کراچی، رینجرز اور پولیس کی مشترکہ کارروائی، دو انتہائی مطلوب ملزمان گرفتار
اشاعت کی تاریخ: 23rd, June 2025 GMT
کراچی:
پاکستان رینجرز (سندھ) اور پولیس نے انٹیلی جنس معلومات کی بنیاد پر مشترکہ کارروائی کرتے ہوئے کراچی کے علاقے سعود آباد اور ایئر پورٹ کے قریب سے دو انتہائی مطلوب ملزمان، محمد شہاب خان عرف "کارا" اور منصور عالم عرف "چرکٹ" کو گرفتار کرلیا۔
گرفتار ملزمان کا تعلق ایم کیو ایم (لندن) سے ہے اور وہ متعدد سنگین جرائم میں ملوث ہیں۔
پاکستان رینجرز (سندھ) اور پولیس کی کارروائی کے دوران ملزمان کے قبضے سے ایک آٹو رکشہ، دو موبائل فونز اور نقدی برآمد کی گئی۔
ملزمان کا سابقہ ریکارڈ عادی جرائم پیشہ ہونے کی نشاندہی کرتا ہے، اور وہ ماضی میں پولیس اور سیکورٹی فورسز کے ہاتھوں کئی مرتبہ گرفتار ہوچکے ہیں۔
ابتدائی تفتیش میں ملزم منصور عالم نے اعتراف کیا کہ وہ سال 2011 میں سیاسی جماعت میں شامل ہوا تھا اور پارٹی کی سرگرمیوں میں مشغول رہا، جن میں وال چاکنگ، بینرز لگانا اور چندہ جمع کرنا شامل تھے۔
کراچی آپریشن کے دوران گرفتاری سے بچنے کے لیے اس نے رکشہ چلانا شروع کیا اور اس کا استعمال گٹکا، ماوا اور منشیات کی ترسیل کے لیے کرتا رہا۔
دوسری جانب، ملزم محمد شہاب خان نے بتایا کہ وہ ایک نجی فیکٹری میں کنٹرول انچارج کے طور پر کام کرتا تھا اور پارٹ ٹائم اسٹریٹ کرائم کی وارداتوں میں ملوث تھا۔ ملزم نے اعتراف کیا کہ وہ متعدد بار گرفتار ہوکر جیل جا چکا ہے۔
گرفتار ملزمان نے کراچی کے مختلف علاقوں جیسے ملیر، شاہ فیصل کالونی، لانڈھی اور کورنگی میں متعدد اسٹریٹ کرائم کی وارداتیں کیں۔ ان کے خلاف تین نجی دودھ کی دکانوں پر ڈکیتی کی وارداتوں میں بھی ملوث ہونے کا انکشاف ہوا ہے۔
ملزمان نے اسٹریٹ کرائم اور ڈکیتی کی وارداتوں میں 4 لاکھ روپے اور 40 سے 50 موبائل فونز اسلحے کے زور پر لوٹنے کا اعتراف کیا ہے۔
گرفتار ملزمان محمد شہاب خان اور منصور عالم کو مسروقہ سامان سمیت مزید قانونی کارروائی کے لیے پولیس کے حوالے کر دیا گیا ہے۔
پاکستان رینجرز نے عوام سے اپیل کی ہے کہ اگر انہیں اس طرح کے جرائم پیشہ عناصر کے بارے میں کوئی اطلاع ہو تو وہ فوری طور پر قریبی رینجرز چیک پوسٹ، رینجرز ہیلپ لائن 1101 یا رینجرز مددگار واٹس ایپ نمبر 03479001111 پر کال یا ایس ایم ایس کے ذریعے اطلاع دیں۔ عوام کا نام صیغہ راز میں رکھا جائے گا۔
.ذریعہ: Express News
پڑھیں:
راولپنڈی، فیک نیوز پھیلانے کے الزام میں 3 افراد گرفتار
راولپنڈی:نیشنل سائبر کرائم انوسٹی گیشن ایجنسی(این سی سی آئی اے) نے کارروائی کرتے ہوئے فیک نیوز پھیلانے والے 3 افراد کو گرفتار کرلیا۔
این سی سی آئی اے کے مطابق جھوٹی خبروں کے ذریعے خوف و ہراس پھیلانے پر ملزمان کے خلاف مقدمہ درج کرلیا گیا ہے۔
بیان میں کہا گیا کہ ایف آئی آر نمبر 186/2025 پریوینشن آف الیکٹرانک کرائمز ایکٹ 2016 کے تحت درج مقدمے میں ملزمان پر آن لائن پروپیگنڈا اور غلط معلومات پھیلانے کا الزام عائد کیا گیا ہے۔
مزید بتایا گیا کہ مذکورہ کارروائی این سی سی آئی اے سائبر کرائم رپورٹنگ سینٹر راولپنڈی نے کی، جس کے تفتیشی افسر انسپکٹر محمد توصیف ہیں۔
این سی سی آئی اے نے بتایا کہ ملزمان سے موبائل فون قبضے میں لے لیے گئے اور سیزر میمو کے تحت گرفتار ملزمان کی شناخت محمد سفیان، راجب علی اور عالیان آصف کے طور پر ہوئی۔
این سی سی آئی اے نے کہا کہ سوشل میڈیا پر خوف، افواہ اور انتشار ے پھیلانے والوں کے خلاف سخت کارروائی کی جائے گی۔
امریکی سینیٹ نے مختلف ممالک پر لگایا گیا ٹرمپ ٹیرف مسترد کردیا