بھارت کا چہرہ بے نقاب کرنے کے لیے پاکستانی وفد آج اہم ملاقاتیں کرے گا
اشاعت کی تاریخ: 2nd, June 2025 GMT
بھارت کے حملوں سے شہریوں کی اموات اور مودی حکومت کی آبی جارحیت سے امریکا اور اقوام متحدہ کو آگاہ کرنے کے لیے پاکستان کا نو رکنی وفد آج سے اہم ملاقاتوں کا آغاز کرے گا۔
رپورٹس کے مطابق پاکستانی وفد اقوام متحدہ میں چین اور روس کے مندوبین سے ملاقات کرے گا، وفد او آئی سی کے سفیروں سے بھی نیویارک میں ملاقات کرے گا۔
چیئرمین پیپلزپارٹی بلاول بھٹو زرداری کی قیادت میں 9 رکنی وفد میں شیری رحمان اور حنا ربانی کھر شامل ہیں۔
وفد میں جلیل عباس جیلانی، مصدق ملک، خرم دستگیر، فیصل سبزواری، بشریٰ انجم بٹ اور تہمینہ جنجوعہ بھی شامل ہیں۔
Post Views: 4.ذریعہ: Daily Mumtaz
کلیدی لفظ: کرے گا
پڑھیں:
بھارتی جارحیت اور علاقائی امن پر عالمی رائے ہموار کرنے بلاول بھٹو کا وفد نیویارک میں متحرک
بھارت کی حالیہ جارحیت اور جنگ بندی کے باوجود جاری اشتعال انگیزی کے خلاف پاکستان کا اعلیٰ سطح وفد سابق وزیر خارجہ اور چیئرمین پیپلز پارٹی بلاول بھٹو زرداری کی قیادت میں نیویارک پہنچ چکا ہے، جہاں وہ آج سے اقوام متحدہ کے اعلیٰ عہدیداروں، سلامتی کونسل کے ارکان اور دوست ممالک کے نمائندوں سے اہم ملاقاتوں کا آغاز کر رہا ہے۔
9 رکنی وفد میں سابق وزرائے خارجہ حنا ربانی کھر اور جلیل عباس جیلانی، سینیٹر شیری رحمان، سینیٹر مصدق ملک، خرم دستگیر خان، فیصل سبزواری، بشریٰ انجم بٹ اور تہمینہ جنجوعہ شامل ہیں۔ بلاول بھٹو اور شیری رحمان ہفتے کو نیویارک پہنچے، جبکہ دیگر اراکین اتوار کو نیویارک پہنچے۔
وفد کی پہلی ملاقات آج اقوام متحدہ میں چین کے مستقل مندوب فو کونگ سے ہوگی، جس کے بعد روس، او آئی سی اور غیر وابستہ ممالک کے نمائندوں سے ملاقاتیں طے ہیں۔ ذرائع کے مطابق وفد بھارت کی جانب سے شہری آبادیوں پر حملے، آبی جارحیت، اور کشمیر پر غیرقانونی اقدامات سے متعلق پاکستان کا مؤقف پیش کرے گا، اور زور دے گا کہ مسئلہ کشمیر کو سلامتی کونسل کی قراردادوں اور کشمیری عوام کی خواہشات کے مطابق حل کیا جائے۔
مزید پڑھیں: سونندا پشکر کیس اور ششی تھرور پر قتل کا الزام، بی جے پی کیا چاہتی ہے؟
وفد سیکریٹری جنرل اقوام متحدہ انتونیو گوتریس، جنرل اسمبلی کے صدر، اور سلامتی کونسل کے 15 میں سے 14 رکن ممالک کے سفیروں سے ملاقات کرے گا، جن میں امریکا، چین، روس، برطانیہ اور فرانس جیسے مستقل ارکان شامل ہیں۔ پاکستان خود بھی اس سال سلامتی کونسل کا غیر مستقل رکن ہے۔
وفد 3 جون کو واشنگٹن روانہ ہوگا، جہاں امریکی حکام، تھنک ٹینکس اور دانشوروں سے ملاقاتیں کی جائیں گی۔ بلاول بھٹو کورنیل کلب میں ایک اہم پالیسی خطاب بھی کریں گے، جس میں امریکا میں مقیم پاکستانی اور خارجہ امور سے متعلق ماہرین شریک ہوں گے۔
یہ دورہ ایسے وقت میں ہو رہا ہے جب بھارت نے اپنے بیانیے کے فروغ کے لیے ششی تھرور کی سربراہی میں ایک وفد امریکا بھیجا ہے۔ وزیراعظم شہباز شریف کی ہدایت پر تشکیل دیے گئے پاکستانی وفد کا مقصد بین الاقوامی رائے عامہ کو متحرک کرنا اور بھارت کے جنگی جنون، علاقائی عدم استحکام اور انسانی حقوق کی خلاف ورزیوں کو بے نقاب کرنا ہے۔
مزید پڑھیں: بلاول بھٹو کی قیادت میں پاکستانی وفد نیویارک پہنچ گیا، کونسی اہم ملاقاتیں متوقع ہیں؟
چین اور روس دونوں نے پاک بھارت حالیہ کشیدگی پر گہری تشویش کا اظہار کیا ہے اور مذاکرات کے ذریعے مسئلہ حل کرنے پر زور دیا ہے۔ چین نے خاص طور پر مسئلہ کشمیر کو اقوام متحدہ کی قراردادوں کے مطابق تصفیہ طلب تنازع قرار دیا ہے، جبکہ روسی وزیر خارجہ سرگئی لاؤروف نے پاکستانی اور بھارتی ہم منصبوں سے رابطہ کرکے ثالثی کی پیشکش بھی کی تھی۔
اسی طرح او آئی سی نے بھی بھارت کی جانب سے پاکستان پر الزامات کو بے بنیاد قرار دیتے ہوئے مطالبہ کیا ہے کہ کشمیریوں کو ان کا حق خود ارادیت دیا جائے۔ او آئی سی کا کہنا ہے کہ خطے میں امن کا قیام مسئلہ کشمیر کے حل سے جڑا ہے، جس کے لیے اقوام متحدہ اور عالمی برادری کو مؤثر کردار ادا کرنا ہوگا۔
پاکستانی وفد کی ان سرگرمیوں کو ٹرمپ انتظامیہ بھی بغور دیکھ رہی ہے۔ بعض ذرائع کا کہنا ہے کہ امریکا بیک ڈور ڈپلومیسی کے ذریعے پاکستان اور بھارت کے درمیان کشیدگی کم کرنے کی کوشش کر رہا ہے۔ تاہم بلاول بھٹو کی قیادت میں پاکستانی وفد سفارتی محاذ پر بھرپور انداز میں سرگرم ہو چکا ہے۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
انتونیو گوتریس او آئی سی بلاول بھٹو پاکستان حنا ربانی کھر واشنگٹن
اسلامی نظریاتی کونسل نے کم عمری کی شادی روکنے کا بل مسترد كردیا