حج کا رکن اعظم وقوف عرفہ ادا کرلیا گیا جس کے بعد اب ایک لاکھ 15 ہزار پاکستانیوں سمیت لاکھوں عازمین مزدلفہ روانہ ہوگئے اور رات کھلے آسمان تلے گزاریں گے۔
عازمین نے منی میں رات گزارنے کے بعد میدان عرفات کا رخ کیا اور مسجد نمرہ میں خطبہ حج سنا جبکہ رب کے حضور مغفرت، رحمت اور مظلوموں کیلیے دعائیں مانگیں۔
عصر اور مغرب کے درمیان وقوف عرفہ جس میں حاجی اللہ رب العزت کے حضور گڑ گڑا کر دعائیں کریں گے ، سورج غروب ہونے کے ساتھ ہی گولہ چلے گا اور نماز مغرب ادا کیے بغیر حاجی مزدلفہ کے لیے روانہ ہوں گے جہاں پر وہ مغرب اور عشا کی نمازیں ایک ساتھ ادا کریں گے۔
رات کھلے آسمان تلے گزارنے کے بعد حاجی نما زفجر ادا کریں گے اور طلوع آفتاب کے ساتھ ہی منی میں اپنے خیموں کی طرف لوٹ جائیں گے۔
رمی جمرات کریں گے بڑے شیطان کو7 کنکریاں ماریں گے ، قربانی کریں گے، حجاج کرام حلق کرانے کے بعد احرام کھول دیں گے اور عام لباس زیب تن کر لیں گے،11 ذوالحج کو حجاج کرام تینوں شیطانوں چھوٹے ،درمیانے اور بڑے شیطان کو 7،7 کنکریاں ماریں گے۔
مزید پڑھیں: لَبَّيْكَ اللَّهُمَّ لَبَّيْكَ کی صداؤں کے ساتھ آج مناسک حج 1446ھ کا آغاز ہو گا
رمی جمرات کے بعد حجاج کرام طواف زیارت کیلئے خانہ کعبہ جائیں گے، 12 ذوالحج کو زوال آفتاب کے بعد پھر تینوں شیطانوں کو کنکریاں ماری جائیں گی۔
حجاج کرام رمی جمرات کے بعد منی سے اپنی رہائش گاہ روانہ ہو جائیں گے، اگر کوئی حاجی منٰی میں ایک اور دن رکنا چاہے تو وہ ، 13 ذوالحجہ کو تینوں شیطانوں کو کنکریاں مار کر مکہ اپنی قیام گاہ پہنچ جائیں گے۔
حج کا فریضہ مکمل ہوگیا، کچھ حاجی طواف الوداع کرکے اپنے وطن اور کچھ روضہ رسول ؐ پر حاضری کیلئے مدینہ منورہ چلے جائیں گے۔
