جھوٹی خبر پھیلانے پر 3سال قید 20لاکھ روپے جرمانہ ہوگا پیکا ایکٹ میں ترمیم کا فیصلہ
اشاعت کی تاریخ: 22nd, January 2025 GMT
اسلام آباد: حکومت نے پیکا (دی پریوینشن آف الیکٹرانک کرائم ایکٹ )میں مزید ترامیم کا فیصلہ کرلیا جس کے مسودے کی کاپی بھی سامنے آگئی۔
حکومت نے ایک اور بڑی قانون سازی کی تیاری شروع کردی، حکومت نے دی پریوینشن آف الیکٹرانک کرائم ایکٹ پیکا میں مزید ترامیم لانے کا فیصلہ کیا ہے۔ذرائع کا کہنا ہے کہ سوشل میڈیا سمیت فیک نیوز سے متعلق اہم قانون سازی کی جائے گی جسے جلد منظوری کے لیے پارلیمنٹ میں پیش کیا جائے گا۔
الیکٹرانک کرائمز کی روک تھام(ترمیمی) ایکٹ 2025 مسودے کی کاپی ایکسپریس کو موصول ہوئی ہے۔ مسودے میں ڈیجیٹل رائٹس پروٹیکشن اتھارٹی قائم کرنے کی تجویز دی گئی ہے، ڈی آر پی اے کو آن لائن مواد ہٹانے کا اختیار حاصل ہوگا، اتھارٹی کو ممنوعہ یا فحش مواد تک رسائی حاصل کرنے کا اختیار ہوگا، اتھارٹی کو ممنوعہ مواد شیئر کرنے پر ملوث افراد کے خلاف کارروائی کا اختیار ہوگا۔
مجوزہ ترامیم میں سوشل میڈیا پلیٹ فارم کی نئی تعریف شامل کی گئی ہے، مجوزہ تعریف میں سوشل میڈیا تک رسائی کے لیے استعمال ہونے والے ٹولز اور سافٹ ویئر کا اضافہ کردیا گیا۔
پیکا ایکٹ کے سیکشن 2 میں ایک نئی شق کی تجویز شامل ہے۔ مجوزہ ترمیم میں قانون میں بیان کردہ اصطلاحات کی تعریف شامل ہے۔
سوشل میڈیا تک رسائی کی اجازت دینے والے نظام کو چلانے والا کوئی بھی شخص کو بھی نئی تعریف میں شامل کیا گیا ہے۔مجوزہ ترمیم میں کی گئی تعریف میں ویب سائٹ، ایپلی کیشن یا مواصلاتی چینل کا بھی اضافہ کیا گیا ہے، مجوزہ ترمیم کے تحت حکومت ڈیجیٹل رائٹس پروٹیکشن اتھارٹی قائم کرے گی،اتھارٹی وفاقی اور صوبائی حکومت کو ڈیجیٹل اخلاقیات سمیت متعلقہ شعبوں میں تجاویز دے گی، یہ اتھارٹی تعلیم، تحقیق سوشل میڈیا پلیٹ فارمز کی حوصلہ افزائی اور سہولت فراہم کرے گی، اتھارٹی صارفین کے آن لائن تحفظ کو یقینی بنائے گی۔
ڈی آر پی اے سوشل میڈیا مواد کو ریگولیٹ کرنے کا اختیار ہوگا، اتھارٹی پیکا ایکٹ کے تحت شکایات کی تحقیقات اور مواد تک رسائی کو بلاک یا محدود کرنے کی مجاز ہوگی، اتھارٹی سوشل میڈیا کمپنیوں کیلیے اپنے احکامات پر عمل درآمد کے لیے ٹائم فریم کا تعین کرے گی۔
اتھارٹی سوشل میڈیا پلیٹ فارمز کے لیے پاکستان میں دفاتر یا نمائندے رکھنے کے لیے سہولت فراہم کرے گی۔یہ اتھارٹی چیئرپرسن سمیت دیگر 6 ممبران پر مشتمل ہوگی، وفاقی حکومت 3 سال کے لیے چیئرپرسن اور 3اراکین کا تقرر کرے گی۔
سیکرٹری اطلاعات، سیکرٹری آئی ٹی اور چیئرمین پی ٹی آئی اتھارٹی کے ممبران ہوں گے۔اتھارٹی میں تمام فیصلے اکثریتی اراکین کی رضامندی سے کیے جائیں گے، چیئرپرسن کو کسی بھی غیر قانونی آن لائن مواد کو بلاک کرنے کے لیے ہدایات جاری کرنے کا خصوصی اختیار ہوگا، چیئرپرسن کے فیصلے کی اتھارٹی کو 48 گھنٹوں کے اندر توثیق کرنا ہوگی۔
تجویز کردہ ترامیم کے مطابق اتھارٹی کے پاس سوشل میڈیا پلیٹ فارمز کو قواعد کی پاسداری کے لیے رجسٹرڈ کرنے اور ان کے لیے شرائط طے کرنے کا اختیار ہوگا، اتھارٹی کے پاس حکومت اور سوشل میڈیا کمپنیوں کو غیر قانونی آن لائن مواد کو بلاک یا ہٹانے کا حکم دینے کا اختیار ہوگا۔
مجوزہ ترمیم میں غیر قانونی مواد کی تعریف میں توسیع کردی گئی ہے، پیکا ایکٹ کے سیکشن 37 میں موجودہ غیر قانونی آن لائن مواد کی تعریف میں اسلام مخالف، پاکستان کی سلامتی یا دفاع کے خلاف مواد شامل ہیں۔
غیر قانونی مواد کی تعریف میں امن عامہ، غیر شائستگی، غیر اخلاقی مواد، توہین عدالت یا اس ایکٹ کے تحت کسی جرم کے لیے اکسانا شامل ہیں، پیکا ایکٹ میں مجوزہ ترمیم میں غیر قانونی مواد کے16 اقسام کے مواد کی فہرست دی گئی۔
غیر قانونی مواد میں گستاخانہ مواد، تشدد، فرقہ وارانہ منافرت کو ہوا دینا شامل ہیں۔غیر قانونی مواد میں فحش مواد، کاپی رائٹ کی خلاف ورزی، جرائم یا دہشت گردی کی حوصلہ افزائی شامل ہیں، غیر قانونی مواد میں جعلی یا جھوٹی رپورٹس، آئینی اداروں اور ان کے افسران بشمول عدلیہ یا مسلح افواج کے خلاف الزام تراشی، بلیک میلنگ اور ہتک عزت شامل ہیں۔مجوزہ ترامیم میں بتایا گیا ہے کہ جھوٹی خبر پھیلانے پر تین سال قید 20لاکھ روپے جرمانہ ہوگا، ایکٹ کے تحت سوشل میڈیا پروٹیکشن ٹربیونل قائم کیا جائے گا، وفاقی حکومت تین سال کیلئے ٹربیونل ممبران تعینات کرے گی، سوشل میڈیا پروٹیکشن ٹربیونل 90روز میں کیس نمٹانے کے پابند ہوں گے۔
مسودے کے مطابق ٹربیونل کے فیصلے کے خلاف اپیل سپریم کورٹ میں دائر کی جاسکے گی، ٹربیونل فیصلے کو 60 روز کے اندر اپیل سپریم کورٹ میں دائر کرنے کا اختیار ہوگا، ایکٹ کے تحت وفاقی حکومت نیشنل سائبر کرائم انوسٹی گیشن ایجنسی کا قیام عمل میں لایا جائے گا، این سی سی آئی اے سائبر کرائم سے متعلق مقدمات کی تحقیقات کرے گی۔
وفاقی حکومت تین سال کیلئے ڈی جی نیشنل سائبر کرائم انوسٹی گیشن ایجنسی کا تقرر کرے گی، ڈی جی نیشنل سائبر کرائم ایجنسی آئی جی پولیس کے عہدے کے برابر ہوگا، نیشنل سائبر کرائم انوسٹی گیشن ایجنسی قیام کے بعد ایف آئی اے سائبر کرائم کے تمام دفاتر اور مقدمات ایجنسی کو منتقل ہوجائیں گے۔
مجوزہ ترامیم کے تحت ایف آئی اے سائبر کرائم ونگ ختم کرنے کا فیصلہ کیا گیا ہے۔ ایف آئی اے سائبر کرائم کے تمام اثاثے، بجٹ، این سی سی آئی اے کو منتقل ہوجائیں گے، اس کے متبادل کے طور پر قائم اتھارٹی 8 ممبران پر مشتمل ہوگی، 5ممبران کا تقرری وفاقی حکومت کرے گی۔
مجوزہ ترامیم کے مطابق قومی اسمبلی سینیٹ اور صوبائی اسمبلیوں میں حذف مواد سوشل میڈیا پر نشر کرنے پر کارروائی ہوگی، اسپیکرز و چیئرمین سینیٹ کی طرف سے حذف مواد نشر کرنے پر تین سال قید اور بیس لاکھ روپے جرمانہ کیا جاسکے گا۔
.ذریعہ: Juraat
کلیدی لفظ: کرنے کا اختیار ہوگا آئی اے سائبر کرائم سوشل میڈیا پلیٹ غیر قانونی مواد آن لائن مواد وفاقی حکومت ایکٹ کے تحت پیکا ایکٹ تعریف میں کا فیصلہ کی تعریف شامل ہیں تک رسائی تین سال مواد کی کے خلاف کرے گی گیا ہے کے لیے
پڑھیں:
16 سال سے کم عمر بچوں نے سوشل میڈیا اکاؤنٹ بنایا تو کتنی سزا ہوگی؟
سینیٹ میں ’سوشل میڈیا (ایج رجسٹریشن فار یوزرس ) بل 2025‘ پیش کیا گیا ہے، جس کے تحت 16 سال سے کم عمر بچوں پر سوشل میڈیا اکاؤنٹ بنانے کی پابندی عائد کرنے کی تجویز دی گئی ہے۔
اس بل کا مقصد بچوں کو سائبر بُلئنگ، ہراسانی، ذہنی دباؤ اور فحش مواد جیسے خطرات سے بچانا ہے۔
بل میں واضح کیا گیا ہے کہ اگر کوئی سوشل میڈیا پلیٹ فارم اس پابندی کی خلاف ورزی کرے گا تو اس پر کم از کم 50 ہزار روپے جبکہ زیادہ سے زیادہ 50 لاکھ روپے تک جرمانہ عائد کیا جا سکتا ہے۔ اس کے علاوہ، اگر کوئی فرد نابالغ کو اکاؤنٹ بنانے میں مدد فراہم کرے گا تو اسے 6 ماہ قید کی سزا دی جا سکے گی۔
اس قانون کے نفاذ کے لیے پاکستان ٹیلی کمیونیکیشن اتھارٹی (PTA) کو ذمہ داری سونپی گئی ہے، جو نابالغ صارفین کے اکاؤنٹس بند کرنے اور پلیٹ فارمز کے لیے ضوابط بنانے کی مجاز ہوگی۔
یہ بھی پڑھیے کم عمر صارفین کی سوشل میڈیا تک رسائی پر پابندی، سینیٹ میں بل پیش
بل پیش کرنے والوں کے مطابق دنیا کے دیگر ممالک، خصوصاً آسٹریلیا اور نیوزی لینڈ میں بھی اس نوعیت کی قانون سازی کی جا چکی ہے، جہاں نابالغوں کی سوشل میڈیا تک رسائی محدود کی جا رہی ہے۔
اس حوالے سے آئینی ماہرین کا کہنا ہے کہ اس قانون پر عمل درآمد ایک بڑا چیلنج ہوگا، کیونکہ بچوں کی درست عمر کی تصدیق کے لیے کوئی مؤثر نظام موجود نہیں، اور کئی بچے جعلی تاریخ پیدائش دے کر پابندی کو بائی پاس کر سکتے ہیں۔ مزید برآں، اس قانون کے اطلاق سے آزادی اظہار اور پرائیویسی کے حوالے سے بھی سوالات پیدا ہو رہے ہیں۔
ماضی میں کمسن بچوں کے تحفظ کے حوالے سے قوانین بنانے میں معاونت کرنے والے وکیل شرافت علی کا کہنا تھا کہ بچوں کی حفاظت کے نام پر ایسا قانون لانا جس کا نفاذ عملی طور پر ممکن نہ ہو، صرف کاغذی کارروائی بن کر رہ جائے گا۔ اگر حکومت واقعی سنجیدہ ہے تو اسے پہلے عمر کی تصدیق کے موثر اور محفوظ نظام، والدین کی تربیت اور ڈیجیٹل لٹریسی جیسے اقدامات کو بنیاد بنانا چاہیے۔ بصورت دیگر، یہ قانون صرف نمائشی حیثیت رکھے گا اور بچے باآسانی عمر چھپا کر پلیٹ فارمز تک رسائی حاصل کر سکیں گے۔
انہوں نے زور دیا کہ ایسے قوانین بنانے سے پہلے پارلیمانی مشاورت، تکنیکی ماہرین کی رائے، اور انسانی حقوق کمیشن کی شمولیت ضروری ہے تاکہ قانون سازی متوازن ہو، مؤثر بھی رہے اور آئینی حدود سے متجاوز بھی نہ ہو۔
’میری ذاتی رائے میں پاکستان میں سوشل میڈیا کا استعمال جہاں بچوں کے لیے سیکھنے، اظہارِ خیال اور کمانے کے نئے مواقع پیدا کر رہا ہے، وہیں اس کے ساتھ جڑے خطرات کہیں زیادہ اور سنگین ہیں۔ اس پلیٹ فارم کے بے لگام استعمال سے معاشرے میں کئی نئے سماجی، نفسیاتی اور اخلاقی مسائل جنم لے رہے ہیں۔ ایسے میں اگر کوئی قانون بچوں کو ان نقصانات سے محفوظ رکھنے کے لیے متعارف کروایا جاتا ہے تو ممکن ہے کہ یہ ایک مثبت سماجی رجحان قائم کرنے میں مددگار ثابت ہو۔‘
واضح رہے کہ بل کو اب سینیٹ کی متعلقہ کمیٹی کو بھیج دیا گیا ہے جہاں اس پر مزید غور کیا جائے گا، اور منظوری کے بعد یہ قومی اسمبلی میں پیش کیا جائے گا۔
یہ بھی پڑھیے برازیل کی سپریم کورٹ کا اہم فیصلہ، سوشل میڈیا کمپنیوں کو صارفین کے مواد پر جوابدہ ٹھہرایا جا سکتا ہے
قرۃ العین راولپنڈی میں ایک نجی بینک میں ملازم ہیں۔ اور 3 بچوں کی ماں ہیں۔ جنہوں نے اس حوالے سے بتایا ’ماں ہونے کے ناتے میں روز یہ دیکھتی ہوں کہ ہمارے بچے کس حد تک سوشل میڈیا کے زیرِ اثر آ چکے ہیں۔ ان کے خیالات، عادتیں اور یہاں تک کہ نیند کا شیڈول بھی سوشل میڈیا سے متاثر ہو رہا ہے۔ ہمیں سمجھنا ہوگا کہ 12 یا 14 سال کا بچہ ابھی جذباتی اور ذہنی طور پر اتنا پختہ نہیں ہوتا کہ وہ آن لائن ہراسانی، فحش مواد یا غلط معلومات کا سامنا کر سکے۔‘
کپتی ہیں کہ ان کے نزدیک اگر حکومت سوشل میڈیا پر عمر کی حد مقرر کر رہی ہے تو یہ قدم بچوں کی فلاح کے لیے ہے، نہ کہ ان کی آزادی سلب کرنے کے لیے۔ ہاں، اس پر عمل درآمد ایک چیلنج ہو سکتا ہے، مگر بحیثیت والدین ہمیں بھی اپنی ذمے داری ادا کرنی ہوگی۔ صرف قانون پر انحصار نہیں کیا جا سکتا۔ ہمیں چاہیے کہ ہم خود اپنے بچوں کے ساتھ بیٹھ کر ان کو سوشل میڈیا کے فائدے اور نقصانات سمجھائیں، ان کی آن لائن سرگرمیوں پر نرمی سے نظر رکھیں، اور وقتاً فوقتاً ان سے بات کریں۔
’ کیونکہ آج کل سوشل میڈیا کی وجہ سے جو حالات ہو چکے ہیں۔ اگر اس طرح کے اقدامات نہ کیے گئے تو نسلوں کی نسلیں تباہ ہو جائیں گی۔‘
کون سے ممالک میں اس قسم کے قوانین موجود ہیں؟امریکا
امریکا میں 13 سال سے کم عمر بچوں کے لیے سوشل میڈیا پر اکاؤنٹ بنانا قانونی طور پر ممنوع ہے۔ یہ پابندی ’چلڈرنز آن لائن پرائیویسی پروٹیکشن ایکٹ‘ (COPPA) کے تحت نافذ ہے، جو سوشل میڈیا پلیٹ فارمز کو پابند کرتا ہے کہ وہ نابالغ صارفین کی معلومات والدین کی اجازت کے بغیر جمع نہ کریں۔ اسی قانون کی وجہ سے پلیٹ فارمز جیسے فیس بک، انسٹاگرام، اور یوٹیوب پر 13 سال سے کم عمر افراد کے اکاؤنٹس بنانے کی اجازت نہیں دی جاتی۔
برطانیہ
برطانیہ نے ’ایج اپروپریئیٹ ڈیزائن کوڈ‘ کے نام سے بچوں کے آن لائن تحفظ کے لیے ایک جامع ضابطہ اخلاق متعارف کروایا ہے، جو بچوں کے لیے استعمال ہونے والے تمام پلیٹ فارمز کو اس بات کا پابند بناتا ہے کہ وہ صارف کی عمر کا درست اندازہ لگائیں اور پرائیویسی کو ترجیح دیں۔ یہاں بھی کم از کم عمر کی حد 13 سال ہے۔
یورپی یونین
یورپی یونین میں جنرل ڈیٹا پروٹیکشن ریگولیشن (GDPR) کے تحت بچوں کے لیے ڈیجیٹل خدمات تک رسائی 16 سال کی عمر سے مشروط ہے، تاہم رکن ممالک اس حد کو کم کر کے 13 سال بھی مقرر کر سکتے ہیں۔ اس قانون کے مطابق سوشل میڈیا پلیٹ فارمز بچوں کی معلومات والدین کی اجازت کے بغیر جمع نہیں کر سکتے۔
آسٹریلیا
آسٹریلیا نے حال ہی میں 16 سال سے کم عمر بچوں کے سوشل میڈیا اکاؤنٹ بنانے پر مکمل پابندی کا فیصلہ کیا ہے، جس کا نفاذ 2025 کے اختتام تک متوقع ہے۔ اس پابندی کے ساتھ حکومت عمر کی تصدیق کے سخت نظام بھی متعارف کروانے جا رہی ہے تاکہ بچے جعلی تاریخ پیدائش کے ذریعے پلیٹ فارمز تک رسائی حاصل نہ کر سکیں۔
یہ بھی پڑھیے کم عمری میں اسمارٹ فون کا استعمال ذہنی صحت کے لیے نقصان دہ، تحقیق
نیوزی لینڈ
نیوزی لینڈ میں فی الحال 13 سال کی عمر کی حد نافذ ہے، تاہم حکومتی سطح پر یہ تجویز زیر غور ہے کہ بچوں کے لیے سوشل میڈیا اکاؤنٹس بنانے کی عمر 16 سال تک بڑھا دی جائے۔ اس کے ساتھ ہی بچوں کے آن لائن ڈیٹا اور پرائیویسی کے تحفظ کے لیے اضافی قوانین پر بھی کام جاری ہے۔
چین
چین میں بچوں کی آن لائن سرگرمیوں پر سخت ترین کنٹرول موجود ہے۔ 18 سال سے کم عمر بچوں کو رات 10 بجے کے بعد سوشل میڈیا اور گیمنگ پلیٹ فارمز استعمال کرنے کی اجازت نہیں۔ علاوہ ازیں، چین میں ’ریئل نیم رجسٹریشن‘ اور چہرے کی شناخت جیسے نظام بھی رائج کیے گئے ہیں تاکہ بچوں کی رسائی کو محدود کیا جا سکے۔
سنگاپور
سنگاپور میں 13 سال سے کم عمر بچوں کے لیے سوشل میڈیا پر اکاؤنٹ بنانا منع ہے، اور پلیٹ فارمز پر لازم ہے کہ وہ بچوں کے ڈیٹا کو اکٹھا کرنے سے قبل والدین کی رضامندی حاصل کریں۔ پرسنل ڈیٹا پروٹیکشن ایکٹ کے تحت عمر کی تصدیق کے اقدامات بھی متعارف کروائے گئے ہیں۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
سوشل میڈیا بل 2025
ٹرمپ انتظامیہ اور کیلیفورنیا میں انڈوں کا تنازع شدت اختیار کر گیا