بُنیَان مَّرَصُوص کا عملی نمونہ…آج کا پاکستان
اشاعت کی تاریخ: 12th, May 2025 GMT
جب دشمن کی توپوں کی گھن گرج فضاؤں میں سنائی دے، جب سرحدوں پر سناٹا موت کی آمد کی گواہی دے رہا ہو، جب ناپاک ارادے پاکستان کے امن کو روندنے کا خواب دیکھ رہے ہوں، تب کوئی لشکرِ جرار ہی ان خوابوں کو خاک میں ملا سکتا ہے۔ مگر وہ لشکر محض ہتھیاروں کا نام نہیں، وہ ایک ایمان، ایک نظریہ اور ایک چٹان صفت وحدت کا نام ہے۔ قرآن کریم نے ایسے ہی اہل ایمان کی صفات کو بیان کرتے ہوئے فرمایا:’’بے شک اللہ اُن لوگوں سے محبت کرتا ہے جو اُس کی راہ میں صف بستہ ہو کر لڑتے ہیں، گویا وہ سیسہ پلائی دیوار ہوں‘‘ (سورہ الصف: 4) یہی ہے ’’بنیان مرصوص’’ …ایک ایسی امت، ایک ایسی قوم، ایک ایسا لشکر، جو وحدت، غیرت اور یقین کا پیکر ہو۔ آج اگر اس آیت کا عملی عکس کہیں نظر آتا ہے تو وہ پاکستان کی مسلح افواج اور اُس عوام میں ہے جو ہر قربانی کے لئے آمادہ کھڑی ہے۔پاکستان کی تخلیق کسی حادثے کا نتیجہ نہیں، یہ نظریہ توحید کی بنیاد پر اٹھنے والی وہ صدا ہے جس نے لاکھوں شہداء کے خون کو اپنا ایندھن بنایا۔ جب ایک نظریاتی ریاست دشمن کے گھیرے میں ہو، جب اس کے وجود کو مٹانے کی سازشیں جاری ہوں، تب اُس ریاست کو بچانے کے لیے ایک ایسی قوم کی ضرورت ہوتی ہے جو بنیان مرصوص کی عملی تصویر ہو۔
پاکستان کی فوج، اُس کے عوام، اور اُس کی قیادت نے وقتاً فوقتاً یہ ثابت کیا ہے کہ وہ صرف سیسہ پلائی دیوار ہی نہیں، بلکہ ایک ایسا فولادی قلعہ ہیں، جسے کوئی طاقت ہلا نہیں سکتی۔دشمن کئی بار یہ سوچ چکا تھا کہ پاکستان کو اندر سے توڑ دو، با ہر سے دباؤ دو، معیشت کو کمزور کرو، فر قہ واریت پھیلاؤ، لیکن جس قوم کی بنیاد لا الہ الا اللہ پر ہو، جس کا ہر سپاہی شہادت کو زندگی سے بہتر سمجھے اور جس کا ہر شہری اپنی زمین کے لیے جان دینا اعزاز سمجھے اُسے جھکانا ناممکن ہے۔ یہی وہ جذبہ ہے جو ’’بنیان مرصوص‘‘ کو حقیقت بناتا ہے۔آپریشن ضربِ عضب ہو ، رد الفساد ہو، یا سوات، وزیرستان یا پھر بلوچستان کی پہاڑیاں،ہر میدان میں پاکستانی فوج نے اپنے خون سے یہ ثابت کیا ہے کہ وہ محض وردی پہنے سپاہی نہیں، بلکہ نظرئیے کے محافظ ہیں۔ ان کی بندوقوں میں صرف بارود نہیں، ان کے دلوں میں وہ آگ ہے جو ایمان سے جلتی ہے۔ جب وہ حملہ کرتے ہیں تو دشمن کی صفیں لرزتی ہیں۔ جب وہ دفاع کرتے ہیں تو دشمن کی چالیں ٹوٹ جاتی ہیں۔ ان کی ہر پیش قدمی صرف عسکری نہیں، بلکہ روحانی بھی ہوتی ہے، کیونکہ وہ اللہ کے حکم پر صف بستہ ہیں، بنیان مرصوص کی عملی تعبیر بنے ہوئے۔ہماری افواج نے نہ صرف دشمن کے دانت کھٹے کیے بلکہ دنیا کو یہ پیغام دیا کہ پاکستان ایک ذمہ دار، بالغ، اور باشعور ایٹمی طاقت ہے۔ جنگیں صرف میدانوں میں نہیں لڑی جاتیں، سفارت کاری کے محاذ، میڈیا وار، سائبر جنگ، معیشت کی بقا یہ سب میدانِ امتحان ہیں اور ان سب میں پاکستانی قوم نے اپنی افواج کے شانہ بشانہ وہ کردار ادا کیا ہے جو قوموں کو سربلند کرتا ہے۔
دشمن کا گمان تھا کہ نوجوان نسل کو سوشل میڈیا، کلچر وار اور ذہنی غلامی سے کمزور کر دیا جائے گا مگر یہ نسل، جو سوشل میڈیا پر بھی پاکستان کا پرچم اٹھائے، ہر جھوٹ کا منہ توڑ جواب دیتی ہے وہ بھی بنیان مرصوص کی ایک صورت ہے۔ نہ صرف سپاہی، بلکہ طالب علم، تاجر، مزدور، کسان، ڈاکٹر، سب اس ’’سیسہ پلائی دیوار‘‘ کا حصہ ہیں، جو وطن کے لیے کھڑی ہے۔آج کی دنیا میں جہاں طاقت کا پیمانہ صرف اسلحہ اور معیشت کو سمجھا جاتا ہے وہاں پاکستان نے دنیا کو یہ دکھایا کہ اصل طاقت ایمان، وحدت اور مقصد میں پوشیدہ ہے۔ دشمن چاہے جتنے ہتھکنڈے آزما لے مگر جب ایک قوم اللہ کے حکم پر’’صفًا‘‘ ہو جاتی ہے، تو پھر فرشتے ان کی مدد کو اتارے جاتے ہیں۔یہی وجہ ہے کہ ہر معرکہ، ہر آزمائش، ہر سازش کے باوجود پاکستان نہ صرف قائم ہے، بلکہ مضبوط ہو رہا ہے۔ کیونکہ اس کی جڑیں اس آیت میں پیوست ہیں، ’’کَأَنَّہُم بُنیَانٌ مَّرْصُوصٌ‘‘ … گویا وہ ایک سیسہ پلائی دیوار ہیں۔یہ دیوار نہ صرف سرحدوں کی حفاظت کرتی ہے بلکہ نظریات کی، اقدار کی اور امت کی غیرت کی بھی حفاظت کرتی ہے۔ اس دیوار کی اینٹیں شہداء کا لہو ہیں، اس کا گارا وفاداری ہے اور اس کا سایہ اللہ کی نصرت ہے۔موجودہ حکومت نے جس بردباری، بصیرت اور قومی سلامتی کے شعور کا مظاہرہ کیا ہے، وہ بھی بنیان مرصوص کا عملی تسلسل ہے۔ ریاست کو صرف بندوق اور توپ سے نہیںعقل، حکمت اور ذمہ داری سے بھی مضبوط کیا جاتا ہے۔
وزیراعظم اور عسکری قیادت نے نہایت سمجھداری سے عالمی دباؤ، داخلی مسائل اور دشمن کی اشتعال انگیزیوں کا سامنا کیا۔ انہوں نے محاذ جنگ کو وسعت دینے کے بجائے امن کی بات کی، لیکن کمزوری نہیں دکھائی۔ ان کی پالیسی ’’وقار کے ساتھ امن‘‘ کا بہترین عملی مظہر بنی۔وزارت خارجہ نے سفارتی محاذ پر پاکستان کا مقدمہ دنیا کے سامنے جس جرأت مندی سے پیش کیا، وہ بھی اسی قومی وحدت اور عزم کا ثبوت ہے۔ عالمی فورمز پر پاکستان کو تنہا کرنے کی بھارتی کوششیں ناکام ہوئیں اور برادر اسلامی ممالک نے پاکستان کے مؤقف کو سراہا۔ چین، ترکی، سعودی عرب اور ایران جیسے ممالک نے پاکستان کے ساتھ یکجہتی کا اظہار کیا، جو موجودہ حکومت کی کامیاب سفارت کاری کا منہ بولتا ثبوت ہے۔داخلی محاذ پر حکومت نے دہشت گردی کے خلاف جو بے لچک رویہ اپنایا، وہ بھی ایک واضح پیغام ہے کہ پاکستان کی سرزمین کو کسی صورت دہشت گردی کے لئے استعمال نہیں ہونے دیا جائے گا۔ انٹیلی جنس اداروں کے ساتھ بہتر کوآرڈینیشن، جدید نگرانی کے نظام اور عوام کے تعاون سے کئی سازشوں کو آغاز میں ہی ناکام بنایا گیا۔
یہ سب کچھ اس لیے ممکن ہوا کہ حکومت، فوج، عوام اور میڈیا سب نے ایک صف میں کھڑے ہو کر دشمن کو یہ دکھایا کہ پاکستان ایک زندہ قوم ہے اور اس کا ہر فرد سیسہ پلائی دیوار کی ایک اینٹ ہے۔ اس دیوار میں نہ کوئی دراڑ ہے، نہ کمزوری، کیونکہ اسے ایمان، قربانی اور اخلاص نے تعمیر کیا ہے۔پاکستان آج جس مقام پر کھڑا ہے، وہ ایک طویل جدوجہد، بے شمار قربانیوں، اور مسلسل استقامت کا ثمر ہے۔اس دیوار کی مضبوطی میں نہ صرف عوام، افواج اور شہداء کا کردار ہے بلکہ موجودہ قیادت کی بصیرت اور استقامت بھی ہے۔وزارتِ خارجہ ہو یا دفاع، معیشت ہو یا امن و امان ہر محاذ پر موجودہ حکومت نے وہ قومی یکجہتی اور ہمت دکھائی ہے جس کی بدولت دشمن کے عزائم خاک میں ملے۔ انہوں نے یہ ثابت کیا کہ جنگ صرف بندوق سے نہیں جیتی جاتی، حکمت، اتحاد اور سچائی سے بھی دشمن کو پسپا کیا جا سکتا ہے۔
ذریعہ: Daily Ausaf
کلیدی لفظ: سیسہ پلائی دیوار بنیان مرصوص پاکستان کی کہ پاکستان دشمن کی کیا ہے وہ بھی
پڑھیں:
مقدّر کا سکندر
لگتا ہے خالقِ کائنات کی اِس پر خاص نظر کرم ہے کہ جس کے باعث آج دنیا کی نظروں میں مقدّر کا سکندر بن چکا ہے ۔ اسلامی جمہوریہء پاکستان بھی اور اس کا سپہ سالار بھی۔صرف چند ماہ پہلے تک مایوسی کے پیغامبر ملک کے مستقبل ہی نہیں بقاء کے بارے میں بھی سوال اُٹھارہے تھے۔
صورتحال بلاشبہ بہت مایوس کن تھی، مگر دنیاؤں اور کائناتوں کے خالق کو اپنے نام پر بننے والے ملک کی ذلّت اور بے توقیری گوارہ نہ تھی اور پھر اُس نے اس بستی کو جس کا نام پاکستان ہے، ذلّت کی گہرائیوں سے اُٹھا کر عزّت کی رفعتوں تک پہنچادیا۔
کوئی ناممکن یا مشکل ترین کام کرنے کا اُس کا اپنا طریقہء کار ہے، جس کو انسان سمجھنے سے قاصر ہیں، وہ بعض اوقات صرف کُن کہہ دیتا ہے اور بعض اوقات ایسے اسباب پیدا کرتا ہے جو ہمارے اور آپ کے وہم و گمان میں بھی نہیں ہوتے۔ بعض اوقات ایسے حالات پیدا ہوتے ہیں جو بظاہر بڑے ناخوشگوار اور نامساعد معلوم ہوتے ہیں مگر کچھ عرصے بعد انھیں میں سے خیر کے پہلو پھوٹتے ہیں اور برکات نمودار ہونا شروع ہوجاتی ہیں۔
بھارت کے عوام ہندو توا کی انتہاپسندانہ اور متشدّدانہ پالیسیوں سے بیزا ر تھے جب کہ وہاںصوبۂ بہار کے انتخابات قریب تھے، لہٰذا مودی کو پلوامہ کی طرح کا کوئی انتخابی اسٹنٹ درکار تھا جسے استعمال کرکے وہ الیکشن جیت جائے۔ لہٰذا سر جوڑے گئے، منصوبے بنائے گئے، سازش تیار ہوگئی اور پھر ایک روز اعلان کردیا گیا کہ کشمیر کے سیّاحتی علاقے پہلگام میں دہشت گری کا واقعہ ہوا ہے، جس میں بیس سے زائد لوگ مارے گئے ہیں۔
فائرنگ کے اس افسوسناک واقعے کے چند منٹ کے اندر قریبی پولیس اسٹیشن میں پہلے سے موجود ایک سرکاری اہلکار نے تحریری درخواست دی، جس میں پہلگام واقعے کی ذمّے داری پاکستان پر ڈال دی گئی، پولیس اسٹیشن کے انچارج نے دی گئی ہدایات اور تحریر کے عین مطابق ایف آئی آر کاٹ دی اور ساتھ ہی اسکرپٹ کے مطابق ہندو توا کے پیروکار میڈیا نے ڈھول بجانا شروع کردیاکہ اس میں پاکستان ملوّث ہے مگر کسی ثبوت یا شہادت کے بغیر اس ڈرامے کو کون مانتا۔ کوئی ملزم گرفتار نہیں ہوا، کسی کی تصویر نہیں دکھائی گئی، کسی کی گفتگو intercept کرکے نہیں سنائی گئی، کسی ملزم کی شناخت تک نہیں ہوئی اور کوئی ملزم آج تک پکڑا ہی نہیں گیا، مگر مودی اور اس کی حکومت اور میڈیا نے اپنی رَٹ جاری رکھّی کہ ’’یہ پاکستان نے کرایا ہے اور اب پاکستان کو سبق سکھایا جائے گا۔‘‘
اب چونکہ دنیا کے بڑے ملکوں کے پاس حقائق جاننے کے اپنے ذرایع بھی ہیں، وہ جدید ترین ٹیکنالوجی سے لیس سٹلائٹس کی مدد سے حقائق معلوم کرچکے تھے، لہٰذا کسی ملک نے بھی مودی کے الزامات کو سنجیدگی سے نہیں لیا۔ مگر مودی کو اس سے غرض نہیں تھی، اس کے پیشِ نظر تو بہار کے انتخابات تھے، جن کے لیے اُس نے اپنے لیے ’’چھپّن انچ چھاتی والا بہادر وزیرِاعظم‘‘ کا امیج تراشنا تھا، جو پاکستان کے خلاف کوئی جارحانہ اقدام کرکے ہی قائم کرسکتا تھا۔ اُسے پاکستان کی کمزور معیشت اور سیاسی عدمِ استحکام سے بھی شہ ملی، لہٰذا اس نے 5/6 مئی کو ہماری جغرافیائی حدود کو پامال کیا اور ہماری حدود کے اندر آکر بہت سی جگہوں پر میزائلوں سے حملہ کیا، جس سے ہمارے شہریوں کا جانی اور مالی نقصان بھی ہوا، مگر ہم نے بھی بھارت کے پانچ طیّارے مارگرائے۔
اس موقع پر کئی بہت سے اہم لوگ چاہتے تھے کہ پاکستان ، بھارت کوجواب نہ دے، بات آگے نہ بڑھے اور وہیں ختم ہوجائے۔ مگر وہی تو تاریخی لمحہ تھا فیصلہ کرنے کا، اس طرح کے مواقع مختلف قوموں کے راہنماؤں اور افواج کے کمانڈروں کو ملتے ہیں ، جو بھی اُس وقت درست فیصلہ کرجائے یعنی اس لمحے کو مُٹھّی میں قابو (seize the moment) کرلے وہ مقدّر کا سکندر قرار پاتا ہے اور وقت کی اسکرین پر انمٹ نقوش چھوڑتا ہے۔
’جنگ کہیں بڑھ نہ جائے، اسک ے شعلے پورے خطّے میں پھیل جائیں گے، ہماری کمزور معیشت جنگ کا وزن بالکل برداشت نہیں کرسکے گی‘ جیسی آوازوں کو نظر اندار کرتے ہوئے جنرل سیّد عاصم منیر نے وہی فیصلہ کیا جو ایک ایٹمی ملک کے سپہ سالار کو کرنا چاہیے تھا کہ’’ہم حملہ آور بھارت کو جواب دیں گے اور ایسا جواب دیں گے جو وہ ہمیشہ یاد رکھّے گا‘‘ اور پھر ایسا جواب دیا گیا کہ چند گھنٹوں میں ہی حریف چاروں شانے چِت ہوگیا، بھارت کو بے بس کردیاگیا، چھ گنا بڑے دشمن چاروں شانے چت ہوگیا اور وہ بچاؤ بچاؤ کی صدائیں لگاتا ہوا، امریکی صدر ٹرمپ کے پاؤں جا پڑا۔
پاکستان، بھارت کو مکمّل طور پر جَیم کرچکا تھا، وہ اس وقت بھارت کو ناقابلِ تلافی تقصان پہنچا سکتا تھا مگر امریکا نے بیچ میں پڑکر جنگ بند کرادی۔ جنگ بند توہوگئی مگر چند گھنٹوں میں ہی اس کے ایسے اثرات مرتّب ہوگئے جو کئی دھائیوں پر محیط ہوں گے۔ دنیا بھر کے مسلمانوں کو بڑے عرصے کے بعد مسرّت و افتخار سے سرشار ہونے کا موقع ملا اور اسرائیلی جارحیّت کا نشانہ بننے والے عرب ملکوں کو پاکستان کی صورت میں ایک قابلِ اعتبار محافظ نظر آنے لگا۔ چار روزہ جنگ کی کوکھ سے برکات مسلسل نمودار ہورہی ہیں اور یہ سلسلہ ابھی جاری رہے گا۔
سعودی عرب کا بھی ، قطر کا بھی اور کئی دوسرے عرب ملکوں کا امریکا کے ساتھ دفاعی معاہدہ تھا جس کے مطابق حملے کی صورت میں امریکا اس ملک کا دفاع کرنے کا پابند تھا، مگر حالیہ سالوں اور مہینوں میں اسرائیل نے مشرقِ وسطیٰ کے سات ممالک پر حملہ کیا اور انھیں نقصان پہنچایا مگر معاہدے کے باوجود امریکا ٹس سے مس نہ ہوا اور کسی ملک کا دفاع نہ کیا اور نہ ہی اسرائیل کو حملہ کرنے سے روکا۔ ان حالات و واقعات نے عرب حکمرانوں کی آنکھیں کھول دیں اور وہ سمجھ گئے کہ اسرائیلی حملے کی صورت میں امریکا ان کی مدد نہیں کرے گا، اس لیے ہمیں اپنے ملک کی سالمیّت کے لیے کوئی اور دوست اور محافظ ڈھونڈنا ہوگا، جو ہماری حفاظت کی صلاحیّت بھی رکھتا ہواور قابلِ اعتبار بھی ہو۔
سعودی عرب کو، جہاں ہمارے مکّہ مدینہ ہیںجو ہماری عقیدتوں اور محبّتوں کے مرکز ہیں، جن پر قربان ہونا ہماری سب سے بڑی آرزو ہے، یہ فیصلہ کرنے میں زیادہ وقت نہیں لگا ہوگا، کیونکہ سعودی حکمران مکّہ مدینہ کے ساتھ پاکستانیوں کی جذباتی وابستگی سے بخوبی واقت ہیں اور اچھی طرح جانتے ہیں کہ مکّہ ، مدینہ والے ملک کی حفاظت اگر کوئی سعودی عرب سے بھی زیادہ خلوص، محبّت اور جذبے سے کرسکتا ہے تو وہ پاکستان ہے، پاکستان کی فوج ہے اور پاکستان کے عوام ہیں۔
قطر پر اسرائیلی حملے کے فوراً بعد راقم نے لکھّا تھا کہ پاکستان کے وزیراعظم اور سپہ سالار کو یہ اعلان کردینا چاہیے کہ ’ مکّہ اور مدینہ کا دفاع ہم کریں گے اور اس کے لیے پاکستان کے کمانڈوز اور پاکستان کی ائرفورس سعودی فورسز سے آگے ہو گی اور اس کے لیے کسی معاہدے کی بھی ضرورت نہیں ‘ معاہدہ ہوگیا ہے تو اچھی بات ہے، اس کے ثمرات دونوں ملکوں کو حاصل ہوں گے۔
پاکستان پچھلی ربع صدی سے ایک declared ایٹمی قوّت ہے۔ کچھ عرصے سے اسے معاشی اور سیاسی مسائل کا سامنا ہے مگر پوری دنیا نے دیکھ لیا کہ جب مئی میں اُس پر جنگ تھونپی گئی تو پاکستان نے اپنی تماتر معاشی کمزوریوں اور سیاسی مسائل کے باوجود یہ ثابت کردیا کہ وہ مالی طور پر کمزور سہی مگر ڈانگ سوٹے کا بہت تگڑا ہے اور جو بھی اس سے جنگ چھیڑے گا، شکست اس کا مقدّر ہو گی۔ عرب ملکوں کو پاکستان کی عسکری صلاحیّت کے بارے میں اگر کچھ تخفّظات تھے تو وہ بھی مئی کی جنگ میں دور ہوچکے ہیں۔ یہ سب اللہ کے فضل و کرم سے ہوا ہے۔کل تک غیر بھی اور اپنے بھی جس ملک کے مستقبل سے مایوس تھے، آج دنیا کے امیر ترین ملک اُس سے تخفّظ مانگ رہے ہیں۔
بیسیوں مرتبہ لکھ چکا ہوں کہ دنیا کے کسی اور ملک کے باشندے کسی غیر ملک میں جا کر نہ اپنے ملک کی سیاست کرتے ہیں نہ ہی ایک دوسرے سے گتھم گتھا اور جُوتم پیزار ہوکر دنیا کو تماشا دکھاتے یہ صرف پاکستانی ہیں جو اپنے گندے کپڑے لندن اور نیویارک کی سڑکوں پر دھوتے ہیں اور انھیں شرم بھی محسوس نہیں ہوتی۔ انھوں نے لندن میں وزیراعظم کے دورے کے موقع پر جو تماشا لگایا وہ پوری پاکستانی قوم کے لیے باعثِ شرم تھا۔
یہ صرف اللہ کی خاص رحمت سے ہوا ہے کہ آج مقدّر کا سکندر بن چکا ہے ۔پاکستان بھی، اس کا وزیرِاعظم بھی اور اس کا سپہ سالار بھی۔ اس وقت دل ے بے اختیار نکل رہا ہے ۔
تو نشانِ عزمِ عالیشان۔۔
ارضِ پاکستان
پرچم ِ ستارہ و ہلال
رہبرِ ترقّی و کمال
سایۂ خدائے ذوالجلال
میرا ایمان ہے کہ وطنِ عزیز پر خدائے ذولجلال کا سایہ ہے اور یہ قیامت تک رہے گا۔
پاکستان اورسعودی عرب کے مابین طے پانے والاتاریخی معاہدہ دونوں برادرممالک کے تاریخی تعلقات میں ایک نئے دورکا آغازہے ، شیخ آفتاب احمد