یوسفی: کون لفظوں کو سکھائے گا تبسم خیزیاں
اشاعت کی تاریخ: 20th, June 2025 GMT
پیدائش جے پور کی تھی، درس گاہ علی گڑھ یونیورسٹی رہی۔ تعلیم فلسفے کی حاصل کی۔ لگے ہاتھوں ایل ایل بی بھی کر لیا۔ پہلی ملازمت ڈپٹی کمشنری ٹھہری، روزگار بینکاری کے شعبے سے پایا، پاکستان کے چار بڑے بینکوں کے صدر رہے اور پھر بینکنگ کونسل کے چیئرمین بھی بنے۔ جثہ دھان پان سا، قد ساڑھے پانچ فٹ سے بھی نکلتا ہوا اور رنگت ایسی کہ کبھی خود پر فخر کی نوبت نہیں آئی۔ فارغ البال تھے لہٰذا منہ دھونے میں بہت وقت اور رقبہ صرف ہوتا تھا۔ آواز ایسی کہ خود کو بھی سرگوشی معلوم پڑتی تھی۔ لہجہ لیکن ایسا تیکھا کہ کاٹ دور تک جاتی تھی۔
یہ ہے حضرت یوسفی کی ذات گرامی کا خلاصہ۔ اس سوانح عمری کو پڑھ کر کون کہہ سکتا تھا کہ یہ شخص مزاح کا ایسا شہسوار نکلے گا کہ جس پر اردو فکاہیہ ادب پر کیا موقوف سارا اردو ادب ہمیشہ ناز کرے گا۔
یہ بات پرانی ہوگئی کہ ’ہم اردو مزاح کے عہدِ یوسفی میں جی رہے ہیں‘ اب محاورہ کچھ یوں درست بیٹھتا ہے کہ ’اردو ادب یوسفی کے آغوش میں جی رہا تھا‘۔
جس محنت سے یوسفی نے مزاحیہ نثر کی پرداخت کی، اس محنت سے تو آج کل کوئی اولاد کی پرورش نہیں کرتا۔ ایک ایک لفظ موتیوں میں پرویا ہوا، گلابوں میں سمویا ہوا، آب زم زم سے دھویا ہوا۔ یوسفی نے ترکے میں پانچ کتابیں چھوڑی ہیں۔ یہی ترکہ ورثہ ہے اردو کا، یہی پانچ کتابیں آبرو ہیں اس زبان کی۔
یوسفی اپنے فن میں اتنے غرق تھے کہ انہیں اپنے آپ پر فخر کرنے کی فرصت ہی نہیں ملی۔ جہاں موقع دیکھتے اپنی ہی بھد اڑاتے، خود پر طنز کے تیر چلاتے، جی بھر کر اپنا مذاق اڑاتے۔
یوسفی کی تحریروں میں اصلاحی پیغامات کی شدت سے کمی ہے، ناصح کے بہروپ کی طرف ان کی طبیعت ہی نہیں آتی۔ قوم کو راہِ راست پر لانے کا بیڑا انہوں نے کبھی نہیں اٹھایا، صراط مستقیم پر چلنے کی تلقین کی بھی کوئی روایت نہیں ملتی۔ وہ تو کہتے ہیں کہ ’اگر برا کام بھی میانہ روی سے کرنا ہے تو اس سے بہتر ہے آدمی کوئی نیکی کر لے‘۔
یوسفی کے ترکش میں جو تیر تھے وہ طنز کے زہر میں بجھے ہوئے تھے، شگفتگی کی کمان پر تنے ہوئے تھے، مزاح کی مچان پر ڈٹے ہوئے تھے۔ انہوں نے اصلاح احوال کے روایتی نسخے پیش کرنے سے بہتر اس بات کو جانا کہ ہنسا جائے، خوب ہنسا جائے، اپنے آپ پر ہنسا جائے، اپنے جذبات پر ہنسا جائے، اپنے حالات پر ہنسا جائے۔
لفظ کو برتنے کا جو ہنر یوسفی کو تفویض ہوا تھا اس کے پیچھے محنت شاقہ کہیں نظر نہیں آتی۔ یہ برکت تو ودیعت ہوتی ہے، اس میں کمال کسب نہیں ہوتا یہ جمال یار کی عطا ہوتی ہے۔
اردو فکاہیہ نثر پر نظر ڈالیں تو کیا، کیا ستارے نظر آتے ہیں، شفیق الرحمان، کرنل محمد خان، پطرس بخاری اور ابن انشا کی کہکشاں میں یوسفی چاند کی مانند تھے۔ سب ستارے ان کی کشش میں ان کے گرد گردش کرتے تھے۔ اس لیے کہ ان کے ہاں شفیق الرحمٰن کا بانکپن بھی تھا، کرنل محمد خان کی ذہانت بھی، پطرس کی کاٹ بھی اور ابن انشا کی برجستگی بھی۔ یوسفی سی مکمل تحریر کب کسی اور کا نصیب ہوئی۔
عام زندگی میں یوسفی اپنی تحریر سے مختلف تھے۔ بات بات پر جملہ نہیں کہتے تھے۔ ملاحت سے بات کرتے، حلم سے جواب دیتے، مخاطب کو توجہ دیتے اور انکسار سے ملتے تھے۔ لیکن یہ کیفیت ابتدائی ہوتی تھی۔ ذرا معاملات بے تکلفی کی جانب بڑھے تو اچانک ایک پھلجھڑی سی چلتی اور محفل قہقہوں سے روشن ہو جاتی۔
سنجیدہ بات جلدی سے کرتے اور اس پر غور و فکر کو موقع بھی نہ دیتے۔ بس اس لمحے سے برق رفتاری سے آگے گزر جاتے تھے۔ شاید اس لیے کہ آگے مزاح کے توشہ دان میں کہیں نعمتیں تقسیم کرنے کو دھری ہوتیں۔ وہ کب اپنے مہمانوں کو ان نعمتوں سے محروم رکھتے تھے۔
میری جب ان سے ملاقات ہوئی تو انہی دنوں ان کی اہلیہ کا انتقال ہوا تھا اور یوسفی صاحب نے گھر سے نکلنا ترک کر دیا تھا۔ نصف صدی کا ساتھ تھا۔ بات محبت کی تھی۔ احترام لازم تھا۔
کہنے لگے ’جب سے میری اہلیہ کا انتقال ہوا ہے اب میں بستر پر نہیں سوتا، زمین پر لیٹتا ہوں۔ اب زیادہ دوری برداشت نہیں ہوتی‘۔
جملہ ایسا تھا کہ محفل کا رنگ ہی بدل گیا۔ قہقہے سناٹے میں تبدیل ہوگئے۔ یہ کیفیت یوسفی کو برداشت نہیں تھی۔ غیر متبسم چہرے انہیں گوارا نہیں تھے۔ اسی جملے کی روانی میں کہنے لگے ’اب لوگ کہتے ہیں گھر سے نکلا کریں۔ جو مجھے یہ کہتے ہیں میں ان سے کہتا ہوں کہاں جاؤں؟ کوئی پتا بھی بتا دیں اور ہاں، فون نمبر بھی دے دیں تو عنایت ہو گی‘۔ بات پھر قہقہے پر ہی ختم ہوئی۔ یوں لگتا یوسفی اپنے غم کا ’دف‘ بھی اپنے آپ پر کسے جملے ہی سے مارتے تھے۔
اسلام آباد کی ایک تقریب میں یوسفی صاحب مہمان خصوصی تھے۔ مہمان خصوصی کے استقبال کے لیے ایک سابق پولیس آفیسر نے خطبہ استقبالیہ پیش کیا۔ پولیس آفیسر شاید یوسفی کو بہت سینیئر آفیسر سمجھے۔ انہوں تعریف کے ضمن میں تمام حدیں پار کر لیں۔ مبالغہ اور غلو اس قدر عروج پر تھا کہ عشاق یوسفی بھی جھینپ جھینپ ہنسی دباتے رہے۔
اس خطبہ استقبالیہ کے بعد جب یوسفی کو اسٹیج پر دعوت دی گئی تو نہایت انکسار سے گویا ہوئے ’بھیا ہمارے ہاں زندہ افراد کی اتنی تعریف کی روایت نہیں البتہ مجھے آپ کی جلد بازی پر حیرت ضرور ہے‘۔
اپنی بڑائی کے قصے، اپنی عظمت کی کہانیاں، اپنی ذہانت کے ثبوت یوسفی نے نہ کبھی گفتگو میں پیش کیے نہ ان کی تحریر میں کہیں ایسا شائبہ ملتا ہے۔ انکسار ان کی شخصیت کا بنیادی وصف تھا اور یہی کیفیت ان کی تحریر میں بھی نمایاں نظر آتی تھی۔ ان کے کردار بھی سپر مین بننے سے اجتناب کرتے تھے۔ عام سے لوگ تھے، عام سی زندگی گزارتے تھے، مگر یوسفی عام آدمی کی کجیوں، کمیوں، لاپروائیوں اور آوارہ گردیوں سے ایسے ایسے مزاح پارے تراشتے تھے کہ قاری کتاب کے اور صاحب کتاب کےعشق میں مبتلا ہو جاتا تھا۔
اردو سے محبت کرنے والا جو ایک دفعہ عشق یوسفی میں گرفتار ہوا وہ اس کے سحر میں تمام عمر مبتلا رہتا ہے۔ اس کے کرداروں میں زندگی بسر کرتا ہے۔ اس کے مکالموں پر تنہائی میں بھی ہنستا ہے۔ قہقہوں کی دنیا میں حیات کو جاوداں کرتا ہے۔
فنکار کا کمال یہ ہے کہ اپنے فن میں خوب محنت کرے مگر جب وہ فن قاری / ناظر کے سامنے پیش ہو تو اس میں محنت تو نظر آئے مگر یبوست کی کیفیت نہ ملے، مشقت نہ نظرآئے۔ یہی یوسفی کا کمال ہے۔ اپنی تحریر میں جابجا اردو، فارسی، عربی، انگلش اور فرنچ ادب کا تڑکا لگاتے ہوئے بھی ان کی تحریر کی برجستگی قائم رہتی ہے۔ جملہ کاٹ رکھتا ہے۔ مفہوم بھی ادا ہو جاتا ہے اور قہقہہ بھی قضا نہیں ہوتا۔
اب یو سفی نہیں رہے۔ اردو ادب کا ایک باب ختم ہوا۔ افتخار اردو رخصت ہوا۔ فکاہیہ نثر کا دروازہ بند ہوا۔ ان سا لکھنے والا نہ تخت اردو پر پہلے کوئی براجمان ہوا ہے نہ پھر کسی کو یہ سعادت نصیب ہو گی۔
اب سمجھ نہیں آتی کہ ان کے انتقال پر ہنسا جائے کہ رویا جائے۔ ہنسا اس لیے نہیں جا سکتا کہ اب اردو میں ایسا مزاح نگار کوئی اور نہ ہوگا۔ فکاہیہ ادب کا ایک قرینہ دفن ہوا۔ ایسے حال پر کیسے کوئی ہنس سکتا ہے اور مرگِ یوسفی پہ رویا اس لیے نہیں جا سکتا کہ چشمِ نم کی یوسفی کے ہاں ممانعت ہے۔ آنسوؤں کو قہقہوں میں بدلنے کی ہمیشہ تلقین کی ہے۔ ماتم کی کیفیت سے انکار ہے۔ الم کے اظہار کی مناہی ہے۔ اب آپ ہی بتائیں عشق یوسفی میں مبتلا لوگ اس مرحلے میں کہاں جائیں۔ روئیں یا پھر قہقہے لگاتے، لگاتے مر جائیں۔
ادارے کا کالم نگار کی رائے کے ساتھ متفق ہونا ضروری نہیں ہے۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
عمار مسعود کالم نگار، سیاسی تجزیہ کار، افسانہ نگار اور صحافی۔ کبھی کبھی ملنے پر اچھے آدمی ہیں۔ جمہوریت ان کا محبوب موضوع ہے۔ عوامی مسائل پر گہری نظر اور لہجے میں جدت اور ندرت ہے۔ مزاج میں مزاح اتنا ہے کہ خود کو سنجیدہ نہیں لیتے۔ تحریر اور لہجے میں بلا کی کاٹ ہے مگر دوست اچھے ہیں۔
جے پور علیگڑھ یونیورسٹی مشتاق احمد یوسفی یوسفی.ذریعہ: WE News
کلیدی لفظ: جے پور مشتاق احمد یوسفی یوسفی مشتاق احمد یوسفی یوسفی کو کی تحریر اس لیے تی تھی نہیں ا
پڑھیں:
اسرائیل کا ہدف صرف ایٹمی تنصیبات نہیں، ایرانی حکومت کی جڑیں ہلانا ہے، رپورٹ
data-id="863a0a8" data-element_type="widget" data-widget_type="theme-post-content.default">
یروشلم: ایران اور اسرائیل کے درمیان جاری جنگ نئی شدت اختیار کر گئی ہے اور اب اس کا مقصد صرف ایران کی جوہری صلاحیت اور میزائل پروگرام کو تباہ کرنا نہیں بلکہ ایرانی سپریم لیڈر علی خامنہ ای کی حکومت کی بنیادیں ہلا دینا ہے۔
غیر ملکی میڈیا رپورٹس کےمطابق اسرائیلی و مغربی اور علاقائی حکام کاکہنا ہےکہ اسرائیل ایک ہمہ گیر فضائی مہم چلا رہا ہے جس کا مقصد ایران کو اس حد تک کمزور کرنا ہے کہ وہ اپنے جوہری پروگرام، میزائل ٹیکنالوجی اور خطے میں عسکری نیٹ ورکس سے مکمل دستبرداری پر مجبور ہو جائے۔
اسرائیلی وزیر اعظم بنیامین نیتن یاہو اس بات پر بضد ہیں کہ ایران کو اس کے عسکری اثر و رسوخ سے محروم کر کے اس کی حکومت کو اندرونی طور پر غیر مستحکم کیا جائے،یہ مہم حکومت کی طاقت کو ختم کرنے اور داخلی اتحاد کو پارہ پارہ کرنے کی حکمت عملی ہے۔
ذرائع کے مطابق اسرائیل نے اب تک اپنے حملوں کو صرف فوجی اہداف تک محدود نہیں رکھا بلکہ تہران میں سرکاری ادارے، پولیس ہیڈکوارٹرز، اور ریاستی نشریاتی اداروں کو بھی نشانہ بنایا جا رہا ہے، اسرائیلی حکومت نے کم از کم دو ہفتے کی شدید فضائی کارروائی کا منصوبہ بنایا ہے، جس کا انحصار ایرانی میزائل ذخائر کی تباہی پر ہے۔
امریکی مشرق وسطیٰ کے سابق ایلچی ڈینس راس کا کہنا ہے کہ ایران کو زبردست دباؤ کا سامنا ہے اور اسرائیلی حملوں کے نتیجے میں خامنہ ای کے قریبی حلقے کو شدید نقصان پہنچا ہے،ایران کی حکومت خود کو کمزور محسوس کر رہی ہے اور اگر یہ مہم حکومت کے زوال کا باعث بنی تو اسرائیل کو اس پر کوئی افسوس نہیں ہوگا۔
دوسری جانب ایرانی قیادت کے قریبی ذرائع کا کہنا ہے کہ 86 سالہ خامنہ ای کو اگر عزت سے پیچھے ہٹنے کا موقع نہ دیا گیا تو وہ ممکنہ طور پر کھلی جنگ کا راستہ اختیار کر سکتے ہیں، اسی تناظر میں خامنہ ای نے اپنے حالیہ خطاب میں خبردار کیا کہ امریکا کی کسی بھی مداخلت کا “ناقابل تلافی نقصان” ہوگا۔
ایران میں کتنے پاکستانی زائرین موجود ہیں؟ وزارت خارجہ کی ایران، عراق کے سفر پر نظرثانی کی ہدایت