پہلگام فالس فلیگ آپریشن کے بعد بھارت کے جارحانہ عزائم کے پیش نظر پاک فوج کی جنگی مشقیں
اشاعت کی تاریخ: 30th, April 2025 GMT
فائل فوٹو: آئی ایس پی آر
پہلگام فالس فلیگ آپریشن کے بعد بھارت کے جارحانہ عزائم کے پیش نظر پاک فوج کی مشقیں جاری ہیں۔
ذرائع کے مطابق جنگی مشقیں سیالکوٹ، نارووال، ظفروال اور شکر گڑھ کے علاقوں میں کی جارہی ہیں، مشقوں میں چھوٹے بڑے جدید ہتھیاروں سمیت ٹینکوں، توپ خانہ اور انفنٹری نے حصہ لیا ہے۔
واضح رہے کہ 29 اور 30 اپریل کی درمیانی شب بھارت کی جانب سے لائن آف کنٹرول (ایل او سی) پر بلااشتعال فائرنگ کی گئی۔
سیکیورٹی ذرائع کے مطابق بھارت نے ایل او سی پر سیز فائر کی خلاف ورزی کی ہے، بھارت کی جانب سے ایل او سی کے کیانی اور منڈل سیکٹر میں بلااشتعال فائرنگ کی گئی۔
سیکیورٹی کے ذرائع کا کہنا ہے کہ بھارت کی جانب سے بلااشتعال فائرنگ میں چھوٹے ہتھیاروں کا استعمال کیا گیا، پاک فوج نے بھرپور جوابی کارروائی کرتے ہوئے بھارتی فوج کو منہ توڑ جواب دیا۔
29 اور 30 اپریل کی درمیانی شب بھارت کی جانب سے لائن آف کنٹرول (ایل او سی) پر بلااشتعال فائرنگ کی گئی۔
سیکیورٹی کے ذرائع کے مطابق پاکستان نے ایل او سی پر مؤثر جواب دیتے ہوئے دشمن کو خاموش کروا دیا۔
سیکیورٹی کے ذرائع کے مطابق پاک فوج کے مؤثر جواب سے دشمن کے متعدد مورچے تباہ ہونے کی بھی اطلاعات ہیں۔
پاک فوج نے جوابی کارروائی کے دوران مقبوضہ کشمیر میں واقع ایل او سی پر بھارتی چکپترا پوسٹ کو بھی تباہ کر دیا۔
سیکیورٹی کے ذرائع کا کہنا ہے کہ بھارت کی جانب سے یہ اشتعال انگیزی اس کے جنگی جنون کی غماز ہے، پاک فوج ملکی سالمیت کے دفاع کے لیے ہمہ وقت تیار ہے۔
دوسری جانب بھارت نے مقبوضہ کشمیر کے سرحدی علاقوں کو بھی خالی کروا لیا ہے، بھارت کی جانب سے مقبوضہ کشمیر میں مسلمانوں کے خلاف کریک ڈاؤن جاری ہے۔
.ذریعہ: Jang News
پڑھیں:
پہلگام فالس فلیگ ،بھارتی وزیراعظم نریندرا مودی کا بھارتی فوج کو جنگ کیلئے تیار رہنے کا حکم
نئی دہلی (اوصاف نیوز)وزیر اعظم نریندر مودی نے متنازعہ ریاست جموں و کشمیر میں تعینات بھارتی فوج کو ‘آپریشنل فریڈم کا حق دیدیا ہے کہ وہ جب چاہیں، جیسے چاہیں اور جہاں چاہیں کاروائیاں کر سکتے ہیں۔ نئی دہلی میں موجود حکومتی ذرائع نے عالمی ذرائع ابلاغ اے ایف پی کو بتایا ہے کہ فوج کو یہ اختیار پچھلے ہفتے کے حملے کے سلسلے میں دیا گیا ہے۔
دوسری جانب پاکستان بھارتی الزام کی تردید کرتا ہے کہ وہ پہلگام کے واقعے میں ملوث ہے تاہم بھارت نے تحقیقات سے بھی پہلے پاکستان کے خلاف اقدامات شروع کردیئے ۔ ان اقدامات میں پاکستان کے ساتھ 1960ء کےآبی معاہدہ کو معطل کرکے پاکستان کا پانی بند کرنا اور سفارتی عملے میں کمی کرنا اور شہریوں کی آمد و رفت کو روکنا اور ویزوں کو منسوخ کردینے کے علاوہ لائن آف کنٹرول پر پاکستانی پوسٹوں کر نشانہ بنانا شامل ہیں۔
ان بھارتی اقدامات کی وجہ سے دونوں جوہری ہتھیار رکھنے والے ممالک کی فوجیں ہائی الرٹ پوزیشن پر چلی گئی ہیں اور دونوں طرف سے کہا جا رہا ہے کہ جنگ کسی بھی وقت چھڑ سکتی ہے۔ ادھر نئی دہلی میں وزیر اعظم مودی کی آرمی چیف سمیت تمام مسلح افواج کے سرابراہان سے ملاقات کی ویڈیو ذرائع ابلاغ کو جاری کی گئی جس میں وزیر دفاع راج ناتھ سنگھ بھی نظر آرہے ہیں۔
بھارتی ذرائع کے مطابق وزیراعظم مودی نے ایک بند کمرے کے اجلاس میں افواج کو یہ اجازت دی ہے کہ انہیں آپریشنز کرنے کی مکمل آزادی ہوگی اور وہ ان آپریشن کے طریقہ کار، اہداف اور وقت کا بھی خود تعین کرسکیں گی۔ مودی نے اس موقع پر یہ بھی کہا کہ ہمیں دہشتگردی کو ایک قومی حل کے طور پر ختم کرنا ہے۔ حکومت کے جن ذرائع نے اے ایف پی کو یہ بتایا انہوں نے اپنے نام ظاہر نہ کرنے کی درخواست کی ہے۔
خیال رہے کہ بھارت نے متنازع ریاست جموں و کشمیر میں چھ لاکھ کے قریب مسلح افواج کو تعینات کر رکھا ہے۔ یہ افواج 1989ء سے ان کشمیریوں کے خلاف آپریشن شروع کیے ہوئے ہیں جو 1947ء کے تقسیم ہند کے منصوبہ اور اقوام متحدہ کی قراداروں کے مطابق اپنی آزادی کے لیے جدوجہد کر رہے ہیں لیکن بھارت ان کشمیریوں کو دہشت گرد قرار دیتا ہے۔
اس حالیہ ایک ہفتہ کے دوران بھارتی سیکورٹی فورسز نے لگ بھگ دو ہزار کے قریب کشمیریوں کو زیر حراست لیا ہے اور جگہ جگہ کریک ڈاؤن جاری ہے جبکہ کئی گھروں کو جلانے، بارود سے اڑانے یا مسمار کرنے کی اطلاعات بھی مل رہی ہیں۔
پہلگام واقعہ : سچ سامنے لانے پر سربراہ ناردرن کمانڈ لیفٹیننٹ جنرل ایم وی ایس کمار برطرف
پاکستان کا دورہ کرکے جانیوالے امریکی رکن کانگریس کا عمران خان کی رہائی کا مطالبہ