ایران :ایٹمی تنصیبات پر پیجر طرز پر بڑا حملہ ناکام بنانے کا دعویٰ
اشاعت کی تاریخ: 17th, January 2025 GMT
تہران (مانیٹرنگ ڈیسک) روسی خبررساں ایجنسی نے دعویٰ کیا ہے کہ ایرانی ایٹمی تنصیب پر پیجر دھماکوں کی طرز کا حملہ ناکام بنادیا گیا۔ روس کی سرکاری خبررساں ایجنسی تاس نے ایران کے نائب صدر جواد ظریف کا حوالہ دیتے ہوئے بتایا ہے کہ یورینیم افزودگی کے لیے استعمال ہونے والے گیس سینٹری فیوج کے پلیٹ فارم میں بم نصب تھا جسے ناکارہ بنادیا گیا۔ خبررساں ایجنسی کے مطابق جواد ظریف نے اس کارروائی
کے پیچھے اسرائیل کے ملوث ہونے کا اشارہ بھی دیا۔ جواد ظریف نے ایرانی میڈیا کو انٹرویو دیتے ہوئے لبنان میں ہونے والے پیجر دھماکوں پر بات کی، انہوں نے کہا کہ اسرائیل کو پیجر دھماکوں کی تیاری کے لیے بہت وقت لگا لیکن شاید پابندیوں کے باعث یہ دھماکے ممکن ہوئے۔ انہوں نے کہا کہ پابندیوں کے باعث کسی پیداواری ادارے سے براہ راست خریداری کرنا ممکن نہیں ہوتا جس کے باعث کسی تیسرے ذریعے سے خریداری کرنی پڑتی ہے، اگر اسرائیل سپلائی چین میں داخل ہوجائے تو وہ جو چاہے کرسکتا ہے اور جو چاہے نصب کرسکتا ہے۔ انہوں نے مثال دیتے ہوئے کہا کہ ایرانی اٹامک انرجی آرگنائزیشن نے سینٹری فیوج خریدا تو معلوم ہوا کہ اس کے اندر دھماکا خیز مواد نصب تھا جس کا ماہرین نے پتا لگا لیا۔ جواد ظریف نے کہا کہ یہ واقعہ ان پابندیوں کی وجہ سے ہوا جن سے ایران کو بچنا پڑتا ہے، ان کے باعث مالی نقصانات کے ساتھ ساتھ ایران کی سلامتی کو بھی نقصان پہنچا ہے۔ تاہم جواد ظریف نے یہ واضح نہیں کیا کہ یہ واقعہ کب پیش آیا۔ خیال رہے کہ 17 ستمبر 2024 کو لبنان میں سیکڑوں کی تعداد میں پیجرز میں دھماکے ہوئے تھا جس کے نتیجے میں 12 افراد ہلاک اور ہزاروں زخمی ہوگئے تھے۔ ان دھماکوں کے اگلے ہی روز لبنان میں کئی واکی ٹاکی سیٹس اور موبائل فونز میں دھماکے ہوئے جن کے نتیجے میں مزید 25 افراد ہلاک اور 608 افراد زخمی ہوئے تھے۔لبنان کی مزاحمتی تنظیم حزب اللہ نے ان دھماکوں کا الزام اسرائیل پر عاید کیا تھا، بعد ازاں اسرائیلی وزیر اعظم نے ان حملوں کی ذمے داری قبول کی تھی۔
ذریعہ: Jasarat News
کلیدی لفظ: جواد ظریف نے کے باعث
پڑھیں:
پاکستان کو ایٹمی قوت بنانے میں نوائے وقت کا بھرپور کردار، کرنل (ر) احمد ندیم قادری
لاہور (سپیشل کارسپانڈنٹ) پاکستان کو ایٹمی قوت بنانے میں نوائے وقت کا بھرپور کردار ہے جو آبروئے صحافت مجید نظامی کے صورت میں پوری قوم نے دیکھ رکھا ہے۔ 28 مئی1998ء اسلامی جمہوریہ پاکستان کے لئے تاریخی دن ہے، جس دن پاکستان سائوتھ ایشیا میں طاقت کا توازن قائم رکھتے ہوئے ایٹمی دھماکے کئے۔ ادارہ نوائے وقت پوری قوم کو مبارکباد دیتا ہے۔ نوائے وقت گروپ کے چیف آپریٹنگ آفیسر لیفٹیننٹ کرنل (ر) سید احمد ندیم قادری، تمغہ امتیاز نے ان خیالات کا اظہار مجید نظامی ہال میں 28 مئی یوم تکبیر کی مناسبت سے کیک کاٹنے کی تقریب سے کیا۔ سینئر ساتھیوں ڈائریکٹر مارکیٹنگ بلال محمود، ہیڈ آف ہیومین ریسورسز چودھری شفیق سلطان، آئی ٹی ہیڈ قیصر ندیم، سپیشل کارسپانڈنٹس فیصل ادریس بٹ و خاور عباس سندھو، ہیڈ آف اکائونٹس شاہد انجم تارڑ، ایڈیٹر پھول شعیب مرزا، منیجرز سرکولیشن عابد نذیر سندھو و صغیر امجد، خواجہ ریاض اویس ، فہمید ولسن جانسن ، حاجی محمد امین ، محمد عباس سمیت سٹاف کی بڑی تعداد تقریب میں شریک ہوئی۔ لیفٹیننٹ کرنل (ر) ندیم قادری نے کہا پاکستان ایٹمی صلاحیت سے لیس نہ ہوتا تو بھارت ہمیں سکون سے جینے نہ دیتا۔انہوںنے کہا کہ پاکستان کو ایٹمی قوت بنانے کے پیچھے ہزاروں کردار ہیں ، لیکن سب کو اس بات پر فخر ہے کہ پاکستان آج ایٹمی صلاحیت کا حامل واحد اسلامی ملک ہے ۔ بھارت نے جب 1974ء میں ایٹمی دھماکہ کیا تو ذوالفقار علی بھٹو کی دوراندیشی نے یہ دیکھ لیا تھا کہ اگر پاکستان نے یہ صلاحیت حاصل نہ کی تو بھارت پاکستان کو ختم کرنے کی کوشش کرے گا ، بھٹو نے کہا تھا کہ ہم گھاس کھالیں گے لیکن ایٹم بن ضرور بنائیں گے ۔ محسن پاکستان ڈاکٹر عبدالقدیر کا بیان موجود ہے کہ پاکستان نے 1984 ء میں ایٹمی صلاحیت حاصل کرلی تھی لیکن اس کا اظہار بڑا ضروری تھا ، جس کا پاکستان کو 1998ء میں موقع ملا۔ جب نواز شریف نے بھارت کے پانچ ایٹمی دھماکوں کے جواب میں چھ ایٹمی دھماکے کئے ۔ بھارتی دھماکوں کے بعد پاکستان پر امریکہ کا بہت دبائو تھا کہ پاکستان دھماکے نہ کرے ، اس کے بدلے پہلے اربوں ڈالر کی پیشکش کی پھر پابندیوں کی دھمکی لگائی ۔ ایسے وقت میں معمارنوائے وقت مجید نظامی کا کردار تاریخ کا سنہر ا باب ہے جب انہوں نے مدیران کے اجلاس میں کہا کہ اگر نواز شریف نے ایٹمی دھماکے نہ کئے تو وہ اور قوم ان کا دھماکہ کردے گی جس کے بعد نواز شریف نے کہا کہ اب ہم دھماکے کرنے جارہے ہیں۔ نوائے وقت کا پاکستان کو درپیش چیلنجز سے نکالنے میں کردار قابل فخر ہے ۔ پاکستان کا قیام ہو ، ایٹمی دھماکے کرنے ہوں یا آپریشن بنیان مرصوص ہو ، نوائے وقت نے ہمیشہ فرنٹ لائن کا کردار ادا کیا۔انہوں نے کہا کہ مجید نظامی کی اکلوتی صاحبزادی رمیزہ مجید نظامی ، منیجنگ ڈائریکٹر نوائے وقت گروپ نے معرکہ حق میں ملک و قوم اور پاک افواج کے شانہ بشانہ نوائے کے شاندار کردار کو اسی انداز میں نبھایا جو ادارے کے شان شایان ہے۔یہاں یہ بات قابل ذکر ہے کہ پاک افواج نے نوائے وقت کی شہ سرخی کو اپنے ہورڈنگ بورڈز کی زینت بنایا ۔
مودی کے سر پر جنگ سوار؛ بھارت میں غیر ملکی سرمایہ کاری ڈوبنے لگی