نوبل انعام کیلئے نامزدگی،ٹرمپ کو پاکستان کے بعدایک اورملک کی حمایت مل گئی
اشاعت کی تاریخ: 7th, August 2025 GMT
سابق امریکی صدر ڈونلڈ ٹرمپ کو نوبل انعام کے لیے ایک اور بین الاقوامی نامزدگی موصول ہوئی ہے۔ پاکستان کے بعد اب کمبوڈیا نے بھی انہیں نوبل پرائز کے لیے نامزد کر دیا ہے، یہ نامزدگی تھائی لینڈ اور کمبوڈیا کے درمیان حالیہ کشیدگی کے خاتمے میں ٹرمپ کے کردار کو سراہتے ہوئے کی گئی ہے۔
کمبوڈیا کی وزارت اطلاعات کے مطابق وزیراعظم ہون مینیٹ نے 7 اگست کو نارویجن نوبل کمیٹی کو باقاعدہ خط ارسال کیا، جس میں انہوں نے ڈونلڈ ٹرمپ کو نوبل انعام کے لیے نامزد کرتے ہوئے کہا کہ یہ اقدام صرف ذاتی تحسین نہیں بلکہ کمبوڈیا کے عوام کی جانب سے ان کی کاوشوں کا اعتراف ہے۔
ہون مینیٹ نے ٹرمپ کی تعریف کرتے ہوئے کہا کہ انہوں نے دنیا کے کچھ انتہائی حساس اور پرتشدد خطوں میں دشمنیوں کو ختم کرنے میں نمایاں کردار ادا کیا ہے، اور ان کی کوششیں غیر معمولی رہی ہیں۔
یاد رہے کہ کمبوڈیا اور تھائی لینڈ کے درمیان حالیہ مہینوں میں شدید کشیدگی دیکھی گئی، جس دوران دونوں ملکوں کی افواج کے درمیان پانچ روز تک جاری رہنے والی لڑائی میں نہ صرف گولہ باری اور فضائی حملے ہوئے، بلکہ کئی فوجی اور عام شہری بھی ہلاک ہوئے۔
میڈیا رپورٹس کے مطابق ٹرمپ نے اس دوران دونوں ممالک کے وزرائے اعظم سے براہ راست بات کی اور انہیں تنازع ختم کرنے پر زور دیا، ساتھ ہی انتباہ دیا کہ اگر لڑائی جاری رہی تو امریکا کے ساتھ ان کے تجارتی معاہدے متاثر ہو سکتے ہیں۔ بالآخر 28 جولائی کو جنگ بندی کا اعلان کیا گیا، جس کے بعد ٹرمپ نے دونوں رہنماؤں کو دوبارہ فون کر کے جنگ بندی پر مبارکباد دی۔
اس سے قبل مئی میں پاکستان نے بھی بھارت کے ساتھ کشیدگی کے خاتمے پر امریکی کردار کو سراہتے ہوئے ٹرمپ کو نوبل انعام کے لیے نامزد کیا تھا، جب کہ اسرائیلی وزیراعظم بینجمن نیتن یاہو نے بھی جولائی میں کہا تھا کہ ان کی حکومت بھی ٹرمپ کو نوبل کے لیے نامزد کرنے پر غور کر رہی ہے۔
ڈونلڈ ٹرمپ کے لیے یہ متعدد بین الاقوامی رہنماؤں کی جانب سے نوبل پرائز کی حمایت، ان کے عالمی سطح پر ثالثی کردار کے اعتراف کے طور پر دیکھی جا رہی ہے۔
ذریعہ: Daily Mumtaz
کلیدی لفظ: کے لیے نامزد ٹرمپ کو نوبل
پڑھیں:
جموں و کشمیر کو ریاست کا درجہ دینے کیلئے تمام پارٹیوں کی حمایت ضروری ہے، عمر عبداللہ
سرینگر میں نامہ نگاروں سے بات کرتے ہوئے انہوں نے کہا کہ ریاستی درجہ بحال کرنے کا وعدہ جموں و کشمیر کے عوام سے عوامی جلسوں میں، پارلیمنٹ میں اور سپریم کورٹ کے سامنے کیا گیا ہے۔ اسلام ٹائمز۔ جموں و کشمیر کے وزیراعلیٰ عمر عبداللہ نے کہا ہے کہ انہوں نے پارلیمنٹ میں بڑی تعداد میں ارکان رکھنے والی تمام سیاسی جماعتوں کو خط لکھا ہے، جس میں ان سے ریاستی درجہ بحال کرنے کی حمایت کرنے کی درخواست کی گئی ہے۔ سرینگر میں نامہ نگاروں سے بات کرتے ہوئے انہوں نے کہا کہ ریاستی درجہ بحال کرنے کا وعدہ جموں و کشمیر کے عوام سے عوامی جلسوں میں، پارلیمنٹ میں اور سپریم کورٹ کے سامنے کیا گیا ہے۔ انہوں نے مزید کہا کہ یہ معاملہ پارلیمنٹ میں اٹھایا جانا چاہیئے تاکہ موجودہ اجلاس میں بل پاس ہو سکے۔
عمر عبداللہ نے کہا کہ اس معاملے پر 8 اگست کو سپریم کورٹ میں سماعت ہے اور ریاستی درجہ جلد از جلد بحال کیا جانا چاہیئے۔ انہوں نے کہا کہ کئی سال گزر چکے ہیں لیکن اس پر کوئی پیش رفت نہیں ہوئی، اور اگر حکومت اقدام نہ کرے تو عدالت کو چاہیئے کہ اس وعدے کو پورا کروائے۔ انہوں نے کہا کہ جموں و کشمیر میں اسمبلی انتخابات اس لئے ہوئے کیونکہ سپریم کورٹ نے اس عمل کے لئے ایک ٹائم لائن طے کی تھی اور میں آج آپ سے وزیر اعلیٰ کے بطور بات کررہا ہوں۔ انہوں نے کہا کہ ریاستی درجہ بحال کرنے کے لئے بھی اسی قسم کا طریقہ کار اپنانا چاہیئے۔
سیکیورٹی صورتحال کا حوالہ دیتے ہوئے عمر عبداللہ نے کہا کہ 22 اپریل کے پہلگام حملے کے بعد صورتحال بدل چکی ہے، جو حالات تھے وہ حالات ہے نہیں ہیں۔ انہوں نے بتایا کہ اس سال تقریباً 4 لاکھ یاتریوں نے بالتل اور پہلگام کے راستوں سے امرناتھ یاترا مکمل کی، اور انہوں نے امید ظاہر کی کہ ملک بھر سے سیاح دوبارہ اس خطے کا رخ کریں گے۔ عمر عبداللہ نے رامبن اور اتراکھنڈ میں حالیہ واقعات کا بھی حوالہ دیا اور انہیں بدلتے موسم، جنگلات کی کٹائی اور پہاڑوں کی کھدائی سے جوڑا۔ انہوں نے کہا کہ ایسی سرگرمیاں جموں و کشمیر جیسے پہاڑی علاقوں کے لئے خطرہ ہیں اور ان سے نمٹنے کے لئے اقدامات کئے جانے چاہئیں۔ وزیراعلٰی نے کہا کہ جموں و کشمیر کی حکومت اتراکھنڈ میں حالیہ واقعے کے بعد وہاں کے عوام اور حکومت کے ساتھ کھڑی ہے اور ہمدردی کا اظہار کرتی ہے۔
امریکا اور جنوبی کوریا کے درمیان 350 ارب ڈالر کا تجارتی معاہدہ طے پا گیا