تنہائی میں بھی پاکیزگی اختیار کیجیے۔۔۔ !
اشاعت کی تاریخ: 11th, April 2025 GMT
خلوت، عربی زبان کا لفظ ہے جس کا معنی تنہائی اور علاحدگی ہے۔ دنیاوی زندگی میں خلوت یعنی تنہائی انسان کے لیے اچھائی اور برائی کے درمیان ایک کش مکش کا سبب ہوتی ہے۔
ایک طرف شیطان و شیطانی قوت بُرائی کی لذت کو خوب صورت و مزیّن صورت میں پیش کرتی ہے تو دوسری جانب ایمان و ایمانی طاقت اسے بتاتی ہے، اﷲ تعالیٰ تجھے دیکھ رہا ہے، تیری ہر بات کو سن رہا ہے، وہ تیرے ساتھ ہے۔ ’’تیری شہ رگ سے زیادہ قریب ہے۔‘‘ لہٰذا: ’’جہاں کہیں بھی ہو اﷲ سے ڈرو۔‘‘ (جامع ترمذی) اور: ’’اﷲ تعالیٰ جانتا ہے کہ کون اﷲ تعالیٰ سے غائبانہ ڈرتا ہے۔‘‘ (المائدہ) چناں چہ ان دو میں سے ایک ندا پر انسان لبیک کہتے ہوئے پھر یا تو اپنی نیکیوں کی بربادی کا راستہ اختیار کرتا ہے یا اﷲ تعالیٰ کے ہاں خوف و خشیت پر موعود تمام انعامات و بشارات کا مستحق بنتا ہے۔
اسی آزمائش کو اﷲ تعالیٰ نے سورۃ المائدہ میں یوں ذکر فرمایا ہے، مفہوم:
’’اے ایمان والو! اﷲ ایسے شکار کے ذریعے تمہاری آزمائش کرے گا جو تمہارے ہاتھوں اور تمہارے نیزوں کی زد میں ہوں گے، یہ دیکھنے کے لیے کہ کون غائبانہ طور پر اﷲ سے ڈرتا ہے۔‘‘ (المائدہ)
عصر حاضر میں یہ شکاری جس کے ذریعے تنہائی میں ہر انسان ایک آزمائش میں مبتلا ہے وہ آج اس کے ہاتھ کا کنگن اسمارٹ فون ہے۔ جس کے صارفین کی تعداد ایک محتاط اندازے کے مطابق پانچ ارب کے لگ بھگ ہے اور اس کی رسائی برائی اور گناہ کے تمام اسباب و صورتوں تک اس قدر وسیع و سریع ہے کہ ایک کلک پر اس کی ہوش ربا صورتیں منکشف ہو کر اس کے ایمان و اعمال کواپنے گھیرے میں لے کر دیمک کی طرح چاٹ کر صاف کر دیتی ہیں۔ حتیٰ کہ بہت سے نیک، شریف النفس و سلیم الفطرت طبقات بھی نافرمانی، شہوت رانی کے ٹھاٹھیں مارتے سیلاب میں خس و خاشاک کی طرح بہہ جاتے ہیں۔ ارشاد باری تعالیٰ کے مطابق، مفہوم: ’’یہی وہ لوگ ہیں جن کے تمام (نیک) اعمال دنیا و آخرت میں برباد ہوگئے۔‘‘ کا مصداق بنتے ہیں۔
اﷲ تعالیٰ نے انسان میں طبعی طور پر یہ صلاحیت رکھی ہے کہ وہ نیکی کے ماحول اور شرم و حیاء کے وصف کی بناء پر لوگوں کے سامنے بہت سے گناہوں سے صرف اس جذبہ کی بناء پر محفوظ رہتا ہے کہ ’’دیکھنے والے کیا کہیں گے‘‘ مگر تنہائی میں جب بہ ظاہر ہر نظر سے اوجھل ہوتا ہے اور صرف ایک اﷲ کی نظر کے سامنے ہوتا ہے، اپنے آپ کو برائی و گناہ کے سپرد کر بیٹھتا ہے۔ حقیقت میں یہی اس کی حقیقی کیفیت اور اصلی چہرہ ہوتا ہے۔ جو بہ ظاہر لوگوں سے پوشیدہ ہوتا ہے۔ اس لیے خلوت (تنہائی) میں کیا گیا عمل ہمیں ہماری پہچان دیتا ہے کہ ہم اصلاً اچھے ہیں یا بُرے۔
اسی کیفیت کا پردہ چاک کرتے ہوئے کسی نے کہا تھا:
بہت مشکل ہے بچنا بادۂ گلگوں سے خلوت میں
بہت آسان ہے یاروں میں معاذ اﷲ کہہ دینا
اور نبی کریم ﷺ یہ دعا فرمایا کرتے تھے، مفہوم: ’’اے اﷲ! میرے باطن کو میرے ظاہر سے اچھا کردے۔‘‘ آپ ﷺ کا ارشاد ہے: ’’تین چیزیں باعث نجات ہیں، غضب اور خوشی دونوں صورتوں میں عدل کرنا، امیری اور فقیری میں میانہ روی اختیار کرنا اور خلوت (تنہائی) اور جلوت (ہجوم) میں اﷲ کا خوف قائم رکھنا۔‘‘ یہی تنہائی میں خوف و خشیت ’’صفت احسان‘‘ کا تقاضا ہے یعنی: ’’تم اﷲ تعالیٰ کی بندگی ایسے کرو گویا کہ تم اسے دیکھ رہے ہو اور اگر تم اﷲ تعالیٰ کو نہیں دیکھ رہے تو (یقین رکھو) وہ تمہیں دیکھ رہا ہے۔‘‘ چناں چہ ظاہر میں نیک رہنا اور چھپ کر گناہ کرنا تقویٰ نہیں بل کہ ریاکاری ہے۔
حضرت عدی بن حاتمؓ سے مروی ہے کہ آپ ﷺ نے ارشاد فرمایا، مفہوم: ’’قیامت کے دن کچھ لوگوں کو جنّت کی طرف لے جانے کا حکم ہوگا یہاں تک کہ جب وہ جنت کے قریب پہنچ کر اُس کی خوش بُو سونگھیں گے، اس کے محلات اور اس میں اہل جنّت کے لیے اﷲ تعالیٰ کی تیار کردہ نعمتیں دیکھ لیں گے تو آواز دی جائے گی: انہیں جنت سے لوٹا دو کیوں کہ ان کا جنت میں کوئی حصّہ نہیں۔ (یہ ندا سن کر ) وہ ایسی حسرت کے ساتھ لوٹیں گے کہ ان جیسی حسرت کے ساتھ ان سے پہلے لوگ کبھی نہ لوٹے ہوں گے۔ پھر وہ عرض کریں گے: اے ہمارے رب! اگر تو اپنا ثواب اور اپنے نیک بندوں کے لیے تیار کردہ نعمتیں دکھانے سے پہلے ہی ہمیں جہنم میں داخل کر دیتا تو یہ ہم پر زیادہ آسان ہوتا۔ اﷲ تعالیٰ ارشاد فرمائے گا: میں نے ارادتاً تمہارے ساتھ ایسا کیا (اور اس کی وجہ یہ ہے کہ) جب تم تنہائی میں ہوتے تھے تو بڑے بڑے گناہ کرکے میرے ساتھ اعلان جنگ کرتے تھے اور جب لوگوں سے ملتے تھے تو عاجزی و انکساری کے ساتھ ملتے تھے اور لوگوں کو اپنی وہ حالت دکھاتے تھے جو تمہارے دلوں میں میرے لیے نہیں ہوتی تھی۔ تم لوگوں سے ڈرتے تھے مگر مجھ سے نہیں ڈرتے تھے۔ تم لوگوں کی عزت کرتے تھے مگر میری نافرمانی کرتے تھے۔ تم لوگوں کی وجہ سے بُرا کام کرنا چھوڑ دیتے تھے لیکن میری وجہ سے برائی نہ چھوڑتے تھے۔ آج میں تمہیں اپنے ثواب سے محروم کرنے کے ساتھ اپنے عذاب کا مزہ بھی چکھاؤں گا۔ (معجم الاوسط)
چناں چہ تنہائی کے گناہ اﷲ تعالیٰ کے غضب و قہر کے نزول کا سبب ہیں۔ اسی لیے حضرت علی ؓ فرمایا کرتے تھے: ’’تنہائی میں اﷲ تعالیٰ کی مخالفت کرنے سے ڈرو کیوں کہ جو گواہ ہے وہی حاکم ہے۔‘‘ (نہج البلاغہ) جب گواہ اور گرفت پر قادر ایک ہی ہستی ہوگی تو سزا سے نجات کا کوئی راستہ نہیں ہو سکتا۔ مزید برآں ابن ماجہ کی روایت میں تنہائی کے گناہ کی سزا میںسب نیک اعمال کے ضیاع و بے کار جانے کی وعید بھی مذکور ہے۔
حضرت ثوبان ؓ سے روایت ہے کہ رسول اﷲ ﷺ نے ارشاد فرمایا، مفہوم: ’’میں اپنی امت میں سے ایسے لوگوں کو جانتا ہوں جو قیامت کے دن تہامہ (مکہ مکرمہ کا ایک نام) کے پہاڑوں کے برابر نیکیاں لے کر آئیں گے اﷲ تعالیٰ ان کو فضا میں اڑتے ہوئے ذرّے کی مانند بنا دے گا۔‘‘ حضرت ثوبانؓ نے عرض کیا: اﷲ کے رسول ﷺ ان لوگوں کا حال ہمیں بیان فرمائیے اور کھول کر بیان فرمائیے تاکہ لا علمی اور جہالت کی وجہ سے ہم ان میں سے نہ ہوجائیں۔ آپ ﷺ نے فرمایا: ’’جان لو کہ وہ تمہارے بھائیوں میں سے ہیں اور تمہاری قوم میں سے ہیں۔ وہ بھی رات کو اسی طرح عبادت کرتے ہوں گے جیسے تم عبادت کرتے ہو۔ لیکن وہ ایسے لوگ ہیں کہ جب تنہائی میں ہوں گے تو حرام کاموں کا ارتکاب کریں گے۔‘‘ (ابن ماجہ)
اگر ہم تنہائی میں درپیش خطرات ِگناہ اور ارتکاب معصیت پر نظر کریں تو معلوم ہوتا ہے کہ ان روایات میں ہمارے زمانے کے موبائل فون کی تنہائی کی تباہ کاریوں کا بھی تذکرہ ہے۔ چناں چہ خلوت کی حفاظت کے متعلق آپ ﷺ کا ارشاد ہے: ’’جو کام لوگوں کے سامنے کرنے کو ناپسند کرتے ہو وہ تنہائی میں بھی نہ کیا کرو۔‘‘ (جامع صغیر) جیسا کہ تنہائی میں گناہوں کے ارتکاب پر سخت و عیدیں منقول ہیں ایسے ہی تنہائی میں (برائی کے اسباب مہیا ہونے کے باوجود) یادِ الہٰی اور خشیت و تقویٰ پر اجر ثواب بھی بہت زیادہ ہے۔ حضرت قتادہ ؓ سے روایت ہے آپ ﷺ نے ارشاد فرمایا: ’’جو شخص (تنہائی میں) کسی حرام کام پر قادر ہو پھر اسے صرف اﷲ کے خوف کی وجہ سے چھوڑ دے تو اﷲ تعالیٰ آخرت سے پہلے دنیا ہی میں اس کا ایسا بدل عطا فرماتا ہے جو اس حرام کام سے (بہ درجہ) بہتر ہو۔ (جامع الاحادیث)
حضرت کعب الاحبارؓ بیان فرماتے ہیں: ’’جس نے ایک رات بھی اﷲ تعالیٰ کی ایسے عبادت کی کہ اسے کوئی جاننے والا نہ دیکھے تو وہ گناہوں سے ایسے نکل گیا جیسے (سورج طلوع ہوتے ہی) اپنی رات سے نکل جاتا ہے۔ (حلیۃ الاولیاء)
ایسے ہی ایک دوسری روایت میں منقول ہے۔ حضرت ابو امامہؓ سے مروی ہے آپ ﷺ نے ارشاد فرمایا، مفہوم: ’’جس شخص کو (تنہائی میں) کسی عورت نے برائی کی دعوت دی اور وہ محض اﷲ کے خوف کی وجہ سے اس سے باز رہا تو قیامت کے دن اﷲ تعالیٰ اسے عرش کے سایے میں جگہ عطا فرمائے گا۔‘‘ (معجم الکبیر) ایک حدیث میں حضرت ابو ہریرہؓ سے مروی ہے کہ نبی کریم ﷺ نے ارشاد فرمایا، مفہوم: ’’سات طرح کے لوگ وہ ہیں جنہیں اﷲ تعالیٰ اپنے سایہ میں پناہ دے گا ان میں ایک وہ شخص بھی ہے جس نے تنہائی میں اﷲ کو یاد کیا تو (خوف یا محبت کی وجہ سے) اس کی آنکھوں سے آنسو جاری ہوگئے۔‘‘ (بخاری) نیز حضرت علیؓ سے مروی ہے: ’’جس نے اﷲ تعالیٰ کے خوف سے اور اُس کی رضا حاصل کرنے کی خاطر (تنہائی میں) گناہ چھوڑ دیا تو اﷲ تعالیٰ اسے راضی فرمائے گا۔‘‘ (کنزالعمال)
چناں چہ جیسے اس موبائل فون کے غلط استعمال سے تنہائی میں نافرمانی باعث غضب الہٰی ہے، ایسے ہی ہر معصیت و نافرمانی کی صورت کو تنہائی میں اختیار کرنے پر قدرت کے باوجود محض رضا باری تعالیٰ کی خاطر اختیار نہ کرنے پر اجر و ثواب بھی بے حد و حساب ہے۔ البتہ اس حفاظت کو رحمت و فضل اﷲ رب العزت سمجھے۔ حدیث میں ظاہر و باطنی گناہوں سے بچنے کے لیے ایک دعا تعلیم فرمائی گئی ہے۔ ہر مسلمان کو چاہیے کہ تنہائی کے گناہوں سے حفاظت کے لیے اسے اپنا معمول بنائے۔ حضرت عمرؓ فرماتے ہیں کہ رسول اﷲ ﷺ نے یہ دعا سکھائی، مفہوم:
’’اے اﷲ! میرے باطن کو میرے ظاہر سے اچھا کردے اور ظاہر کو نیک و صالح بنا دے۔ اے اﷲ! میں تجھ سے لوگوں کو عطا کی جانے والی بہترین چیزیں یعنی مال، اچھا گھربار اور وہ اولاد مانگتا ہوں جو نہ گم راہ ہو اور نہ گم راہ گر ہو۔‘‘ (ترمذی)
اسی لیے تنہائی کے لمحات ایک بیش قیمت خزانہ ہے جس کے خطرات اور ہلاکت کے ذرایع معصیت اور ارتکاب گناہ ہے اور اس کی حفاظت کا سامان خوف و خشیتِ باری تعالیٰ ہے۔
اﷲ تعالی ہمیں ہر حال میں رضائے الہی کا خُوگر بنائے رکھے اور ہم سے راضی ہوجائے۔ آمین
.ذریعہ: Express News
کلیدی لفظ: ﷺ نے ارشاد فرمایا تنہائی میں سے مروی ہے گناہوں سے تنہائی کے کی وجہ سے اﷲ تعالی لوگوں کو کرتے تھے ہوتا ہے چناں چہ کرتے ہو کے ساتھ ہوں گے اور اس کے لیے
پڑھیں:
مدد کے کلچر کا فقدان
پاکستان میں سیلاب ابھی جاری ہے۔ لیکن وسطی پنجاب سے پانی نکل کر اب سندھ پہنچنا شروع ہو گیا ہے۔ بلکہ وسطیٰ پنجاب کے علاقوں سے پانی اترنا شروع ہو گیا ہے۔ آیندہ چند دنوں میں لوگ اپنے گھروں میں واپس جانا شروع ہو جائیں گے۔ بلکہ کچھ علاقوں میں لوگ واپس اپنے گھروں میں جانا شروع ہو گئے ہیں، جہاں تباہی ہو چکی ہے۔
اس سے پہلے کہ ہم اس تباہی پر بات کریں۔ میں یہ بھی بتانا چاہتا ہوں کہ سیلاب صرف پاکستان میں نہیں آیا۔ سیلاب بھارتی پنجاب میں بھی آیا ہے۔ بھارت نے کوئی پانی پاکستان کی سرحد پر لاکر نہیں چھوڑ دیا۔ پانی نے بھارتی پنجاب میں بھی خوب تباہی مچائی ہے۔ ایک محتاط اعداد و شمار کے مطابق بھارتی پنجاب کے 23اضلاع سیلاب سے شدید متاثر ہوئے ہیں۔ ان 23اضلاع میں بیس لاکھ سے زائد لو گ سیلاب سے متاثر ہوئے ہیں۔
2050گاؤں بھارتی پنجاب میں سیلاب سے متاثر ہوئے ہیں۔ چار لاکھ سے زائد لوگوں کو گھروں سے نکال کر محفوظ پناہ گاہوں میں پہنچایا گیا ہے۔ پونے دو لاکھ ایکڑ سے زائد زیر کاشت رقبہ تباہ ہوا ہے۔ جہاں کھڑی فصلیں بھی تباہ ہوئی ہیں اور پانی کھڑا ہے۔ اڑھائی لاکھ جانور مر گئے ہیں۔ چھ لاکھ پولٹری کی مرغیاں مر گئی ہیں۔ یہ سب لکھنے کا مقصد یہ ہے کہ بھارتی پنجاب میں کم تباہی نہیں ہوئی ہے، وہاں سیلاب نے خوب تباہی مچائی ہے۔
لیکن ایک فرق کھل کر سامنے آیا ہے۔ بھارت میں لوگ دوسروں کی مدد کے لیے سامنے آئے ہیں۔ وہاں کے اسٹارز مدد کے لیے سامنے آئے ہیں، کاروباری لوگ مدد کے لیے سامنے آئے ہیں۔ لو گ دیہاتوں کے دیہات اپنے ذمے لے رہے ہیں کہ ان کا نقصان پورا کرنا ہماری ذمے داری ہے۔ لوگ ایک دوسرے کی مدد کے لیے سامنے آرہے ہیں۔ ہم شائد اب پابندیوں کی وجہ سے یہاں بھارت کی خبریں کم دیکھتے ہیں۔ لیکن اگر آپ کو بھارتی پنجاب کے ریلیف کے کام دیکھنے کا موقع ملے تو وہاں لوگ متاثرین کی بہت مدد کر رہے ہیں۔ بڑے کاروباری ادارے مدد کے لیے سامنے آئے ہیں۔
افسوس کی بات ہے کہ مجھے پاکستان میں یہ کلچر بہت کم نظر آیا ہے۔ یہاں لوگ حکومتوں سے گلہ کر رہے ہیں لیکن خود کچھ نہیں کر رہے ۔ پاکستان میں بھی بہت بڑے بڑے گلوکار ہیں جو ایک ایک کنسرٹ کا کروڑوں روپے چارج کرتے ہیں لیکن وہ سیلاب زدگان کی مدد کے لیے کچھ نہیں کر رہے۔ ہمارے کھلاڑی ارب پتی ہیں لیکن وہ بھی کچھ نہیں کر رہے۔ پاکستان میں بھی کوئی کم امیر لوگ نہیں ہیں۔
یہاں بھی بھارت سے زیادہ امیر لوگ موجود ہیں لیکن وہ سیلاب سے متاثرہ لوگوں کی مدد کے لیے سامنے نہیں آئے۔ پاکستان کا کارپوریٹ کلچر بھی سامنے نہیں آیا۔ وہ پاکستان سے اربوں روپے کماتا تو ہے لیکن پاکستان میں سیلاب سے متاثرہ لوگوں کی مدد کرنے کے لیے تیار نہیں۔ مجھے افسوس کے ساتھ یہ لکھنا پڑ رہا ہے کہ مجھے پاکستان میں لوگوں کی مدد کا کلچر کمزور پڑتا دکھائی دیتا ہے۔
یہ تو بہت سننے کو ملتا ہے کہ ہمیں عالمی دنیا سے مدد مانگنی چاہیے۔ ایسے مشورے تو بہت سننے کو ملتے ہیں کہ ہمیں عالمی دنیا سے چندہ مانگنا چاہیے، اپنی مظلومیت کا رونا رونا چاہیے، اقوام عالم سے مدد مانگنی چاہیے، سیلاب کے لیے بڑے پیمانے پر دنیا میں فنڈ ریزنگ کرنی چاہیے۔ لیکن میرا سوال ہے کہ پاکستان میں تو لوگ ایک دوسرے کی مدد کے لیے نکلیں پھر دنیا سے بھی مدد مانگ لیں گے۔ چندہ مانگنے چلے جائیں، اپنی جیب سے ایک روپیہ نہ نکالیں۔
سب سے پہلے پاکستانیوں کو پاکستانیوں کی مدد کے لیے نکلنا چاہیے، اگر ہر کوشش کے بعد ہم نقصان پورا نہ کر سکیں تو باہر سے مدد مانگنی چاہیے۔ کیا پاکستان میں ایسے لوگوں کی کمی ہے جو دس دس دیہات اپنے ذمے نہیں لے سکتے۔ کیا پاکستان میں ایسے کاروباری اداروں کی کمی ہے جو ایک نہیں درجنوں دیہات کی بحالی کا کام اپنے ذمے لے سکتے ہیں۔ پاکستان میں تو ایسے امیر لوگوں کی کمی نہیں ہیے جو لوگوں کا نقصان پورا کر سکتے ہیں۔ لیکن وہ بھی چندہ مانگنے کی بات کرتے ہیں۔ جن کو خود سب کچھ کرنا چاہیے وہ بھی باہر سے مانگنے کی بات کرتے ہیں۔ یہ ایک افسوسناک صورتحال ہے ۔
پاکستان میں کس شہر کے چیمبر نے سیلاب زدگان کی مدد کے لیے کام شروع کیا ہے۔ کسی نے نہیں۔ آپ ان کے عہدیداروں سے سیاسی پریس کانفرنسیں کروا لیں، ٹیکس کے خلاف اتحاد بنوا لیں، حکومت کے خلاف اتحاد بنوا لیں۔ لیکن پاکستانیوں کی مدد کے لیے نہ کہیں۔ اگر ہر چیمبر اپنے ایک ایک رکن پر ایک گاؤں کی بحالی کی ذمے داری بھی ڈالے تو کیا ہمیں کسی سے مدد مانگنے کی ضرورت رہے، ہرگز نہ رہے۔ لیکن ایسا ہوتا نہیں ہے۔ وہ عوام سے چندہ مانگنا شروع کر دیتے ہیں۔
بڑے کاروباری ادارے دیکھ لیں۔ سب کی ایک جیسی صورتحال ہے۔ ان کو دیکھ کر لگتا ہے کہ پاکستان میں کوئی سیلاب آیا ہی نہیں ہے۔ یہ لوگ اپنے ٹیکس کے خلاف تو متحد ہو جاتے ہیں لیکن لوگوں کی مدد کے لیے اکٹھے نہیں ہوتے۔ میں بھی کیا گلہ کر رہا ہوں جو ملک کو ٹیکس دینے کے لیے تیار نہیں، وہ سیلاب ز دگان کی کیا مدد کریں گے۔ شائد ان میں اب یہ جذبہ ہی ختم ہو گیا ہے۔
میں یہ نہیں کہہ رہا کہ آپ حکومت کو چندہ دیں، بھائی خود جاکر مدد کریں، اپنے پیسوں سے خود مدد کریں۔ جائیں لوگوں کے گھر بنانے شروع کریں۔ جائیں لوگوں میں جانور تقسیم کریں۔ جائیں لوگوں کو ان کے کھیت دوبارہ قابل کاشت بنانے میں مدد کریں۔ لوگوں کے گھروں کی تمام اشیا بہہ گئی ہیں۔ لوگوں کو نئی اشیا کی ضرورت ہے، جائیں لوگوں کی براہ را ست مدد کریں۔ ایک ایسا کلچر بنائیں کہ لوگ کہیں کہ ہمیں اب مدد کی ضرورت نہیں۔ ہمارا نقصان پورا ہو گیا ہے۔ ہر شہر کا چیمبر اپنے علاقے کا ذمے لے۔ یہ کوئی ناممکن کام نہیں، صرف ایک جذبہ کی ضروت ہے جو نظر نہیں آرہا۔
یہ حقیقت ہے کہ لوگوں میں ایک دوسرے کی مدد کرنے کے جذبہ کی کمی ہورہی ہے۔ امیر کو غریب کی کوئی فکر نہیں، امیر کو اپنی دولت کی فکر ہے۔ یہ کسی بھی قوم کی کوئی اچھی پہچان نہیں۔ دنیا میں کیا یہ حقیقت نہیں کہ ہماری پہچان بھکاریوں کی ہوتی جا رہی ہے۔ لوگ ہمارے ملک کے لوگوں پر ویزہ اس لیے بند کر رہے ہیں کہ ہمارے بھکاری وہاں پہنچ جاتے ہیں۔ اس لیے پاکستان سے مانگنے کا کلچر ختم کرنا ہوگا۔ اپنی مدد آپ کے کلچر کو فروغ دینا ہوگا۔ مدد مانگنے کا کلچر کوئی اچھی پہچان نہیں۔
دریائے چناب میں سیلابی صورتحال، ٹرین سروس معطل