ایم کیو ایم کی کوششوں سے بجلی کی قیمت کم ہوئی، فاروق ستار کا دعویٰ
اشاعت کی تاریخ: 4th, April 2025 GMT
کراچی:
ایم کیو ایم پاکستان کے سینئر رہنما ڈاکٹر فاروق ستار نے دعویٰ کیا ہے کہ ایم کیو ایم پاکستان کی کوششوں کے نتیجے میں وزیرِاعظم نے بجلی کے نرخوں میں 12 سے 17 فیصد کمی کا اعلان کیا جو عوام کے لیے ایک بڑا ریلیف ہے۔
ایم کیو ایم پاکستان کے مرکز بہادرآباد میں پریس کانفرنس کرتے ہوئے فاروق ستار نے کہا کہ عید کے بعد کراچی میں ایم کیو ایم کے پروگرام میں وزیرِاعظم سے بجلی کی قیمت میں مزید 6 روپے کمی کا اعلان کروایا جائے گا۔
انہوں نے کہا کہ پیپلز پارٹی نے دریائے سندھ سے چھ کینال منصوبے پر دوغلی پالیسی اپنائی، پہلے صدر نے اس منصوبے کی حمایت کی اور اب عوامی دباؤ میں اس کی مخالفت کی جا رہی ہے۔ صدر مملکت کو عوام سے معافی مانگنی چاہیے۔
ڈاکٹر فاروق ستار نے کہا کہ ہم وزیرِاعظم شہباز شریف کا شکریہ ادا کرتے ہیں کہ انہوں نے ہمارے مطالبے پر یہ اقدام اٹھایا۔ ہم نے واضح طور پر کہا تھا کہ عید کے بعد وزیرِاعظم بجلی کی قیمت میں 5 سے 10 روپے فی یونٹ کمی کا اعلان کریں گے۔
فارو ق ستار نے کہا کہ وزیر اعظم کے اعلان کے بعد تاجر اور صنعت کاروں نے ایم کیو ایم پاکستان کا شکریہ ادا کیا، اور میں اس شکریہ کو وزیرِاعظم تک پہنچا رہا ہوں۔ 10 ہزار کے بجلی بل پر 1500 روپے تک کمی ملے گی۔
انہوں نے کہا کہ ہم نے آئی پی پیز کے معاملے پر بھی کافی جدوجہد کی۔ وزیرِاعظم پاکستان عید کے بعد کراچی آئیں گے اور ایم کیو ایم پاکستان کے منعقدہ پروگرام میں شریک ہوں گے۔ بجلی کی قیمت میں مزید 6 روپے فی یونٹ کمی متوقع ہے۔
فاروق ستار نے کہا کہ 26 کروڑ گیلن کا منصوبہ یعنی کے فور کا پہلا مرحلہ اگلے سال تک مکمل ہو جائے گا۔ یہ منصوبہ کراچی واٹر اینڈ سیوریج بورڈ سے لے کر واپڈا کے سپرد کیا گیا ہے۔ ہم سب نے وزیرِاعظم پر دباؤ ڈال کر اور احسن اقبال سے ملاقاتیں کرکے یہ ممکن بنایا۔ یومیہ 26 کروڑ گیلن پانی کے فور کے پہلے مرحلے سے اضافی ملے گا۔
فاروق ستار نے کہا کہ وفاق سے 20 ارب روپے کراچی کے ایم پی ایز اور 6 ارب روپے حیدرآباد کے ایم این ایز کے لیے دیے جائیں گے۔ ہم پائیدار سڑکیں بنائیں گے اور بلدیاتی مسائل حل کریں گے۔ اس ریلیف سے تاجر اور صنعت کار فائدہ اٹھائیں گے، غربت اور بے روزگاری میں کمی آئے گی، جبکہ مہنگائی میں بھی کمی کی توقع ہے۔
انہوں نے کہا کہ کچھ لوگ اپنی سیاست چمکانے کے لیے بے جا دعوے کر رہے ہیں۔ ہم حکومت اور منتخب ایوانوں میں موجود ہیں اور وزیرِاعظم اور وفاقی وزراء سے مسلسل رابطے میں ہیں۔ ہر کسی کو دعوے کرنے کا حق ہے، لیکن کیا جماعتِ اسلامی کو معلوم تھا کہ عید کے بعد بجلی کی قیمت میں کمی ہوگی؟۔
فاروق ستار نے کہا کہ بلدیاتی حکومت میں جماعت اسلامی اپوزیشن میں ہے، لیکن انہوں نے عوامی مسائل کے حل کے لیے کتنے دھرنے دیے؟ کیا انہوں نے پنشن دلوانے کے لیے کوئی جدوجہد کی؟ جماعت اسلامی بھی ہماری بدولت بلدیاتی ایوانوں میں پہنچی ہے۔ جماعت اسلامی نے سڑکوں کی تعمیر اور نکاسی آب کے نظام کے لیے کتنا بجٹ مختص کیا؟ انہیں حساب دینا چاہیے۔
.ذریعہ: Express News
کلیدی لفظ: فاروق ستار نے کہا کہ ایم کیو ایم پاکستان بجلی کی قیمت میں عید کے بعد انہوں نے کے لیے ایم کی
پڑھیں:
وزیر اعظم کے کزن کی نماز جنازہ و تدفین
وزیر اعظم شہباز شریف اور مسلم لیگ ن کے صدر نواز شریف کے کزن میاں شاہد شفیع کو سپرد خاک کردیا گیا۔
میاں شاہد شفیع کی نماز جنازہ لاہور میں ادا کی گئی جس میں شریف فیملی کے نمایاں افراد اور دیگر اہم شخصیات نے شرکت کی۔
سابق وزیرِ اعظم و مسلم لیگ ن کے صدر نواز شریف اور وزیرِ اعظم شہباز شریف کے کزن شاہد شفیع انتقال کر گئے۔
ان کی نماز جنازہ اتفاق مسجد ماڈل ٹاؤن میں قاری نصیر نے پڑھائی جس میں وزیر اعظم شہباز شریف، سابق وزیر اعظم نواز شریف، حمزہ شہباز، وفاقی وزراء خواجہ محمد آصف، امیر مقام، سلمان شہباز نے شرکت کی۔
اس کے علاوہ دیگر افراد میں عابد شیر علی، بلال یاسین، خواجہ احمد حسان، میاں جاوید لطیف، گوہر اعجاز، روحیل منیر، سہیل ضیاء بٹ، آئی جی اسلام آباد علی ناصر رضوی، سہیل ضیاء بٹ، رانا محمد ارشد اور عرفان دولتانہ شامل تھے۔
مرحوم کو انجینئرنگ یونیورسٹی کے قریب بدھو کا آوا کے آبائی قبرستان میں سپرد خاک کیا گیا۔
حکومت چلانے کیلیے آپ کے مشوروں کی ضرورت نہیں، گورنر پنجاب کے خط پر عظمیٰ بخاری کا ردعمل