اسلام آباد:صدر مملکت آصف علی زرداری نے اسکواڈرن لیڈر عثمان یوسف شہید کے گھر جا کر اہل خانہ سے تعزیت کی۔ صدر مملکت نے کہا کہ قوم کو اپنے بہادر سپاہیوں کی قربانیوں پر فخر ہے۔
صدر مملکت آصف علی اسکواڈرن لیڈر عثمان یوسف شہید کے گھر پہنچے جہاں انہوں نے شہید کے والد اور اہل خانہ سے ملاقات کی۔ صدر آصف زرداری نے کہا کہ پوری قوم اپنے بہادر جوانوں کی قربانیوں کو سلام پیش کرتی ہے اور ان کے خاندانوں کی قربانیوں کو کبھی فراموش نہیں کرے گی۔
صدر مملکت نے شہید کے لیے فاتحہ خوانی کی اور بلندی درجات کی دعا کی۔ انہوں نے شہید کے اہل خانہ کے ساتھ اظہارِ ہمدردی کرتے ہوئے ان کے لیے صبر جمیل کی دعا بھی کی۔
قبل ازیں یوم تشکر پر اپنے پیغام میں کہا کہ پاکستان کی مسلح افواج نے بھارتی اشتعال انگیزی کا نہایت پیشہ ورانہ انداز اور بھرپور قوت کے ساتھ جواب دیا، بلا اشتعال بھارتی جارحیت کے جواب میں آپریشن بنیان مرصوص کی کامیابی پر رب ذوالجلال کے شکرگزار ہیں۔
آصف زرداری کا کہنا تھا کہ اس کامیابی پر مسلح افواج کے دلیر سپاہیوں اور عسکری قیادت کوخراج تحسین پیش کرتا ہوں، یہ کامیابی صرف پاکستان کی مسلح افواج کی نہیں بلکہ پوری قوم کی ہے، پوری قوم دشمن کی جارحیت کے خلاف بنیان مرصوص کی مانند کھڑی ہے۔
صدر مملکت کا کہنا تھا کہ پاکستان اپنی خودمختاری، جغرافیائی سالمیت اور قومی مفادات پر کبھی سمجھوتہ نہیں کرےگا، پاکستان ایک پرامن ملک ہے اور کسی کے خلاف جارحانہ عزائم نہیں رکھتا، ہماری سرزمین کے خلاف کسی بھی جارحیت کا بھرپور جواب دیا جائے گا، سندھ طاس معاہدے کی کسی یکطرفہ معطلی کو مسترد کرتے ہیں۔
