9 مئی کےبعد پی ٹی آئی پر دھاوا بولا گیااور تمام قوتیں پارٹی اور بانی کو ختم کرنے پر لگ گئیں،علی امین
اشاعت کی تاریخ: 23rd, June 2025 GMT
وزیراعلیٰ خیبرپختونخوا علی امین گنڈا پور نے کہا ہے کہ 9 مئی ایک بہانہ تھا جس کو بنیاد بنا کر پی ٹی آئی پر دھاوا بولا گیا، تمام قوتیں پارٹی اور چیئرمین کو ختم کرنے پر لگ گئیں۔
پشاور میں خیبرپختونخوا اسمبلی کے بجٹ اجلاس میں اظہار خیال کرتے ہوئے وزیراعلیٰ نے کہا کہ بانی پی ٹی آئی نے ہمیشہ قوم اور ملک کی بات کی اور ثابت کیا کہ ہمارا مقصد حکومت نہیں بلکہ یہ ملک ہے۔
علی امین گنڈا پور نے کہا کہ انہوں نے پنجاب اور کے پی حکومتیں ختم کیں، بدقسمتی سے فیصلہ سازوں نے وقت پر انتخابات نہیں کروائے، آزاد کشمیر میں جنہوری قتل کے زریعہ ہماری دوتہائی حکومت ختم کی گئی۔
سیاسی جبر کو قیامت تک یاد رکھیں گے، گنڈا پور
انہوں نے کہا کہ طاقت اللہ کی طرف سے ایک نعمت ہوتی ہے، جو بھی اس کا غلط استعمال کرتا ہے تاریخ ان کے انجام کی گواہ ہے، 9 مئی کے بعد پی ٹی آئی پر بھرپور طاقت کے ساتھ دھاوا بولا گیا اور تمام قوتیں پی ٹی آئی اور بانی کو ختم کرنے پر لگ گئیں، دنیا کی تاریخ میں ایسا سیاسی جبر کسی نے نہیں دیکھا، یہ پاکستان کا وہ سیاہ باب ہے جو قیامت تک یاد رکھا جائے گا۔
علی امین گنڈا پور نے کہا کہ 8 فروری کو پارٹی ختم کرنے کے باوجود عوام نے ہم پر اعتماد کیا، پھر روالپنڈی کے کمشنر کا بیان بھی سب کے سامنے ہے، کے پی میں بھی منڈیٹ چوری کرنے کی کوشش کی گئی جو عوام نے ناکام بنادی۔
صوبائی حکومت سازش کا شکار نہ ہوئی تو آئینی حق پر قدغن لگائی گئی، گنڈا پور
انہوں نے کہا کہ کسی بھی حکومت کو ختم کرنے کے لئے دو چیزیں ضروری ہیں، جب صوبہ دیوالیہ ہو جس کے لئے نگران حکومت نے کوئی کسر نہیں چھوڑی تھی، امن و امان کی صورتحال بھی قابو سے باہر تھی۔
پشاور۔۔۔صوبے میں امان و امان کی صورتحال تباہ کی گئی، جب صوبائی حکومت سازش کا شکار نہ ہوئی تو اب ہمارے آئینی و اخلاقی حق پر قدغن لگائی گئی۔
وزیراعلیٰ نے کہا کہ آج تک کبھی نہیں دیکھا کہ گورنر نے بجٹ اجلاس نہ بلایا ہو، ۔بانی پی ٹی آئی سے ہماری ملاقات نہیں کرائی جارہی تاکہ بجٹ پاس نا ہو اور یہ معاشی ایمرجنسی کو بنیاد بنا کر خیبرپختونخوا کی حکومت ختم کرنا چاہتے ہیں مگر ہم وفاق کی اس سازش کو کامیاب نہیں ہونے دینگے کیونکہ صوبائی حکومت کو ختم کرنے کا حق صرف بانی پی ٹی آئی کے پاس ہے۔
عمران خان کی ہدایت پر بجٹ میں ردوبدل کرسکتے ہیں، وزیراعلیٰ
علی امین گنڈا پور نے کہا کہ بانی پی ٹی آئی جب اور جو بھی حکم دینگے اُس پر من و عن عمل کرینگے، پیٹرن ان چیف سے جب بھی ملاقات ہو بجٹ میں ردوبدل کرسکتے ہیں۔انہوں نے کہا کہ صوبائی بجٹ میں کمی بیشی بانی پی ٹی آئی کا اختیار ہے۔
انہوں نے کہا کہ تمام سازشی عناصر کو کہتا ہوں کہ بانی پی ٹی آئی کا اختیار کسی اور کے ہاتھ میں نہیں دونگا، صوبے کی آمدن 60 ارب سے بڑھ کر 93 ارب روپے ہوچکی ہے، اس کے باوجود حکومت کے خلاف سازشیں ہورہی ہیں۔
ملک لوٹنے والوں کی نظریں اب خیبرپختونخوا کے بھرے خزانے پر ہیں، گنڈاپور
علی امین گنڈا پور نے کہا کہ پختونخوا پی ٹی آئی کا قلعہ ہے جس کے عوام نے کبھی کسی کی غلامی قبول نہیں کی، ملک لوٹنے والوں کی نظریں صوبے کے بھرے خزانے پر ہیں تاکہ وہ سرپلس بجٹ کو نقصان زدہ کردیں۔
وزیراعلیٰ نے کہا کہ این ایف سی میں اپنا حق لینے کے قریب ہیں، بجلی کے خالص منافع کی وصولی کے لئے بھی کمیٹی تشکیل دی جا چکی ہے، بجلی کے خالص منافع کی بقایاجات کی مد میں دو ہزار ارب سے زائد وصول کرینگے۔
’بانی پی ٹی آئی اور بشریٰ بی بی کیخلاف بیان دینے کا کہا گیا‘
علی امین گنڈا پور نے کہا کہ مجھے 9 مئی سے پہلے گرفتار کیا گیا اور بانی پی ٹی آئی اور بشری بی بی کے خلاف بیان دینے کا کہا گیا تھا، 9 مئی تو صرف ایک بہانہ تھا۔
’وزارت اعلیٰ امانت ہے، بانی کے حکم پر ایک منٹ میں اسمبلی توڑ دوں گا‘
اپوزیشن لیڈر کی تقریر کے جواب میں وزیراعلیٰ نے کہا کہ ہمارے کارکن گولیاں کھا کر بھی بانی پی ٹی آئی کے ساتھ کھڑے ہیں، میرے ہر فیصلہ کا اختیار بانی کے پاس ہے اور یہ وزرات اعلیٰ بھی اُن کی ہی امانت ہے، اگر انہوں نے اسمبلی توڑنے کا کہا تو ایک منٹ بھی نہیں لگے گا اور ہم گھر چلے جائیں گے۔
.
ذریعہ
ذریعہ: Express News
کلیدی لفظ: علی امین گنڈا پور نے کہا کہ انہوں نے کہا کہ بانی پی ٹی آئی کو ختم کرنے
پڑھیں:
مودی کا امتحانی پرچے لیک کرنے والوں کے خلاف فاسٹ ٹریک عدالتیں قائم کرنے کا اعلان
بھارتی وزیراعظم نریندر مودی نے امتحانی پرچوں کے لیک ہونے کے بڑھتے ہوئے واقعات کے خلاف سخت اقدامات کا اعلان کرتے ہوئے کہا ہے کہ ایسے جرائم میں ملوث افراد کو جلد انصاف کے کٹہرے میں لانے کے لیےفاسٹ ٹریک عدالتیںقائم کی جائیں گی۔ انہوں نے واضح کیا کہ طلبہ کے مستقبل سے کھیلنے والوں کے ساتھ کسی قسم کی رعایت نہیں برتی جائے گی۔
سوشل میڈیا پلیٹ فارم ایکس (X) پر جاری اپنے بیان میں وزیراعظم مودی نے کہا کہ نوجوانوں کا مستقبل حکومت کی اولین ترجیح ہے اور امتحانی نظام میں بدعنوانی یا پرچے لیک کرنے جیسے جرائم میں ملوث عناصر کو سخت اور فوری سزا دی جائے گی۔
یہ امتحانی پرچوں کے لیک ہونے کے معاملے پر وزیراعظم مودی کا پہلا عوامی بیان ہے۔ تاہم ان کے ردعمل کے بعد بھی ملک بھر میں جاری طلبہ احتجاج میں کمی نہیں آئی۔ متعدد طلبہ اور سماجی حلقوں نے سوال اٹھایا کہ حکومت نے اس حساس معاملے پر ردعمل دینے میں اتنی تاخیر کیوں کی۔
دوسری جانب لوک سبھا میں قائد حزب اختلاف راہل گاندھی نے وزیراعظم کے بیان کو تنقید کا نشانہ بناتے ہوئے حکومت پر تعلیمی نظام کو کمزور کرنے کا الزام عائد کیا۔
راہل گاندھی نے ایکس پر اپنی پوسٹ میں لکھا کہ نوجوانوں کے مستقبل کو سب سے زیادہ نقصان موجودہ حکومت نے پہنچایا ہے۔ ان کے مطابق حکومت نے نہ صرف تعلیمی نظام کو تباہ ہونے دیا بلکہ ذمہ دار افراد کو بھی تحفظ فراہم کیا۔
انہوں نے کہا کہ احتجاج کرنے والے طلبہ کے تین بنیادی مطالبات ہیں، جن میں وزیر تعلیم دھرمندر پردھان کو عہدے سے ہٹانا، طلبہ سے باضابطہ معافی مانگنا اور احتجاج کے دوران طلبہ پر مبینہ تشدد میں ملوث افراد کے خلاف کارروائی شامل ہے۔
واضح رہے کہ ملک میں تعلیمی اصلاحات اور امتحانی نظام میں شفافیت کے مطالبات کے حوالے سے احتجاجی تحریک جاری ہے۔ حالیہ دنوں میں طلبہ اور پولیس کے درمیان جھڑپوں کے بعد یہ معاملہ مزید شدت اختیار کر گیا ہے، جبکہ امتحانی پرچے لیک ہونے کے واقعات نے بھارت کے تعلیمی نظام پر سنجیدہ سوالات کھڑے کر دیے ہیں۔
سپریم کورٹ کا تاریخی فیصلہ، پولیس ریکارڈ سے ذات برادری کا خاتمہ لازم قرار