
پنسلوانیا: امریکی ریاست پنسلوانیا کے علاقے مانہیم ٹاؤن شپ میں ایک چھوٹا طیارہ ریٹائرمنٹ کمیونٹی کی پارکنگ میں گر کر تباہ ہوگیا، جس کے نتیجے میں پانچ افراد زخمی ہوگئے، تاہم زمین پر موجود افراد محفوظ رہے۔
یہ حادثہ اتوار کے روز اس وقت پیش آیا جب ایک بیچ کرافٹ بونانزا سنگل انجن طیارہ لینکاسٹر ایئرپورٹ سے اوہائیو کے لیے روانہ ہوا، مگر تھوڑی دیر بعد ہی گر کر تباہ ہوگیا۔
طیارہ بریدرین ولیج ریٹائرمنٹ کمیونٹی کی پارکنگ میں گرنے کے بعد آگ کی لپیٹ میں آ گیا، جس سے متعدد گاڑیاں متاثر ہوئیں، تاہم کوئی عمارت متاثر نہیں ہوئی۔
ریسکیو حکام نے موقع پر پہنچ کر جلتے ہوئے طیارے کی آگ بجھائی اور تمام زخمیوں کو اسپتال منتقل کر دیا۔ مانہیم ٹاؤن شپ پولیس چیف ڈواین فشر نے تصدیق کی کہ طیارے میں سوار تمام پانچ افراد زخمی ہوئے، مگر کسی کی جان نہیں گئی۔
فیڈرل ایوی ایشن ایڈمنسٹریشن (FAA) نے حادثے کی تحقیقات کا آغاز کر دیا ہے جبکہ نیشنل ٹرانسپورٹیشن سیفٹی بورڈ (NTSB) بھی تفتیش میں شامل ہوگا۔
پنسلوانیا کے گورنر جوش شاپیرو نے حادثے پر اظہار افسوس کرتے ہوئے کہا کہ ریاستی پولیس اور تمام متعلقہ ادارے امدادی سرگرمیوں میں مصروف ہیں۔
اس حادثے نے ایک بار پھر امریکا میں فضائی حادثات پر تشویش کو بڑھا دیا ہے، کیونکہ حالیہ مہینوں میں ایک فوجی بلیک ہاک ہیلی کاپٹر اور ایک کمرشل جیٹ طیارے کے حادثے کے واقعات بھی پیش آ چکے ہیں۔