سدرہ امین کے شاندار سنچری کے بعد 6 کا اشارہ، بھارتی سوشل میڈیا پر ہنگامہ
اشاعت کی تاریخ: 21st, September 2025 GMT
پاکستان ویمن کرکٹ ٹیم کی اسٹار بیٹر سدرہ امین نے جنوبی افریقہ کے خلاف شاندار کارکردگی دکھاتے ہوئے مسلسل دو ون ڈے میچز میں سنچریاں اسکور کر کے نیا قومی ریکارڈ قائم کر دیا۔ تاہم ان کی سنچری کے بعد کیا گیا ایک اشارہ بھارتیوں کو خاصا ناگوار گزرا۔
سدرہ امین نے پہلے ون ڈے میں 121 رنز جبکہ دوسرے میچ میں 122 رنز کی اننگز کھیل کر نہ صرف پاکستان کی فتح میں اہم کردار ادا کیا بلکہ اپنی چھٹی ون ڈے سنچری بھی مکمل کی۔ اس کارکردگی کے ساتھ وہ مسلسل دو ون ڈے سنچریاں بنانے والی پہلی پاکستانی اور دوسری ایشیائی ویمن کرکٹر بن گئی ہیں۔
جب سدرہ نے اپنی چھٹی سنچری مکمل کی تو انہوں نے خوشی کے اظہار کے طور پر ہاتھوں سے چھ کا اشارہ کیا۔ اس سادہ سے جشن نے بھارتی سوشل میڈیا صارفین کو سیخ پا کر دیا، جنہوں نے اس اشارے کو سیاسی رنگ دیتے ہوئے دعویٰ کیا کہ سدرہ امین کرکٹ میں “سیاست گھسیٹ رہی ہیں”۔
بھارتیوں کو یاد آیا فضائی معرکہ؟
دلچسپ بات یہ ہے کہ سدرہ کے کے اشارے کو کچھ بھارتی صارفین نے معرکہ حق سے جوڑ دیا، جس میں پاکستان کی جانب سے بھارت کے 6 طیارے مار گرائے گئے۔
اسی پس منظر میں پاک فضائیہ کے ایئروائس مارشل اورنگزیب احمد نے ایک بیان میں کہا تھا کہ معرکۂ حق میں پاک فضائیہ نے بھارت کو 6-0 سے شکست دی۔
بھارتی سوشل میڈیا معرکہ حق کوسدرہ کے اشارے سے جوڑتے ہوئے تنقید کا سلسلہ شروع ہوگیا، حالانکہ سدرہ کی طرف سے اس اشارے کی کوئی سیاسی وضاحت سامنے نہیں آئی۔
سدرہ کی کارکردگی نے تاریخ رقم کر دی
پاکستان ویمنز ٹیم کی تاریخ میں اب تک 10 ون ڈے سنچریاں اسکور کی گئی ہیں، جن میں سے اکیلی سدرہ امین نے 6 بنائی ہیں — جو کہ ان کی مستقل مزاجی اور اعلیٰ صلاحیتوں کا ثبوت ہے۔
کرکٹ مبصرین اور سابق کھلاڑی سدرہ کی اس کارکردگی کو پاکستان ویمن کرکٹ کے لیے “گیم چینجر لمحہ” قرار دے رہے ہیں، جو نوجوان لڑکیوں کے لیے ایک روشن مثال ہے۔
ذریعہ
ذریعہ: Daily Mumtaz
پڑھیں:
مصنوعی مٹھاس دماغی صحت کے لیے خطرہ؟ نئی تحقیق میں یادداشت متاثر ہونے کا اشارہ
ایک نئی سائنسی تحقیق میں یہ انکشاف سامنے آیا ہے کہ مصنوعی مٹھاس کا زیادہ استعمال یادداشت اور ذہنی صلاحیتوں میں تیزی سے آنے والی کمی سے تعلق رکھ سکتا ہے۔ ماہرین کا کہنا ہے کہ اگرچہ یہ اجزا چینی کے متبادل کے طور پر استعمال کیے جاتے ہیں، تاہم ان کے طویل المدتی اثرات دماغی صحت کے لیے تشویش کا باعث بن سکتے ہیں۔
یہ تحقیق امریکن اکیڈمی آف نیورولوجی کے جریدے نیورولوجی میں شائع ہوئی، جس میں تقریباً 13 ہزار بالغ افراد کی آٹھ برس تک نگرانی کی گئی۔ تحقیق کے دوران کم یا بغیر کیلوریز والی مٹھاس کے سات عام اجزا کا جائزہ لیا گیا، جن میں ایسپارٹیم، سیکرین، ایسی سلفیم کے، اریتھریٹول، زائیلیٹول، سوربیٹول اور ٹیگاٹوز شامل تھے۔
تحقیقی نتائج کے مطابق وہ افراد جو روزانہ اوسطاً 191 ملی گرام مصنوعی مٹھاس استعمال کرتے تھے، جو تقریباً ایک کین ڈائٹ سوڈا میں موجود ایسپارٹیم کے برابر مقدار ہے، ان میں کم استعمال کرنے والوں کے مقابلے میں یادداشت اور ذہنی کارکردگی میں کمی کی رفتار 62 فیصد زیادہ دیکھی گئی۔
اسی طرح درمیانی مقدار میں مصنوعی مٹھاس استعمال کرنے والے افراد میں بھی ذہنی صلاحیتوں میں کمی کا خطرہ نمایاں رہا، جہاں یہ شرح کم استعمال کرنے والوں کے مقابلے میں 35 فیصد زیادہ ریکارڈ کی گئی۔
محققین کے مطابق یہ تعلق 60 سال سے کم عمر افراد اور ذیابیطس کے مریضوں میں زیادہ نمایاں دیکھا گیا، کیونکہ یہ افراد عام چینی کے بجائے مصنوعی مٹھاس کا زیادہ استعمال کرتے ہیں۔
تحقیق میں شامل سات میٹھے اجزا میں سے صرف ٹیگاٹوز ایسا جز تھا جس کا ذہنی صلاحیتوں میں تیز رفتار کمی سے واضح تعلق سامنے نہیں آیا، جبکہ باقی چھ اجزا اس خطرے سے منسلک پائے گئے۔
تحقیق کی مرکزی مصنفہ، یونیورسٹی آف ساؤ پالو سے وابستہ ڈاکٹر کلاڈیا کیمی سوئیموتو نے کہا کہ مصنوعی مٹھاس کو عموماً صحت مند متبادل سمجھا جاتا ہے، لیکن تحقیق کے نتائج اس بات کی نشاندہی کرتے ہیں کہ بعض مصنوعی میٹھے اجزا طویل عرصے تک استعمال کیے جانے کی صورت میں دماغی صحت پر منفی اثرات مرتب کر سکتے ہیں۔
یہ مصنوعی مٹھاس عام طور پر ڈائٹ سوڈا، فلیورڈ واٹر، انرجی ڈرنکس، دہی اور دیگر کم کیلوریز والی پراسیسڈ غذاؤں میں استعمال کی جاتی ہے۔
تاہم محققین نے اس بات پر بھی زور دیا کہ یہ ایک مشاہداتی تحقیق ہے، اس لیے اس سے یہ حتمی نتیجہ اخذ نہیں کیا جا سکتا کہ مصنوعی مٹھاس ہی براہِ راست یادداشت میں کمی کی وجہ بنتی ہے۔ ان کے مطابق ان نتائج کی مزید تصدیق اور مختلف متبادل میٹھے اجزا کے اثرات جانچنے کے لیے مزید سائنسی تحقیق کی ضرورت ہے۔
بھارت سے جنگ اور افغانستان میں کارروائی خارج ازامکان نہیں، وزیردفاع