اسلام ٹائمز: نیتن یاہو اور اس کے کار ستم میں اس کا رفیق کار، ڈونلڈ ٹرمپ بھی ایران پر حملے کا ارمان لیے ہوئے بیٹھے ہیں لیکن ”خیرالماکین“ کے ارادے نے ان دونوں کے مکر و فریب کو ”بحر احمر“ کے پانیوں میں غرق کردیا ہے۔ کل تک امریکہ اور اسرائیل جو ”اہل خیبر“ کی طرح وارثینِ حیدر کرارؑ کو للکار رہے تھے آج ایران کی طاقت کے کچھ مظاہر دیکھنے کے بعد لگتا ہے ان کا دماغ اپنے اپنے ٹھکانوں پر واپس آرہا ہے۔ تحریر: سید تنویر حیدر
مارچ کا مہینا ابھی گزرا ہے۔ اس گزرے ہوئے مہینے میں دنیا کے ذرائع ابلاغ میں ایک شور محشر برپا ہوا، جو اب بھی ہے کہ ”امریکہ ایران پر حتمی طور پر حملہ کرے گا“۔ پھر کیا تھا کہ اس حملے کے حوالے سے دنیا بھر میں قائم امریکی اڈوں کے نام تمام اہل خبر کی زبانوں سے نشر ہونے لگے۔ اسی گونج میں امریکہ کے ”بی باون“ طیاروں کے گوجنے کی آوازیں بھی آنے لگیں۔ اس گھن گھرج میں ہمارے تخیل کی پرواز بھی ہمیں آج سے تقریباً دس سال پیچھے لے گئی۔ یہ وہ زمانہ تھا جب اسرائیل کی غاصب صیہونی حکومت کا وزیراعظم ”صابرا و شاتیلا “ کا قصائی، ”آریئل شارون“ تھا۔ اس کے ذہن پر بھی نیتن یاہو کی طرح ایران کو صفحہء ہستی سے مٹانے کا جنون سوار تھا۔ اس نے بھی ایران پر حملے کا پختہ ارادہ کر لیا تھا۔ حتیٰ کہ اس نے اس حملے کا مہینہ بھی بتا دیا تھا اور وہ مہینہ مارچ کا مہینہ تھا۔ دنیا اس وقت بھی اسرائیل کے ایران پر حملے کی اسی طرح منتظر تھی جس طرح آج امریکہ کے ایران پر حملے کی منتظر ہے۔ ایران کے دوست اسرائیل کے حملے کے اس اعلان پر اسی طرح مضطرب تھے جس طرح آج مضطرب ہیں۔
ایران کے دشمن اس وقت بھی اسی طرح اپنی بغلیں بجا رہے تھے جس طرح آج وہ بغیر کسی وقفے کے بجا رہے ہیں۔ لیکن پھر کیا ہوا؟ وہ ”قادر مطلق“ جس کا ارشاد ہے ”واللہ خیر الماکرین“، اس نے اپنی قدرت کاملہ کو دکھایا اور وہ جو اپنے ذہن میں ایران کی تباہی کا سودا لیے ہوئے تھا اپنے اس خیال باطل سمیت ”کومے“ کی دنیا میں پہنچ گیا اور پھر بالآخر آٹھ سال تک قبر نما کومے میں بے حس و حرکت رہنے کے بعد دنیا کے زندان سے آخرت کے جہنم میں چلا گیا۔ آج اس کا جانشین، نیتن یاہو اور اس کے کار ستم میں اس کا رفیق کار، ڈونلڈ ٹرمپ بھی ایران پر حملے کا ارمان لیے ہوئے بیٹھے ہیں لیکن ”خیرالماکین“ کے ارادے نے ان دونوں کے مکر و فریب کو ”بحر احمر“ کے پانیوں میں غرق کردیا ہے۔ کل تک امریکہ اور اسرائیل جو ”اہل خیبر“ کی طرح وارثینِ حیدر کرارؑ کو للکار رہے تھے آج ایران کی طاقت کے کچھ مظاہر دیکھنے کے بعد لگتا ہے ان کا دماغ اپنے اپنے ٹھکانوں پر واپس آرہا ہے۔
ایران نے زیر زمین جو شہر آباد کیے ہوئے ہیں، ان کی آبادی اپنے دامن میں ایران کے دشمنوں کی مکمل بربادی کا سامان لیے ہوئے ہے۔ ان شہروں میں، اپنے اپنے آشیانوں میں ہر دم پرواز کے لیے تیار، ابابیلوں کی ایک فوج ظفر موج نے ابھی سے ہاتھیوں کی چنگھاڑ کو کسی بھیگی بلی کی دبی ہوئی آواز میں تبدیل کر دیا ہے۔ ارشاد باری تعالیٰ ہے ”ان تنصراللہ ینصرکم“ یعنی اگر تم اللہ کی نصرت کرو گے تو اللہ بھی تمہاری نصرت کرے گا۔ ایران تقریباً نصف صدی سے راہ خدا میں مسلسل اپنی قربانیوں کے نذرانے پیش کر رہا ہے۔ یقیناً یہ سب کچھ ”خبیرِ مطلق“ کی نظر میں ہے۔ ہم یہ نہیں جانتے کہ اس موقع پر ”خیرالماکرین“ کی حکمت عملی کیا ہے؟ لیکن اتنا ضرور جانتے ہیں کہ وہ اپنے وعدے کے مطابق ان کی مدد ضرور کرے گا جو اس کے دین کے احیاء کے لیے اس کی مدد کرتے ہیں۔
ذریعہ: Islam Times
کلیدی لفظ: ایران پر حملے لیے ہوئے حملے کا اور اس
پڑھیں:
لیویز اور پولیس نے حملے پر جوابی کارروائی کی، ڈی سی شیرانی
ڈی سی شیرانی کا کہنا ہے کہ گزشتہ شب نامعلوم مسلح افراد نے بھاری اسلحہ راکٹ لانچر، سنائپر اور بارودی مواد سے لیویز لائن اور ہولیس تھانے پر حملہ کیا۔ جس پر لیویز اور پولیس اہلکاروں نے بہادری سے جوابی کارروائی کی۔ اسلام ٹائمز۔ بلوچستان کے ضلع شیرانی میں پولیس تھانے اور لیویز لائن پر حملے کی تفصیلات سامنے آ گئیں۔ ڈپٹی کمشنر شیرانی حضرت ولی کاکڑ نے میڈیا کو تفصیلات سے آگاہ کرتے ہوئے بتایا کہ گزشتہ شب نامعلوم مسلح افراد نے بھاری اسلحہ راکٹ لانچر، سنائپر اور بارودی مواد سے حملہ کیا۔ جس پر لیویز اور پولیس اہلکاروں نے بہادری سے جوابی کارروائی کی۔ حملہ آوروں اور اہلکاروں کے درمیان 3 گھنٹے سے زائد تک فائرنگ کا سلسلہ جاری رہا۔ جوابی کاروائی نے علاقے کو بڑے نقصان سے بچایا ہے۔ ڈپٹی کمشنر نے کہا کہ حملے میں ایک پولیس اہلکار آفتاب الرحمان شہید ہوئے ہیں، جبکہ لیویز کے دو اہلکار کالو خان اور عبدالواحد زخمی ہوئے ہیں۔ جنہیں ٹراما سینٹر کوئٹہ منتقل کر دیا گیا ہے۔ لیویز اہلکار اعظم لاپتہ ہیں جن کی تلاش جاری ہے۔ ڈی سی شیرانی نے بتایا کہ نامعلوم مسلح افراد نے لیویز کی ایک گاڑی اور پی ڈی ایم اے کی امدادی سامان کو آگ لگائی۔ پولیس اور لیویز کی سرچ آپریشن جاری ہے۔
اسرائیل نے غزہ سٹی میں بھی زمینی فوج اُتار دی