پاکستان میں ٹیلی کام صارفین کی تعداد 20 کروڑ سے تجاوز، پی ٹی اے کا اہم اعلان
اشاعت کی تاریخ: 19th, June 2025 GMT
اسلام آباد:
پاکستان میں ٹیلی کام صارفین کی تعداد 20 کروڑ سے تجاوز کر گئی۔
پی ٹی اے کی جانب سے سبسکرائیرز کی تعداد 20 کروڑ سے تجاوز کرنے پر تقریب کا انعقاد کیا گیا۔تقریب میں وفاقی وزیر آئی ٹی شزا فاطمہ، چیئرمین پی ٹی اے میجرجنرل ر حفیظ الرحمان اور ڈی جی لائسنسنگ پی ٹی اے عامر شہزاد نے شرکت کی۔
تقریب سے خطاب میں وفاقی وزیر آئی ٹی شزا فاطمہ نے کہا کہ آج پاکستان میں 20 کروڑ صارفین کا مکمل ہونا خوش آئند ہے۔یہ 20کروڑ کنکنش نہیں بلکہ یہ پاکستان کی اسٹرینتھ ہے۔پاکستان کی یوتھ ہمارا سب سے بڑا سرمایہ ہیں۔
انہوں نے کہا کہ ہماری کوشش ہے اسپیکٹرم نیلامی جلد سے جلد ہوسکے۔شہریوں کو قسطوں پر موبائل فون دینے کی پالیسی پر بھی کام کیا جارہا ہے۔ اب تک وزیراعظم لیپ ٹاپ اسکیم کے تحت 12لاکھ لیپ ٹاپس تقسیم کئے جاچکے ہیں۔
انہوں نے مزید کہا کہ پاکستان کی خواتین تک موبائل فون اور انٹرنیٹ تک رسائی بہتر ہوئی ہے۔خواتین اور مردوں کے مابین موبائل فون یوزرز کا گیپ 36فیصد سے کم ہوکر 25فی صد پر آگیا ہے۔ 8 لاکھ سے زائد خواتین نے ایک ماہ میں موبائل والٹس بنائے۔ ہم نے کیش لیس اکانومی کو ملک میں یقینی بنانا ہے۔
تقریب سے خطاب میں چیئرمین پی ٹی اے میجرجنرل ر حفیظ الرحمان کا کہنا تھا کہ اس وقت ملک میں 15 کروڑ انٹرنیٹ کے صارفین ہیں۔ملک میں ٹیلی کام انڈسٹری، حکومت اور انویسٹرز ایک صفحے پر ہیں۔ٹیلی کام کے بغیر ڈیجیٹل اکانومی ناممکن ہے۔20 کروڑ صارفین مکمل ہونے کی خوشی میں صارفین کچھ تحائف دیے جارہے ہیں۔پاکستان ایسا ملک ہے جہاں پر بڑے اچھے کام بھی ہورہے ہیں۔
اس موقع پر پی ٹی اے کی جانب سے تمام موبائل صارفین کو مفت دو جی بی ڈیٹا اور 200 منٹ دیئے جائیں گے۔یہ آفر تمام موبائل نیٹورکس پر دستیاب ہوگی اور 20 جون کو *2200# ڈائل کر کے حاصل کی جا سکتی ہے۔
اس کے علاوہ طالبات کے لیے چھ ماہ کے لیے یونیورسٹیوں میں مفت وائی فائی ہاٹ اسپاٹ کی سہولت میسر ہوگی۔
ساتھ ہی مقامی اسمبل شدہ 200 اسمارٹ فونز خواتین صارفین میں بذریعہ قرعہ اندازی تقسیم ہوں گے۔ گلگت، آزاد کشمیر اور ملک بھر کی خواتین کو اسمارٹ فونز دیے جائیں گے۔
.
ذریعہ
ذریعہ: Express News
پڑھیں:
معاشی سرگرمیوں میں تیزی، کے الیکٹرک صنعتی صارفین کا بجلی استعمال ریکارڈ سطح پر پہنچ گیا
کراچی: ملک میں معاشی سرگرمیوں میں بہتری کے ساتھ کے الیکٹرک صنعتی صارفین کی جانب سے بجلی کے استعمال نے نئی بلند ترین سطح حاصل کر لی۔ مالی سال 2026 کے دوران کے الیکٹرک کے صنعتی فیڈرز پر بجلی کی مجموعی کھپت 6 ارب 8 کروڑ یونٹس (6.08 ارب یونٹس) ریکارڈ کی گئی، جو ادارے کی تاریخ میں کسی بھی مالی سال کے دوران سب سے زیادہ ہے۔
کے الیکٹرک کے جاری کردہ اعلامیے کے مطابق صنعتی بجلی کی طلب میں یہ نمایاں اضافہ ایسے وقت میں سامنے آیا جب پاکستان کی مجموعی قومی پیداوار (جی ڈی پی) کی شرح نمو 3.7 فیصد رہی۔ کمپنی کا کہنا ہے کہ کراچی کی صنعتوں کو مسلسل، قابل اعتماد اور بلا تعطل بجلی کی فراہمی نے صنعتی پیداوار اور معاشی سرگرمیوں کو فروغ دینے میں اہم کردار ادا کیا۔
کے الیکٹرک کے چیف ایگزیکٹو آفیسر سید محمد طہٰ نے کہا کہ صنعتی بجلی کے استعمال میں ریکارڈ اضافہ حکومت پاکستان، اسپیشل انویسٹمنٹ فسیلیٹیشن کونسل (SIFC) اور کراچی کی صنعتی برادری کی مشترکہ کوششوں کا نتیجہ ہے۔ ان کے مطابق سرمایہ کاری کے بہتر ماحول، صنعتی سرگرمیوں میں تیزی اور کاروباری اعتماد میں اضافے نے اس کامیابی کو ممکن بنایا۔
انہوں نے کہا کہ کراچی ملک کی معاشی شہ رگ ہے اور کے الیکٹرک 2013 سے صنعتی فیڈرز کو لوڈشیڈنگ سے مستثنیٰ رکھے ہوئے ہے تاکہ صنعتوں کی پیداوار اور برآمدات متاثر نہ ہوں۔
بی تھری کیٹیگری میں سب سے زیادہ بجلی استعمال
اعلامیے کے مطابق سب سے زیادہ بجلی کا استعمال بی تھری (B3) کیٹیگری میں ریکارڈ کیا گیا، جس میں 501 سے 5 ہزار کلوواٹ تک بجلی استعمال کرنے والی صنعتیں شامل ہیں۔ اس زمرے میں سیمنٹ، اسٹیل، ٹیکسٹائل، کیمیکل اور دیگر بڑے صنعتی شعبے شامل ہیں۔
ماہانہ بنیاد پر جون 2026 میں صنعتی بجلی کی کھپت سب سے زیادہ رہی، جبکہ اپریل 2026 دوسرے نمبر پر رہا۔
گزشتہ سال کے مقابلے میں 20 فیصد سے زائد اضافہ
اعداد و شمار کے مطابق مالی سال 2025 میں صنعتی صارفین نے 5.04 ارب یونٹس بجلی استعمال کی تھی، جبکہ مالی سال 2026 میں یہ مقدار بڑھ کر 6.08 ارب یونٹس تک پہنچ گئی، جو 20 فیصد سے زائد سالانہ اضافہ ظاہر کرتی ہے۔
اس سے قبل مالی سال 2022 میں صنعتی بجلی کی کھپت 5.84 ارب یونٹس ریکارڈ کی گئی تھی، تاہم رواں مالی سال میں یہ ریکارڈ بھی ٹوٹ گیا۔
349 نئے صنعتی کنکشنز فراہم
کے الیکٹرک کے مطابق مالی سال 2026 کے دوران 349 نئے صنعتی کنکشنز جاری کیے گئے، جبکہ 273 صنعتی صارفین نے اپنے بجلی کے لوڈ میں اضافہ کیا، جس سے مجموعی طور پر 168 میگاواٹ اضافی طلب قومی گرڈ میں شامل ہوئی۔
اعلامیے میں کہا گیا کہ حکومت کی جانب سے صنعتوں کو کیپٹو پاور پلانٹس سے قومی گرڈ پر منتقل کرنے کی پالیسی، معاشی بحالی اور صنعتی پیداوار میں اضافے نے بھی بجلی کی طلب بڑھانے میں اہم کردار ادا کیا۔
کمپنی کا مزید کہنا ہے کہ صنعتی فیڈرز کی ریکوری کی شرح تمام صارفین کے مختلف زمروں میں سب سے بہتر رہی، جو بروقت بلوں کی ادائیگی اور لوڈشیڈنگ سے استثنیٰ کے درمیان مضبوط تعلق کو ظاہر کرتی ہے۔
کے الیکٹرک نے اس عزم کا اعادہ کیا کہ کراچی کی صنعتوں اور کاروباری سرگرمیوں کو قابل اعتماد اور بلا تعطل بجلی کی فراہمی آئندہ بھی اس کی اولین ترجیح رہے گی تاکہ ملکی معیشت کی ترقی میں اپنا کردار جاری رکھا جا سکے۔
سپریم کورٹ کا تاریخی فیصلہ، پولیس ریکارڈ سے ذات برادری کا خاتمہ لازم قرار