ٹرمپ، جنوبی ایشیا اور کلنٹن کا راستہ
اشاعت کی تاریخ: 27th, January 2025 GMT
امریکا کے نومنتخب صدر ڈونلڈ ٹرمپ نے غزہ جنگ بندی کا سہرہ رخصت ہوتے ہوئے صدر جوبائیڈن سے چھین کر اپنے سر سجا لیا ہے۔ وہ پورے اعتماد کے ساتھ خود کو اس جنگ بندی کا محرک قرار دے رہے ہیں۔ ٹرمپ یہاں تک کہہ رہے ہیں کہ اگر وہ صدر نہ بنتے تو غزہ میں جنگ بندی ممکن نہ ہوتی۔ اگرچہ حماس اور اسرائیل کے درمیان جنگ بندی ہوئی تو اس وقت جوبائیڈن ہی وائٹ ہائوس میں اپنی آخری گھڑیاں گزار رہے تھے مگر اس وقت ٹرمپ کے وائٹ ہائوس میں داخل ہونے میں چند ہی دن باقی تھے۔ اس سے پہلے ٹرمپ جنگ بندی نہ ہونے کی صورت میں خوفناک نتائج کی دھمکیاں بھی دے چکے تھے۔ جس میں ایک دھمکی یہ تھی اگر ان کے حلف اُٹھانے سے پہلے جنگ بندی نہ کی گئی تو وہ مشرق وسطیٰ کو جہنم بنا دیں گے۔ ٹرمپ غزہ جنگ بندی کی فتح اپنی قلغی میں سجانے میں اس حوالے سے حق بجانب ہیں کہ جو کام بائیڈن پندرہ ماہ میں نہیں کر سکے وہ ٹرمپ نے پندرہ دن میں کر دکھایا۔ سابق اسرائیلی وزیر اعظم یہود المرٹ نے بھی انکشاف کیا کہ ٹرمپ نے نیتن یاہو پر دبائو ڈال کر غزہ میں جنگ بندی کرائی۔ ٹرمپ کے ایک سابق مشیر اسٹینیو بینٹ نے کہا ہے کہ ٹرمپ کی دھمکی حماس کے لیے نہیں بلکہ اسرائیل کے لیے تھی۔ اس بات میں خاصا وزن بھی ہے کیونکہ حماس تو پہلے ہی اسرائیلی یرغمالیوں کو رہا کرنے کو تیار تھی مگر اسرائیل آخری فتح اور تمام مقاصد پورے ہوئے بغیر جنگ بندی سے انکاری تھا۔ یہ بھی حقیقت ہے کہ جس معاہدے پر اسرائیل نے اب عالم ِ مجبور ی میں دستخط کیے یہ وہی معاہدہ ہے جو دسمبر 2023 میں قطر اور مصر نے جنگ کے دوماہ بعد ہی تیار کیا تھا مگر اسرائیل اس معاہدے کو تسلیم کرنے سے انکاری رہا اور جوبائیڈن پانچ ماہ تک اقوام متحدہ میں جنگ بندی کی قرارداد کو ویٹو کرتے رہے۔ تیرہ ماہ بعد یہی معاہدہ اسرائیل کو تسلیم کرنا پڑا تو اس میں جو بائیڈن کی کوشش اور کاوش کا کوئی دخل نہ ہونا واضح ہوتا ہے۔ اس لیے غزہ جنگ بندی نے وقتی طور پر ٹرمپ کا امیج مشرق وسطیٰ میں ایک جنگجو اور جنگ پسند عالمی راہنما کے بجائے ایک امن پسند اور امن پرور لیڈر کا بنایا ہے۔ اس اعتماد سے سرشار ڈونلڈ ٹرمپ کیا بل کلنٹن کی طرح امن کی راہوں پر اپنا سفر مزید جاری رکھیں گے؟
اب یہ سوال اہمیت اختیار کر گیا ہے۔ مشرق وسطیٰ کے بعد یوکرین کا مسئلہ بھی ٹرمپ کو درپیش اہم ترین چیلنج ہے۔ ٹرمپ یوکرین کی جنگ کا بوجھ امریکیوں کے کندھوں سے اُتار کر یورپ کو منتقل کرنا چاہتے ہیں۔ لاتعداد معاشی بحرانوں میں گھرے یورپ میں اپنے طور پر اس جنگ کو طویل المدت تک جاری رکھنے کی سکت دکھائی نہیں دیتی۔ اس طرح ٹرمپ اس جنگ سے ہاتھ کھینچ کر عملی طور پر فریقین کو امن کی راہ کی جانب دھکیل رہے ہیں۔ اسی طرح جنوبی ایشیا ٹرمپ کی صلاحیتوں کے لیے اسی طرح ایک چیلنج کے طور پر موجود ہے۔ جنوبی ایشیا میں دو روایتی حریف ممالک پاکستان اور بھارت کئی برس سے تعلقات منجمد کیے بیٹھے ہیں۔ کشمیر کی خصوصی شناخت کے خاتمے کے بعد دونوں ملکوں میں سفارتی تعلقات کا درجہ گر گیا تھا وہ برسوں بعد بھی دوبارہ بحال اور بلند نہیں ہوسکا۔ بھارت اپنے تئیں مسئلہ کشمیر کو حل سمجھے مگر کشمیر کے سکوت اور سکون کی تہہ میں کئی آتش فشاں پل رہے ہیں۔ بھارت جس طرح کشمیر کی صدیوں پر محیط مسلم اور کشمیری شناخت کو بدلنے اور مسخ کرنے کی راہ پر چل رہا ہے وہ جنوبی ایشیا میں بنگلا دیش سے زیادہ عوامی ردعمل کو جنم دے سکتی ہے۔ پاکستان کے حکمران لاکھ مصلحت پسند اور لچکدار اور دبائو قبول کرنے کے خوگر سہی مگر عوامی جذبات انہیں تادیر انہیں یک طرفہ طور پر بچھے جانے اور امن کا ویران اور خالی ٹھیلہ لیے پھرنے کی اجازت نہیں دیں گے۔ چار وناچار یہاں بھی امریکا کو پاک بھارت حالات اور تعلقات کی نارملائزیشن کے لیے ہی سہی مگر متوجہ ہونا پڑے گا۔ گوکہ انہیں مشرق وسطیٰ میں نیتن یاہو جیسے خود سر اکھڑ اور ضدی شخص کی طرح نریندر مودی جیسے انانیت پسند اور کٹر پنتھی اور اڑیل دوست کا سامنا ہو سکتا ہے جو پاکستان کو خاطر میں لانے پر تیار نہیں لیکن یہاں بھی ٹرمپ نیتن یاہو کی طرح پیچ کسنے کا طریقہ اپنا سکتے ہیں۔ خود اسرائیلی ذرائع کا دعویٰ ہے کہ اس بار ٹرمپ کے بدلے ہوئے لہجے کے باعث نیتن یاہو ہکا بکا رہ گئے اور انہیں چار وناچار اپنی انا کی قربانی دے کرجنگ بندی کا ایسا معاہدہ کرنا پڑے جسے اسرائیل کے وزیر خزانہ بیزائل سموٹرچ نے اسرائیل کی سلامتی کے لیے تباہ کن قرار دے کر استعفے کی دھمکی دی تھی۔
ٹرمپ کے سر میں ایک امن پسند عالمی لیڈر بننے کا جو سودا سمایا ہے اس میں ماضی کے ان کے بہت سے جنگجو دوست نیتن یاہو کی طرح حیران وششدر رہ سکتے ہیں۔ ٹرمپ اپنے لیے امن دوست کا امیج پسند کرتے ہیں تو نوے کی دہائی کے امریکی صدر بل کلنٹن کا راستہ ہوگا جو خلیج کی پہلی جنگ کے بعد امریکا کے صدر بنے اور انہوں نے اپنے لیے دنیا کے تین خطوں کو درپیش سنگین مسائل کے حل کو ہدف بنالیا۔ ان میں پہلا مسئلہ مشرق وسطیٰ، دوسرا شمالی آئرلینڈ اور تیسرا پاک بھارت تنازع کی جڑ کشمیر تھا۔ کلنٹن کے دور میں تینوں مقامات پر مسائل کے حل کے لیے خفیہ سفارت کاری کا یا تو آغاز ہوا یا اس عمل میں تیزی لائی گئی۔ اس عمل میں انہیں پہلی کامیابی فلسطین اسرائیل کے درمیان 1993 میں معاہدہ اوسلو کی صورت میں ملی جس میں فلسطینیوں کو ایک لاکل اتھارٹی حاصل ہوئی اور یاسر عرفات ایک عسکری ماضی سے کٹ کر سیاسی اور حکومتی رول کے ساتھ سامنے آئے۔ اس معاہدے کے وقت بل کلنٹن بنفس نفیس یاسر عرفات اور اسحاق رابن کے پیچھے فاتحانہ مسکراہٹ لیے کھڑے تھے۔ چند ہی برس کلنٹن کو دوسری کامیابی شمالی آئرلینڈ میں آئرش ری پبلکن آرمی اور برطانوی حکومت کے درمیان معاہدے کی صورت میں حاصل ہوئی جہاں یاسر عرفات کی ہی طرح آئرش لیڈر جیری آدم نے عسکریت کو ترک یا فریز کرتے ہوئے سیاسی دھارے میں شامل ہونا قبول کر لیا اور 1998 میں کلنٹن اپنا دوسرا ہدف مکمل کرنے میں کامیاب ہوئے۔ جنوبی ایشیا میں بھی پس پردہ سفارت کاری کے نتیجے میں وہ پاکستان اور بھارت کے حکمرانوں کو اس بات پر قائل کرنے پر آمادہ ہوئے کہ انہیں مسئلہ کشمیر کو ’’ونس فار آل‘‘ کے اصول کے تحت حل کرنا چاہیے۔ انہوں نے بہت سمجھ کر پاکستان کے اس وقت کے مضبوط لیڈر میاں نوازشریف سے ذاتی مراسم پیدا کیے کیونکہ انہیں بتایا گیا تھا کہ فوج کے اصل حلقہ اثر یعنی پنجاب یا جی ٹی روڈ میں مقبول لیڈر ہی زیادہ جرأت مندانہ اور بڑے فیصلے کر سکتا ہے۔ کلنٹن کی ہلہ شیری سے نوازشریف اور واجپائی مسئلہ کشمیر کے حل کے لیے ایک سمجھوتے کے قریب پہنچ گئے تھے مگر کارگل کی جنگ نے اس ڈپلومیسی کی ساری بساط ہی اُلٹ ڈالی اور حالات اس شعر کی مانند ہو کر رہ گئے
قسمت تو دیکھ ٹوٹی ہے جا کر کہاں کمند
کچھ دور اپنے ہاتھ سے جب بام رہ گیا
یوں کلنٹن جنوبی ایشیا میں اپنے مقصد میں کامیاب نہ ہو سکے اور انہیں اس بات کا احساس رہا کہ نوازشریف نے ان کی بات کو مان کر بھاری قیمت چکائی ہے اور اسی لیے کلنٹن نے انہیں قید سے نکال کر حالات کی چکی میں پسنے سے بچالیا۔ جس کا انکشاف ڈاکٹر نسیم اشرف کی کتاب میں بھی کیا گیا ہے کہ کلنٹن جب بھارت جاتے ہوئے پاکستان کے دورے پر چند گھنٹوں کے لیے بادل نخواستہ رکے تو انہیں واش روم جانا پڑا۔ واش روم کی طرف بڑھتے ہوئے عدالت عظمیٰ کے چیف جسٹس ارشاد حسن خان بھی ان کے پیچھے پیچھے ہو لیے جہاں کلنٹن نے چیف جسٹس کو متنبہ کیا کہ نوازشریف کو پھانسی نہیں ہونی چاہیے۔ اس پس منظر میں اب دیکھنا یہ ہے کہ ٹرمپ کلنٹن کی راہ پر چلتے ہوئے جب جنوبی ایشیا کی طرف آتے ہیں تو ان کا رویہ کیا ہوتا ہے؟
.ذریعہ: Jasarat News
کلیدی لفظ: جنوبی ایشیا میں اسرائیل کے نیتن یاہو ٹرمپ کے رہے ہیں کے لیے کی طرح
پڑھیں:
وسطی ایشیا میں بھارتی موجودگی کا خاتمہ، تاجکستان نے بھارت سے اپنا ایئربیس واپس لے لیا
تاجکستان نے آینی ایئر بیس کا مکمل کنٹرول انڈیا سے واپس لے لیا ہے، جس کے ساتھ ہی بھارت کی تاجکستان میں تقریباً 20 سالہ عسکری موجودگی کا اختتام ہوگیا۔
یہ فیصلہ خطے میں روس اور چین کے بڑھتے ہوئے اثرورسوخ کے تناظر میں ایک اہم موڑ کی حیثیت رکھتا ہے، بھارتی کانگریس نے اسے ملک کے لیے اسٹریٹجک دھچکا قرار دے دیا ہے۔
یہ بھی پڑھیے: بھارتی فوج سیاست اور سیاسی قیادت عسکریت میں مشغول ہے، جنرل ساحر شمشاد مرزا
بھارت کے لیے آینی ایئر بیس کا نقصان صرف ایک لاجسٹک معاملہ نہیں بلکہ اس کی علاقائی اسٹریٹجک رسائی میں نمایاں کمی کی علامت ہے۔ یہ اڈہ افغانستان اور وسطی ایشیائی خطے میں نگرانی کے لیے انتہائی اہم سمجھا جاتا تھا۔
آینی ایئر بیس کی تاریخی اہمیتدوشنبے کے مغرب میں تقریباً 15 کلومیٹر کے فاصلے پر واقع آینی ایئر بیس (جسے فارخور-آینی کمپلیکس بھی کہا جاتا ہے) سوویت دور میں تعمیر کیا گیا تھا۔ سرد جنگ کے زمانے میں یہ اڈہ افغانستان میں سوویت کارروائیوں کا مرکزی مرکز تھا۔
سوویت یونین کے خاتمے کے بعد 1991 میں تاجکستان نے یہ اڈہ سنبھالا مگر خانہ جنگی کے باعث وہ اسے فعال نہیں رکھ سکا۔
بھارت نے 2002 میں تاجکستان کے ساتھ معاہدہ کر کے اڈے کی تزئین و آرائش اور مشترکہ آپریشن شروع کیا۔
بھارت نے اس منصوبے پر 7 سے 10 کروڑ امریکی ڈالر تک کی سرمایہ کاری کی، جس کے تحت رن وے کو 3,200 میٹر تک بڑھایا گیا، نئے ہینگرز، کنٹرول ٹاورز، ریڈار اور سیکیورٹی انفراسٹرکچر تعمیر کیا گیا۔
یہ اڈہ بھارتی فضائیہ کے Su-30MKI لڑاکا طیاروں اور Mi-17 ہیلی کاپٹروں کے لیے موزوں بنایا گیا جبکہ تقریباً 200 بھارتی فوجی اور ٹیکنیکل عملہ یہاں تعینات تھا۔
خطے میں بھارت کا اثرورسوخآینی بیس وسطی ایشیا میں بھارت کا پہلا اور واحد فوجی اڈہ تھا، جو پاکستان کی شمالی سرحد سے 1000 کلومیٹر سے بھی کم فاصلے پر واقع ہے۔ یہ اڈہ افغانستان کے واخان کوریڈور اور پاکستان کے دفاعی ڈھانچے پر بھارتی نگرانی کے لیے مثالی مقام سمجھا جاتا تھا۔
یہ بھی پڑھیے: پاکستان اور تاجکستان باہمی اسٹریٹجک تعاون کو نئی سطح تک بڑھانے کے لیے پرعزم
یہ اڈہ بھارت کی ‘کنیکٹ سینٹرل ایشیا’ پالیسی کا مرکزی حصہ تھا، جس کا مقصد خطے میں توانائی، تجارت اور سیکیورٹی روابط کو فروغ دینا تھا۔
روس اور چین کا دباؤمیڈیا رپورٹس کے مطابق، بھارت کی آینی سے واپسی محض معاہدے کے خاتمے کا نتیجہ نہیں بلکہ روس اور چین کے دباؤ کا نتیجہ تھی۔ دونوں ممالک نے تاجکستان پر زور دیا کہ وہ وسطی ایشیائی سیکیورٹی ڈھانچے میں بھارت کی فوجی موجودگی ختم کرے۔
روس، جو تاجکستان میں اپنی 201 ویں فوجی ڈویژن رکھتا ہے، بھارتی موجودگی کو اپنے علاقائی مفادات سے متصادم سمجھتا تھا، جبکہ چین نے بھی تاجکستان میں اپنے سیکیورٹی منصوبوں کو وسعت دینا شروع کر دی ہے۔
یہ بھی پڑھیے: افغان حکومت بھارتی حمایت یافتہ دہشتگردی کی سرپرست ہے، وزیر دفاع خواجہ آصف
آینی ایئر بیس سے بھارت کا انخلا نئی جیوپولیٹیکل حقیقت کی نشاندہی کرتا ہے، جہاں وسطی ایشیائی ریاستیں روس اور چین کے دباؤ میں اپنی پالیسیوں کو ازسرنو تشکیل دے رہی ہیں۔
بھارت کے لیے یہ اقدام نہ صرف عسکری نقصان ہے بلکہ وسطی ایشیا میں اس کے بڑھتے ہوئے اثرورسوخ کے خاتمے کی علامت بھی ہے۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
ایئربیس بھارت تاجکستان فوج وسطی ایشیا
پشاور میں ہسپانوی ثقافت کی جھلک، فلیمنکو رقص نے سماں باندھ دیا