آؤشوٹس کی موت کی چمنی، سفید دھواں اور سرخ آسمان
اشاعت کی تاریخ: 27th, January 2025 GMT
اسلام آباد (اُردو پوائنٹ ۔ DW اردو۔ 27 جنوری 2025ء) آپ پولستانی شہر کراکاؤ سے کوئی پچاس کلومیٹر دور آؤشوٹس پہنچے ہیں تو ایک لمحے کو ایک سیاح یا وزٹر کی بجائے اس یہودی قیدی کا کردار اوڑھ کر دیکھیے، جسے نازی دستے یورپ کے کسی دور افتادہ علاقے سے اس مقام پر ایک طویل مسافت میں ریل گاڑی کی ایک بوگی میں درجنوں افراد کے ہم راہ دبوچے ہوئے لے آئے ہیں۔
بہ ظاہر یہ بتا کر کہ اس سے جبری مشقت لی جائے گی۔کہتے ہیں کہ آخری امید بھی ختم ہو جائے، تو موت آسان ہو جاتی ہے، اس لیے گو کہ نسل پرستی کے جنون میں مبتلا نازی یہ طے کر چکے ہیں کہ آپ اور دیگر قیدیوں کو بھوک، اذیت، عقوبت، تشدد اور سانسیں نوچ کر ہلاک کیا جائے گا، مگر بتایا یہی گیا ہے کہ اپنا قیمتی سامان اور برتن ساتھ لے لیں کہ آپ کو کہیں اور بسایا جا رہا ہے۔
(جاری ہے)
یعنی آپ اور دیگر یرغمالیوں کو خبر بھی نہیں کہ جو قیمتی سامان آپ خود اپنے ساتھ لے جا رہے ہیں، وہ ان نازیوں نے لوٹنے کی مشقت سے بچنے کے لیے آپ سے اٹھوایا ہے اور یہ برتن اور لباس کے بستے اس موہوم امید کے لیے، جو کسی انسان میں ''مزاحمت کے علاوہ کوئی چارہ نہیں‘‘ کا خیال ادھیڑ دیتی ہے۔آؤشوٹس کے اس حراستی مرکز اور ہمارے آج کے درمیان اسی برس کی گرد موجود ہے، مگر یہ گرد ہٹائیں تو اس کیمپ کی چمنیوں سے اچانک سفید دھواں برآمد ہونے لگے گا، جس میں انسانی جسموں کے جھلس کر راکھ ہو جانے کی بو ہو گی۔
یہاں لکیروں میں کھچی ہوئی عمارتوں کی سلاخوں میں دھنسی کھڑکیوں سے بے جہت چیخیں سنائی دینے لگیں گی، جو اپنے راستے میں کھڑی بندوقوں کی بند گلی اور غیر انسانی حد تک نفرت میں دھنسے سپاہیوں کی گالیاں دیتی آنکھوں سے ٹکرا کر خود میں گھٹ کر مرنے لگیں گی، بے بسی کے ہاتھوں سے اپنے آس پاس کا تمام یقین نوچتے ہوئے۔مرکزی دروازے پر ''آربائٹ ماخت فرائے‘‘ یعنی ''کام آزادی دیتا ہے‘‘ کا جملہ، دنوں کی تھکن، بھوک اور موت کے خوف پر کسی بے یقین سے سکون کے فریب کا باعث بنے گا۔
جہاں آپ کو لگے گا کہ جبری مشقت تو ہو گی، اذیت بھی ہو گی، تضحیک بھی ہو گی، بے بسی بھی ہو گی، تشدد بھی ہو گا، مگر شاید آپ کو یا آپ کے ہم راہ نڈھال قدم اٹھاتے بچے کی جان بخش دی جائے۔لیکن پہلی بیرک سے کچھ قدم پہلے ہی، بدن کی ناتوانی اور چستی کا دوراہا نکلتا ہے۔ یہاں آپ کے تھکن سے نڈھال بچے کا ہاتھ ایک گندی گالی اور تحقیر کے تھپڑ کے ساتھ آپ کے ہاتھ سے چھڑایا جا چکا ہے۔
یہاں بزرگ، معذور اور ناتواں خواتین کسی اور جانب دھکیلے جا رہے ہیں۔کچھ دیر تک ان کی زندگی کی بھیک مانگتی چیخیں سنائی دیں، اب وہ بھی دم توڑ گئی ہیں۔ چمنی سے کچھ اور سفید دھواں اٹھنے لگا ہے، فضا میں کچھ اور سڑاند پھیل گئی ہے۔ آسمان کچھ اور سرخ ہو گیا ہے۔
یہاں چستی کا راستہ بھی آسان نہیں۔ سامنے قطار در قطار عمارتیں ہیں، جہاں آپ ہی کی طرح کے یقین و گمان میں دھنسے قیدی نئی عمارتوں کی تعمیر میں مصروف ہیں۔
کانوں میں قتل ہو جانے کی سرگوشیاں کچھ اور دھیمی ہو جائیں گی۔''آربائٹ ماخت فرائے‘‘ کا جملہ نگاہوں میں کچھ اور گھومتا محسوس ہو گا۔ آپ بندوقوں کی پشتوں سے دھکیلے جاتے ہوئے اس نیم تاریک بیرک کے کمرے میں دھکیل دیے گئے ہیں، جہاں چند گز کے خطے پر درجنوں انسان لکیروں میں پڑے ہیں۔ وہ جگہ جہاں دو چار افراد بہ مشکل گزارا کر سکتے ہیں، اسے سینکڑوں سے بھر دیا گیا ہے، جہاں بو، سڑاند اور بے بسی جیسے ہوا کا مسلسل ذائقہ بن چکے ہیں۔اڈولف ہٹلر کے نسل پرستانہ اور جنونیت پر مبنی نظریے کو دل سے قبول کرنے والے 'شٹس شٹافل‘ یا ایس ایس کے دستے باہر سینہ پھلائے کھڑے ہیں۔ آنکھوں کی پٹی نفرت کی گرہ سے باندھی جائے تو تعلیم اور شعور کی انگلیاں اسے باآسانی کھول نہیں سکتیں۔ ان قاتلوں میں ڈاکٹر ہیں، انجینیئر ہیں، فلسفی ہیں، ماہرین بشریات ہیں، مگر ان سب کو مکمل یقین ہے کہ آپ ان کی طرح دکھنے والے ضرور ہیں، مگر انسان نہیں ہیں۔
ان کا علم و شعور انہیں آپ کی بے بسی کو شدتِ رنج سے گزارنے کی تراکیب سکھا رہا ہے، تھکن، بھوک اور چوٹ پر مرہم پٹی کا کوئی راستہ نہیں۔ یہاں کچھ لوگ جو چند روز قبل چست قرار دے کر لائے گئے تھے، مسلسل بھوک اور مشقت کے ہاتھوں اسی دوراہے پر واپس کھینچے جا رہے ہیں، جہاں ناتواں لوگ چمنی کے دھوئیں میں تبدیل ہو جاتے ہیں۔ بس کچھ ہی دیر میں چمنی سے کچھ اور سفید دھواں اٹھے گا، فضا میں کچھ اور سڑاند پھیلے گی اور آسمان کچھ اور سرخ ہو جائے گا۔چستی نے آواز اٹھائی، بے بسی نے کسی بغاوت پر آمادہ کیا یا دکھ نے الجھن پر اکسایا تو آپ کو انچوں میں کھچی ایک عمودی قبر نما کوٹھری میں ٹھونس دیا جائے گا، جہاں پہلے سے تین 'باغی‘ موجود ہیں اور جگہ بس اتنی ہے کہ چاروں بہ مشکل کھڑے ہو سکتے ہیں۔ اور یہاں کئی روز یوں ہی کھڑے کھڑے سونا بھی ہے، جاگنا بھی ہے اور جینا بھی۔
آج ستائیس جنوری انیس سو پینتالیس ہے۔
بوٹوں کا شور سنیے۔ نازیوں میں بھگدڑ مچنے کی آوازیں محسوس کیجیے۔ سوویت یونین کے فوجی دستے آ چکے ہیں اور انسانیت کے ضمیر پر یہ بدنما دھبا تاریخ کا بدترین سبق سنانے کے لیے دھاڑیں مار مار کر رو رہا ہے۔یہ آواز ایسی شدید ہے کہ انسان اقوام متحدہ، جنیوا کنوینشن، ویانا کنوینشن، انسانی حقوق، معذوروں کے حقوق، خواتین کے حقوق، رومن اسٹیچوٹ اور درجنوں دیگر معاہدوں اور کنویشینوں کی صورت میں اس دکھ کے مداوے پر مجبور ہو گیا ہے۔
آؤشوٹس کی آزادی کو اسی برس گزر گئے ہیں۔ دھند، مٹی اور گرد جیسے پھر سے آؤشوٹس جیسی انسانیت سوزی کا سبق بھلا رہی ہیں۔ جیسے پھر سے دنیا نسل پرستی، قوم پرستی اور انسانیت دشمنی کے راستے پر نکل رہی ہے۔ جیسے پھر سے عوامیت پسندی کا عفریت سر اٹھا رہا ہے۔ جیسے پھر سے آؤشوٹس سے سیکھا گیا سبق دھندلا رہا ہے اور جیسے پھر سے چستی اور ناتوانی کا دوراہا کھل رہا ہے۔
مکالمے، اختلاف رائے پر گفتگو اور انسانیت کی سربلندی کے بجائے اب پھر اگر کوئی دوسرا راستہ چنا جاتا ہے، تو خوف یہ ہے کہ پھر سے چمنی سفید دھواں نہ اگلنے لگے، کہیں پھر سے فضا میں انسانی جسموں کی سڑاند نہ پھیل جائے اور کہیں پھر سے آسمان سرخ نہ ہونے لگے۔
نوٹ: ڈی ڈبلیو اردو کے کسی بھی بلاگ، تبصرے یا کالم میں ظاہر کی گئی رائے مصنف یا مصنفہ کی ذاتی رائے ہوتی ہے، جس سے متفق ہونا ڈی ڈبلیو کے لیے قطعاﹰ ضروری نہیں ہے۔
.ذریعہ: UrduPoint
کلیدی لفظ: تلاش کیجئے جیسے پھر سے کچھ اور رہا ہے کے لیے گیا ہے بھی ہو
پڑھیں:
ایسی دنیا جہاں تقسیم اورچیلنجزبڑھ رہے ہیں ہمیں تصادم کے بجائے تعاون اورطاقت کے بجائے سفارتکاری کو ترجیح دینی چاہیے ، وزیرخارجہ
نیویارک (اُردو پوائنٹ اخبارتازہ ترین - این این آئی۔ 23 جولائی2025ء)نائب وزیراعظم و وزیر خارجہ سینیٹر اسحاق ڈار نے کہا ہے کہ ایسی دنیا جہاں تقسیم اور چیلنجز بڑھ رہے ہیں ہمیں تصادم کے بجائے تعاون اور طاقت کے بجائے سفارت کاری کو ترجیح دینی چاہیے، پاکستان ان مشترکہ اہداف پر پیش قدمی کے لیے سب کے ساتھ مل کر کام کرنے کے لیے تیار ہے، ہماری خارجہ پالیسی کا بنیادی ستون کثیرالجہتی اور اقوام متحدہ کے ساتھ ہمارا مضبوط عہد ہے، اقوام متحدہ کے چارٹر میں درج مقاصد اور اصول، خاص طور پر تنازعات کے پرامن حل اور طاقت کے استعمال یا دھمکی سے گریز، بین الاقوامی انصاف کے لیے ناگزیر ہیں، یہی رہنما اصول پاکستان کی صدارت میں منعقدہ تقریبات کیلئے کلید رہیں گے۔ دفتر خارجہ کے ترجمان کی طرف سے جاری بیان کے مطابق نائب وزیراعظم و وزیر خارجہ نے اقوام متحدہ کی سلامتی کونسل کے اراکین، معزز مہماناں اور دیگر شرکا کا خیر مقدم کرتے ہوئے کہا کہ اقوام متحدہ کی سلامتی کونسل میں پاکستان کی اس ماہ کی صدارت کا جشن منا تے ہوئے استقبالیہ تقریب میں آپ سب کو خوش آمدید کہنا میرے لیے انتہائی مسرت کا باعث ہے۔(جاری ہے)
انہوں نے کہا کہ پاکستان کی خارجہ پالیسی کا بنیادی ستون کثیرالجہتی اور اقوام متحدہ کے ساتھ ہمارا مضبوط عہد ہے۔ ان کا کہنا تھا کہ اقوام متحدہ کے چارٹر میں درج مقاصد اور اصول بالخصوص تنازعات کے پرامن حل اور طاقت کے استعمال یا دھمکی سے گریز بین الاقوامی انصاف کے لیے ناگزیر ہیں، یہی رہنما اصول ہماری اس ماہ کی صدارت میں بھی سلامتی کونسل کے کام خواہ وہ مباحثے ہوں یا عملی اقدامات ہماری شراکت کو شکل دے رہے ہیں۔ محمد اسحاق ڈار نے کہا کہ آج دنیا میں بڑھتی بے چینی اور تنازعات کے دور میں غیر حل شدہ تنازعات، طویل المدت تصفیہ طلب تنازعات، یکطرفہ اقدامات اور بین الاقوامی قانون کی خلاف ورزیوں کے نتائج ہر خطے میں محسوس کئے جا رہے ہیں، ہمارا یقین ہے کہ عالمی امن و سلامتی صرف کثیرالجہتی، تنازعات کے پرامن حل، جامع مکالمے اور بین الاقوامی قانون کے احترام سے ہی حاصل ہو سکتی ہے۔ اسی تناظر میں جیسا کہ آپ جانتے ہیں، پاکستان نے اپنی صدارت کے دوران تین ترجیحات پر توجہ مرکوز کی ہے، اول تنازعات کا پرامن حل اقوام متحدہ کے چارٹر کا بنیادی اصول ہے لیکن اسے اکثر نظر انداز کر دیا جاتا ہے، اعلیٰ سطحی کھلے مباحثے اور سلامتی کونسل کی متفقہ قرارداد 2788 میں اس ترجیح کی عکاسی کی گئی ہے۔ دوم کثیرالجہتی، ہم کثیرالجہتی کو نعرے کے بجائے ایک ضرورت سمجھتے ہیں، سلامتی کونسل کو صرف ردعمل کا ایوان نہیں بلکہ روک تھام، مسائل کے حل اور اصولی قیادت کا فورم ہونا چاہیے۔ سوم اقوام متحدہ اور علاقائی تنظیموں کے درمیان تعاون، بالخصوص اسلامی تعاون کی تنظیم (او آئی سی)جو 57 رکن ممالک کے ساتھ عالمی امن کی تعمیر میں ایک اہم شراکت دار ہے، ہم 24 جولائی کو او آئی سی کے ساتھ ہونے والے اجلاس میں اس تعاون کو مزید بڑھانے کے منتظر ہیں۔ محمد اسحاق ڈار نے کہا کہ پاکستان اقوام متحدہ اور دنیا بھر میں امن اور ترقی کے مشترکہ مقاصد کو آگے بڑھانے کے لیے رکن ممالک، دوستوں اور شراکت داروں کے ساتھ فعال طور پر مصروف عمل ہے، یہ مشغولیت اور عہد صرف سلامتی کونسل تک محدود نہیں بلکہ پورے اقوام متحدہ کے نظام میں پھیلا ہوا ہے۔ انہوں نے کہا کہ پاکستان موسمیاتی تبدیلی اور ترقی کے عالمی مباحثے میں ایک اہم آواز ہے، چاہے وہ جنرل اسمبلی ہو، ای سی او ایس او سی ہو یا دیگر فورمز، ہم نے اقوام متحدہ کے تین ستونوں امن و سلامتی، ترقی اور انسانی حقوق کو مضبوط بنانے کی وکالت کی ہے اور عالمی ادارے کی اصلاحات کو سپورٹ کیا ہے تاکہ ہماری تنظیم کو زیادہ موثر، مضبوط اور عام اراکین کے مفادات کے لیے جوابدہ بنایا جا سکے۔ نائب وزیراعظم و وزیر خارجہ نے کہا کہ پاکستان نے 2026-28 کے لیے انسانی حقوق کونسل کے انتخابات میں اپنی امیدواری پیش کی ہے جو ایشیا پیسیفک گروپ کی طرف سے حمایت شدہ ہے، ہم آپ کی قیمتی حمایت کے لئے بھی پر امید ہیں۔ انہوں نے کہا کہ ہمارا انسانی حقوق کونسل کے ساتھ تعلق ٹی آر یو سی ای (رواداری، احترام، عالمگیریت، اتفاق رائے اور مشغولیت) کے تصور پر مبنی ہے۔ محمد اسحاق ڈار نے کہا کہ آخر میں میرا پیغام ہے کہ ایک ایسی دنیا میں جہاں تقسیم اور چیلنجز بڑھ رہے ہیں، ہمیں تصادم کے بجائے تعاون اور طاقت کے بجائے سفارت کاری کو ترجیح دینی چاہیے، پاکستان ان مشترکہ اہداف کو آگے بڑھانے کے لیے آپ سب کے ساتھ مل کر کام کرنے کے لیے تیار ہے۔
آزاد کشمیر الیکشن، ن لیگ نے مشاورتی کمیٹی قائم کر دی