پنجاب میں قبضے ختم کرانے کے لیے خصوصی عدالتیں قائم ہوں گی، فیصلے 90 دن میں ہوں گے: وزیراعلیٰ
اشاعت کی تاریخ: 25th, September 2025 GMT
وزیراعلیٰ پنجاب مریم نواز شریف نے اعلان کیا ہے کہ صوبے میں نجی زمینوں پر قبضے واگزار کرانے کے لیے خصوصی عدالتیں قائم کی جائیں گی، جو 90 دن کے اندر کیسز کا فیصلہ سنائیں گی۔
پیرا فورس کی پہلی پاسنگ آؤٹ پریڈ کے موقع پر وزیراعلیٰ نے کہا کہ یہ اقدام قبضہ مافیا کے خلاف تاریخی پیشرفت ہوگی، خاص طور پر غریبوں، بیواؤں اور یتیموں کی جائیدادوں کے تحفظ کے لیے۔ ان کے مطابق زمین پر قبضہ کرنے والوں کو 10 سال قید اور بھاری جرمانے کی سزائیں دی جائیں گی۔
حکومتی ذرائع کے مطابق اس مقصد کے لیے پنجاب انفورسمنٹ آف ویمن پراپرٹی ترمیمی بل کا مسودہ تیار کیا جا رہا ہے، جسے دسمبر تک پنجاب اسمبلی سے منظور کروانے کا ہدف ہے۔
بل میں عدالتوں کی تعداد، دائرہ کار اور ٹائم فریم کی وضاحت کی جائے گی۔ خصوصی عدالتیں صوبے کے تمام اضلاع میں قائم ہوں گی اور انہیں زمین قبضہ کیسز کے فوری فیصلے کا اختیار حاصل ہوگا۔
مزید پڑھیں: مریم نواز کا جنوبی پنجاب میں اپنا سیکریٹریٹ لگانے کا اعلان
فی الحال پیرا فورس کے پاس صرف سرکاری زمین واگزار کرانے کا اختیار ہے، تاہم ترمیم کے بعد نجی زمینوں پر قبضے کے خلاف بھی کارروائی ممکن ہو جائے گی۔
پیرا فورس کا پس منظرپنجاب انفورسمنٹ اینڈ ریگولیٹری اتھارٹی (پیرا فورس) جولائی 2025 میں قائم کی گئی تھی۔ اس کا بنیادی مقصد مہنگائی، ذخیرہ اندوزی اور ناجائز تجاوزات کے خلاف کارروائیاں کرنا ہے۔
وزیراعلیٰ مریم نواز نے اس موقع پر کہا تھا کہ پیرا فورس ظالموں کے لیے دہشت کی علامت ہوگی۔ فورس میں 8 ہزار اہلکار شامل ہیں جو صوبے کے ہر ضلع اور تحصیل میں تعینات ہوں گے۔
زمینوں پر قبضے کے پہلے بھی قوانین اور ادارے موجود ہیں، اگر 90 دن میں فیصلے ہوئے تو عوام کو ریلیف ملے گا۔ ماہرینِ قانونمزید پڑھیں: مراد علی شاہ بہتر وزیراعلیٰ ہیں، مریم نواز تو لاہور میں صدر کا استقبال نہیں کرتیں، ندیم افضل چن
قانونی ماہر ایڈووکیٹ حسن مجید نے وی نیوز سے گفتگو میں کہا کہ یتیموں اور بیواؤں کی زمینوں پر قبضے کے حوالے سے پہلے بھی قوانین اور ادارے موجود ہیں، جیسا کہ پنجاب میں محتسب کا نظام، جس کے ذریعے ہزاروں کیسز حل کیے گئے۔
تاہم، اگر حکومت نئی خصوصی عدالتیں قائم کرتی ہے اور ان میں واقعی 90 دن کے اندر فیصلے ہوتے ہیں تو عوام کو بڑا ریلیف ملے گا۔ انہوں نے کہا کہ یہ عدالتیں آزاد اور سیاسی دباؤ سے محفوظ ہونی چاہییں۔
ایڈووکیٹ ناصر بشیر کے مطابق خصوصی عدالتوں کا قیام آئین کے آرٹیکل 175 کے تحت ممکن ہے، مگر قبضہ مافیا کے اثرورسوخ کو مدِنظر رکھتے ہوئے پیرا فورس کو مزید وسائل اور قانونی تحفظ درکار ہوگا۔ ان کا کہنا تھا کہ بل یقیناً گڈ گورننس کی سمت ایک قدم ہے، لیکن اس کی کامیابی عمل درآمد پر منحصر ہے۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
پنجاب انفورسمنٹ اینڈ ریگولیٹری اتھارٹی پیرا فورس زمین پہ قبضہ مریم نواز.
ذریعہ
ذریعہ: WE News
کلیدی لفظ: پیرا فورس زمین پہ قبضہ مریم نواز خصوصی عدالتیں پیرا فورس مریم نواز کے لیے
پڑھیں:
مالی سال 26-2025 کے اختتام پر کلیمز جمع کرانے کی آخری تاریخ 12 جون مقرر
اکاؤنٹنٹ جنرل پاکستان ریونیو (اے جی پی آر) اسلام آباد نے مالی سال 26-2025 کے اختتام کے سلسلے میں ادائیگیوں، بلوں اور کلیمز کی وصولی کے لیے اہم ڈیڈ لائنز مقرر کردی ہیں۔
اے جی پی آر کی جانب سے جاری نوٹیفکیشن کے مطابق تمام ڈرائنگ اینڈ ڈسبرسنگ آفیسرز (ڈی ڈی اوز) کو ہدایت کی گئی ہے کہ حالیہ خریداریوں اور حاصل کی گئی خدمات کے تمام کلیمز 12 جون 2026 تک لازمی طور پر جمع کرائے جائیں۔
نوٹیفکیشن میں کہا گیا ہے کہ 12 جون 2026 تک جاری کیے گئے ٹوکنز کے تحت تمام غیر منظور شدہ بلوں اور دعوؤں کو دوبارہ جمع کرانے کی آخری تاریخ 15 جون 2026 مقرر کی گئی ہے۔
اسی طرح اے جی پی آر اسلام آباد اور اس کے ماتحت دفاتر کے زیر انتظام اسائنمنٹ اکاؤنٹس کے لیے ریلیز جمع کرانے کی آخری تاریخ 19 جون 2026 ہوگی۔
اے جی پی آر نے واضح کیا ہے کہ 12 جون 2026 کے بعد اعزازیہ (ہونوریرئم) سے متعلق کوئی کلیم وصول نہیں کیا جائے گا۔
مزید برآں آف سائیکل ادائیگیوں کے حوالے سے کمپیوٹرائزڈ تبدیل شدہ اسٹیٹمنٹس صرف 11 جون 2026 تک وصول کی جائیں گی، جبکہ ان پر کارروائی عارضی طور پر 16 جون 2026 تک مکمل کر لی جائے گی۔
نوٹیفکیشن میں تمام ڈی ڈی اوز اور متعلقہ دفاتر کو تاکید کی گئی ہے کہ ادائیگیوں اور مالی معاملات میں کسی قسم کی تاخیر سے بچنے کے لیے تمام کیسز مقررہ مدت کے اندر جمع کرائے جائیں۔
اے جی پی آر نے یہ بھی آگاہ کیا ہے کہ موجودہ مالی سال سے متعلق تنخواہوں کے چیکس مالی سال کے اختتام پر زائد المعیاد (اسٹیل) تصور ہوں گے اور 30 جون 2026 کے بعد ان کے متبادل چیکس جاری نہیں کیے جائیں گے۔
ادارے نے تمام متعلقہ سرکاری دفاتر اور مالیاتی حکام پر زور دیا ہے کہ بلوں، ادائیگیوں اور کلیمز سے متعلق تمام مقررہ ڈیڈ لائنز پر سختی سے عمل درآمد یقینی بنایا جائے تاکہ مالی سال 26-2025 کے حسابات بروقت اور مؤثر انداز میں مکمل کیے جا سکیں۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
wenews آخری تاریخ مقرر کلیمز مالی سال کا اختتام وی نیوز
منشیات و اسلحہ برآمدگی کیس: صحافی مطیع اللہ جان پر فرد جرم عائد کرنے کا فیصلہ