پاکستان میں دہشت گردی کی نئی لہر
اشاعت کی تاریخ: 29th, March 2025 GMT
پاکستان میں دہشت گردی کے واقعات میں حالیہ ہفتوں میں خطرناک اضافہ دیکھا گیا ہے۔ خیبر پختونخوا اور بلوچستان میں دہشت گردی کی نئی لہر نے شدت پسندوں کے حملوں نے سیکورٹی صورتحال کو انتہائی نازک بنا دیا ہے۔ جعفر ایکسپریس پر حملہ، پشاور میں بم دھماکے، اور بلوچستان میں سرکاری اداروں پر فائرنگ جیسے واقعات نے حکومت اور عوامی حلقوں میں تشویش بڑھا دی ہے۔ اس بحران کے پیشِ نظر، اسلام آباد میں پارلیمانی کمیٹی کا ایک ہنگامی اجلاس بلایا گیا، جس میں آرمی چیف جنرل عاصم منیر، وفاقی وزرا، انٹیلی جنس ایجنسیوں کے سربراہان، اور سیاسی قائدین نے شرکت کی۔ اجلاس کے بعد جاری کردہ اعلامیہ میں ریاست کی پوری قوت کے ساتھ دہشتگردی کے خاتمے کا عزم ظاہر کیا گیا۔
پاکستان میں ماضی میں کیے گئے فوجی آپریشنز جیسے کہ سوات اور وزیرستان آپریشن کے ذریعے دہشت گرد گروہوں کو ختم کرنے میں بڑی کامیابی حاصل ہوئی تھی۔ خاص طور پر سوات آپریشن میں عوام کی بڑی حمایت حاصل تھی، جس کے نتیجے میں چھ ہفتوں میں شدت پسندوں کا خاتمہ ممکن ہوا۔ موجودہ حالات ایسے دکھائی دے رہے ہیں کہ ایک اور فوجی آپریشن کی ضرورت پیش آ سکتی ہے، کیونکہ ماضی کے تجربات سے ثابت ہوتا ہے کہ طاقت کے استعمال کے بغیر دہشت گردی کا مکمل خاتمہ مشکل ہے۔ تاہم، فوجی آپریشن کے ساتھ ساتھ عوامی حمایت اور سول اداروں کی شمولیت بھی ناگزیر ہے تاکہ دہشت گردی کے خاتمے کے بعد دیرپا امن قائم کیا جا سکے۔
اجلاس میں 2014 ء کا نیشنل ایکشن پلان دوبارہ فعال کرنے پر زور دیا گیا، جس کے تحت دہشت گردی کے خلاف ریاستی اداروں کو یکجا کیا گیا تھا اور دہشت گردوں کے خلاف سخت کارروائی کے عزم کا اعادہ کیا گیا۔
٭کمیٹی نے سٹریٹجک اور متفقہ سیاسی عزم کی ضرورت پر زور دیا جس میں تمام سیاسی جماعتیں شامل ہوں۔
٭اس موقع پر آرمی چیف جنرل عاصم منیر، اعلیٰ حکومتی وزرا، پارلیمانی کمیٹی کے اراکین اور انٹیلی جنس ایجنسیوں کے نمائندگان نے دہشت گردی کے بڑھتے ہوئے خطرات پر تبادلہ خیال کیا۔
٭سوات میں 2009 ء کے فوجی آپریشن کی مثال دیتے ہوئے کہا گیا کہ 22لاکھ افراد کی منتقلی کے بعد 6ہفتوں میں مالاکنڈکے 8اضلاع کی بازیابی ممکن ہوئی تھی۔
٭موجودہ صورتحال میں ہارڈ سٹیٹ کی اصطلاح استعمال کی گئی ہے جس کا مطلب ہے کہ اب طاقت کے ذریعے مسائل کے حل کوترجیح دی جائے گی۔
٭حکومت کو سیکورٹی پالیسیز میں سوشل میڈیا مانیٹرنگ کے جدید ٹولز شامل کرنے کی ہدایت کی گئی۔
٭کمیٹی نے حزبِ اختلاف کے بعض اراکین کی عدم شرکت پر افسوس کا اظہار کیا، جس سے سیاسی وحدت کا فقدان ظاہر ہوتا ہے۔
٭اجلاس میں اس بات پر اتفاق کیا گیا کہ ریاست کو پوری قوت کے ساتھ دہشت گرد عناصر کا خاتمہ کرنا ہوگا اور اس کے لیے جامع حکمت عملی ترتیب دی جائے گی۔
٭دہشت گرد گروہوں کی جانب سے سوشل میڈیا کو ریڈارکلائزیشن اور فنڈنگ کے لیے استعمال کرنے اور دیگر ریاست کے خلاف پروپیگنڈہ میڈیا کے غلط استعمال پر تشویش کا اظہار کیا گیا۔
٭کمیٹی نے دہشتگرد گروہوں کی جانب سے سوشل میڈیا پلیٹ فارمز کے غلط استعمال پر شدید تشویش کا اظہار کیا۔ دہشت گرد تنظیمیں نوجوانوں کو ورغلانے اور اپنی پراپیگنڈا مہم کے لیے سوشل میڈیا کا استعمال کر رہی ہیں، جس کی روک تھام کے لیے فوری اقدامات ناگزیر ہیں۔ اجلاس میں اس بات پر زور دیا گیا کہ انٹیلی جنس ایجنسیاں اور قانون نافذ کرنے والے ادارے مل کر سوشل میڈیا پر نظر رکھیں اور شدت پسندی پھیلانے والے عناصر کے خلاف کارروائی کریں۔
٭اجلاس میں حزبِ اختلاف کی عدم ِ شرکت اور ایک بلوچ سیاسی جماعت کی قیادت پر تنقید کرتے ہوئے تسلیم کیا گیا کہ ایک بھائی بی ایل اے کا سربراہ بن کر ریاست کے خلاف دشمنوں کا آلہ کار بن کر دہشت گردی کر رہا ہے اور دوسرا بھائی سیاسی جماعت کا لیڈر بن کر اسمبلی میں ریاست پر تنقید کر رہا ہے۔ مثال کے طور پر، بلوچستان میں سیاسی جماعتیں ایک دوسرے کے خلاف بیان بازی میں مصروف ہیں۔ جبکہ حزبِ اختلاف کسی ایک ایجنڈے پر خود کو قائم رکھنے میں ناکام رہی ہے۔ اس مشکل ترین اور قومی سلامتی کے موقع پر بھی وہ اپنے سیاسی مفادات کے حصول کیلئے کبھی جیل سے اپنے رہنما کی پیرول پر رہائی کی شرط عائد کرتی ہے اور کبھی پختونخواہ صوبہ جہاں اس کی حکومت ہے، وہاں کے وزیراعلیٰ کی قومی سلامتی کے اجلاس میں عدم شرکت اور عدم تعاون کی پالیسی اور بیانات سے ملکی سلامتی کو نقصان اور دنیا بھر کو اس نازک ترین موقع پر غلط پیغام مل رہا ہے۔
٭پارلیمانی کمیٹی کے اجلاس میں حزب اختلاف کے بعض اراکین کی عدم شرکت کو قومی مفاد کے خلاف قرار دیا گیا۔ قومی سلامتی جیسے اہم معاملے پر سیاسی اختلافات کو بالائے طاق رکھنا ضروری ہے تاکہ ملک دشمن عناصر کے خلاف متحدہ محاذ بنایا جا سکے۔ قومی سلامتی جیسے حساس معاملے پر سیاسی اتفاق رائے کی ضرورت ہے تاکہ ملک سے دہشت گردی کا مکمل طور پر خاتمہ کیا جا سکے۔ اجلاس میں اس بات پر زور دیا گیا کہ تمام سیاسی جماعتیں قومی سلامتی کے مسائل پر یکجا ہو کر فیصلہ سازی میں حصہ لیں۔
٭فوجی آپریشنز اور عسکری کردار کو عارضی حل قرار دیا گیا کیونکہ یہ دہشت گرد نیٹ ورکس کو کمزور تو کرتے ہیں لیکن مستقل بنیادوں پر خاتمہ نہیں کر پاتے۔
٭ماہرین کا کہنا ہے کہ دہشت گردی کے خلاف پولیس کا کردار مرکزی ہونا چاہیے، کیونکہ ان کا عوام سے براہِ راست رابطہ ہوتا ہے۔فی الحال پولیس ابھی تک ناکام نہیں ہوئی، اس کو بہترین فیصلہ سازوں کی ضرورت ہے جس کے بعد وہ آپریشن کیلئے مفید اور موثر ثابت ہو سکتے ہیں۔
٭بلوچستان کا مسئلہ اس وقت تک حل نہیں ہو سکتا جب تک بلوچوں کا ریاست پر اعتماد بحال نہیں کیا جاتا کمیٹی میں کمیٹی میں یہ تسلیم کیا گیا کہ اعتماد بحال کرنے والے اقدامات (جیسے سیاسی مذاکرات، معاشی ترقی)کی ضرورت ہے۔
٭کمیٹی نے بیانیے کی ناکامی کو تسلیم کیا ہے کہ ہمارا بیانیہ راولپنڈی اور اسلام آباد تک محدود ہے۔ بلوچ نوجوانوں اور عام شہریوں تک ریاست کا پیغام نہیں پہنچتا۔(جاری ہے)
ذریعہ: Daily Ausaf
کلیدی لفظ: دہشت گردی کے فوجی آپریشن قومی سلامتی سوشل میڈیا پر زور دیا اجلاس میں کمیٹی نے کی ضرورت کیا گیا دیا گیا کے خلاف گیا کہ
پڑھیں:
علاقائی سیاست اور باہمی تعلقات
پاکستان نے اگر آگے بڑھنا ہے تو اس کی ایک بڑی کنجی داخلی سیاست ،معیشت اور سیکیورٹی استحکام کے ساتھ ساتھ علاقائی ممالک سے بہتر تعلقات ضروری ہیں۔ عالمی سیاست کی اہمیت اپنی جگہ مگر پہلی ترجیح علاقائی سیاست میں اپنی اہمیت منوانا ہے۔ سفارت کاری کے محاذ پر جب پاکستان اپنا مقدمہ علاقائی یا عالمی سیاست میں لڑتا ہے تو اس کی کامیابی کا بڑا انحصار بھی اس کی داخلی سیاست کے استحکام سے جڑا ہوتا ہے کیونکہ اگر ہم داخلی محاذ پر کمزور ہوں تو پھر سفارت کاری کے محاذ پر مشکلات پیش آتی ہیں۔دیگر ممالک ہماری داخلی کمزوریوں کو بنیاد بنا کر ہمارے خلاف اپنا مقدمہ مضبوط بناتے ہیں۔
علاقائی سیاست کے جو بھی تنازعات ہیں ان کا حل دو طرفہ بات چیت ہی سے ممکن ہے۔جنگ یا تنازعات کو ابھارنا یا خود کو اس میں الجھائے رکھنا مسائل کا حل نہیں بلکہ یہ حکمت عملی ہمیں اور زیادہ مسائل میں الجھا دیتی ہے ۔لیکن مسئلہ یہ ہے کہ ہماری علاقائی سیاست کے تنازعات اور تضادات اتنے گہرے ہیں کہ ہم مشترکہ طور پر اعتماد سازی کے فقدان کا شکار ہیں اور کسی بھی طور پر ایک دوسرے پر بھروسہ کرنے کے لیے تیار نہیں ہوتے۔یہ ہی وجہ ہے کہ علاقائی سطح پر جو بھی سیاسی ،سماجی ،معاشی ، سیکیورٹی کے فورمز موجود ہیں وہ عدم فعالیت کا شکار ہیں ۔
مثال کے طور پر سارک فورم ہی کو دیکھ لیں جو نہ فعال ہے اور نہ ہی علاقائی ممالک کے درمیا ن جو بھی تنازعات ہیں ان کو ختم کرنے میں کوئی بڑ ا کردار ادا کرسکا ہے۔یہ ہی وجہ ہے کہ اہل سیاست یا پڑھے لکھے سنجیدہ افراد بھی اب ان فورم کی کارکردگی اور صلاحیت سے نالاں یا مایوس نظر آتے ہیں۔ علاقائی سیاست میں دہشت گردی یا انتہا پسندی ایک بڑا خطرہ ہے ۔
عمومی طور پر علاقائی ممالک کا مجموعی رویہ یہ ہے کہ وہ دہشت گردی کی اپنی ناکام حکمت عملیوں پر خود کو ذمے دار سمجھنے کے لیے تیار نہیں۔ زیادہ تر حکمت عملی میں اپنی ناکامیوں کو چھپا کر علاقائی ممالک ایک دوسرے پر الزامات کی سیاست کررہے ہیں۔ ایک رویہ یہ بھی ہے کہ ہم دہشت گردی کے بارے میں تو زیادہ حساس نظر آتے ہیں مگر دہشت گردی کے خاتمہ میں اپنی توجہ سیکیورٹی امور تک محدود کرکے معاملات کو دیکھتے ہیں ۔حالانکہ دہشت گردی کے خاتمہ میں سیاسی، سماجی اور معاشی فورمز کی بڑی اہمیت ہوتی ہے ۔
یہ ہی وجہ ہے کہ علاقائی ممالک کی ترقی میں ان فورمز کی فعالیت ،دو طرفہ تعلقات اور باہمی عوامی رابطوں کو فوقیت دی جاتی ہے۔لیکن علاقائی ممالک اس میں ناکام ہیں اور وہ تنہا ہی معاملات کو حل کرنا چاہتے ہیں یا اپنی بالادستی دوسروں پر مسلط کرنا چاہتے ہیں۔ علاقائی سطح پر سارک فورم سمیت جو بھی دیگر فورمز ہیں ان کی عدم فعالیت میں بھارت کی حکمت عملی کا بھی بڑا دخل ہے ۔کیونکہ بھارت علاقائی سیاست میں ایک بڑا ملک ہے مگر وہ اس میں مثبت اور فعال کردار ادا کرنے کے لیے تیار نہیں اور اسی وجہ سے یہ فورمز وہ کچھ نہیں کر پارہے جو ان کی ذمے داری یا دائرہ کار میں آتے ہیں۔
مثال کے طور پر بھارت براہ راست پاکستان کی ریاست کو دہشت گردی کا ذمے دار قرار دیتا ہے۔ پاکستان جیسی ریاست جو خود دہشت گردی کا شکار ہواور جس نے دہشت گردی کے خلاف نہ صرف بڑی جنگ لڑی ہے بلکہ بڑی قربانیاں بھی دی ہیں۔اس لیے یہ الزام کہ پاکستان دہشت گردی کی سرپرستی کرتا ہے کوئی اہمیت نہیں رکھتا اور اس سے دونوں ملکوں سمیت علاقائی استحکام بھی ممکن نہیں ہوگا۔
علاقائی سطح پر دہشت گردی ایک بڑا مسئلہ ہے اور اس کا حل جہاں دو طرفہ تعلقات ، بات چیت ہے وہیں دہشت گردی کے خلاف ایک مشترکہ حکمت عملی اور میکنزم پر اتفاق رائے اور اس پر عمل درآمد پر ہر ملک کا اپنا اپنا اور پھر ایک اجتماعی کردار بھی ہے۔محض ایک دوسرے پر الزام تراشیوں سے مسائل کا حل ممکن نہیں بلکہ یہ حکمت عملی ایک دوسرے کے ساتھ آگے بڑھنے کے امکانات کو محدود کرکے بداعتمادی کے ماحول میں اور زیادہ شدت پیدا کرتی ہے۔ اسی طرح ہمیں یہ سمجھنا ہوگا کہ دہشت گردی کو ختم کرنے میں کوئی ایک ملک تن تنہا کچھ نہیں کرسکے گا۔ جب تک تمام ممالک اس مسئلہ پر مشترکہ حکمت عملی اور کردار ادا نہیں کریں گے کچھ بھی ممکن نہیں ہوگا۔
حال ہی میں چین میں ہونے والی شنگھائی تعاون تنظیم کے وزرائے خارجہ کے اجلاس میں یہ تجویز سامنے آئی ہے کہ ہمیں ’’ شنگھائی ریجنل سیکیورٹی فورم‘‘ کی تشکیل نو کرنا ہوگی جو خطے میں سیکیورٹی سے جڑے معاملات میں ایک دوسرے سے تعاون کے امکانات کو بڑھائے۔اس فورم کا مقصد ممبر ممالک چین، بھارت، روس،پاکستان ،ایران اور وسطی ایشائی ریاستوں کے انٹیلی جنس اور دفاعی حکام کو مشترکہ حکمت عملی کو اختیار کرنے میں ایک پلیٹ فارم پر لانا ہے تاکہ وہ معلومات کا تبادلہ اور عملی اقدامات کی طرف بڑھ سکیں۔ایران کی طرف سے اس طرز کے فورم کی تشکیل اہم بات بھی ہے اور اسے ایک بڑی پیش رفت کہا جاسکتا ہے۔
شنگھائی فورم پر اس مشترکہ سیکیورٹی فورم کی اہمیت اس لیے بھی زیادہ ہے کہ اس میں چین ،بھارت اور روس سمیت پاکستان شامل ہے ۔چین اور روس ایک بڑا کردار ادا کرسکتے ہیں اور پاک بھارت تعلقات میں بہتری پیدا کرنے سمیت علاقائی تجارت اور دیگر شعبوں میں تعاون کو بڑھانے میں مدد دے سکتے ہیں۔ پاکستان نے ہمیشہ دہشت گردی کے خاتمے میں مشترکہ حکمت عملی پر زور دیا ہے اور اب اگر دیگر ممالک بھی اسی نقطہ پر زور دے رہے ہیں تو پاکستان کے موقف کی پزیرائی بھی ہے۔اسی طرح افغانستان کے امن اور داخلی بحران کا حل خطہ کے استحکام کے لیے ضروری ہے۔
علی گنڈاپور صادق و امین نہیں رہے، وزیراعلیٰ پختونخوا کیخلاف مقدمے کی درخواست