پاکستان اور افغانستان کا فطری اتحاد
اشاعت کی تاریخ: 15th, June 2025 GMT
علاقائی پیچیدگیوں اور سیاسی تغیرات کے باوجود، پاکستان نے ہمیشہ ایک پرامن اور خوشحال افغانستان کے لئے تعاون کی حکمت عملی اپنائی ہے۔ مستحکم، متحد اور خوشحال افغانستان کو نہ صرف ایک ہمسایہ ذمہ داری بلکہ علاقائی امن کے لیے ایک تزویراتی ضرورت سمجھتا ہے۔ پاکستان نے ہمیشہ دوستی کا ہاتھ بڑھایا ہے۔ پاکستان اور افغانستان کا رشتہ صدیوں پرانا ہے، جو مشترکہ تاریخ اور جغرافیہ میں جڑا ہوا ہے۔ یہ قدرتی وابستگیاں دونوں ممالک کے عوام کے درمیان برادرانہ تعلقات کو فروغ دیتی ہیں۔ قدیم ادوار میں افغانستان وسطی ایشیائی ریاستوں سے برصغیر تک تجارت کے لیے قدرتی گیٹ وے کے طور پر کام کرتا رہا۔ ان تجارتی راستوں نے ثقافتی، مذہبی اور تجارتی تبادلوں کو ممکن بنایا، جس سے دونوں خطوں کے درمیان ایک گہرا تعلق قائم ہوا۔ پاکستان آج بھی ان تاریخی تجارتی روابط کی بحالی کے لیے پرعزم ہے۔
پاکستان اور افغانستان معیشت، سلامتی اور سماجی روابط کے اعتبار سے تاریخی طور پر ایک دوسرے پر انحصار کرتے رہے ہیں۔ ایک ملک میں امن دوسرے کی سلامتی پر براہ راست اثر انداز ہوتا ہے، جس سے دونوں کی تقدیریں جڑی ہوئی ہیں۔ ایک مستحکم افغانستان سرحد پار جرائم، دہشت گردی اور مہاجرین کی آمد میں کمی کو یقینی بناتا ہے، جس سے پاکستان کی سیکورٹی کو فائدہ ہوتا ہے۔ اسی لئے پاکستان افغان قیادت پر مبنی امن عمل کا پرزور حامی رہا ہے۔ اسی طرح پاکستان میں امن تجارت، علاقائی ربط اور سرحد پار تعاون کو فروغ دیتا ہے، جو افغانستان کے لیے فائدہ مند ہے۔ پاکستان کے تعمیراتی منصوبے اور تجارتی مواقع افغانستان کی علاقائی بحالی کے لیے کلیدی حیثیت رکھتے ہیں۔ پاکستان کی علاقائی پالیسی کا بنیادی مقصد ایک پرامن، محفوظ اور اقتصادی طور پر مستحکم افغانستان ہے۔ عالمی مفادات کی عارضی نوعیت کے برخلاف، پاکستان کی حکمت عملی دیرپا اور علاقائی امن پر مبنی ہے۔ دونوں ممالک کے درمیان 2,600کلومیٹر طویل سرحد ہے۔ اس سرحد کے دونوں جانب ایک ہی مذہب (اسلام)اور ایک جیسے نسلی پس منظر کے لوگ آباد ہیں جیسے پشتون، تاجک، اور ہزارہ۔ ان قبائلی، نسلی اور خاندانی رشتوں نے ایک انوکھا انسانی ربط پیدا کیا ہے، جو پاکستان اور افغانستان کو صرف ہمسائے نہیں بلکہ باہم جڑی ہوئی معاشرتیں بناتا ہے۔ یہ سماجی ہم آہنگی مشکل وقت میں عوامی سفارت کاری کی بنیاد بن جاتی ہے۔
پاکستان نے ہمیشہ ہر افغان حکومت کے ساتھ خوشگوار تعلقات قائم کرنے کی کوشش کی ہے، چاہے کابل میں کون برسرِاقتدار ہو۔ پاکستان کی پالیسی کبھی بھی افغانستان مخالف نہیں رہی، بلکہ ہمیشہ باہمی فائدے کی کوشش کی ہے۔ ہر حکومت کی تبدیلی کے بعد پاکستان نے خیرسگالی اور احترام پر مبنی رویہ اپنایا ہے۔ بدقسمتی سے کئی افغان حکومتیں بھارت کے اثر میں رہی ہیں، جس نے پاکستان کے خلاف بداعتمادی کو ہوا دی۔ اس بھارتی اثر و رسوخ نے پاک،افغان تعلقات کی مکمل صلاحیت کو حاصل نہیں ہونے دیا۔ اس کے باوجود پاکستان نے ہمیشہ گفت و شنید کو ترجیح دی ہے۔ پاکستان کا موقف ہمیشہ ایک ہی رہا ہے افغانستان کا امن، استحکام اور ترقی۔ پاکستان کی افغان پالیسی قومی مفاد اور علاقائی استحکام پر مبنی ہے۔ پاکستان کی بے مثال فراخدلی کا اظہار اس بات سے ہوتا ہے کہ اس نے چار دہائیوں سے زائد عرصے تک 40لاکھ سے زائد افغان مہاجرین کو پناہ دی۔ یہ دنیا کی سب سے بڑی اور طویل ترین مہاجر میزبانی میں سے ایک ہے۔
15اگست 2021ء کے بعد جب دنیا کی اکثر ریاستیں نیٹو کے ساتھ کام کرنے والے افغانوں کو قبول کرنے میں ناکام رہیں، پاکستان نے ایک بار پھر انسانیت کی خدمت کو ترجیح دی اور مزید 10لاکھ قانونی/غیر قانونی مہاجرین کو پناہ دی۔ مغربی طاقتوں کے وعدے ابھی تک پورے نہیں ہو سکے، لیکن پاکستان نے عالمی ذمہ داری کو وقار اور ہمدردی کے ساتھ نبھایا۔ 12 صوبوں کے لئے45 ایمبولینسز فراہم کی گئیں۔ طبی کیمپس کے ذریعے 30,000 سے زائد مفت آنکھوں کی سرجریاں کی گئیں۔ پاکستان کی طبی خدمات نے ہزاروں افغانوں کی جانیں بچائیں۔۔ چمن،سپین بولدک اور پشاور،جلال آباد ریلوے منصوبوں کے لئے پاکستان کی طرف سے فزیبلٹی مکمل کی جا چکی ہے۔۔ ان منصوبوں کا مقصد تجارت اور نقل و حرکت کو بہتر بنا کر افغانستان کو خطے کی معیشت میں شامل کرنا ہے۔ پاک-افغان تعاون فورم کے تحت کل انسانی امداد کا تخمینہ 30 ملین ڈالر کے لگ بھگ ہے۔ قدرتی آفات میں 15,000 ٹن امداد فراہم کی گئی۔
پاکستان نے ہر حال میں امداد جاری رکھی، جب دنیا کی توجہ ہٹ گئی تو بھی پاکستان نے اپنی ذمہ داری نبھائی۔ قندھار کے لیے ٹی وی ٹرانسمیٹر، سیکیورٹی آلات اور کمپیوٹرز، کابل کے دیہات میں 15 دیپ ویل ہینڈ پمپ ، کابل چڑیا گھر اور دہ مزنگ پارک کی بحالی قابل ذکر ہیں۔ یہ خدمات عام شہری زندگی میں بہتری، ثقافتی ورثے کی بحالی اور بنیادی سہولیات کی فراہمی میں معاون ہیں۔ پاکستان کی دہائیوں پر محیط خدمات نے اسے افغانستان کا واحد قابلِ بھروسہ اور مستقل ساتھی بنایا ہے۔ پاکستان نے افغانستان کے مستحکم مستقبل کی خاطر ہمیشہ دست تعاون دراز کیا ہے۔ یہ رشتہ لین دین پر مبنی نہیں بلکہ برادرانہ، آزمودہ اور مشترکہ مفادات سے منسلک ہے۔
ذریعہ
ذریعہ: Daily Ausaf
کلیدی لفظ: پاکستان اور افغانستان پاکستان نے ہمیشہ افغانستان کا پاکستان کی کے لیے
پڑھیں:
دوسرا ون ڈے: آسٹریلیا نے پاکستان کو جیت کیلئے 232 رنز کا ہدف دے دیا
تین ایک روزہ میچوں کی سیریز کے دوسرے میچ میں آسٹریلیا نے پاکستان کو جیت کے لیے 232 رنز کا ہدف دے دیا۔لاہور کے قذافی اسٹیڈیم میں کھیلے جارہے میچ میں پاکستان کے کپتان شاہین آفریدی نے ٹاس جیت کر آسٹریلیا کو پہلے بیٹنگ کی دعوت دی۔مہمان ٹیم نے پہلےکھیلتے ہوئے مقررہ 50 اوورز میں 9 وکٹ پر 231 رنز اسکور کیے۔آسٹریلیا کی جانب سے کیمرون گرین 53، جوش انگلس 51 اور میٹ رنشا 43 رنز بنا کر نمایاں رہے۔پاکستان کی جانب سے کپتان شاہین آفریدی نے 3 جب کہ حارث رؤف ، عرفات منہاس اور ابرار احمد نے 2،2 وکٹیں حاصل کیں۔پاکستان نے آسٹریلیا کے خلاف پہلا ون ڈے جیتنے والی ٹیم کو ہی برقرار رکھا ہے۔خیال رہے کہ پہلے ایک روزہ میچ میں پاکستان نے آسٹریلیا کو 5 وکٹ سے شکست دی تھی، تین ایک روزہ میچوں کی سیریز میں پاکستان کو ایک صفر کی برتری حاصل ہے۔
منشیات و اسلحہ برآمدگی کیس: صحافی مطیع اللہ جان پر فرد جرم عائد کرنے کا فیصلہ