کبھی آپ نے سوچا ہے… توبہ توبہ ہم بھی کیا اناب شناب پوچھنے لگے ہیں آپ سے اس’’کام‘‘ کے بارے میں پوچھ رہے ہیں جو کبھی آپ سے سرزد نہیں ہوا اور سرزد ہو بھی تو کیسے؟کہ اسے آپ نے سیکھا ہی نہیں اور دنیا کے سارے ڈاکٹروں نے آپ کو مکمل پرہیز لکھا ہوا ہے، اگر آپ کو سوچنا آتا اگر آپ نے سوچنا سیکھا ہوتا اگر آپ سوچنے کی تکلیف گوارا کرتے تو آج آپ کا یہ حال ہوتا ؟راہبر تو دور کی بات ہے آپ راہزن کو پہچانتے نہیں جو آپ کے سامنے ہے اور سو بار اپنے فن کا مظاہرہ آپ پر کر چکا ہے بلکہ بار بار آتا ہے اور اعلان کرتا ہے کہ میں پھر تجھے لوٹنے آیا ہوں تیار ہوجاؤ۔اور آپ پھر لوٹنے کے لیے تیار ہوجاتے ہیں ۔
لیکن کیا کریں ہم بھی بندہ بشر اور آپ کے قدوبت کو دیکھ کر دھوکا کھا جاتے ہیں کہ شاید بھول چوک ہی میں سے آپ سے سوچنے کی بدپرہیزی ہوجائے کوشش کرلینے میں کیا حرج ہے۔ وہ کسی جنگل صحرا میں دو آدمیوں کا ملن ہوا، ایک کے پاس نہایت شاندار گھوڑا تھا۔ساتھ ہی اس پر زین اور دوسرے قیمتی لوازمات جب کہ دوسرے کے پاس ایک لاغر اور زخمی اور لڑکھڑاتا ہوا گدھا تھا۔
باتوں باتوں میں گدھے والے نے گھوڑے والے سے پوچھا سواری بدلنے کے بارے میں کیا خیال ہے اگر راضی ہو تو میں اپنا گدھا تمہارے گھوڑے سے بدلنے کو تیار ہوں۔اس پر گھوڑے والا حیران ہوکر بولا، یہ کیا کہہ رہے رہو کیا میں تجھے احمق نظر آتا ہوں۔ گدھے والے نے کہا کیا پتہ تم ہو کوشش کرنے میں کیا حرج ہے۔آپ بھی ہیں یہ ہمیں معلوم ہے لیکن پھر بھی کوشش کرلینے میں کیا برائی ہے۔ٹھیک ہے آپ’’سوچنے‘‘پر ناراض ہوتے ہیں تو یہ پوچھ لیتے ہیں کہ آپ نے کبھی دیکھا ہے؟کیونکہ کھوپڑی خالی سہی یہ اتنی بڑی اُلو جیسی آنکھیں تو ہیں نا آپ کے چہرے پر، تہمت کی طرح لگی ہوئیں۔
مطلب یہ کہ یہ اردگرد جو ہورہا ہے آپ کو نہیں لگتا کہ دنیا میں عموماً اور پاکستان میں خصوصاً نفرتوں کا گراف انتہائی حدوں کو پہنچ رہا ہے، ایسا لگتا ہے جیسے لوگ باقی سب کچھ بھول چکے ہوں، محبت، رشتے ناطے، انسانیت، رحم، کرم اور بھائی چارہ ، عفوو درگزر، برداشت، افہام وتفہیم۔دنیا سے مکمل طور پر اٹھ چکے ہوں۔اور انسان نفرتوں، کدورتوں اور دشمنیوں کا مجسمہ ہوکر رہ گیا ہو۔اس سوکھے خس وخاشاک کی طرح جس پر تیل بھی چھڑکا گیا ہو اور جو ایک چھوٹی سی چنگاری سے بھڑک اٹھتا ہو۔
اب تک تو یہ آگ ذرا دور رہتی تھی کشمیر، فلسطین، یمن یہاں وہاں نہ جانے کہاں کہاں۔لیکن اس کرم ایجنسی کو ہم کیا کہیں گے؟اس پاکستانی سیاست میں نفرتوں کی انتہا کو کیا سمجھیں گے بلکہ شہر شہر، گاؤں گاؤں، مسجد مسجد اور فرقہ فرقہ، برادری برادری اور پیشے پیشے میں یہ جو زہر ہلاہل بہنے لگا ہے اسے کیا سوچیں کیا سمجھیں اور کیا کہیں۔
اور یہ جو ساری دنیا کو مار مار کر پیٹ پیٹ کر، توڑ پھوڑ کر مسلمان بنانے کا رجحان ہے اسے ہم کیا سمجھیں گے کیا مساجد میں بلاسٹ کرکے،اسکولوں میں خون کی ہولیاں کھیل کر، بازاروں میں دھماکے کرنے سے، پولیس والوں کو اڑانے سے’’اسلام‘‘ نافذ ہوجائے گا ۔ تحقیق کا ایک سیدھا سادا اصول ہے۔جب کوئی جرم ہوتا ہے فرض کرلیجیے قتل ہوجاتا ہے۔تو سب سے پہلے موٹیو ڈھونڈا جاتا ہے کہ آخر اس قتل کا محرک کیا تھا۔اگر موٹیو صاف اور سامنے ہو یعنی دشمنی انتقام یا اتفاقی جھگڑا یا پرانی دشمنی ہو تو ٹھیک ہے لیکن اگر وجہ نامعلوم ہو تو پھر دیکھا جاتا ہے کہ اس قتل سے ’’فائدہ‘‘کس کو پہنچ رہا ہے یا پہنچا ہے۔
کیا کشمیر، فلسطین اور ایسے دوسرے معاملات سے برسرمیدان لڑنے والوں کو کوئی فائدہ پہنچ رہا ہے۔؟تو پتہ چلتا ہے کہ ہندوستان اور پاکستان دونوں کو نقصان ہی نقصان ہورہاہے دونوں ہی اپنے عوام کا پیٹ کاٹ کاٹ کر ہتھیار جمع کرنے پر مجبور ہیں تو فائدہ کس کو ہوا؟۔چلیے دور دور جانے کے بجائے اپنے قریب ترین اور تازہ ترین کرم ایجنسی کے تازہ ترین واقعے پر سوچتے ہیں اس میں فائدہ کس کو پہنچا بلکہ یہ پہلا واقعہ نہیں اس سے پہلے بھی یہاں تصادم ہوتے رہے۔
ان سب میں کسی کو کوئی معمولی فائدہ پہنچا ہے نقصان ہی نقصان تباہی ہی تباہی بربادی ہی بربادی ہوتی رہی ہے کسی بھی فریق کو کوئی بھی فائدہ نہیں پہنچا ہے۔ تو پھر کیوں یہ بے فیض خونریزیاں ہورہی ہیں اور اگر اس پر ’’موٹو‘‘کی روشنی میں غور کیا جائے تو صاف صاٖف مجرم کا پتہ چل جاتا ہے کہ وہی ہے جس کو اس سے فائدہ ہورہا ہے وہی جس کا اسلحہ مارکیٹ ہورہا ہے کوئی بھی مرے جیئے تباہ ہوجائے اسلحہ تو ان کا بک جاتا ہے اور تب تک بکتا رہے گا جب تک دنیا میں جذباتی بے وقوف موجود ہیں۔
وہ کسی بزرگ نے کہا ہے کہ اگر دنیا میں احمق نہ ہوتے تو عقل مند بھوکوں مرجاتے۔اور احمق جذباتی ہوتا ہے چاہے جذبات کسی بھی شکل میں ہوں۔کیوں کہ جب جذبات کسی سر میں موجود ہوں یا آجاتے ہیں تو عقل رخصت ہوجاتی ہے۔وہ عام سی بات تو آپ نے سنی ہوگی کہ کسی نے غصے سے کہا کہ تم کہاں رہتے ہو بولا ’’سر‘‘میں۔مگر وہاں تو عقل رہتی ہے۔بولا جب میں آجاتی ہوں وہ بھاگ جاتا ہے اور آخر میں ایسا ہی ایک دوسرا قصہ۔کہ افیونی نے دکاندار سے دو پیسے کی افیون مانگی۔ دکاندار نے کہا کہ دو پیسے کی افیون سے کیا نشہ ہوگا۔ افیونی نے کہا نشہ، میرے سر میں بہت ہے بس تھوڑے سے دھکے کی ضرورت ہے۔ اور وہ تھوڑا سا دھکا اسلحہ فروش کسی نہ کسی طرح دے ہی دیتے ہیں۔ اب اس’’سر‘‘ کا پتہ لگانا تو اتنا مشکل نہیں ہے نا۔
.ذریعہ: Express News
کلیدی لفظ: جاتا ہے میں کیا نے کہا ہے اور
پڑھیں:
مصنوعی ذہانت
مصنوعی ذہانت کے استعمال سے جہاں عالمی معاشروں میں حیران کن تبدیلیاں آرہی ہیں وہاں ذرایع ابلاغ اور خبریں بھی ایک نئے اور پیچیدہ عہد میں داخل ہو رہی ہیں۔ ایک ایسا عہد جس میں ’’خبر‘‘ محض اطلاع نہیں بلکہ ایک ڈیجیٹل تشکیل بن چکی ہے۔ آج کسی خبر کی سچائی پر یقین کرنے سے پہلے قاری کو یہ سوچنا پڑتا ہے کہ کیا یہ خبر انسان نے بنائی ہے یا مشین نے؟
مصنوعی ذہانت یعنی اے ائی (Artificial Intelligence) لمحوں میں تصویر، آواز یا وڈیو کو اس طرح بدل دیتی ہے کہ سچ اور جھوٹ کے درمیان فرق مٹ جاتا ہے۔ یہی وہ خطرہ ہے جو دنیا بھر کے میڈیا کو درپیش ہے اور جس سے پاکستان بھی اب لاتعلق نہیں رہ سکتا۔
ڈیجیٹل فریب کی اس نئی دنیا نے کچھ ہی عرصے میں ’’جنریٹو اے آئی‘‘ (Generative AI) نے خبر کے معیار، رفتار اور اعتبار کو یکسر بدل کر رکھ دیا ہے۔ ChatGPT، Midjourney، Runway، Sora جیسے ٹولز نہ صرف مواد تخلیق کرتے ہیں بلکہ مکمل حقیقت کو بھی بدل کر رکھ دیتے ہیں۔
اس ٹیکنالوجی کی ایک خطرناک صورت ڈیپ فیک (Deepfake) ہے۔ ڈیپ فیک کے استعمال سے ایسی جعلی وڈیوز بنائی جاتی ہیں جو دیکھنے میں بالکل اصلی لگتی ہیں۔
مثال کے طور پر 2024کے امریکی صدارتی انتخابات سے قبل ایک ڈیپ فیک آڈیو سامنے آئی جس میں صدر جوبائیڈن کی آواز میں ووٹروں کو پیغام دیا گیا۔ بعدازاں انکشاف ہوا کہ یہ مصنوعی آواز تھی۔
بھارت میں بھی 2023 کے ریاستی انتخابات کے دوران مشہور شخصیات کی جعلی وڈیوز وائرل ہوئیں جنھوں نے انتخابی بیانیے کو متاثر کیا۔ اسی طرح پاکستان کے سوشل میڈیا پر مختلف سیاست دانوں اور بااثر افراد کی ایسی فیک وڈیوز گردش کر رہی ہیں جن کو دیکھ کر انسان صرف حیران اور پریشان ہی نہیں ہوتا بلکہ ایسا محسوس ہوتا ہے کہ اگر یہ عمل جاری رہا تو آگے کیا ہوگا۔
حالیہ برسوں میں متعدد وڈیوز اور بیانات توڑمروڑ کر پھیلائے گئے۔ کئی مرتبہ تو پرانی وڈیوز کو نئے عنوانات کے ساتھ وائرل کیا گیا، جس سے غلط فہمیاں اور انتشار پیدا ہوا۔
ہمارے ہاں سوشل میڈیا پر نہ تو فیکٹ چیکنگ یونٹس ہیں اور نہ ہی ایتھکس کی تربیت ہے۔ نتیجتاً افواہیں خبروں سے زیادہ تیزی سے پھیلتی ہیں لیکن اگر دوسری طرف دیکھیں تو یہ چیلنج دراصل ایک موقع بھی ہے۔ اگر پاکستان کا میڈیا اس ٹیکنالوجی کو مثبت انداز میں اپنائے تو خبر کے حصول کی رفتار، تحقیق اور تجزیے کی نئی راہیں کھل سکتی ہیں۔
دنیا کے بڑے خبررساں ادارے اے آئی کو مددگار ٹول کے طور پر استعمال کر رہے ہیں۔ نیوز ٹریسر ایک ایسا خودکار ٹول ہے جو سوشل میڈیا پر خبروں کی اصلیت اور جعلی پن کی جانچ کرتا ہے۔
ایک اور ٹریسر ایسا بھی ہے جو تصاویر وڈیو اور اعداد وشمار کی اے آئی الگورتھم استعمال کر کے تصدیق کرتا ہے۔ پاکستانی ابلاغ کے ادارے بھی اگر چاہیں تو انھی ماڈلز کو اپنا سکتے ہیں۔
اس وقت سب سے اہم سوال یہ ہے کہ پاکستانی میڈیا کس طرح فیک اور اصلی خبر میں تمیز کر سکتا ہے یا اصلی خبر کی تیزرفتار جانچ پڑتال کیسے ممکن ہے؟ اس کے لیے درج ذیل اقدامات کرنے کی فوری ضرورت ہے۔
ہر نیوز روم میں فیکٹ چیکنگ یونٹ قائم کیا جائے۔صحافیوں کے لیے اے آئی اور ڈیجیٹل ایتھکس کی تربیت کو لازمی قرار دیا جائے۔اگر کوئی تصویر یا وڈیو اے آئی سے تیار کی گئی ہو تو اس کی وضاحت لازمی ہو۔
یونیورسٹیوں، میڈیا ریگولیٹرز اور نیوز اداروں کو مل کر ایک قومی پالیسی وضع کرنی چاہیے تاکہ ٹیکنالوجی کا استعمال ذمے داری سے ہو۔پاکستان کی بعض یونیورسٹیوں نے ’’ڈیجیٹل جرنلزم‘‘ میں مصنوعی ذہانت کے ماڈیول شامل کیے ہیں لیکن یہ ابھی ابتدائی کوششیں ہیں۔
اگر ہم نے ابھی سے تیاری نہ کی تو مستقبل میں ’’خبر‘‘ شاید انسان نہیں بلکہ الگورتھم لکھے گا۔ پھر سوال یہ نہیں رہے گا کہ خبر کیا ہے؟ بلکہ یہ ہوگا کہ کس نے بنائی؟
مصنوعی ذہانت کے اس دور میں اصل امتحان مشین کا نہیں، انسان کے شعور کا ہے۔ خبر کی سچائی، اعتماد اور اخلاقیات کو زندہ رکھنا اب ہماری ذمے داری ہے ۔ مصنوعی ذہانت نے پاکستان سمیت دنیا کو ایک نئے فکری چوراہے پر لا کھڑا کیا ہے۔
یہ ٹیکنالوجی اگر درست سمت میں استعمال ہو تو میڈیا کو زیادہ بااعتماد، تیز اور معیاری بنا سکتی ہے لیکن اگر غفلت برتی تو سچ اور فریب کے درمیان فرق مٹ سکتا ہے ۔
کراچی: گورنر خیبرپختونخوا کے میڈیا ایڈوائزر کی چھینی گئی گاڑی برآمد