ملک بھر میں بارشوں کا نیا سلسلہ:محکمہ موسمیات نے الرٹ جاری کر دیا
اشاعت کی تاریخ: 22nd, February 2025 GMT
اسلام آباد:محکمہ موسمیات نے اعلان کیا ہے کہ آئندہ ہفتے سے ملک بھر میں بارشوں کا نیا سلسلہ شروع ہوگا، جس کے ساتھ ساتھ کئی علاقوں میں ژالہ باری، گرج چمک، اور برفباری کا بھی امکان ہے۔
24 فروری سے مغربی ہواؤں کے نظام کے داخلے کے بعد پنجاب، خیبر پختونخوا، اسلام آباد اور دیگر شمالی علاقوں میں موسمی تبدیلیاں متوقع ہیں۔
محکمہ موسمیات کے مطابق ملک کے شمالی اور پہاڑی علاقوں میں وسیع پیمانے پر بارش، گرج چمک، اور برفباری ہوگی۔ گلگت بلتستان میں 25 فروری سے 2 مارچ تک شدید بارشوں اور برفباری کا امکان ہے جب کہ کشمیر میں بھی اسی عرصے کے دوران شدید بارش اور برفباری متوقع ہے۔ خیبر پختونخوا میں 24 فروری سے یکم مارچ تک بارش اور گرج چمک کے ساتھ بالائی علاقوں میں برفباری ہوگی۔
پنجاب اور اسلام آباد میں 25 فروری سے یکم مارچ تک گرج چمک کے ساتھ بارش کی توقع ہے جب کہ مری اور گلیات سمیت دیگر پہاڑی علاقوں میں برفباری کا امکان ہے، جس کے باعث سڑکوں پر پھسلن اور دیگر مشکلات کا سامنا ہو سکتا ہے۔
بلوچستان میں 24 فروری سے 26 فروری تک کوئٹہ، زیارت اور قریبی علاقوں میں بارش اور برفباری کا امکان ہے۔ سندھ میں 25 سے 26 فروری تک لاڑکانہ، سکھر، اور ملحقہ علاقوں میں ہلکی بارش متوقع ہے۔
بارشوں اور برفباری کے باعث مری، گلیات، ناران، کاغان اور دیگر پہاڑی علاقوں میں سڑکوں کے بند ہونے اور لینڈ سلائیڈنگ کا خطرہ ہے۔ محکمہ موسمیات نے سیاحوں کو غیر ضروری سفر سے گریز کرنے کی ہدایت کی ہے۔ خیبر پختونخوا اور کشمیر میں فلیش فلڈ کا بھی امکان ہے، جس کے پیش نظر مقامی انتظامیہ کو ہدایات جاری کی گئی ہیں۔
محکمہ موسمیات نے عوام کو ہدایت کی ہے کہ وہ موسمی تبدیلیوں کے دوران احتیاطی تدابیر اختیار کریں۔ بالخصوص پہاڑی علاقوں میں رہنے والے افراد لینڈ سلائیڈنگ اور دیگر قدرتی آفات کے خطرات سے آگاہ رہیں۔ سفر کے دوران گاڑیوں کی رفتار کم رکھیں اور موسمی حالات کی مسلسل نگرانی کریں۔
ماہرین کے مطابق اس نئے موسمی نظام کے باعث درجہ حرارت میں نمایاں کمی آنے کے امکانات ہیں، جس کے نتیجے میں سردی کی لہر میں اضافہ ہوگا۔ بارشوں اور برفباری کے باعث زرعی شعبے کو فائدہ ہوگا لیکن ساتھ ہی کچھ علاقوں میں سیلاب اور دیگر مشکلات کا بھی سامنا ہو سکتا ہے۔
محکمہ موسمیات کا کہنا ہے کہ وہ موسمی تبدیلیوں کی مسلسل نگرانی کر رہا ہے اور عوام کو بروقت معلومات فراہم کرتا رہے گا۔ عوام سے گزارش ہے کہ وہ محکمہ موسمیات کی جانب سے جاری کردہ ہدایات پر عمل کریں اور موسمی حالات کے پیش نظر احتیاطی تدابیر اختیار کریں۔
.ذریعہ: Jasarat News
کلیدی لفظ: پہاڑی علاقوں میں محکمہ موسمیات نے اور برفباری برفباری کا امکان ہے اور دیگر کے باعث
پڑھیں:
پنجاب میں بارش کی پیشگوئی، کن علاقوں میں بادل برسنے کا امکان؟
لاہور:محکمہ موسمیات نے آج شام سے پنجاب کے بیشتر اضلاع میں ہلکی بارشوں کی پیشگوئی ہے۔
پی ڈی ایم اے پنجاب کے مطابق 5 نومبر تک پنجاب میں بارش کا امکان ہے، بارشیں آلودگی اور ایئرکوالٹی انڈکس کم ہونے میں مددگار ثابت ہوں گی۔
لاہور، راولپنڈی، مری، گلیات، اٹک، تلہ گنگ، جہلم، سرگودھا، خوشاب، گجرانوالہ، سیالکوٹ اور نارووال میں بارشوں کا امکان ہے جبکہ مری، گلیات سمیت دیگر پہاڑی علاقوں میں برف باری کی پیشگوئی ہے۔
ڈی جی پی ڈی ایم اے کا کہنا ہے کہ بارشوں کے باعث درجہ حرارت میں واضح طور پر کمی واقع ہوگی جبکہ ممکنہ بارشوں سے اسموگ میں کمی ہوگی۔ اسموگ سے بچاؤ کے لیے ماسک کا استعمال کریں اور غیر ضروری باہر نہ نکلیں۔
ڈی جی عرفان علی کاٹھیا کے مطباق پی ڈی ایم اے کنٹرول روم میں صورتحال کی مانیٹرنگ 24/7 جاری ہے، شہری خراب موسم کی صورتحال میں غیر ضروری سفر سے گریز کریں۔ کسان اپنی سرگرمیوں کو موسم کی صورتحال کے مطابق ترتیب دیں۔
ترجمان کے مطابق دوران سفر فوگ لائیٹس کا استعمال کریں، ہنگامی صورتحال میں پی ڈی ایم اے کی ہیلپ لائن 1129 پر کال کر سکتے ہیں۔
کراچی، نادرن بائی پاس پر پلاسٹک کے گودام میں آگ لگ گئی