جنگ بندی ہماری ضرورت یا مجبوری نہیں؟
اشاعت کی تاریخ: 23rd, February 2025 GMT
15 ماہ تک امریکا، برطانیہ اور دیگر صلیبیوں کے ڈالر اور اسلحہ سے لیس ہو کر دجالی ریاست (اسرائیل) اہل غزہ پر حملہ آور رہی۔ اِس دوران عالمی ضمیر سوتا اور جاگتا رہا، اقوام متحدہ، عرب لیگ اور او آئی سی سمیت تمام عالمی ادارے اسرائیلی جارحیت اور دہشت گردی کو روکنے میں ناکام رہے۔ اسکول، اسپتال، رفاعی اور امدادی اداروں سمیت خوراک اور پانی کے تمام ذرائع اور ذخائر تباہ کردیے گئے۔ اِنسانی ہمدردی کی بنیاد پر کوئی بھی امداد کسی متاثر تک پہنچنے نہیں دی گئی۔ یہاں تک کہ کھانے کے انتظار میں کھڑے بھوک اور پیاس سے نڈھال بچوں پر بھی بمباری کردی گئی۔ اسپتالوں کے اندر سے عملہ نکال کر زخمیوں اور مریضوں کے دروازے بند کردیے گئے تا کہ وہ تڑپ تڑپ کر مرجائیں۔ مسلم خواتین ڈاکٹرز کو اسپتالوں کے اندر یہودی فوجیوں نے گینگ ریپ کا نشانہ بنایا اور بعدازاں اِن مظلوم خواتین کو قتل کرکے اسپتالوں کے اندر ہی اجتماعی قبروں میں دفنا دیا گیا۔ مسلم قیدی خواتین کی اسرائیلی جیلوں کے اندر برہنہ پریڈ کرائی گئی، 50 ہزار سے زائد فلسطینی مسلمان مرد، خواتین اور بچے موت کے گھاٹ اُتار دیے گئے۔ معذور، زخمی اور دربار ہوجانے والوں کی تعداد بھی لاتعداد ہے۔ مساجد سمیت پورا غزہ ملبے کا ڈھیر بن گیا۔
غرضیکہ آج کی دنیا جسے مہذب اور ترقی یافتہ ہونے کا دعویٰ ہے اِن تمام تر مظالم اور درندگی کو اپنی کھلی آنکھوں سے دیکھتی اور تماشائی بنی رہی۔ مذمت کے بیانات مظلومین کے زخموں پر نمک چھڑکنے کے مترادف رہے، مسلم حکمرانوں سمیت مظلوم فلسطینی مسلمانوں کی کسی نے بھی کوئی ’’فوجی مدد‘‘ نہیں کی۔ مزید برآں یہ بات بھی یاد رہنی چاہیے کہ اسرائیلی دہشت گردی اور جارحیت محض اہل غزہ اور بیت المقدس کے قریب ترین علاقوں تک محدود نہیں رہی بلکہ اس دوران اسرائیل نے ایران، لبنان، شام، عراق اور یمن تک کے علاقوں اور شہریوں کو نشانہ بنایا۔ اسماعیل ہنیہ، یحییٰ سنوار اور حسن نصر اللہ سمیت درجنوں مجاہدین رہنمائوں کو بھی انتہائی بے دردی کے ساتھ شہید کردیا گیا۔ علاوہ ازیں یہ بات بھی ریکارڈ پر ہے کہ دجالی ریاست (اسرائیل) کی قیادت نے اپنے 77 سالہ ناجائز قبضے پر کسی قسم کی شرمندگی کا اظہار کرنے کے بجائے ’’گریٹر اسرائیل‘‘ کا نقشہ بھی جاری کردیا کہ جس میں اسرائیل کی سرحدیں سعودی عرب کے صحرائوں سے ہوتی ہوئی دریائے فرات کے کناروں تک جارہی ہیں۔
یہود و نصاریٰ نے انبیاؑ کی عظیم ہستیوں کے ساتھ کیا سلوک کیا، یہود و نصاریٰ نے مل کر اہل اسلام کو کس قدر تکلیف پہنچائی، یہود و نصاریٰ خدا کی زمین پر کتنا بڑا فساد اور فتنہ ہیں یہ کوئی آج کی بات نہیں بلکہ صدیوں پہلے قرآن پاک نے اِس کی تصدیق اور وضاحت فرمادی ہے۔ یہود و نصاریٰ کے گٹھ جوڑ سے کبھی بھی عالمی امن کو کوئی فائدہ نہیں پہنچا بلکہ اب تو یہود و نصاریٰ کے ساتھ ایک تیسرا فتنہ ’’ہنود‘‘ کا بھی شامل ہوچکا ہے۔ یہی وجہ ہے کہ امریکی صدر ٹرمپ نے وائٹ ہائوس میں داخل ہونے کے بعد سب سے پہلے جن دو غیر ملکی رہنمائوں سے ملاقات کی اُن میں یہودی صدر نیتن یاہو اور ہندو انتہا پسند وزیراعظم نریندر مودی بالترتیب شامل تھے۔ ٹرمپ، نیتن یاہو اور مودی کی ملاقاتوں سے ثابت ہوگیا کہ جب تک طاقت کا توازن اِن تینوں شیطانی قوتوں کے پاس رہے گا تب تک مقبوضہ کشمیر سے مقبوضہ فلسطین تک ’’رقص ِ ابلیس‘‘ جاری رہے گا۔ دنیا انصاف سے خالی اور امن سے محروم رہے گی۔
قدیم اور جدید انسانی تاریخ کا مطالعہ بتاتا ہے کہ بالآخر ظالم ہی مظلوم کے مقابلے میں ناک رگڑنے پر مجبور ہوا جبکہ مظلوم زخموں سے چور چور ہو کر بھی فاتح اور سرخرو ہو کر میدان جنگ سے باہر آیا۔ اب بھی ان شاء اللہ ایسا ہی ہوگا۔ ’’جنگ بندی‘‘ ہماری کوئی لازمی ضرورت یا مجبوری نہیں بلکہ ہمارے لیے ’’جہاد‘‘ مجبوری اور شہادت ضروری ہے۔ غلامی میں ہم زندہ نہیں رہ سکتے اس لیے ہم زندگی پر موت اور غلامی پر شہادت کو ترجیح دے رہے ہیں۔ نواسہ رسولؐ سیدنا امام حسینؓ نے کربلا میں ایک موقع پر فرمایا تھا کہ ’’جب موت نے آنا ہی ہے تو پھر سب سے بہتر شہادت کی موت ہے‘‘۔
اسرائیل شاید اس بات کو بھول رہا ہے کہ ’’جنگ بندی‘‘ ہماری خواہش نہیں بلکہ خود یہودی عوام کی اپنی ضرورت اور مجبوری تھی کیونکہ وہ اپنے پیاروں کو زندہ دیکھنا چاہتے تھے جبکہ ہم نے تو اپنے شہدا کی گنتی ہی چھوڑ دی ہے۔ جن کی نگاہ اللہ کی رضا پر ہو اور جن کا انعام جنت الفردوس ہو انہیں کیا ضرورت ہے کہ وہ وائٹ ہائوس میں بیٹھے دروغہ جہنم کے بیانات پر غور کریں۔ بہرحال یہود، ہنود اور نصاریٰ کی قیادت کو یہ بات بھی اچھی طرح سے سمجھ لینی چاہیے کہ ایسی کوئی ’’جنگ بندی‘‘ ہرگز ہرگز کبھی قابل قبول نہیں ہوگی کہ جس کے نتیجے میں مسلمان بیت المقدس سے دستبردار ہوجائیں، آزاد فلسطین ریاست کا مطالبہ واپس لے لیں۔ اللہ پاک تمام مظلومین و اہل ایمان کو فتح اور غلبہ عطا فرمائے۔ آمین یا رب العالمین
.ذریعہ: Jasarat News
کلیدی لفظ: یہود و نصاری کے اندر
پڑھیں:
ایچ پی وی ویکسین: پاکستانی معاشرے میں ضرورت
انسانی تاریخ میں کچھ بیماریاں ایسی بھی رہی ہیں جو نسلِ انسانی کے وجود پر سوالیہ نشان بن کر ابھریں۔ کینسر ان میں آج بھی سب سے بھیانک ہے۔ مگر سائنس نے انسان کو یہ پیغام دیا کہ اندھیروں میں بھی چراغ جلائے جاسکتے ہیں۔
انہی چراغوں میں سے ایک ہے ایچ پی وی ویکسین (Human Papillomavirus Vaccine)، جسے اردو میں ’’انسانی پیپلیلوما وائرس حفاظتی دوا‘‘ کہا جا سکتا ہے۔ یہ ویکسین بالخصوص خواتین کی زندگی اور صحت کی حفاظت کے لیے آج کی سائنسی دنیا میں بڑی عظیم کامیابی ہے۔
عالمی تحقیق اور ابتدا
ایچ پی وی ویکسین کی بنیاد 1990 کی دہائی میں رکھی گئی جب آسٹریلیا کے سائنس دان پروفیسر یان فریزر (Ian Frazer) اور ان کے ساتھی جیہان ژو (Jian Zhou) نے وائرس جیسے ذرات (Virus-like Particles) ایجاد کیے۔ یہ ذرات بیماری نہیں پھیلاتے لیکن جسم کو مدافعتی ردعمل کے لیے تیار کر دیتے ہیں۔ 2006 میں امریکا نے پہلی بار اسے Gardasil کے نام سے متعارف کرایا، بعد ازاں Cervarix اور Gardasil 9 جیسے مزید مؤثر ورژن سامنے آئے۔
عالمی ادارۂ صحت (WHO) اور امریکا کے سینٹرز فار ڈیزیز کنٹرول (CDC) کے مطابق یہ ویکسین خواتین میں سروائیکل کینسر (Cervical Cancer) کے تقریباً 70 فیصد سے 90 فیصد تک کیسز کو روکتی ہے۔ آسٹریلیا، برطانیہ اور ناروے جیسے ممالک میں یہ ویکسینیشن پروگرام اس حد تک کامیاب رہا کہ وہاں نوجوان نسل میں سروائیکل کینسر کی شرح نصف سے بھی کم ہوگئی۔
پاکستان میں ضرورت
پاکستان میں ہر سال تقریباً 5,000 خواتین سروائیکل کینسر کا شکار ہوتی ہیں، جبکہ اموات کی شرح 60 فیصد کے قریب ہے، کیونکہ عموماً مرض کی تشخیص دیر سے ہوتی ہے۔ یہ بیماری صرف عورت تک محدود نہیں رہتی، بلکہ خاندان کی بقا، بچوں کی تربیت اور سماج کی اخلاقی ساخت کو بھی متاثر کرتی ہے۔ ایسے میں ایچ پی وی ویکسین کا استعمال ناگزیر دکھائی دیتا ہے۔
مزید یہ کہ عالمی تحقیق ثابت کرچکی ہے کہ ایچ پی وی صرف خواتین کے لیے ہی نہیں بلکہ مردوں کے لیے بھی خطرہ ہے۔ یہ وائرس مردوں میں منہ، گلے اور تولیدی اعضا کے سرطان کا باعث بن سکتا ہے۔ امریکا اور یورپ میں ویکسین لگنے کے بعد مردوں میں بھی اس کے خلاف نمایاں تحفظ دیکھا گیا ہے۔
سماجی اور مذہبی رکاوٹیں
پاکستان میں اس ویکسین کے فروغ میں کئی رکاوٹیں درپیش ہیں۔
کچھ حلقے اسے مغربی سازش قرار دیتے ہیں اور مذہبی بنیاد پر مخالفت کرتے ہیں۔
والدین میں یہ خوف بھی پایا جاتا ہے کہ یہ ویکسین نوجوانوں میں جنسی آزادی کو فروغ دے گی۔
لاعلمی اور کم علمی کی وجہ سے اکثر اسے غیر ضروری یا غیر محفوظ سمجھا جاتا ہے۔
اسلامی ممالک اور علما کا موقف
کچھ اسلامی ممالک نے نہ صرف ایچ پی وی ویکسینیشن پروگرام فعال کیے ہیں بلکہ علما نے بھی اسے شرعی اعتبار سے جائز قرار دیا ہے۔ مثال کے طور پر ملیشیا میں 2010 میں Jabatan Kemajuan Islam Malaysia (JAKIM) نے باضابطہ فتوٰی جاری کیا کہ اگر ویکسین کی ترکیب میں کوئی مشکوک جزو نہ ہو اور یہ نقصان دہ نہ ہو تو رحمِ مادر کے سرطان سے بچاؤ کےلیے HPV ویکسین لگوانا ’’مباح‘‘ (permissible) ہے۔
اسی طرح متحدہ عرب امارات (UAE) نے 2018 میں HPV ویکسین کو اپنے قومی حفاظتی پروگرام میں شامل کیا، اور وہاں کے نیشنل امیونائزیشن ٹیکنیکل ایڈوائزری گروپ نے حکومتی سطح پر اس کی تائید کی۔
مزید یہ کہ سعودی عرب کے صوبے جازان میں عوامی رویے اور تحقیق سے واضح ہوا کہ مذہبی خدشات کے باوجود طبی اور شرعی دلائل نے ویکسین کے استعمال کو قابلِ قبول بنایا ہے۔
یہ مثالیں اس بات کا ثبوت ہیں کہ انسانی جان کے تحفظ کو اسلام میں اولین ترجیح حاصل ہے، اور جب کوئی دوا جان بچانے کا ذریعہ ہو تو اس کا استعمال نہ صرف جائز بلکہ واجب کے قریب قرار دیا جا سکتا ہے۔
ایچ پی وی ویکسین آج پاکستانی معاشرے کے لیے محض ایک طبی ایجاد اور ضرورت ہی نہیں بلکہ خواتین کی زندگی، اور معاشرتی بقا کی بھی ضامن ہے۔ اگر حکومت اسے قومی حفاظتی ٹیکوں کے دیگر ذرائع کی طرح مستقل پروگراموں میں شامل کر لے تو ہر سال ہزاروں زندگیاں بچائی جا سکتی ہیں۔ اس کے لیے ضروری ہے کہ اعداد و شمار، تحقیق اور عالمی تجربات کو مدنظر رکھتے ہوئے سماجی اور مذہبی غلط فہمیوں کو دور کیا جائے۔
نوٹ: ایکسپریس نیوز اور اس کی پالیسی کا اس بلاگر کے خیالات سے متفق ہونا ضروری نہیں۔
اگر آپ بھی ہمارے لیے اردو بلاگ لکھنا چاہتے ہیں تو قلم اٹھائیے اور 800 سے 1,200 الفاظ پر مشتمل تحریر اپنی تصویر، مکمل نام، فون نمبر، فیس بک اور ٹوئٹر آئی ڈیز اور اپنے مختصر مگر جامع تعارف کے ساتھ [email protected] پر ای میل کردیجیے۔
عمران خان کی 7 مقدمات میں درخواست ضمانت پر سماعت 13 ستمبر تک ملتوی