جماعت اسلامی سندھ کا انڈس ہائی وے پر دھرنا ،پولیس سے جھڑپیں ،وزیراعلیٰ ہاؤس کے گھیراؤں کا اعلان
اشاعت کی تاریخ: 17th, February 2025 GMT
امیر جماعت اسلامی سندھ کاشف سعید شیخ ڈاکو راج کی سرکاری سرپرستی کے خلاف کندن چوک انڈس ہائی وے پر عوامی دھرنے سے خطاب کررہے ہیں
کراچی/شکارپور (نمائندہ جسارت) بالائی سندھ میں بدامنی اور ڈاکو راج کی سرکاری سرپرستی کے خلاف بحالی امن ایکشن کمیٹی اور جماعت اسلامی کی جانب سے صوبائی امیر کاشف سعید شیخ کی قیادت میں کندن چوک انڈس بائی پاس کے پاس زبردست دھرنا دیا گیا۔ انڈس ہائی وے پر کئی گھنٹوں تک جاری دھرنے کی وجہ سے کراچی پنجاب اور بلوچستان جانے والی سیکڑوں گاڑیاں رک گئیں۔ ابتدائی طور پر ڈی آئی پی انچارج شاہجہان شاہ نے تین تھانوں کے ایس ایچ اوز سمیت پولیس اٹالوں سے کارکنوں کو ہٹانے کی کوشش کی لیکن کارکنان کی بھرپور مزاحمت کے بعد پولیس پیچھے ہٹ گئی۔ اس موقع پر دھرنے کے شرکا نے امن کھپے امن کھپے، امن کی نگری امن چاہتی ہے، ڈاکو راج نامنظور کے فلک شگاف نعرے لگا رہے تھے۔ دھرنے سے جماعت اسلامی کے علاوہ بحالی امن ایکشن کمیٹی میں شامل سیاسی، سماجی، قوم پرست تنظیموں کے رہنماؤں کے علاوہ تاجروں، صحافی برادری، وکلا، اقلیتوں اور سول سوسائٹی کے نمائندوں نے بھی خطاب کیا۔ رہنماؤں نے مطالبہ کیا کہ ڈاکوؤں اور ان کے سرپرستوں کے خلاف بھرپور آپریشن اور تمام مغویوں کو جلد بازیاب کرکے سندھ کا امن بحال کیا جائے۔اس موقع پر جماعت اسلامی سندھ کے امیر کاشف سعید شیخ نے عید کے بعد فیصلہ کن تحریک کا اعلان کرتے ہوئے کہا کہ اگر حکومت نے امن امان کی بحالی میں سنجیدگی نہ دکھائی تو رمضان شریف کے بعد دوببرلو سے کراچی تک نیشنل ہائی وے کو بلاک اور وزیر اعلیٰ ہاؤس کا گھیراؤ کیا جائے گا۔ انہوں نے مطالبہ کیا کہ پیپلز پارٹی اپنے صفوں سے ڈاکوؤں کے سرپرستوں کو نکال دے۔ انہوں نے کہا کہ سندھ میں 17 سال سے پیپلزپارٹی کی حکومت قائم ہے۔ ناپرکوٹ میں 9 مزدوروں کو اغوا کر لیا گیا، اسی طرح شکارپور، کنڈھ کوٹ اور گھوٹکی سے کئی افراد اغوا شدہ ہیں لیکن پولیس صرف سرداروں،وڈیروں اور وزیروں مشیروں کو فول پروف پروٹوکول دینے میں مصروف ہے،پولیس رینجرز ایف سی اور پنوعاقل کی چھاؤنی کی موجودگی کے باوجود سندھ کے عوام امن سے محروم ہیں۔ انہوں نے مزید کہا کہ سندھ حکومت کا دوہرا اور منافقانہ کردار ہے، یہاں امیر اور غریب کے لیے الگ الگ قانون رائج ہے۔ حکمران روزانہ لوگوں کو لولی پوپ دے رہے ہیں،تمام مغویوں کی بازیابی اور امن کی بحالی تک ہماری پرامن جدوجہد جاری رہے گی۔ اقلیتی رہنما اور شہری اتحاد کندھ کوٹ کے صدر ڈاکٹر مہر چند نے دھرنے سے خطاب کرتے ہوئے کہا کہ امن ہماری مانگ نہیں بلکہ حکومت کی ذمہ داری ہے۔ ہم صرف امن چاہتے ہی، عوام امن اور اپنے حقوق کے لیے میدان میں نکل آئے ہیں، کشمور کندھ کوٹ ضلع لوٹ مار راج اور اغوا انڈسٹری کے حوالے سے پورے پاکستان میں مشہور ہوچکا ہے۔ ایم ڈبلیو ایم کیمرکزی رہنما علامہ مقصود احمد ڈومکی نے کہا کہ ایک سردار پر حملہ ہوا تو مرادعلی شاہ سمیت تمام سردار باہر نکل آئے، یہاں غریبوں کا الگ تو امیروں کے لیے الگ پاکستان ہے۔ملی یکجہتی کونسل سندھ کے صدر اورسابق ایم این اے مولانا اسداللہ بھٹو نے کہا کہ امن ہمارے بچوں کی بنیادی ضرورت ہے، امن کے بغیر کچھ نہیں ہو سکتا۔ سندھ کے وزیراعلیٰ مراد علی شاہ امن بحال نہیں کر سکتے تو کرسی خالی کر دیں،پیپلز پارٹی کی حکومت عوام کو تحفظ دینے کے بجائے ڈاکوؤں کی سرپرستی کررہی ہے۔جماعت اسلامی سندھ کے جنرل سیکرٹری محمد یوسف نے عوامی دھرنے سے خطاب کرتے ہوئے کہا کہ سندھ کے عوام ڈاکوراج کو کسی صورت بھی قبول نہیں کریں گے،جدید اسلحہ جو پولیس اہلکاروں کے پاس بھی نہیں وہ ڈاکوئوں کے پاس موجود ہے۔ ایس یو پی کے ڈویزنل صدر ظریت ساگر بجارانی نے کہا کہ امن ہر انسان، چرند پرند کی ضرورت ہے۔،سندھ میں آرٹیفیشل ڈاکو راج کے نشانات پیپلز پارٹی کے منتخب نمائندوں کے گھروں کی طرف جاتے ہیں۔ پی ٹی آئی کے رہنما عبدالعزیز سومرو نے کہا کہ جماعت اسلامی واحد جماعت ہے جس نے ہمیشہ عوام کی ترجمانی کی ہے، پیپلز پارٹی کی سرپرستی میں ڈاکو راج قائم ہے۔ دھرنے سے جماعت اسلامی سندھ کے رہنما حافظ نصر اللہ چنا، علامہ حزب اللہ جکھرو، سہیل احمدشارق،جے یو آئی کے علی حسن مارفانی، جئے سندھ قومی محاذ کے عبدالسمیع بلالی، جے یو پی کے فضل للہ نورانی، کمیونسٹ پارٹی کے ممتازمنگی، سندھی ادبی سنگت کے زبیر سومرو، تبدیلی کے پسند پارٹی کے ہمیر چانڈیو، سول سوسائٹی کے ظفر علوی، راشد لاشاری، عادل جان شیخ، وکیل رہنما علی اصغر پہوڑ، جئے سندھ محاذ کے عمران منگی، اسداللہ سومرو، ضلع شکارپور کے امیر عبدالسمیع بھٹی، مقامی امیر مولانا صدر الدین مہر نے بھی خطاب کیا جبکہ اسٹیج سیکرٹری کے فرائض ڈپٹی جنرل سیکرٹری امداد اللہ بجارانی نے انجام دیے۔
ذریعہ: Jasarat News
کلیدی لفظ: جماعت اسلامی سندھ پیپلز پارٹی نے کہا کہ ڈاکو راج سندھ کے ہائی وے
پڑھیں:
سندھ میں وزیراعلیٰ ہاؤس سے لے کر نیچے تک لوٹ مار جاری،حافظ نعیم
یہ کیا ڈرامہ ہے سڑکیں ٹھیک نہیں،مہنگے ای چالان کئے جارہے ہیں، ٹرانسپورٹ ہے نہیں،امیر جماعت اسلامی
ای چالان ہزاروں میں آرہے ہیں،لاہور میں جو چالان 200 کا ہے سندھ میں 5 ہزار کا ہے، تقریب سے خطاب
امیر جماعت اسلامی حافظ نعیم الرحمان نے کہا ہے کہ یہ کیا ڈرامہ ہے سڑکیں ٹھیک نہیں اور مہنگے ای چالان کئے جارہے ہیں، ٹرانسپورٹ ہے نہیں اور ای چالان ہزاروں میں آرہے ہیں، لاہور میں جو چالان 200 روپے کا ہے سندھ میں 5 ہزار روپے کا ہے۔سندھ میں وزیراعلیٰ ہاؤس سے لے کر نیچے تک لوٹ مار جاری ہے ۔کراچی میں ایک تقریب سے خطاب کرتے ہوئے حافظ نعیم نے کہا کہ ایک مرتبہ پھر 9 ٹاؤنز میں ترقیاتی کاموں کا سلسلہ دوبارہ شروع ہوگیا ہے، ہم اپنی بساط سے زیادہ کام کر رہے ہیں اور کرتے رہیں گے، مرتضیٰ وہاب کے کام بھی ہم کو دیکھنے پڑتے ہیں، ایس تھری منصوبہ کہاں چلا گیا ہے؟ انہوں نے کہا کہ کراچی سرکلر ریلوے نہیں بن رہا، جبکہ ریڈ لائن نے یونیورسٹی روڈ کا برا حال کردیا ہے، اورنج لائن میں بھی پورے اورنگی کو کور نہیں کیا گیا، 400 بسیں لا کر لوگوں کو بے وقوف بنایا جارہا ہے، لوٹ مار اور قبضے کے نظام سے شہر کو آزادی دلائیں گے۔امیر جماعت اسلامی کا کہنا تھا کہ بلدیاتی انتخابات جیت کر لوگ کہتے تھے اختیارات ملیں گے نہیں تو کام کیسے کریں گے، پیپلز پارٹی کی سیٹوں میں من پسند حلقہ بندیوں کی وجہ سے اضافہ ہوا، پیپلز پارٹی نے دھاندلی کر کے اپنا میٔر بنایا اور ابھی تک ٹاؤن کو اختیارات منتقل نہیں کیے۔انہوں نے کہا کہ کچرا اٹھانے کا اختیار بھی سندھ حکومت کے پاس ہے، گھر سے جو کچرا اٹھایا جاتا ہے اس کے پیسے لوگ خود ادا کرتے ہیں، سالڈ ویسٹ منیجمنٹ کے پاس گھر سے کچرا اٹھا کر لینڈ فیلڈ سائٹ تک پہنچانے کا پورا میکنزم موجود ہے۔ان کا کہنا تھا کہ ٹاؤن کو کام کرنے سے روکا جارہا ہے، سٹی وارڈن کو استعمال کر کے کام میں روڑے اٹکائے جارہے ہیں، جماعت اسلامی اپنے ٹاؤنز میں اختیارات سے بڑھ کر کام کر رہی ہے، سیوریج اور کچرے کا کام بھی ٹاؤن کر رہا ہے، 12 سے 15 سال سے کراچی کے بڑے منصوبے تاخیر کا شکار ہیں، جماعت اسلامی کے تحت تعمیر و ترقی کا سلسلہ شروع ہوگیا ہے۔انہوں نے کہا کہ سیوریج کا کام کر کے سڑکیں بنانی پڑتی ہیں اور سیوریج کا نظام بھی ٹاؤن کو خود دیکھنا پڑ رہا ہے، 15 سالوں میں پیپلز پارٹی نے کراچی کے لیے کچھ نہیں کیا، صرف قبضے کی سیاست جاری ہے، گاؤں اور دیہات پر قبضے کے بعد شہروں پر قبضہ کرلیا ہے، تعلیم خیرات نہیں یہ ہمارے بچوں کا حق ہے۔
جامعہ کراچی کے عقب میں جھاڑیوں میں آگ لگ گئی