ہم نے یہ فیصلہ کیا کہ ہم شہریوں کو بڑے گوشت میں سبسڈی دیں گے۔
عنایت اللہ نے بتایا کہ ہم ہڈی والا بڑا گوشت 800 روپے میں اور بغیر ہڈی کے 1100 روپے میں فروخت کر رہے ہیں جبکہ اوپن مارکیٹ میں ہڈی والا بڑا گوشت 11 سو جبکہ بغیر ہڈی والا ساڑھے 13 سو سے 1400 روپے فی کلو میں فروخت کیا جارہا ہے۔
عنایت اللہ نے بتایا کہ لوگ بڑی تعداد میں مجھ سے گوشت خریدنے آرہے ہیں اور روزانہ کی بنیاد پر 5 سو سے 6 سو کلو گوشت فروخت کر رہا ہوں جب کہ میرے گوشت کی کوالٹی بھی اوپن مارکیٹ کے گوشت جیسی ہے۔
