ججز کا خط اور عدلیہ کی آزادی
اشاعت کی تاریخ: 3rd, February 2025 GMT
پاکستان میں اسوقت عدلیہ کی آزادی اور عدلیہ کے معاملات میں ایگزیکٹو کے عمل دخل پر بحث جاری ہے۔ یہ بحث عوام، میڈیا اور سوشل میڈیا سے ہوتی ہوئی اب ججز کے خطوط اور فیصلوں تک جا پہنچی ہے۔ سپریم کورٹ کے سینیئر پیونی جج (senior puisne) جسٹس منصور علی شاہ ہوں یا اسلام آباد ہائیکورٹ کے آدھے درجن کے قریب ججز سب کھل کر عدلیہ کی آزادی اور خودمختاری کے علاوہ آئین کی سربلندی کی یاددہانی کراتے ہوئے چیف جسٹس آف پاکستان کو مختلف خطوط لکھ چکے اور چھبیسویں آئینی ترمیم اور ججز کی تعیناتی کے حوالے سے بھی اپنے خدشات اور تحفظات کا اظہار کھلے عام کر چکے ہیں۔
اسلام آباد ہائیکورٹ کے ججز کو اس بات پر اعتراض ہے کہ دوسرے ہائیکورٹس سے جج لاکر ان میں سے کسی ایک کو اسلام آباد ہائیکورٹ کا چیف جسٹس تعینات نہ کیا جائے کیونکہ یہ آئین کیساتھ فراڈ ہوگا۔ سوال یہ ہے کہ کیا ایسا پہلی مرتبہ ہوا ہے کہ کسی ایک ہائیکورٹ کے جج کو کسی دوسرے ہائیکورٹ میں چیف جسٹس تعینات کیا گیا ہو؟ یا براہ راست کسی کو جج بنا کر اسے سیدھا چیف جسٹس تعینات کیا گیا ہو؟ ہمارے ملک میں ایسا انہونا واقعہ بھی ہوا ہے کہ ایک وزیر خارجہ کو استعفیٰ دلوا کر براہ راست ہائیکورٹ کا چیف جسٹس لگایا گیا۔
سابق ملٹری ڈکٹیٹر جنرل ایوب خان کے دور میں منظور قادر بطور وزیر خارجہ کے فرائض سرانجام دے رہے تھے۔ جنرل ایوب خان نے وزارت خارجہ سے انکو استعفیٰ دلوا کر چیف جسٹس ویسٹ پاکستان ہائیکورٹ (لاہور ہائیکورٹ) تعینات کردیا۔ منظور قادر صاحب عدلیہ اور وکلا برادری میں انتہائی احترام کی نظر سے دیکھے جاتے تھے۔ اس لیے جب ان کو براہ راست چیف جسٹس تعینات کیا گیا تو ویسٹ پاکستان ہائیکورٹ کے کسی بھی جج نے ان پر اعتراض نہ کیا۔ ویسے بھی ہماری تاریخ ایسی ہے کہ عدلیہ نے ہمیشہ ڈکٹیٹرز کو نظریہ ضرورت کے تحت آئینی کور دیا۔
جیسا کہ عرض کیا ہے کہ ہماری عدلیہ میں بے شمار انہونے واقعات ہوئے ہیں۔ ہائیکورٹس میں براہ راست چیف جسٹس لگانا تو ایک طرف یہاں تو سپریم کورٹ کے حاضر سروس جج کو ایک ہائیکورٹ کا چیف جسٹس لگا دیا گیا اور وہ بیک وقت دو عہدوں پر فائز رہے۔ لیکن مملکت خداد میں ہمیشہ سہاگن وہی جو پیا من بھائے۔ خود سے آئین کو موم کی ناک کی طرح جس طرف چاہے موڑ دیا جائے لیکن پارلیمنٹ اگر کوئی قانون سازی کرے تو وہ قابل قبول نہیں۔
بہر حال پچھلے دنوں جسٹس ارشاد حسن خان کا میڈیا پر خوب تذکرہ رہا اور آجکل اسلام آباد ہائیکورٹ کے ججز کی طرف سے ججوں کے تبادلے اور کسی دوسرے ہائیکورٹ کے جج کو اسلام آباد ہائیکورٹ کے چیف جسٹس لگائے جانے کے خدشات کا اظہار کیا جارہا ہے تو موقع کی مناسبت سے مجھے ایک واقعہ یاد آگیا اور اس کے ساتھ ساتھ الجہاد ٹرسٹ کیس کا فیصلہ بھی جس میں اس واقعے سے جڑے کچھ حقائق بھی۔
ہوا کچھ یوں کہ لاہور ہائیکورٹ میں چیف جسٹس کا عہدہ خالی ہوا تو ہونا تو یہ چاہیے تھا کہ اس عہدے پر روٹین کیمطابق چیف جسٹس کی تعیناتی کی جاتی لیکن ایسا نہیں ہوا۔ ایک فل ٹائم چیف جسٹس کے بجائے نگران (ایکٹنگ) چیف جسٹس لگادیا گیا۔ اس سے بھی ستم ظریفی یہ کہ سپریم کورٹ کے ایک حاضر سروس جج کو نگران چیف جسٹس لاہور ہائیکورٹ تعینات کیا گیا۔ جسٹس ارشاد حسن خان جو اس وقت سپریم کورٹ میں بطور جج فرائض سرانجام دے رہے تھے ان کو 1995 میں لاہور ہائیکورٹ کے نگران چیف جسٹس کا اضافی چارج بھی دے دیا گیا اور 1996 میں اس عہدے پر ایک ریگولر چیف جسٹس تعینات کیا گیا۔
یہ تو بھلا ہو الجہاد ٹرسٹ کیس کا جس کے بعد کچھ رولز سیٹ کردیے گئے کہ اگر اعلیٰ عدلیہ میں جج کی آسامی خالی ہو تو 30 دن کے اندر پُر کیا جانا لازمی ہے اور اگر کسی جج کی دوران سروس وفات ہو جائے یا کوئی مستعفی ہو جائے تو پھر اس آسامی پر 90 دنوں پر تعیناتی کرنا لازمی ہے۔ اگر یہ فیصلہ نہ آتا تو نہ جانے کب تک نگران چیف جسٹسز کا سلسلہ برقرار رہتا۔
اسلام آباد ہائیکورٹ کے ججز نے جو متفقہ طور پر خط چیف جسٹس سپریم کورٹ، سندھ اور لاہور ہائیکورٹس اور صدر مملکت کو لکھا ہے قانونی طور پر جو شخص بھی سروس آف پاکستان میں ہے مشترکہ نمائندگی کر ہی نہیں سکتا۔ گورنمنٹ سروسز کنڈکٹ رولز آف 1964 کیمطابق کوئی بھی شخص جو سروس آف پاکستان میں ہے ایک سے زیادہ لوگوں کیساتھ مل کر کسی معاملے پر اپنے تحفظات، خدشات کا اظہار نہیں کرسکتا۔ البتہ اکیلے اکیلے ان کے اظہار پر کوئی پابندی نہیں۔
سوال یہ بھی ہے کیا ہماری عدلیہ خود کو سروس آف پاکستان کے ماتحت مانتی ہے کہ نہیں؟ ابھی تک اس سوال کے جواب کا بھی تعین نہیں ہوسکا۔ یہ ایک لمبی بحث ہے۔ بہرحال اب تو ججز کے ان خطوط کا جواب بھی دے دیا گیا اور صدر مملکت نے لاہور، سندھ اور بلوچستان ہائیکورٹ سے ایک ایک جج کا تبادلہ کرکے ان کو اسلام آباد ہائیکورٹ میں تعینات کردیا ہے اور ججز کا خط غیر مؤثر ہوچکا ہے۔ اب تو جو ہونا تھا ہوچکا ہے لیکن ہمیں بھی اپنی اداؤں پر کچھ غور کرنا چاہیے۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
ذریعہ: WE News
کلیدی لفظ: اسلام ا باد ہائیکورٹ چیف جسٹس تعینات کیا گیا اسلام آباد ہائیکورٹ کے لاہور ہائیکورٹ ہائیکورٹ کے جج سپریم کورٹ آف پاکستان براہ راست کورٹ میں گیا اور دیا گیا
پڑھیں:
گلگت بلتستان کا 78 واں یوم آزادی جوش و جذبے کے ساتھ منایا گیا
جشن آزادی گلگت بلتستان کی مناسبت سے آرمی ہیلی پیڈ گلگت پر پروقار تقریب کا انعقاد کیا گیا۔ صدر آصف علی زرداری، گورنر گلگت بلتستان، وزیر اعلیٰ، کمانڈر ٹین کور، فورس کمانڈر جی بی سمیت صوبائی وزراء، اعلیٰ سول و عسکری حکام سمیت عوام کی بڑی تعداد نے شرکت کی۔ اسلام ٹائمز۔ گلگت بلتستان کا 78 واں جشن آزادی جوش و خروش سے منایا گیا۔ صدر مملکت آصف علی زرداری نے جی بی کے یوم آزادی کی تقریب میں خصوصی شرکت کی۔ تفصیلات کے مطابق گلگت میں مرکزی تقریب چنارباغ میں ہوئی جہاں مہمان خصوصی گورنر گلگت بلتستان سید مہدی شاہ تھے، تقریب میں وزیر اعلی جی بی، صوبائی وزراء، کمانڈر ایف سی این اے سمیت دیگر سول و عسکری حکام شریک ہوئے۔ گورنر اور وزیر اعلیٰ نے یادگار شہداء پر پھولوں کی چادر چڑھائی اور فاتحہ خوانی کی۔ ادھر جشن آزادی گلگت بلتستان کی مناسبت سے آرمی ہیلی پیڈ گلگت پر پروقار تقریب کا انعقاد کیا گیا۔ صدر آصف علی زرداری، گورنر گلگت بلتستان، وزیر اعلیٰ، کمانڈر ٹین کور، فورس کمانڈر جی بی سمیت صوبائی وزراء، اعلیٰ سول و عسکری حکام سمیت عوام کی بڑی تعداد نے شرکت کی۔ ادھر سکردو میں جگہ جگہ یوم آزادی کی تقریبات ہوئیں۔ مرکزی تقریب یادگار شہداء پر منعقد ہوئی جہاں کمشنر بلتستان، ڈی جی آئی و دیگر نے پرچم کشائی کی۔
ڈسٹرکٹ ایڈمنسٹریشن کمپلکس سے ریلی بھی نکالی گئی جو یادگار شہداء پہنچ کر جلسے میں بدل گئی۔ ریلی میں سکول کے بچے، انجمن تاجران سمیت عوام نے شرکت کی۔ ادھر ضلع غذر میں ضلعی انتظامیہ کے زیر انتظام ریسٹ ہاؤس سے سٹی پارک تک ریلی نکالی گئی۔ محکمہ جنگلات کی جانب سے سٹی پارک میں شجرکاری کا بھی اہتمام کیا گیا، مہمانوں نے سٹی پارک میں پودے لگائے۔ ضلع ہزہ میں بھی یوم آزادی جوش و خروش سے منایا گیا۔ مرکزی تقریب گرلز ڈگری کالج کریم آباد میں ہوئی جہاں پرچم کشائی کی گئی جبکہ پولیس کے دستے نے سلامی پیش کی۔ دیامر، استور، گانچھے میں بھی یوم آزادی کی تقریبات ہوئیں۔ یوم آزادی کے موقع پر گلگت بلتستان میں عام تعطیل کی گئی۔ دوسری جانب عوامی ایکشن کمیٹی کی جانب سے یوم آزادی کے موقع پر گلگت میں اتحاد چوک پر جلسے کا اہتمام کیا گیا۔ جلسے میں گلگت بلتستان کی محرومیوں کو اجاگر کیا گیا۔
ٹی ٹی پی کے اہم رہنما حافظ گل بہادر کیا پاکستانی حملے میں مارے گئے؟