ایدھی فلم پر بھی تنازع، سندھ حکومت اور فیصل ایدھی کے متضاد بیانات
اشاعت کی تاریخ: 30th, June 2025 GMT
صوبائی حکومت کا معروف فلم ساز ستیش آنند کے اشتراک سے فلم سازی کا دعویٰ
فیصل ایدھی نے اسے اپنا ذاتی منصوبہ قرار دے کر حکومتی دعوئووں کو مکمل مسترد کردیا
پاکستان کے عظیم سماجی کارکن عبدالستار ایدھی کی زندگی پر بننے والی فلم کے حوالے سے ایک عجیب صورتحال پیدا ہو گئی ہے ۔ جہاں ایک طرف سندھ حکومت نے اس منصوبے پر کام شروع کرنے کا اعلان کیا ہے ، وہیں دوسری جانب ایدھی فائونڈیشن کے سربراہ فیصل ایدھی نے اسے اپنا ذاتی منصوبہ قرار دے کر حکومتی دعوئوں کو مسترد کردیا ہے ۔سندھ کے وزیر اطلاعات شرجیل انعام میمن نے حال ہی میں ایک تقریب میں اعلان کیا تھا کہ صوبائی حکومت معروف فلم ساز ستیش آنند کے اشتراک سے ایدھی صاحب کی زندگی پر فلم بنا رہی ہے ۔ تاہم فیصل ایدھی نے اس بیان کو غلط قرار دیتے ہوئے کہا کہ یہ منصوبہ دراصل ایدھی فائونڈیشن کی اپنی کاوش ہے جس پر وہ پچھلے ایک سال سے کام کر رہے ہیں۔فیصل ایدھی نے تفصیلات بتاتے ہوئے کہا کہ ہم نے پہلے ہی ایک معروف ڈرامہ اداکار و پروڈیوسر کے ساتھ معاہدہ کر لیا تھا۔ ستیش آنند نے بعد میں رابطہ کیا تو انہیں مطلع کر دیا گیا کہ یہ منصوبہ پہلے ہی کسی اور کے ساتھ طے پا چکا ہے ۔ انہوں نے زور دے کر کہا کہ فلم کا تمام تر تخلیقی کنٹرول فائونڈیشن کے پاس ہوگا۔اس فلم کا اسکرپٹ معروف مصنفہ تہمینہ درانی کی کتاب ایدھی: آمرر ٹو دی بلائنڈ پر مبنی ہوگا، جس میں ایدھی صاحب نے خود اپنی زندگی کے اہم واقعات قلمبند کیے تھے ۔ فیصل ایدھی کے مطابق، فلم میں ایدھی کی والدہ اور اہلیہ بلقیس ایدھی کے کرداروں کو خصوصی اہمیت دی جائے گی کیونکہ ان خواتین نے ایدھی کی شخصیت کی تشکیل میں کلیدی کردار ادا کیا تھا۔فلم کی شوٹنگ کے لیے ایدھی صاحب سے منسلک تمام اہم مقامات کا انتخاب کیا گیا ہے ، جن میں ان کا آبائی گائوں بانٹوا (گجرات، بھارت) بھی شامل ہے ۔ فیصل ایدھی نے واضح کیا کہ اگر بھارت میں شوٹنگ ممکن نہ ہو سکی تو اس مقام کو اسٹوڈیو میں ہی تیار کیا جائے گا۔جب فیصل ایدھی سے سوال کیا گیا کہ کیا وہ خود اپنے والد کا کردار ادا کریں گے ، تو انہوں نے انتہائی سادگی سے جواب دیا: میں اداکار نہیں ہوں، اس لیے یہ کردار نبھانا میرے لیے ممکن نہیں۔ یہ فیصلہ فلم کے ہدایتکار اور پروڈیوسر کریں گے کہ ایدھی صاحب کا کردار کون ادا کرے گا۔فیصل ایدھی نے اپنی خواہش کا اظہار کرتے ہوئے کہا کہ وہ چاہتے ہیں کہ یہ فلم نہ صرف ایدھی صاحب کی بے مثال خدمات کو خراج تحسین پیش کرے بلکہ بین الاقوامی سطح پر بھی ایک مثال بنے ۔ انہوں نے کہاکہ ہم چاہتے ہیں کہ یہ فلم عالمی معیار کی ہو تاکہ آنے والی نسلیں ایدھی صاحب کی قربانیوں اور خدمات سے آگاہ ہو سکیں۔اب دیکھنا یہ ہے کہ اس تنازع کے بعد فلم بنانے کا اصل حق کسے ملتا ہے اور کون اس عظیم انسان کی زندگی کو پردہ سیمیں پر پیش کرنے کا حق دار ٹھہرتا ہے ۔
.ذریعہ: Juraat
کلیدی لفظ: فیصل ایدھی نے ایدھی صاحب کہا کہ
پڑھیں:
خاموش رہنے کا فیصلہ
اکتوبر 2023میں جب میاں صاحب جلاوطنی گزارکر وطن عزیز واپس لوٹے تو ایک تاثر یہ تھا کہ وہ واپس آکر پھر پہلے کی طرح عملی سیاست میں حصہ لے کر چوتھی بار وزیراعظم کے منصب سے مشرف بااختیار ہو جائیں گے، مگر انھوں نے ایسا کرنے کے بجائے خاموش رہنے اور کنارہ کشی کو اپنانے میں ہی اپنی عافیت جانی۔ ڈیڑھ برس سے زائد کا عرصہ بیت چکا ہے لیکن وہ عملی سیاست سے مسلسل دور ہی رہ رہے ہیں۔
اُن کے مخالفوں کو اُن کی یہ خاموشی بھی طبع نازک پرگراں گزر رہی ہے اور وہ اس میں بھی کوئی راز اور خفیہ پہلو تلاش کرتے پھر رہے ہیں، جب کہ ہمارا خیال ہے کہ انھوں نے عملی سیاست سے دوری کا جو فیصلہ کیا ہے وہ ایک سوچا سمجھا بالکل درست اور دانش مندانہ فیصلہ ہے۔ ہمارے یہاں سیاست ایک بہت ہی پیچیدہ کھیل ہے ۔
اس میں کسی بھی شریف آدمی کو بہت سے مسائل کا سامنا کرنا پڑتا ہے۔ کسی کو لوگوں کی باتیں اور بے جا تنقید سننا ہو تو وہ بلاشبہ اس سیاست کو اپنا اوڑھنا بچھونا بنا لے۔ میاں صاحب تین بار وزیراعظم کے منصب سے سرفراز ہوئے اور تینوں مرتبہ ہی انھیں زبردستی ایوان وزیراعظم سے بے دخل کیا گیا۔ پہلی بار 1993 میں عوام کی زبردست حمایت کے باوجود جس طرح بیدخل کیے گئے وہ ہماری جمہوری سیاست کا بہت ہی افسوسناک طریقہ تھا۔ سابق صدر غلام اسحق خان کی تابعداری سے انکار نے انھیں وہ سزا دلوائی جس کے وہ قطعاً حقدار یا سزاوار بھی نہ تھے۔
مٹی کی محبت میں ہم آشفتہ سروں نے
وہ قرض اتارے ہیں کہ واجب بھی نہ تھے
جب ستم ظریفی ہے کہ قوم سزا دینے والوں سے اس کی وجہ بھی پوچھ نہ سکی کہ میاں صاحب نے ایسا کونسا اتنا بڑا جرم کردیا تھا کہ وہ وزارت عظمیٰ کے عہدے پر مزید رہنے کے قابل نہ سمجھے گئے۔ یہ بات نہ غلام اسحق خان نے کسی کو بتائی اور نہ میاں صاحب اپنی زبان پر لائے۔ پس پردہ تمام کرداروں نے میاں صاحب سے اپنی بھڑاس نکال کر دل کی تسلی کر لی مگر ترقی کرتے ملک کو زبوں حالی کا شکار کردیا۔ چھ مہینے کی اس معرکہ آرائی نے غیر یقینی کی ایسی فضا قائم کردی کہ سارا نظام ہی منجمد ہو کر رہ گیا۔ سپریم کورٹ کے میاں صاحب کے حق میں فیصلے نے مخالف عناصرکے غصے کو اور بھی بڑھاوا دیا اور انھوں نے دوسرے طریقے اپنانا شروع کر دیے۔
پنجاب میں غلام حیدر وائیں کی مضبوط حکومت کو چند دنوں میں عدم اعتماد کی تحریک کے ذریعے اچانک فارغ کردیا گیا اور نئے وزیراعلیٰ نے صوبائی اسمبلی ہی توڑ دی۔ لاہور ہائی کورٹ نے جب اسمبلی کی بحالی کا فیصلہ سنایا تو پھر دوبارہ توڑ دی اور یوں جان بوجھ کر افراتفری اور غیر قانونیت کا بازار گرم کیا گیا۔ دوسری جانب محترمہ بے نظیر صاحبہ کو اسلام آباد کی طرف لانگ مارچ کا گرین سگنل دے دیا گیا اور پنجاب میں منظور وٹو کو اس مجوزہ لانگ مارچ میں مدد گار اور معاون کا کردار ادا کرنے کا ٹاسک دیا گیا۔ ان سب حربوں کے باوجود بھی وہ جب میاں صاحب کو اسلام آباد سے نکالنے میں کامیاب نہ ہوپائے تو جبراً اور زبردستی استعفیٰ پر مجبورکردیا گیا۔ اس کے بعد معین قریشی کا باہر سے درآمد کیا جانا اس واقعے کے پیچھے چھپے بہت سے اسرار و رموز کو عیاں کرتا ہے۔
سازشوں کا یہ سلسلہ دوسری بار بھی اسی طرح دہرایا جاتا ہے اور1997 کے انتخابات میں دو تہائی سے کامیاب ہونے والی حکومت کو 1999 میں ایک بار پھرگن پوائنٹ پر لپیٹ دیا جاتا ہے۔ فارغ کرنے سے پہلے حکومت کو اعتماد میں لیے بغیرکارگل کی جنگ چھیڑ دی جاتی ہے اور وزیراعظم کو اس وقت بتایا جاتا ہے جب دونوں ملکوں کی فوجیں آپس میں گتھم گتھا ہوچکی ہوتی ہیں ۔ دوست ممالک نے بھی ایسے میں ساتھ دینے سے انکارکردیا ۔
اس کے بعد بطور وزیراعظم میاں صاحب کو مجبوراً امریکا سے اس جنگ کو رکوانے کی درخواست کرنا پڑتی ہے اور یوں یہ پھیلتی ہوئی ممکنہ نیوکلیئر جنگ رک جاتی ہے۔ اس واقعہ کے تانے بانے جس طرح بنے گئے وہ بھی باقی تمام رازوں کی طرح ہماری ملکی تاریخ کا ایک راز ہے۔ اس بار بھی میاں صاحب نے خاموشی اختیار کی۔ پھر 12اکتوبر1999 کا سانحہ رونما ہو جاتا ہے۔ اس دن میاں صاحب وزیراعظم ہاؤس سے سیدھے اٹک جیل بھیج دیے جاتے ہیں اور پھر بعد ازاں جوکچھ اُن کے ساتھ ہوا وہ یہاں تحریرکرنا ضروری نہیں۔ یہی وجہ ہے کہ میاں صاحب جب اِن ساری باتوں کو یاد کرتے ہیں تو ان کا سینہ دکھوں سے بھرجاتا ہے۔
1998میں بھارت کے ایٹمی دھماکوں کے جواب میں اس ملک کو ایک نیوکلیئر ریاست کا درجہ دلوانے والے کو جس طرح رسوا کیا گیا کہ طیارہ ہائی جیکنگ کیس میں پھانسی کی سزا سنانے تک کا سامان کر لیا گیا۔ ستم بالائے ستم میاں صاحب کو اقتدار سے زبردستی نکالنے کا سلسلہ 2013 کے الیکشنوں کے بعد پھر سے شروع ہوجاتا ہے۔ 126دنوں کا دھرنا اور اسے کامیاب بنانے کے لیے علامہ طاہر القادری کو کینیڈا سے بلایا جانا، یہ سب کسی نہ کسی خفیہ ہاتھوں کی چال کی نشاندہی کرتا ہے، مگر جب اس میں بھی کامیابی حاصل نہ ہوئی تو پاناما اسکینڈل کو تختہ مشق بنادیا جاتا ہے اور پھر اقامہ کا الزام لگا کر نااہلی کی سزا سنا کر سلاخوں کے پیچھے ڈال دیا جاتا ہے۔
یہ سب کچھ ہوجانے کے بعد اب کس شخص کی ہمت اور خواہش ہوگی کہ وہ چوتھی بار بھی اس ملک کا وزیراعظم بنے۔ میاں صاحب نے خاموشی اختیار کر کے شرافت اور اعلیٰ ظرفی کا ثبوت دیا ہے ۔ وہ اب کسی کے خلاف کچھ نہیں بولتے، جو ہوچکا وہ اسے اپنے سینے میں دبائے بیٹھے ہیں۔ انھوں نے جو فیصلہ کیا ہے، ہمارے خیال میں درست ہی کیا ہے۔ اپنی زندگی کے بقیہ ایام وہ آرام و سکون سے گزارنا چاہتے ہیں۔
وطن کی محبت اپنی جگہ مگر جس دیس کی ترقی و خوشحالی کے لیے انھوں نے اپنی ساری جوانی قربان کردی اور اس کا صلہ بھی انھیں نہ مل سکا تو بہتر ہے زندگی کے باقی ایام اپنی گھر میں خاموشی سے گزار لیں۔ ملک میں جتنے بھی بڑے بڑے ترقیاتی کام ہوئے ہیں اُن میں میاں نوازشریف کی محنت نظر آتی ہے، وہ چاہے موٹر ویز ہوں ، بڑی بڑی شاہراہیں ہوں، میٹرو بس سروس اور اورنج ٹرین ہو یا ایٹمی دھماکے ہوں یا پھر سی پیک جیسا عظیم منصوبہ ہو، سب کے پیچھے میاں صاحب کی کوششیں کار فرما دکھائی دیتی ہیں۔ اِن سب کاموں کے بدلے جیل کی سلاخوں کے درمیان قید تنہائی ہو تو پھر بھلا کون سا شریف انسان مزید سیاست میں رہنے کی خواہش کرے گا، لہٰذا انھوں نے عملی سیاست سے کنارہ کشی کا جو بھی فیصلہ کیا ہے درست ہی کیا ہے۔
ٹرمپ کی پوٹن کو جنگ بندی پر راضی کرنے کی ’آخری‘ کوشش