شہید حسین امیر عبداللہیان ادب و اخلاق کا مظہر تھے، ایرانی وزیر خارجہ
اشاعت کی تاریخ: 21st, May 2025 GMT
سابق ایرانی وزیر خارجہ کو خراج تحسین پیش کرتے ہوئے سید عباس عراقچی کا کہنا تھا کہ انہوں نے وعدہ صادق 1 کے دوران جو سفارتی اقدامات کئے وہ واقعی یونیورسٹی میں پڑھائے جانے کے قابل ہیں۔ اسلام ٹائمز۔ گزشتہ سال ہیلی کاپٹر حادثے میں شہید ہونے والے سابق وزیر خارجہ "حسین امیر عبداللہیان" کی پہلی برسی اسلامی جمہوریہ ایران کے دفتر خارجہ میں منائی گئی۔ اس موقع پر وزیر خارجہ "سید عباس عراقچی" نے اظہار خیال کرتے ہوئے کہا کہ مجھے فخر ہے کہ میں ڈاکٹر صالحی کی مشاورتی کونسل میں ڈاکٹر حسین امیر عبداللہیان کے ساتھ تھا۔ وہ بہت اچھا وقت تھا۔ شہید حسین امیر عبداللہیان کسی بھی چیز سے پہلے ہمارے لئے ایک دوست، بھائی، معاون اور مہربان تھے۔ وزارت خارجہ میں سب لوگ انہیں اُن کے ادب و اخلاق سے جانتے تھے۔ اپنی وزارت کے دوران انہوں نے بہت کامیابیاں سمیٹیں۔ وہ اپنی شائستگی اور تواضع کی بدولت وزارت میں سب کے دلوں پر راج کرتے تھے۔ امیر عبداللهیان، امیرِ سفارت کاری تھے تاہم وہ اس سے بڑھ کر امیر اخلاص و ایمان تھے۔ خداوند متعال ہمیں ان کی راہ پر گامزن رہنے کی توفیق دے۔
سید عباس عراقچی نے کہا کہ میں اور شہید حسین امیر عبداللہیان یونیورسٹی میں تھے اور ایک دوسرے سے دو تین سال کے فاصلے سے وزارت خارجہ میں داخل ہوئے۔ وہ عرب دنیا اور میں بین الاقوامی میدان میں مشغول رہا۔ انہوں نے عرب دنیا میں بہت کام کیا۔ وہ عرب ڈیسک پر بہت تسلط رکھتے تھے۔ وہ ہمارے ان ساتھیوں میں سے تھے جنہوں نے مقاومتی میدان میں بہت خدمات سرانجام دیں اور انہیں اسی صفت کی وجہ سے جانا جاتا ہے۔ اس دوران ایرانی وزیر خارجہ نے آپریشن طوفان الاقصیٰ اور وعدہ صادق کے بارے میں کہا کہ میرے طلباء اس بات کی گواہی دے سکتے ہیں اور میں اُن کی زندگی میں بھی یہ کہہ چکا ہوں کہ انہوں نے وعدہ صادق 1 کے دوران جو سفارتی اقدامات کئے وہ واقعی یونیورسٹی میں پڑھائے جانے کے قابل ہیں۔ انہوں نے کہا کہ ہم ان شہداء کے وارث ہیں۔ ہم اپنی قوم کی عزت و وقار کے لئے کوئی کسر نہیں چھوڑیں گے۔
ذریعہ: Islam Times
پڑھیں:
پاکستان کا صنعتی شعبہ بہتر ہو رہا ہے، آئی ٹی اور سروسز میں ترقی ہو رہی ہے اور غیر ملکی سرمایہ کار پاکستان کا رخ کررہے ہیں ، جام کمال خان
تہران (اُردو پوائنٹ اخبارتازہ ترین - اے پی پی۔ 16 ستمبر2025ء) وفاقی وزیرِ تجارت جام کمال خان نے پاکستان اور ایران کے درمیان ’’مشترکہ خوشحالی کے نئے باب‘‘ کے آغاز کا اعلان کرتے ہوئے کہا ہے کہ پاکستان کا صنعتی شعبہ بہتر ہو رہا ہے، آئی ٹی اور سروسز میں ترقی ہو رہی ہے اور غیر ملکی سرمایہ کار پاکستان کا رخ کررہے ہیں ۔ ان خیالات کا اظہار انہوں نے پاک ایران بزنس فورم 2025 سے خطاب کرتے ہوئے کیا۔ یہ فورم تہران میں پاکستان۔ایران مشترکہ اقتصادی کمیشن (JEC) کے 22ویں اجلاس کے موقع پر منعقد ہوا جس میں بڑی تعداد میں ایرانی اور پاکستانی کاروباری رہنماؤں، حکام اور سفارت کاروں نے شرکت کی۔ منگل کوتہران سے جاری پریس ریلیز کے مطابق وفاقی وزیر تجارت جام کمال خان نے فورم سے خطاب میں کہا کہ بزنس فورم کا اتنے بڑے پیمانے پر پہلی مرتبہ انعقاد اس امر کا مظہر ہے کہ دونوں ممالک کی قیادت اور عوام دوستی کو ٹھوس معاشی نتائج میں ڈھالنے کے لیے پرعزم ہیں۔(جاری ہے)
انہوں نے دوطرفہ تجارت کو نئی بلندیوں تک لے جانے کے لیے متعدد اقدامات کا خاکہ پیش کیا، جن میں بینکنگ، لاجسٹکس، شپنگ، ایوی ایشن، فری زونز، ہائی اینڈ مینوفیکچرنگ، زراعت اور سرمایہ کاری کے فروغ پر 17 نئے پروٹوکولز پر مذاکرات، بارڈر مارکیٹس اور خصوصی اقتصادی زونز کو فعال بنانا ہے تاکہ سرحدی علاقوں میں روزگار اور کاروبار کے مواقع بڑھیں، حکومتِ پاکستان کے پانچ سالہ معاشی منصوبہ ’’اُڑان پاکستان‘‘ کے تحت توانائی، معدنیات، زراعت اور مینوفیکچرنگ میں غیر ملکی سرمایہ کاری کا فروغ، کسٹمز، ٹیرف اور ریگولیٹری رکاوٹوں کے خاتمے کے لیے پاکستانی اور ایرانی ٹیموں کے درمیان قریبی تکنیکی تعاون شامل ہے ۔ جام کمال خان نے کہا کہ وزیرِاعظم شہباز شریف کی قیادت میں حکومتِ پاکستان نے ایران کے ساتھ تجارت اور روابط کو اعلیٰ ترین اسٹریٹجک ترجیح دی ہے۔ انہوں نے کہا کہ ہمارا صنعتی شعبہ بہتر ہو رہا ہے، آئی ٹی اور سروسز میں ترقی ہو رہی ہے اور غیر ملکی سرمایہ کاری پاکستان کا رخ کر رہی ہے۔ وفاقی وزیر نے ایرانی کمپنیوں کو نومبر 2025 میں پاکستان میں ہونے والے ایگریکلچر ایکسپو میں شرکت کی دعوت دیتے ہوئے کہا کہ یہ موقع مینوفیکچرنگ ہبز دیکھنے اور نئی منڈیوں کو دریافت کرنے کے لیے ایک گیٹ وے ثابت ہوگا۔انہوں نے اعلان کیا کہ پاکستان جلد 23ویں مشترکہ اقتصادی کمیشن کا اجلاس پاکستان میں منعقد کرے گا تاکہ تہران میں طے پانے والے معاہدوں پر عملدرآمد یقینی بنایا جا سکے۔ فورم سے خطاب کرتے ہوئے ایرانی وزیر فرزانہ صادق نے گزشتہ برسوں میں دوطرفہ تجارت میں قابلِ ذکر اضافے کو سراہا اور کہا کہ تجارت گزشتہ سال 3.1 ارب ڈالر سے تجاوز کر گئی ہے ۔انہوں نے کہا کہ دونوں ممالک کی قیادت کی رہنمائی میں تجارتی ہدف 10 ارب ڈالر تک پہنچنے کے لیے پیش رفت جاری ہے۔ فرزانہ صادق نےدواسازی، سیرامکس اور دیگر شعبوں میں مشترکہ سرمایہ کاری کے منصوبوں پر دلچسپی ظاہر کی۔ فرزانہ صادق نے کہا کہ پاکستان۔ایران بزنس فورم دونوں ممالک کے لیے عملی پلیٹ فارم فراہم کرتا ہے جس سے تعاون میں تیزی اور دونوں قوموں کے لیے ٹھوس نتائج حاصل ہوں گے۔ ایرانی وزیر نے پاکستان میں آنے والے حالیہ سیلاب کے نتیجے میں ہونے والے قیمتی جانی و مالی نقصان پر افسوس کا اظہار بھی کیا ۔ جام کمال نے ایران کی حکومت، ایرانی وزیر برائے سڑک و شہری ترقی فرزانہ صادق اور ایرانی ٹریڈ پروموشن آرگنائزیشن کا شاندار انتظامات اور میزبانی پر شکریہ ادا کرتے ہوئے کہا کہ ہماری اقتصادی شراکت داری کو بھی اتنا ہی گہرا اور پائیدار ہونا چاہیے جتنا کہ ہمارے مذہبی، ثقافتی اور تاریخی تعلقات ہیں جو صدیوں پر محیط ہیں۔فورم کے اختتام پر دونوں وزراء نے اس عزم کا اظہار کیا کہ پاک۔ایران تاریخی تعلقات کو پائیدار اور جدید اقتصادی شراکت داری میں ڈھال کر علاقائی خوشحالی اور عالمی مسابقت کی راہ ہموار کریں گے۔
کراچی میں متوقع شدید بارش کے پیش نظر انتظامیہ کو ہائی الرٹ رہنے کا حکم