پاکستان: اربعین کے زائرین کے لیے زمینی سفر پر پابندی
اشاعت کی تاریخ: 28th, July 2025 GMT
اسلام آباد (اُردو پوائنٹ ۔ DW اردو۔ 28 جولائی 2025ء) پاکستان کے وزیر داخلہ محسن نقوی نے اتوار کے روز اس بات کی تصدیق کی کہ وفاقی حکومت نے شورش زدہ صوبہ بلوچستان میں سکیورٹی کے خدشات کا حوالہ دیتے ہوئے اربعین کے لیے عراق اور ایران جانے والے زائرین کے زمینی سفر پر پابندی عائد کر دی ہے۔
واضح رہے کہ زائرین چہلم کی تقریب میں شرکت کے لیے عراق جاتے ہیں، جسے 'اربعین‘ کہا جاتا ہے۔
چہلم پیغمبر اسلام کے نواسے امام حسین کی شہادت کے سوگ کے 40ویں دن کے موقع پر ہر سال منایا جاتا ہے اور بہت سے پاکستانی اس مذہبی جلوس میں شرکت کے لیے عراق کا سفر کرتے ہیں۔ حکومت نے پابندی سے متعلق کیا کہا؟پاکستان کے وزیر داخلہ محسن نقوی نے حکومت کے اس فیصلے کا اعلان سوشل میڈیا ایکس پر کیا اور کہا کہ یہ ایک مشکل فیصلہ تھا، تاہم سکیورٹی وجوہات کے سبب ایسا کرنا پڑا۔
(جاری ہے)
انہوں نے اپنی ایک پوسٹ میں لکھا: "وزارت خارجہ، (بلوچستان کی حکومت) اور سکیورٹی ایجنسیوں کے ساتھ وسیع تر مشاورت کے بعد، یہ فیصلہ کیا گیا ہے کہ زائرین کو اس سال اربعین کے لیے سڑک کے ذریعے عراق اور ایران جانے کی اجازت نہیں دی جائے گی۔"
انہوں نے مزید کہا کہ یہ "مشکل فیصلہ عوامی تحفظ اور قومی سلامتی کے مفاد میں کیا گیا"، تاہم چہلم کے لیے زائرین ہوائی جہاز سے سفر کر سکیں گے۔
نقوی نے زور دے کر کہا کہ وزیر اعظم شہباز شریف نے حکام کو ہدایت کی ہے کہ "آنے والے دنوں میں ان کی زیارت کی سہولت کے لیے زیادہ سے زیادہ پروازوں کا بندوبست کیا جائے۔"
ایسوسی ایٹڈ پریس آف پاکستان (اے پی پی) کی اطلاع کے مطابق نقوی نے اس فیصلے کا اعلان اتوار کی صبح وزیر اعظم شہباز شریف سے ملاقات کے بعد کیا۔ اطلاعات کے مطابق انہوں نے زائرین سے متعلق اس نئی پالیسی سے متعلق انہیں تفصیل سے آگاہ کیا۔
وزیر اعظم آفس سے جاری ایک پریس ریلیز کے حوالے سے کہا گیا ہے کہ شہباز شریف نے وزیر ہوا بازی خواجہ آصف کو زائرین کے لیے "خصوصی پروازوں" کا انتظام کرنے کی بھی ہدایت کی۔
وزیر اعظم شہباز شریف کی ہدایت پر زائرین کی سہولت کے لیے پروازوں کا بندوبست کرنے کے لیے پاکستان انٹرنیشنل ایئرلائنز (پی آئی اے) نے آٹھ سے 11 اگست کے درمیان کراچی سے چار خصوصی پروازوں کا اعلان کیا ہے، جبکہ نجف سے واپسی کی پروازیں 18 سے 21 اگست تک شیڈول کی گئی ہیں۔
عازمین زائرین کی مشکلاتزمینی راستے کے سفر پر پابندی کا اعلان اربعین سے محض 15 دن قبل کیا گیا ہے، جس سے عازمین اس بات سے پریشان ہیں کہ ان کو مالی نقصان اٹھانا پڑ سکتا ہے اور اس سے یہ خدشہ بھی پیدا ہوا ہے کہ دسیوں ہزار کم آمدن والے عازمین سفر کے متحمل نہیں ہو سکتے۔
بعض ٹریول گروپوں کا کہنا ہے کہ بہت سے لوگ پہلے ہی ویزا، گاڑیوں کے سرٹیفیکیشن اور ہوٹل کی بکنگ کے لیے پیشگی ادائیگیاں کر چکے تھے۔
عراق میں کربلا کے علاقے میں امام حسین اور ان کے بھائی عباس ایک دوسرے کے آمنے سامنے دو عظیم الشان مقبروں میں مدفون ہیں اور یہ شیعہ مسلمانوں کا مرکز ہے۔ گزشتہ برس اربعین کے موقع پر 21 ملین سے زیادہ عقیدت مندوں نے کربلا کا دورہ کیا تھا۔
ص ز/ ج ا (نیوز ایجنسیاں)
.ذریعہ: UrduPoint
کلیدی لفظ: تلاش کیجئے شہباز شریف اربعین کے کا اعلان نقوی نے کے لیے
پڑھیں:
ٹی ایل پی پر پابندی اچھی بات ہے، کسی دہشتگرد تنظیم سے بات نہیں کرنی چاہیے: اسپیکر پنجاب اسمبلی
اسپیکر پنجاب اسمبلی ملک محمد احمد خان نے تحریک لبیک پاکستان پر پابندی کو احسن اقدام قرار دیتے ہوئے کہا کہ کسی بھی دہشتگرد تنظیم سے بات نہیں کرنی چاہیے۔میڈیا سے گفتگو کرتے ہوئے ملک محمد احمد خان کا کہنا تھا کچھ معاملات ایسے ہیں جس پر متفق ہونا پڑے گا، صوبوں میں بیٹھے لوگ وفاق سے نہ بات کریں تو بنیادیں ہل جاتی ہیں، اسمبلی کو احتجاج کا گڑھ بنا دیا گیا، عوام کے پیسے کو ضائع کیا جا رہا ہے۔انہوں نے کہا کہ جنگوں یا قتل کے بعد بھی بات چیت سے ہی مسئلہ حل کیا جاتا ہے، وزیر اعظم نے بات چیت کے دروازے کو کھولا ہے۔اسپیکر پنجاب اسمبلی کا کہنا تھا بھارتی دہشتگردی کے ثبوت دنیا کے سامنے رکھے ہیں، پاکستان نے اپنی سفارتی و جنگی برتری دونوں ثابت کیں، پاکستانی انٹیلی جنس کی برتری کو بھی دنیا نے تسلیم کر لیا۔ان کا کہنا تھا کہ بھارت پاکستان میں دہشتگردی میں ملوث ہے، بھارت بلوچستان میں پیسے دیکر لوگوں کو خرید کر پاکستان میں دہشتگردی کرواتا ہے، پاکستان میں پراکسی کا لبادہ اوڑھ کر بھارتی سرمایہ کاری ہوتی ہے، بھارتی جاسوس کلبھوشن اور جہلم کے اسٹیشن سے بھارتی جاسوس پکڑے۔ملک محمد احمد خان کا کہنا تھا پہلگام واقعے کا بہانہ بنا کر بھارت نے پاکستان پر حملہ کیا، پہلگام واقعے کو 5 ماہ ہو گئے، 150 دنوں میں ثبوت نہ دیا تو الزام کی کیا حیثیت رہ جاتی ہے، بھارتی سوچ اور مودی نے جنگی فضا قائم کر رکھی ہے، جنگ، خون یا بارود کی بو کس کو پسند ہے، ہمیں مل کر خطے کوپرامن بنانا ہے۔انہوں نے کہا کہ اگر کوئی خطے میں اپنی بدمعاشی ثابت کرے گا تو پھر پاکستان بھر پور جواب دے گا، بھارتی مذموم مقاصد کا بھر پور مقابلہ کریں گے، افغانستان میں پہلے بھی جنگی معاملات رہے اس پر اثر پاکستان پر رہا، امید کرتا ہوں پاک افغان مذاکرات نتیجہ خیز ہوں گے۔ملک محمد احمد خان نے کہا کہ پراکسی وار کے نتائج اچھے نہیں ہوتے، بھارت کو بھی نتائج اچھے نہیں ملیں گے، ہمیں امن کی بات نہیں کرنی بلکہ آگے بڑھ کر قدم بڑھانا ہے۔ایک سوال کے جواب میں اسپیکر پنجاب اسمبلی کا کہنا تھا ٹی ایل پی پر پابندی اچھی بات ہے، کسی بھی دہشتگرد تنظیم سے بات نہیں کرنی چاہیے بلکہ اسے بزور بازو روکنا ہوگا، بات تو ان سے ہوتی ہے جو بات چیت کو سمجھتے اور یقین رکھتے ہیں، ریاست کو اپنی رٹ نافذ کرنی چاہیے۔
کسی سزا یافتہ شخص کی مشاورت پر حکومتی فیصلے کرنا آئینی طور پر درست نہیں; طلال چوہدری