پاکستان نے بھارتی پروپیگنڈے کا جواب دینے کے لیے میڈیا کو ایل او سی کا دورہ کرانے کا فیصلہ کرلیا
اسلام آباد (ویب ڈیسک) پاکستان نے بھارتی پروپیگنڈے کا جواب دینے کے لیے میڈیا کو ایل او سی کا دورہ کرانے کا فیصلہ کرلیا اور اس سلسلے میں وزارت اطلاعات و نشریات نے آج اور کل پاکستانی و بین الاقوامی میڈیا نمائندگان کے لیے لائن آف کنٹرول (ایل او سی) کے دورے کا اہتمام کیا ہے جس کا مقصد بھارت کی جانب سے پاکستان میں مبینہ "دہشت گرد کیمپوں" کے بارے میں کیے گئے بے بنیاد اور من گھڑت پروپیگنڈے کو بے نقاب کرنا ہے۔
بھارت نے متعدد بار ایل او سی کے ساتھ مبینہ دہشت گرد ٹھکانوں کے حوالے سے جھوٹے اور بے بنیاد دعوے کیے ہیں۔ اس دورے کے دوران، میڈیا نمائندگان کو ان مخصوص مقامات پر لے جایا جائے گا جنہیں بھارت نے اپنے دعووں میں دہشت گرد کیمپ قرار دیا ہے، اور ان عالمی و مقامی میڈیا نمائندگان کو زمینی حقائق سے آگاہ کیا جائے گا جو ان گمراہ کن الزامات کی تردید کرتے ہیں۔
وزارت اطلاعات کاکہنا ہے کہ پاکستان ایک پُرامن ملک کے طور پر اپنی پختہ وابستگی کا اعادہ کرتا ہے اور دنیا کے کسی بھی حصے میں دہشت گردی یا دہشت گردانہ سرگرمیوں کو قطعی طور پر مسترد کرتا ہے،قوم اپنی خودمختاری کے دفاع کے لیے پرعزم ہے، اور بھارت کی کسی بھی جارحیت کا فوری اور مؤثر جواب دیا جائے گا۔
