ملالہ نوجوانوں کے لیے مشعلِ راہ ہے
اشاعت کی تاریخ: 18th, January 2025 GMT
طالبان خواتین کو انسان نہیں سمجھتے۔ افغان حکومت کو قانونی حیثیت نہ دی جائے۔ ایک دہائی سے لڑکیوں کو تعلیم سے محروم رکھا۔ یہ اپنے جرائم کو مذہب اورکلچر کے پیچھے چھپاتے ہیں۔ اسرائیل نے غزہ کا پورا تعلیمی نظام تباہ کردیا۔ نوبل انعام یافتہ ملالہ یوسفزئی کا بیانیہ اسلام آباد میں گزشتہ دنوں تعلیمی کانفرنس میں خطاب اس خطے میں تعلیم کی زبوں حالی، افغانستان اور غزہ میں تعلیمی نظام کی تباہی کی حقیقی عکاسی کر رہا ہے۔
ملالہ نے اس کانفرنس میں بتایا کہ دنیا میں 12کروڑ اور پاکستان میں ایک کروڑ لڑکیاں اسکول نہیں جاتیں۔ ملالہ یوسف زئی 12جولائی 1997 کو خیبر پختون خوا کے سیاحتی مقام سوات کے شہر مینگورہ میں پیدا ہوئیں۔ ان کے والد ضیاء الدین یوسفزئی نوجوانی سے بائیں بازو کے نظریات سے متاثر تھے، یوں وہ لڑکیوں اور لڑکوں میں کوئی تفریق نہیں رکھتے تھے۔ ضیاء الدین یوسفزئی نے اپنی بڑی بیٹی کی تربیت پر خصوصی توجہ دی۔
انھوں نے لڑکیوں کی تعلیم کے لیے سوات میں ایک اسکول بھی قائم کیا تھا، یوں ملالہ کو ابتدائی عمر سے تعلیم کی اہمیت کا احساس ہوا۔ وہ ابھی سیکنڈری اسکول تک پہنچی تھی کہ ایک منظم منصوبے کے تحت سوات پر طالبان نے قبضہ کرلیا اور مولوی فضل اللہ نے ایف ایم ریڈیو کے ذریعے رجعت پسندانہ پروپیگنڈہ شروع کیا۔ مولوی فضل اللہ عورتوں کی تعلیم کے مخالف تھے۔ وہ اپنی تقاریر میں خواتین کو گھروں میں مقید رکھنے اور مردوں کو رجعت پسندانہ نظریات پر عمل پیرا ہونے کی تلقین کرتے تھے۔ طالبان نے پورے سوات میں اپنے قوانین نافذ کیے۔ خواتین کو تعلیم حاصل کرنے کے ساتھ ساتھ روزگار کی سہولتوں سے محروم کردیا۔ طالبان جنگجو سوات میں شہروں میں چوک پر عدالتیں لگاتے ۔
جو شخص ان کے نظریے پر عمل پیرا نہیں ہوتا، اس کو کوڑوں کی سزاؤں کے علاوہ سزائے موت بھی دیتے۔ مولانا فضل اللہ اپنے ریڈیو پر اعلان کرتے تھے کہ آج ان مجرموں کو پھانسی دی جائے گی اور ان کے اس اعلان پر باقاعدہ عمل ہوتا تھا ۔ جب سوات کے شہروں اور دیہاتوں میں لوگ علی الصبح باہر نکلتے تو کھمبوں پر لٹکی لاشیں نظر آتی۔ طالبان نے اخبارات پر بھی پابندی لگائی اور جو رپورٹر دوسرے شہروں اور غیر ملکی خبررساں ایجنسیوں، ریڈیو اور ٹیلی وژن کے لیے کام کرتے تھے ان کے گرد گھیرا تنگ ہوا۔
جب پوری دنیا میں یہ خبریں عام ہوئیں کہ سوات اسلام آباد سے صرف 340 کلومیٹر دور ہے اور طالبان اسلام آباد کی طرف نظریں گاڑے ہوئے ہیں اور اسلام آباد اور راولپنڈی کی اعلیٰ قیادت میں اس امر پر اتفاق رائے ہوا کہ سوات کو طالبان سے خالی کرایا جائے۔ یوں اس سوات کو خالی کرانے کے لیے ایک محدود نوعیت کے آپریشن کا فیصلہ کیا گیا۔ اس آپریشن سے پہلے سوات میں آبادی کو جو لاکھوں افراد پر مشتمل ہے مردان اور دیگر میدانی علاقوں میں منتقل کیا گیا۔
ملالہ کا خاندان سوات چھوڑنے پر مجبور ہوا۔ اس طرح ملالہ کی تعلیم میں رخنہ پیدا ہوا۔ ملالہ کو اپنے خاندان والوں کے ساتھ اپنا آبائی گھر چھوڑ کر مردان کے علاقے میں ایک کیمپ میں منتقل ہونا پڑا۔ ملالہ نے اس ساری صورتحال کو اپنی ڈائری میں لکھنا شروع کی۔ پشاور میں مقیم بی بی سی کے ایک نمایندہ کو خبر ہوئی کہ سوات کی ایک نوجوان دختر اردو میں اپنی ڈائری باقاعدہ لکھ رہی ہے جس میں تمام حالات کا احاطہ کیا گیا ہے۔
بی بی سی کے اس نمایندہ نے ملالہ کے والد سے رابطہ کیا ۔ ملالہ کی ڈائری گل مکئی کے نام سے بی بی سی کی اردو ویب سائٹ پر وائرل ہونے لگی۔ گل مکئی کی اس ڈائری میں طالبان کے مظالم کا بھی ذکر ہوتا تھا اور حکام کی نااہلی اور آپریشن کے دوران شہریوں کو درپیش مشکلات بھی تحریر کی جاتی تھیں مگر گل مکئی کی اس ڈائری نے پوری دنیا کے سامنے سوات کے حالات کو آشکار کردیا تھا، پھر سوات میں کسی حد تک امن قائم ہوا۔ مولوی فضل اللہ اور ان کے حواریوں کو افغانستان میں منتقل ہونے کا موقع دیا گیا۔
اب سوات میں زندگی معمول پر آئی، خواتین کو تعلیم کا حق مل گیا۔ طالبات اپنے اسکولوں میں تعلیم حاصل کرنے لگیں مگر طالبان نے ملالہ کو معاف نہ کیا۔ ملالہ اور ان کے اہلِ خانہ طالبان کے مذموم عزائم سے ناواقف تھے ۔ ملالہ کو اپنی تعلیم مکمل کرنے کا جنون تھا، یوں ملالہ نے اسکول جانا شروع کیا۔ ملالہ اپنی سہیلیوں کے ساتھ 9 اکتوبر 2012ء کو اسکول وین میں اسکول سے واپس آرہی تھی تو طالبان جنگجوؤں نے ملالہ پر حملہ کیا۔ ملالہ اس حملے میں شدید زخمی ہوئیں۔ حملے میں ان کی ساتھی بھی زخمی ہوئیں۔ ملالہ پر قاتلانہ حملہ کی خبر نے دنیا کو ہلا کر رکھ دیا۔
اس وقت پیپلز پارٹی کے رہنما یوسف رضا گیلانی وزیر اعظم کے عہدے پر فائز تھے، یوں حکومت کی ہدایت پر ملالہ کو ہیلی کاپٹر میں پشاور منتقل کیا گیا مگر ملالہ شدید زخمی ہوگئی تھیں تو ان کو علاج کے لیے خصوصی طیارے میں برطانیہ منتقل کیا گیا۔ اس زمانے میں سوشل میڈیا ارتقاء پذیر تھا اور رجعت پسند عناصر روایتی میڈیا کے علاوہ سوشل میڈیا کو بھی اپنے مقاصد کے لیے بھرپور طریقے سے استعمال کرتے تھے۔ ان رجعت پسند عناصر نے ملالہ کے خلاف مہم شروع کردی ۔
ملالہ کے خلاف منظم انداز میں میڈیا اور سوشل میڈیا پر مہم چلائی گئی۔ رجعت پسند طالبان کے حامیوں نے یہ بیانیہ اختیار کیا کہ ملالہ پرکوئی حملہ ہوا ہی نہیں، نہ ہی اسلحہ کا استعمال ہوا۔ کئی نام نہاد استاد اور ماہرین نے ملالہ کی زخمی حالت میں کھینچی جانے والی تصاویر سے یہ نتیجہ اخذ کیا کہ ملالہ پر حملہ ہوا ہی نہیں۔ یہ پروپیگنڈہ اتنا منظم تھا کہ صرف عام آدمی ہی نہیں اعلیٰ تعلیم یافتہ افراد جن میں یونیورسٹیوں کے پروفیسر، صحافی اور ڈاکٹرز بھی شامل تھے سبھی متاثر ہوئے مگر برطانوی ڈاکٹروں کی کوششوں سے ملالہ کی جان بچ گئی۔
اس وقت کے برطانیہ کے وزیر اعظم نے ملالہ کا نام نوبل انعام کے لیے پیش کیا۔ سویڈن کی نوبل انعام کا فیصلہ کرنے والی کمیٹی نے تیسری دنیا کی ایک لڑکی کی تعلیم کے لیے قربانی کی اہمیت کو تسلیم کیا اور ملالہ اس نوبل انعام کی مستحق قرار پائیں۔ ملالہ سے پہلے پروفیسر ڈاکٹر عبدالسلام کو فرانس کا نوبل پرائز دیا گیا تھا۔
ملالہ کی اس کامیابی پر پڑوسی ممالک میں خوشی کا اظہارکیا گیا مگر ملک میں رجعت پسند قوتیں اتنی مضبوط تھیں کہ کسی یونیورسٹی،کالج یا اسکول میں ملالہ کو نوبل پرائز ملنے کی خوشی میں تقریب نہ ہوسکی مگر صدر اور وزیر اعظم نے ملالہ کو نوبل انعام ملنے پر ضرور مبارکباد دی۔ ملالہ نے اضافی رقم سے ایک انڈوومنٹ فنڈ قائم کیا اور یہ انڈوومنٹ فنڈ پاکستان کے علاوہ غزہ اور دوسرے ممالک میں تعلیم کے لیے وقف کردیا گیا۔
کابل حکومت نے تحریک طالبان پاکستان کو پاکستان میں دہشت گردی کا موقع دیا۔ یہی وجہ ہے کہ خیبر پختون خوا کے سابقہ قبائلی علاقے میں ٹی ٹی پی کے جنگجو روز معصوم لوگوں کو قتل کرتے ہیں مگر وقت گزرنے کے ساتھ ساتھ ملالہ کے خلاف ہونے والا پروپیگنڈہ جھوٹا ثابت ہوا۔ ملالہ نوجوان نسل کے لیے مشعلِ راہ ہے۔
.ذریعہ: Express News
کلیدی لفظ: اسلام آباد طالبان نے خواتین کو میں تعلیم ملالہ پر ملالہ کے ملالہ نے تعلیم کے کی تعلیم ملالہ کو سوات میں فضل اللہ ملالہ کی نے ملالہ کے ساتھ کیا گیا
پڑھیں:
طالبان اور عالمی برادری میں تعاون افغان عوام کی خواہش، روزا اوتنبائیوا
اسلام آباد (اُردو پوائنٹ ۔ UN اردو۔ 18 ستمبر 2025ء) افغانستان کے لیے اقوام متحدہ کی خصوصی نمائندہ روزا اوتنبائیوا نے سلامتی کونسل کو ملکی حالات سے آگاہ کرتے ہوئے امید ظاہر کی ہے کہ افغان عوام کی خواہشات کے مطابق ان کے ملک اور عالمی برادری کے مابین تعاون کی راہ نکال لی جائے گی جس سے وہاں خواتین اور لڑکیوں کے لیے حالات بہتر ہو سکتے ہیں۔
افغان دارالحکومت کابل سے ویڈیو لنک کے ذریعے سلامتی کونسل میں بات کرتے ہوئے انہوں نے کہا کہ تین سال قبل جب وہ افغانستان پہنچیں تو وہاں عبوری حکام میں دو طرح کے رجحانات پائے جاتے تھے۔
ایک حلقہ افغان عوام کی ضروریات کو ترجیح دینے کا حامی تھا تو دوسرا خالص اسلامی نظام کے قیام پر زور دیتا تھا جس نے عوام پر بہت سے پابندیاں نافذ کی ہیں۔(جاری ہے)
Tweet URLطالبان حکام کی جانب سے لڑکیوں کے چھٹی جماعت سے آگے تعلیم حاصل کرنے پر پابندی نے ایک پوری نسل کو خطرے میں ڈال دیا ہے اور اس سے ملک کو طویل المدتی طور پر بہت بھاری نقصان ہو سکتا ہے جبکہ ان پابندیوں سے افغان معاشرے میں شدید بے چینی اور مایوسی پیدا ہو رہی ہے۔
'یو این ویمن' کے مطابق افغان عوام کی اکثریت لڑکیوں کی تعلیم پر پابندی کی مخالف ہے جبکہ عالمی بینک نے کہا ہے کہ اس پابندی کی وجہ سے افغان معیشت کو سالانہ 1.4 ارب ڈالر کا نقصان ہو رہا ہے۔
مثبت اشاریےانہوں نے اگست 2021 میں طالبان کے اقتدار میں آنے کے بعد قدرے مثبت پیش رفت کی نشاندہی بھی کی جس میں مسلح تنازع اور وسیع پیمانے پر تشدد میں نمایاں کمی بھی شامل ہے جس کے نتیجے میں ملک کے بیشتر حصوں میں سلامتی کی صورتحال قدرے مستحکم ہو گئی ہے۔
2023 کے اوائل میں پوست کی کاشت پر عائد کی جانے والی پابندی بڑی حد تک برقرار ہے جس کے فوائد نہ صرف افغانستان بلکہ پورے خطے اور دنیا کو بھی حاصل ہو رہے ہیں۔
عام معافی کے حکم پر مجموعی عملدرآمد حوصلہ افزا ہے۔ ملک میں اقوام متحدہ کے معاون مشن (یوناما) اور عبوری حکام کے درمیان تعمیری روابط بھی موجود ہیں جن کے نتیجے میں انسانی حقوق کے لیے کام کرنے والی ٹیموں کو ملک کی تمام 34 جیلوں تک رسائی حاصل ہوئی ہے۔
بحرانوں کا طوفاناوتونبائیووا نے کہا کہ مردوخواتین، لڑکیوں اور اقلیتوں پر عائد کی جانے والی بڑھتی ہوئی پابندیوں اور ان پر عملدرآمد سے عوام میں عبوری حکام کے خلاف بے اطمینانی بڑھ رہی ہے۔
ملک کو رواں سال انسانی امداد میں تقریباً 50 فیصد کٹوتی کا سامنا ہے اور اگلے سال اس میں مزید کمی کا امکان ہے۔ یہ تسلیم کرنا ضروری ہے کہ یہ کٹوتیاں جزوی طور پر افغانستان کی خواتین مخالف پالیسیوں کا نتیجہ ہیں۔
ملکی معیشت اب بھی مشکلات کا شکار ہے اور خاص طور پر ہمسایہ ممالک سے بڑی تعداد میں مہاجرین کی واپسی کے نتیجے میں اس پر بوجھ بڑھ گیا ہے۔ ملک کو خشک سالی اور دیگر موسمیاتی حوادث کا سامنا بھی ہے جس سے مسائل مزید بڑھ گئے ہیں۔ آئندہ برسوں میں 60 لاکھ آبادی پر مشتمل دارالحکومت کابل دنیا کا ایسا پہلا بڑا شہر بن سکتا ہے جہاں پانی ختم ہو جائے گا۔
مسائل کے حل کی امیدرواں ماہ کے اختتام پر اپنی ذمہ داریوں سے سبکدوش ہونے والی روزا اوتنبائیوا نے کہا کہ کابل اور دیگر علاقوں میں اقوام متحدہ کے دفاتر میں خواتین ملازمین کی رسائی کو روکنے جیسے اقدامات سے اقوام متحدہ کی امدادی کوششیں متاثر ہو رہی ہیں۔ سلامتی کونسل طالبان حکام سے خواتین کے روزگار پر پابندی کے خاتمے کی اپیل کرے۔
ان کا کہنا تھا کہ اقوام متحدہ کا جامع نقطۂ نظر واحد کثیرالجہتی فریم ورک مہیا کرتا ہے جو عالمی برادری اور عبوری حکام کے درمیان رابطے کا ذریعہ اور ایک ایسا سیاسی راستہ ہے جس کے ذریعے ان پیچیدہ مسائل کو حل کیا جا سکتا ہے جو افغانستان کی عالمی نظام میں دوبارہ شمولیت کی راہ میں رکاوٹ ہیں۔
دنیا بھر میں اسکولوں پر حملوں میں 44 فیصد اضافہ تشویشناک ہے، وزیراعلیٰ سندھ