مسلمانوں میں اتحادنہیں ٹرمپ اپنے ناپاک عزائم میں کامیاب ہوسکتے ہیں
اشاعت کی تاریخ: 15th, February 2025 GMT
اسلام آباد (رپورٹ: میاں منیر احمد) مسلمانوں میں اتحاد نہیں ٹرمپ اپنے ناپاک عزائم میں کامیاب ہوسکتے ہیں‘ امریکا، یورپ میں سرمایہ کاری کی وجہ سے مسلم حکمران ٹرمپ منصوبے کے خلاف کچھ نہیںکرسکتے‘ جنگ بندی کے باوجود اسرائیلی حملوں میں مزید 110 فلسطینی شہید ہوئے‘ مسئلہ فلسطین مزید گمبھیر ہوگا‘ غزہ کی تباہی کے بڑے مجرم سعودی عرب، قطر ، یو اے ای اور ترکی ہیں۔ان خیالات کا اظہار قومی اسمبلی میں قائد حزب اختلاف عمر ایوب خان ،عدالت عظمیٰ کے سینئر قانون دان حسنین ابراہیم کاظمی، تجزیہ کار مظہر طفیل،ادیب دانشور، تجزیہ کار سید اظہر علی شہ بخاری، ترجمان دفتر خارجہ شفقت خان، بزنس مین شیخ اظہر اقبال، تجزیہ کار اعجاز احمد، پیپلز پارٹی ورکرز کی مرکزی رہنما ناہید خان اور ایف پی سی سی آئی کے بزنس مین پینل کے مرکزی رہنما مرزا عبد الرحمن نے جسارت کے اس سوال کے جواب میں کیا کہ ’’غزہ کے حوالے سے ٹرمپ کے ناپاک عزائم کی کامیابی کس حد تک ممکن ہے؟‘‘ عمر ایوب خان نے کہا کہ فلسطین کا معاملہ بہت حساس ہو چکا ہے‘ جنگ جتنی بھی طویل ہو فریقین کو بالآخر مذاکرات کی میز پر ہی آنا پڑتا ہے‘ یہی کچھ اسرائیل اور فلسطین کی
جنگ کے دوران ہوا ہے‘ اگر آغاز کار میں ہی مذاکرات شروع ہو جاتے تو انسانیت کا اتنا زیادہ جانی و مالی نقصان جو اسرائیل کی طرف سے کیا گیا ہے، وہ نہ ہوتا‘ اب جنگ بندی پر اتفاق ہو چکا ہے‘ قیدیوں اور یرغمالیوں کا تبادلہ بھی ہو رہاہے‘ جنگ کے شعلے بجھ رہے ہیں‘ یہ آگ پھولوں میں تو تبدیل نہیں ہوگی البتہ انسانیت مزید المیے سے وقتی طور پر بچ جائے گی‘ اس جنگ بندی کو عبوری سیٹلمنٹ ہی کہا جا سکتا ہے‘ جب تک مسئلہ فلسطین حل نہیں ہوتا، فلسطینیوں کو زندہ رہنے کا حق نہیں مل جاتا‘ اس وقت تک جنگ کے خطرات منڈلاتے رہیں گے‘ اس کے لیے ضروری ہے کہ اقوام متحدہ اور بڑی طاقتیں اپنا کردار ادا کریں‘ اقوام متحدہ کی جو قراردادیں مسئلہ فلسطین کے حل کے لیے منظور ہو چکی ہیں، ان پر عمل کروایا جائے۔ حسنین ابراہیم کاظمی نے کہا کہ ٹرمپ نے جو کچھ کہا ہے اس پر وہ پورا عمل کرسکتا ہے۔ مظہر طفیل نے کہا کہ غزہ سے متعلق امریکی صدر اور اسرائیل کی پالیسی مکمل طور پر ہم آہنگی پر مشتمل ہے ابھی تک غزہ کے بے گناہ مسلمانوں پر جو بھی مظالم ڈھائے گئے ہیں اس کی بنیادی وجہ مسلمانوں میں اتحاد اور بھائی چارے کی کمی اور یہود و نصارا سے قریبی تعلقات اور سب سے بڑھ کے امریکا اور یورپ میں بے انتہا سرمایہ کاری ہے‘ امت مسلمہ کا کردار موجودہ صدی میں انتہائی غلامانہ ذہنیت کی عکاسی کرتا ہے‘ اگر دنیا بھر کے مسلمان متحد ہوتے تو یقینی طور پر آج اسرائیل غزہ کے مسلمانوں پر اس انداز سے ظلم و ستم نہیں کرتا‘ اگر عرب ممالک بھی اپنا بھر پور کردار ادا کرتے تو غزہ میں شہید اور بے گھر ہونے والے مسلمان غزہ ہی میں سکون سے رہ رہے ہوتے‘ غزہ کی افسوس ناک صورتحال کا سب سے بڑا مجرم سعودی عرب، قطر اور یو اے ای کے علاوہ ترکی بھی ہے‘ اسی طرح پاکستان کا کردار اور ہماری خارجہ پالیسی بھی غزہ کے شہید مسلمانوں کے خون سے رنگی ہوئی ہے‘ روز قیامت تمام امت مسلمہ سے اس کی جوابدہ ہوگی‘ طوق کا پھندا تمام امت کے حکمرانوں کے گلے کا سنگھار بنے گا لہٰذا ابھی تک کی صورتحال کا جائزہ لینے کے بعد یہ کہنے میں کوئی عار نہیں کہ ٹرمپ غزہ سے متعلق اپنی منصوبہ بندی میں کامیاب کیوں نہیں ہوسکتا۔ اظہر علی شہ بخاری نے کہا کہ حماس اور اسرائیل کے مابین جنگ بندی کا جب معاہدہ ہوا ہے‘ ایسے معاہدے توڑنا اسرائیل کی جبلت رہی ہے‘ اس معاہدے پر عمل درآمد کے لیے بڑی طاقتوں کو بہر صورت خطے میں امن کے لیے اور انسانیت کی غارت کاری روکنے کے لیے اپنا کردار ادا کرنا ہوگا۔ شفقت خان نے کہا کہ پاکستان نے غزہ کے لوگوں کو بے گھر کرنے کی تجویز کو انتہائی تشویشناک اور غیر منصفانہ قرار دیتے ہوئے کہا ہے کہ یہ سرزمین فلسطینی عوام کی ہے اور اقوام متحدہ کی سلامتی کونسل کی قراردادوں کے مطابق 2 ریاستی حل ہی اِس کا واحد قابلِ عمل اور منصفانہ راستہ ہے‘ پاکستان فلسطینی عوام کی حق خودارادیت کی منصفانہ جدوجہد کے ساتھ ساتھ1967ء سے پہلے کی سرحدوں پر مبنی ایک آزاد، خود مختار اور متصل فلسطینی ریاست کے قیام کا حامی رہا ہے اور رہے گا جس کا دارالحکومت القدس الشریف ہو۔ بیان میں مزید کہا گیا کہ فلسطینیوں کو اُن کی سرزمین سے بے گھر کرنے اور غیر قانونی بستیوں کو جاری رکھنے کی کوئی بھی کوشش بین الاقوامی قانون کی صریح خلاف ورزی ہو گی اور پورے خطے کے امن و سلامتی کو نقصان پہنچائے گی‘ صدر ٹرمپ نے اسرائیلی وزیراعظم سے ملاقات کے بعد مشترکہ پریس کانفرنس کے دوران غزہ پر قبضے کا اعلان کر کے دنیا کو حیران و پریشان کر دیا‘ صدر ٹرمپ نے کہا کہ امریکا غزہ پر ’’قبضہ‘‘ کر کے اس کی تعمیرنو کر سکتا ہے، وہ غزہ کا مالک ہو گا اور خطے میں موجود تمام خطرناک بموں (جو پھٹے نہیں) اور دیگر ہتھیاروں کو ختم کرنے کا ذمہ دار ہو گا۔ امریکی صدر نے غزہ پر قبضے کا اپنا بیان نہ صرف دہرایا بلکہ اِس پر عملدرآمد کا طریقہ کار بھی بتا دیا، ان کے نزدیک غزہ سے فلسطینیوں کو کہیں اور آباد کیا جا سکتا ہے۔ امریکی صدر نے غزہ کو ’’ترقی‘‘ دینے کا وعدہ کرتے ہوئے واشنگٹن کے کردار کو ’’طویل المدتی ملکیت کی پوزیشن‘‘ کے طور پر بیان کیا، اُنہوں نے یہ دعویٰ بھی کیا کہ عرب ممالک بھی اُن کے منصوبے کی حمایت کریں گے تاہم وائٹ ہاؤس کی ترجمان نے ٹرمپ کی تجویز کو تاریخی قرار دیتے ہوئے اِس کی وضاحت کی کہ امریکی صدر نے غزہ میں امریکی فوج بھیجنے کی بات نہیں کی‘ امید پیدا ہوئی تھی کہ ٹرمپ مشرق وسطیٰ میں پائیدار امن کے لیے کردار ادا کریں گے مگر یہ امید اس وقت خاک میں مل گئی جب ان کی طرف سے غزہ سے ان کے مکینوں کو ہی نکالنے کا اعلان کر دیا گیا۔ شیخ اظہر اقبال نے کہا کہ بہت سے ممالک جلد ہی ’’ابراہام معاہدے‘‘ میں شامل ہوں گے‘ اسرائیل بھی اس معاہدے کا حصہ ہے‘ مراکش اور یو اے ای سمیت کئی ممالک اس معاہدے میں شامل ہیں‘ پاکستان کو بھی اس معاہدے کا حصہ بننے کے لیے آمادہ کرنے کی کوشش کی گئی تھی‘ مسئلہ فلسطین کے حل تک تمام مسلم ممالک کا اس معاہدے میں شامل ہونا ممکن نہیں ہے‘ مسئلہ فلسطین حل ہونے کے بجائے مزید گمبھیر ہوتا چلا جائے گا‘ اس مسئلے کی وجہ سے مشرق وسطیٰ مستقل طور پر بد امنی کا شکار چلا آرہا ہے جس کے منفی اثرات عالمی امن پر بھی مرتب ہو رہے ہیں۔ اعجاز احمد نے کہا کہ امریکی صدر ڈونلڈ ٹرمپ نے اسرائیلی وزیراعظم نیتن یاہو سے ملاقات سے پہلے تجویز دی تھی کہ فلسطینی غزہ کو خالی کر کے اِردگرد کے ممالک میں آباد ہو جائیں، امریکا علاقے کی تعمیرنو کرے گا‘ ٹرمپ کے اِس بیان کے بعد دنیا بھر میں اس کے خلاف آواز اُٹھائی گئی ہے‘ اسلامی اور غیر اسلامی ممالک کی طرف سے شدید ردِ عمل دیکھنے میں آیا ماسوائے اسرائیل کے، کسی دوسرے ملک نے اِس تجویز سے اتفاق نہیں کیا بلکہ بعض ممالک نے تو اِس پر شدید تنقید کی‘ اِس سب کے باوجود صدر ٹرمپ نے اسرائیلی وزیراعظم سے ملاقات کے بعد مشترکہ پریس کانفرنس کے دوران غزہ پر قبضے کا اعلان کر کے دنیا کو حیران و پریشان کر دیا۔ اسرار الحق مشوانی نے کہا کہ امریکی صدر کے اِس بیان سے مراد عارضی طور پر علاقے کو چھوڑنا ہے‘ صدر ٹرمپ نے کہا کہ امریکا غزہ پر ’’قبضہ‘‘ کر کے اس کی تعمیرنو کر سکتا ہے۔ ناہید خان نے کہا کہ جب تک مسئلہ فلسطین حل نہیں ہوتا، فلسطینیوں کو زندہ رہنے کا حق نہیں مل جاتا‘ اس وقت تک جنگ کے خطرات منڈلاتے رہیں گے‘حماس اور اسرائیل کے مابین جنگ بندی معاہدے پر ابھی تک عمل ہو رہا ہے‘ اسرائیل کی طرف سے اپنا سارا اسلحہ فلسطینیوں کے خلاف جھونک دیا گیا ہے‘ بہتر ہوتا کہ جنگ بندی کے معاہدے پر دستخط اور اعلان ہوتے ہی اس پر عملدرآمد بھی شروع کر دیا جاتا۔ مرزا عبد الرحمن نے کہا کہ جنگ بندی معاہدہ اسرائیل اور حماس کے مابین ہوا ہے‘ ایسے معاہدے توڑنا اسرائیل کی جبلت رہی ہے‘ اس معاہدے پر عمل درآمد کے لیے بڑی طاقتوں کو اپنا کردار ادا کرنا ہوگا۔
ذریعہ: Jasarat News
کلیدی لفظ: مسئلہ فلسطین فلسطینیوں کو امریکی صدر اسرائیل کی اس معاہدے معاہدے پر کی طرف سے نے کہا کہ سکتا ہے کے لیے کے بعد جنگ کے کر دیا غزہ کے
پڑھیں:
جرگہ کا فیصلہ یا پھر دل کا ۔۔؟
عطاء اللہ ذکی ابڑو
آپ شرابی کے ساتھ چند منٹ گزاریں آپ محسوس کریں گے کہ زندگی بہت آسان ہے ، فقیروں، سادھوؤں یا سنیاسی بابوں کے پاس چلے جائیں ،آپ کو اپنا سب کچھ کسی کو تحفے میں دینے کی خواہش جاگے گی؟ کسی لیڈر سے مل لیں آپ محسوس کریں گے کہ آپ نے اتنا کچھ پڑھ کرابتک جھک ہی ماری ہے ؟ لائف انشورنس ایجنٹ کے سامنے چند منٹ بیٹھیں آپ محسوس کریں گے کہ مرنا کتنا سود مند ہے ؟ تاجروں کی سنیں گے تو آپ کو محسوس ہوگا کہ آپ کی کمائی آٹے میں نمک کے برابر ہے ؟ سائنسدانوں کی تحقیق دیکھیں گے تو آپ کو اپنی لاعلمی کا احساس ہوگا؟ ایک اچھے استاد سے ملیں گے تو آپ کو دوبارہ طالب علمی کا شوق جاگے گا ؟ غرض کہ آپ جیسی عینک پہنیں گے ویسا ہی آپ کو دکھائی دینے لگے گا ؟ وقت کا یہی تقاضا جو اس واقعے پر بھی پورا اترتا ہے ؟جسے آج آپ کے سامنے پیش کرنے جارہا ہوں ۔یہ واقعہ کوئٹہ کے نواحی گاوں ڈیگاری میں جون کے مہینہ میں پیش آیا، 37 سالہ خانو بی بی اور احسان اللہ نامی لڑکے کی سوشل میڈیا پر ایک جرگہ کے ہاتھوں قتل کی وڈیو وائرل ہوتے ہی ٹی وی پرچند ٹکرز چلے ، خبر گرم ہوئی اورہم نے اسے حقیقت مان کر بنا کچھ سوچے ،سمجھے اس واقعہ کو اپنے اپنے نظریہ سے پرکھنا شروع کردیا کسی نے اس ادھوری کہانی کا پورا سچ جاننے کی جستجو ہی نہیں کی؟ کہتے ہیں آدھا سچ پورے وجود کو برباد کرنے کے لیے کافی ہوتا ہے۔ اسی طرح اس واقعے کا بھی پورا سچ سامنے آنا ابھی باقی ہے ؟ تن تنہا بلوچستان کی سنگلاخ چٹانوں کے بیچ کھڑی نہتی لڑکی اورصرف اس کا آشنا ہی جرگے والوں کی بندوقوں کا نشانہ نہیں تھے دونوں کے قتل کی خبرسننے کے لیے اس کے پیچھے دو قبائل بانو اوراحسان اللہ کی موت کے منتظرتھے۔ اب یہ صرف ایک اکیلی خانو بی بی کی زندگی کا سوال نہیں تھا۔ اس کے پیچھے دونوں قبائل کے لوگوں کی زندگی داؤ پرلگی تھی اس لیے خانو نے ہنسی خوشی بندوق کی گولی سینے سے لگانے کو اپنے لیے تمغہ سمجھا اوراسے گلے لگاکر اپنے قبیلے کے کئی پیاروں کی زندگی بچالی ۔جی ہاں اس کڑی دھوپ تلے تپتے صحرا میں اکیلی خانو بی بی نہیں کھڑی تھی اس کی آنکھوں کے سامنے اس کے بچوں،بھائی، بہن،ماں اورباپ سمیت خاندان کے ایک ایک فرد کا چہرہ سامنے تھا جن کا قرض چکانے اپنے گھر کی دہلیز سے اس صحرا تک آئی تھی ؟ اورہاں شاید یہ اس کے عشق کا امتحان تھا ؟ وہ پہلے سے اپنے عقد میں ایک شوہراورکئی بچوں کو گھر میں اکیلا چھوڑ کراحسان کے ساتھ آئی تھی ؟ خانو پریہ بھی الزام تھا کہ وہ تین ماہ سے اپنے عاشق احسان اللہ کے ساتھ بغیر کسی نکاح کے یعنی کسی بھی ازدواجی تعلق کے بغیر شریعت کے حکم کی نفی کرتے ہوئے دن، رات بسرکررہی تھی ۔خانو اپنے اس عشق کے امتحان میں تو پوری اتر گئی مگر اپنے پیچھے اپنے مجازی خدا،پھول سے کھیلتے پانچ بچوں،ماں، باپ، بہن ،بھائی اوراپنے عاشق کی پہلی بیوی جس سے چار بچے بھی ہیں ۔اس کے قبیلے والوں کو بھی ساری زندگی کے لیے کڑے امتحان میں ڈال گئی؟
خانو نے جرگہ کا فیصلہ تو سنا تھا مگر لگتا ہے وہ آج بھی اپنے دل کے فیصلے پراٹل تھی؟ کیونکہ خانو نے اپنے جذبات کا اظہار کرتے ہوئے بندوق اٹھائے جرگہ کے کارندوں کو للکارا اورانہیں اپنی زبان میں کہا کہ ( صرسم ائنا اجازت اے نمے ) تمہیں صرف گولی مارنے کی اجازت ہے ؟ یعنی وہ کہہ رہی تھی کہ خبردار یہ جسم اب اس کے محبوب کی امانت ہے بعد مرنے کے اس کی بے حرمتی نہ کرنا؟ ڈیگاری کے صحرا میں خانو پر بندوقیں تانے کھڑے جرگہ کے کارندے 37سالہ خانو کو موت کے گھاٹ اتارنے کا یہ اقدام نہ اٹھاتے تو پیچھے احسان اللہ کا قبیلہ خانو بی بی کے پورے قبیلے کو موت کی گھاٹ اتارنے کے لیے گھات لگائے بیٹھا تھا؟ یہی وجہ تھی کہ خانوکے کنبے والوں نے ایک اکیلی لڑکی کو قبیلے کی بھینٹ چڑھاکر پہ در پہ سات گولیاں چلاکرکا اسے مٹی کا ڈھیر بنادیا؟ لاش کیلئے گڑھا کھودا اورخانو کو اسی صحرا کی مٹی کے سپرد کرکے چلتے بنے؟ دونوں قبائل کے سرکش لوگ شاید یہ سمجھ بیٹھے تھے کہ بات منوں مٹی تلے دفن ہوگئی؟اوردونوں قبائل نے اپنا اٹل فیصلہ سناکراپنی اپنی زندگیاں بچالیں؟ یہ ان کی خام خیالی ثابت ہوئی؟ ان کا اصل امتحان توتب شروع ہوا جب ٹھیک ایک ماہ بعد سوشل میڈیا پران کے اپنے ہی کسی گروہ کے کارندے نے اس سبق آموزواقعے کی وڈیو کو سوشل میڈیا پراپ لوڈ کردی آناً فاناً ناک پر رومال رکھ غریبوں ، مسکینوں اور محتاجوں کا دم بھرنے والی فلاحی تنظیمیں باہر نکل آئیں؟حکومت سمیت پورا ملک حرکت میں آگیا ۔یہ واقعہ ایک ہولناک خبربن کر سوشل میڈیا کی زینت بن چکا تھا۔ پوری دنیا میں ہمارے سماجی رویوں کی عکاسی کر رہا تھا ؟فوٹیج نے دنیا میں پاکستان کے امیج اورانسانی رویوں کوخاک میں ملادیا تھا ؟ ادھرجوڈیشری بھی حرکت میں آچکی تھی اورمجسٹریٹ نے کوئٹہ واقعے کا نوٹس لیتے ہوئے مارے جانے والے دونوں لڑکے اور لڑکی کی قبر کشائی کا حکم دیا ۔جرگہ میں قتل کا حکم دینے والا سردار شیر ستکزئی سمیت 13 افراد آج ریمانڈ پر ہیں اور ان پر اے ٹی سی ایکٹ کے تحت ایس ایچ او ہنہ کی مدعیت میں مقدمہ درج کیا جا چکا ہے۔ اب سوال یہ پیدا ہوتا ہے کہ کیا بلوچستان جرگہ میں کیا جانے والا یہ پہلا فیصلہ تھا یا پھر حکومت پہلی بار اس فیصلے سے آشنا ہوئی ؟ ایسا ہرگز نہیں ہے۔
آج بھی کئی قبائلی جرگے ہوتے ہیں اور ان جرگہ کے فیصلوں کا حکومت کو بھی انتظار رہتا ہے کیونکہ یہ اس ملک کے کئی قبیلوں کا رسم رواج ہے، کسی قبیلے میں یہ عورت ونی کے نام پر بھیڑیوں کی بھینٹ چڑھادی جاتی ہے تو کہیں کارو اور کاری غیرت کے سوال پر ابدی نیند سلادیا جاتا ہے تو کہیں اس حوا کی بیٹی کو زمینوں کا بٹوارہ بچانے کے لیے قرآن سے شادی کرنا پڑتی ہے ؟ اور جب بات پگدار کا سربچانے کی ہو تو وہ اپنی جان بخشی کے لیے اپنی جان سے پیاری کمسن بیٹی کو کسی کے باپ پر نچھاور کرتے دیر نہیں کرتے ؟ یہی پگدار سامنے والے کواپنی بیٹیاں بطور بیوی کے پیش کرکے اپنا سر بچاتے ہیں تب ان کی عزت ؟ غیرت کہاں چلی جاتی ہے ؟ یہ وہی قبائلی نظام ہے جو فاٹا میں بھی نافذالعمل تھا ،بلوچستان کے قبائل بھی اسی پر چلتے ہیں ؟ پنجاب اور سندھ میں بھی ان قبائلی سرداروں اور بھوتاروں کے آگے کسی کی ایک نہیں چلتی؟ ہمارے ملک کے حکمراں اگر ان سرداروں، وڈیروں اور جاگیرداوں کی نہیں سنیں گے تو پھر یہ تخت نشیں کیسے بنیں گے ؟آج بھی اس مملکت خداد میں تین الگ الگ قانون نافذ ہیں جہاں جرگہ کے فیصلے ہوتے ہیں ،وہاں حکومتی رٹ کہیں دکھائی نہیں دیتی ؟ اور جہاں حکومت اپنی رٹ قائم کرنا چاہتی ہے وہاں شریعت کورٹ کا قانون ہے ؟ الغرض کوئی شخص ملکی قوانین پر عمل نہیں کرتا ؟ جب ایک ریاست کے ہوتے ہوئے ایک ہی ملک میں تین الگ الگ قانون ہوں گے تو پھر اس طرح کی لاقانونیت کو کون روک سکتا ہے ؟
۔۔۔۔۔۔۔۔۔۔۔۔۔۔۔۔۔۔
’وزیرِاعلیٰ نے فنڈ میں خیانت کی، وہ صادق و امین نہیں رہے‘: علی امین گنڈاپور کیخلاف مقدمے کی درخواست