آج کل پاکستان بارے روز کوئی نہ کوئی منفی خبر میڈیا کی زینت بنتی ہے۔ ابھی گزشتہ ہفتے ہی ٹرانسپرنسی انٹرنیشنل نے دنیا بھر کے ممالک میں بدعنوانی سے متعلق ’کرپشن پرسیپشن انڈیکس‘ جاری کیا ہے جس کے مطابق کرپشن انڈیکس میں پاکستان مزید تنزلی کا شکار ہو گیا ہے۔ ملک کے موجودہ سیاسی و معاشی حالات میں یہ کوئی انہونی بات تو نہیں مگر دل کو دھچکا ضرور لگا۔ پاکستان دو درجہِ تنزلی کے بعد 180 ممالک میں سے مجموعی طور پر 135 ویں نمبر پر آ گیا ہے۔ افسوس اس بات کا ہے کہ ہم نے اس بار بھی اپنے عمل کے ذریعے دنیا کو مایوس نہیں کیا اور انہیں پیغام دیا ہے کہ معاشی ترقی ہو یا نہ ہو مگر کرپشن میں ترقی پورے خلوص سے جاری رہے گی۔ صورتحال یہ ہے کہ پاکستان میں اب کوئی ادارہ ایسا نہیں بچا جسے اقربا پروری، سیاسی اثر و رسوخ اور بدعنوانی دیمک کی طرح چاٹ نہ رہی ہو۔ ہم نے اپنے ان اداروں کو مضبوط کرنے کی بجائے انتھک کوششوں سے ایگزیکٹو کے ماتحت کر دیا ہے جنہوں نے حکومت کے مالی معاملات پر کڑی نظر رکھنا تھی اور ان کا احتساب کرنا تھا۔ ٹرانسپرنسی نے ماحولیاتی تحفظ کے لیے مختص اربوں ڈالر کے فنڈز چوری یا غلط استعمال ہونے کے خطرے کی نشاندہی بھی کی ہے۔ جو ممالک موسمیاتی تبدیلیوں کے خطرے سے سب سے زیادہ متاثر ہیں، ان میں سے بیشتر کا سی پی آئی سکور 50 سے کم ہے۔ پاکستان بھی اس وقت شدید ماحولیاتی تبدیلیوں کے دباؤ کا شکار ہے۔ پاکستان کا کرپشن انڈیکس پر نمبر 29 سے 27 پر آ گیا ہے، لہٰذا عالمی بینک نے جو پاکستان کو صحت، تعلیم اور موسمیاتی تبدیلیوں سے نمٹنے کے لیے 10 سال میں 20 ارب ڈالر کی خطیر رقم بطور قرض دینے کا وعدہ کیا، اب ٹرانسپرنسی انٹرنیشنل کی بدعنوانی سے متعلق رپورٹ میں پاکستان کی بدترین پوزیشن کے بعد یہ فنڈز جلد ریلیز ہوتے دکھائی نہیں دے رہے۔ 2022 کے سیلاب میں پاکستان کا ایک تہائی حصہ زیر آب آ گیا تھا، جو پوری دنیا کے الیے الارمنگ کال ہے۔ اس تباہ کن سیلاب سے پاکستان کو جہاں 30 ارب ڈالر سے زائد کا نقصان ہوا وہیں 3 کروڑ 30 لاکھ افراد متاثر ہوئے۔ اس سے قبل 2010 کے ہولناک سیلاب نے بھی ملک کے جغرافیائی رقبے کا پانچواں حصہ تباہ کر دیا تھا جبکہ 2 کروڑ سے زائد افراد اپنی سر چھپانے کی جگہوں سے محروم ہوئے۔ موسمیاتی تبدیلی کا ذمہ دار پاکستان نہیں ہے جبکہ سب سے زیادہ نقصانات بھی ہمیں بھگتنا پڑ رہے ہیں۔ غیر معمولی گرمی، شدید بارشیں، سیلاب، خشک سالی اور موسمی شدت میں اضافہ ہوتا جا رہا ہے۔ دنیا کے 20 امیر ترین ممالک کا کاربن کے اخراج میں 80 فیصد حصہ ہے جبکہ خطے کے دیگر ممالک بالخصوص پاکستان کا کاربن کے اخراج میں ایک فیصد سے بھی کم حصہ ہونے کے باوجود متاثرہ ترین ممالک میں شامل ہے۔ موسمیاتی تبدیلیوں کی تباہ کاریاں پاکستانی عوام بھگت رہے ہیں۔ تاہم 2022 کے سیلاب پر جو بیرونی امداد پاکستان کو دی گئی اس پر کئی سوالات اٹھ رہے ہیں۔ وفاق سندھ پر چڑھائی کر رہا ہے کہ سیلاب زدگان کا پیسہ ان پر استعمال ہونے کے بجائے کن کی جیبوں میں گیا۔ وفاق نے عالمی بینک کے 4 ارب 10 کروڑ روپے کا حساب کتاب سندھ سے مانگ لیا ہے۔ دوسری جانب بلاول بھٹو زرداری نے وفاق پر الزام عائد کیا کہ وفاقی حکومت نے سیلاب متاثرین کے لیے ملنے والا امدادی فنڈ اپنی جیب میں رکھ لیا ہے۔ غریبوں اور سیلاب متاثرین کے پیسوں پر لڑائی یہ ثابت کرتی ہے کہ ضرورت مند کو اس کا حق نہیں ملا اور نہ ملے گا۔ یہ فنڈز بُری طرح کرپشن کی نذر ہو گئے۔ اب ٹرانسپرنسی انٹرنیشنل کا مستقبل میں ملنے والی امداد بھی غلط جگہ استعمال ہونے کا خدشہ بظاہر درست لگتا ہے۔ کرپشن ماحولیاتی منصوبوں کو متاثر کر رہی ہے جس سے لاکھوں افراد کو تحفظ فراہم کیا جا سکتا ہے۔ مگر جس ملک میں جمہوریت آخری سانسیں لے رہی ہو اور ادارے زوال پذیر ہو چکے ہوں وہاں شفافیت کی امید کیونکر لگائی جا سکتی ہے۔ چھبیسویں آئینی ترمیم نے جہاں عدلیہ کی بچی کھچی آزادی کو سلب کیا ہے وہیں پیکا جیسے متنازع قانون نے آزادی رائے کا گلا بھی گھونٹ دیا ہے۔ کرپشن کے ساتھ ساتھ وطن عزیز میں اب جمہوری اقدار بھی زوال پذیر ہیں جس کے واضح اثرات نے اب ہر پاکستانی کو جکڑ لیا ہے۔ ٹرانسپیرنسی انٹرنیشنل نے ایگزیکٹو، عدلیہ، ملٹری اور قانون سازوں کا ذاتی مقاصد کے لیے سرکاری وسائل کے استعمال کا سکور 25 سے بڑھا کر 26 کر دیا ہے جو معمولی بہتری کی علامت ہے جبکہ پببلک سیکٹر، ایگزیکٹو، عدلیہ اور لیجسلیٹو کرپشن کا سکور 20 سے کم ہو کر 14 ہو گیا ہے، جو بتاتا ہے کہ یہاں معاملات خرابی کی طرف گئے ہیں۔
.ذریعہ: Nai Baat
کلیدی لفظ: کے لیے گیا ہے دیا ہے
پڑھیں:
ہر چیزآن لائن، رحمت یا زحمت؟
تیزی سے ترقی کرتی دنیا میں انٹرنیٹ کی ایجاد یقیناً وہ سنگ میل تھا جس کو عبورکرتے ہی بنی نوع انسان نے اپنے لیے نہ صرف کئی سہولتوں کے در وا کر لیے بلکہ لاکھوں کروڑوں میل کے فاصلے کو بھی، گویا پلک جھپکتے طے کر لیا۔
ابتدا میں یہ سہولت صرف ویب کیم کے ذریعے سات سمندر رابطے تک محدود تھی مگر جب فیس بک اور پھر واٹس ایپ کی ایجاد ہوئی تو پھر تو ہفت اقلیم کا خزانہ ہی ہاتھ لگ گیا۔
عزیز و اقارب سے بات چیت، تصاویر کے تبادلے، دور پرے رشتے داروں کو دعوت نامے بھیجنا تو آسان ہوا ہی اب گھر بیٹھے کسی بھی ملک کے علاقے، ثقافت، کھانے، تہذیب و سیاسی حالات الغرض ہر چیز کو جاننا محض ایک اشارے کا محتاج ہوگیا۔
تیزی سے سمٹتی اس دنیا کو مزید قریب آنے کا موقع اس وقت ملا جب کورونا وائرس نے اپنے پنجے گاڑے۔
اندھا دھند چلتی دنیا کو بریک لگ گئے مگر واحد دنیا جو ابھی بھی رواں دواں تھی وہ انٹرنیٹ کی دنیا تھی۔ اس وبا نے باقی دنیا کو تو روک دیا مگر انٹرنیٹ کی دنیا کی رفتار مزید بڑھا دی، آن لائن کاروبار تو مزید بڑھا ہی، اب پڑھائی کے لیے بھی انٹرنیٹ کے استعمال کا رجحان زور پکڑ گیا۔
آن لائن کلاسز جو پہلے صرف کچھ یونیورسٹیز میں ہوتی تھیں، اب گھر، گھر ہونے لگیں کاروباری سرگرمیاں، رقوم کا لین دین، درس و تدریس غرض کئی شعبوں میں آن لائن کا جادو سر چڑھ کر بولنے لگا مگر کیا واقعی یہ جادو اپنے ساتھ صرف مثبت تبدیلیاں لایا ہے یا اس نے ہماری زندگی بظاہر آسان اور درحقیقت مشکل بنا دی ہے؟
پاکستان ایک ترقی پذیر اور کئی شعبہ جات میں زوال پذیر ملک ہے ’’ کوا چلا ہنس کی چال‘‘ کے مصداق ترقی یافتہ دنیا کے طور طریقے ہم نے اپنا تو لیے ہیں مگر ان کے لیے کیا منصوبہ بندی ہوگی؟ کیا نظام ہوگا؟ کسی مسئلے کے نتیجے میں اس کا حل کیا ہوگا؟
اس پر سوچنے کی زحمت کوئی نہیں کرتا۔ نتیجہ صرف یہ ہے کہ کچھ جگہوں پر ہمارا کام دگنا ہوگیا ہے اور کچھ جگہ ہم شدید نقصانات اٹھا رہے ہیں۔
اس ضمن میں سب سے پہلی اور سادہ ترین مثال ہے، آن لائن شاپنگ کی جو بے انتہا مقبول اور با سہولت ہے اس نے نہ صرف بڑے بڑے برانڈز کو چار چاند لگا دیے ہیں بلکہ چھوٹے پیمانے پر کاروبار کرنے والوں کو بھی پنپنے کا موقع دیا، ہر چیز میں تنوع مزید بڑھا دیا انتخاب کرنا مشکل ہوگیا اور مقابلہ بہت سخت ہوگیا۔
آپ ایک چیزکی تلاش کرتے ہیں اور پھر فیس بک اور انسٹا خود آپ کو مزید بزنس پیجز بتانے لگتے ہیں جہاں پر جہاں وہ چیز دستیاب ہے، اس کے علاوہ شاپنگ گروپس بھی ایک سے بڑھ کر ایک موجود ہیں، نتیجتا آن لائن شاپنگ کا رجحان بہت بڑھ گیا مگر اس کے ساتھ ساتھ دھوکا دہی اور فراڈ بھی عام ہوگیا۔
خریدار تو چیزکے خراب نکلنے رقم ضایع ہونے کا شکوہ کرتا نظر آتا ہی ہے، مگرکچھ دکاندار بھی پارسل کینسل کرنے اور ڈلیوری چارجز اپنے گلے پڑنے کا رونا روتے نظر آتے ہیں، بڑے برینڈز کے نام پر اپنے پیجز بنا کر لوٹ مار کرنا بھی آن لائن شاپنگ میں عام ہے۔
ان سارے مسائل کا کوئی حل نہیں ہے، فراڈ کرنے والے اپنے پیج پر فالوورز اور اچھے ریویوز بھی خرید لیتے ہیں کسی کی رپورٹ کرنے پر فیس بک ان کا پیج ڈیلیٹ بھی کر دے تو یہ کسی اور نام سے ظاہر ہوجاتے ہیں مگر ان سب کے باوجود آن لائن شاپنگ کچھ لوگوں کے لیے مجبوری بھی ہے اورکچھ کے لیے تفریح بھی تو اس کا خاتمہ تو ممکن نہیں ہے، البتہ بہتری ضرور لائی جا سکتی ہے۔
دوسرا شعبہ تعلیم کا ہے جو اس آن لائن نظام کی بھینٹ چڑھا، آن لائن کلاسز یونیورسٹیز میں تو نئی بات نہیں تھی مگر جب لاک ڈاؤن ہوا تو ہر گھر میں ہر بچے کے پاس موبائل نظر آنے لگا کہ بھئی پڑھائی، اب آن لائن ہوگی۔
اب وہ الگ بات ہے کہ پڑھائی ہوئی ہو یا نہیں ہوئی ہو، مگر ان بچوں کو بھی موبائل فون استعمال کرنے کی لت لگ گئی جن کو موبائل دینا ہی نہیں چاہیے تھا، پڑھائی کو تو محض بہانہ ہوتا تھا، اصل دلچسپی تو انٹرنیٹ کی رنگینیوں میں پیدا ہوئی جو چند سنجیدہ طالب علم تھے وہ بھی بروقت بجلی اور انٹرنیٹ کی عدم دستیابی کا شکار ہوئے اور پھر یہی وجہ پڑھائی سے دوری کی بنی،کووڈ کے بعد طلبہ کے لازمی مضامین کے تو پرچے لیے ہی نہیں گئے اور جو اختیاری مضامین کے پرچے لیے گئے، اس میں بھی ان کو رعایتی نمبروں سے پاس کرکے گویا تعلیم کا جنازہ ہی نکال دیا گیا۔
سوال یہ اٹھتا ہے کہ جس ملک میں بجلی کی طویل لوڈ شیڈنگ معمول ہے، وہاں آن لائن پڑھائی کا نظریہ دینا کہاں کی عقلمندی ہے؟ پھر ایک اور نیا شور اٹھا کے اب انٹر کے داخلے بھی آن لائن ہوں گے، یہ سہولت یقینا پوش علاقوں اور بہت اچھے تعلیمی اداروں میں پڑھنے والے طلبہ کے لیے تو بہت اچھی ہے مگر پسماندہ علاقے جن میں اکثریت ناخواندہ اورکمپیوٹر کے استعمال سے ہی نابلد ہے داخلے کا یہ طریقہ بہت بڑی درد سری ہے۔
مزے کی بات یہ ہے کہ سارا عمل آن لائن کروانے کے بعد ساری دستاویزات کی فوٹو کاپی کروا کے بھی جمع کروائی جاتی ہیں یعنی آن لائن داخلے کا محض نام ہے اور اس نام نے صرف کام بڑھایا یا تو آپ آن لائن داخلے کی پخ نہ لگائیں یا پھر مزید دستاویزات جمع کروانے کا عمل نہ کروائیں، یہ شعبہ بھی آن لائن کے نام پر مزید مشکل بنا دیا گیا۔
آن لائن بینکنگ کی بات کریں تو یہ تو اتنا بڑا رسک بن گیا ہے کہ اس کو تو سہولت کہنا ہی غلط ہے بلوں کی ادائیگی، فیسوں کی ادائیگی کسی کو رقم دینے کی حد تک تو یقینا سہولت ہوگئی ہے، مگر اس کے بعد جو اسکیم اور جعل سازی کر کے لوٹ مار کر ڈیجیٹل طریقہ ایجاد ہوا ہے، اس نے آن لائن بینکنگ کو بہت زیادہ غیر محفوظ بنا دیا ہے۔
آئے دن کوئی نہ کوئی فراڈ منظر عام پر آجاتا ہے مگر اس کا کوئی ازالہ نہیں ہو سکتا۔ کسی جعلسازی سے اگر آپ کے اکاؤنٹ سے رقم چلی گئی تو بہت مشکل ہے کہ بینک اس کو واپس دلوا سکے، ان تمام مسائل اور خامیوں کے باوجود ہم آن لائن نظام استعمال کرنے کے لیے مجبور ہیں کیونکہ بہت ساری جگہوں پر ہمارے پاس کوئی دوسرا حل موجود ہی نہیں، مگر پاکستان جیسے ملک میں کوئی بھی نظام آن لائن کرنے سے پہلے اس کے سقم دور اور ممکنہ مسائل کا حل پیش کرنے کی ضرورت ہے تاکہ اس نظام کو ہر شعبے میں محفوظ اور آسان بنایا جا سکے۔
پاکستان میں ڈیجیٹل معیشت کی ترقی اور فروغ: میٹا کا تعاون مزید بڑھانے کا اعلان