خیبر پختونخوا میں شدید گرمی؛ پی ڈی ایم اے نے ہیٹ ویوکا الرٹ جاری کردیا
اشاعت کی تاریخ: 20th, May 2025 GMT
پشاور:
خیبرپختونخوا میں آج سے 24 مئی تک گرمی کی شدت میں غیر معمولی اضافے کا خدشہ ظاہر کیا گیا ہے، جس کے پیش نظر صوبائی ڈیزاسٹر منیجمنٹ اتھارٹی نے تمام ضلعی انتظامیہ کو ہائی الرٹ جاری کر دیا ہے۔
پی ڈی ایم اے کی جانب سے جاری مراسلے کے مطابق اس دوران دن کے اوقات میں درجہ حرارت معمول سے 5 تا 7 ڈگری سینٹی گریڈ زیادہ رہنے کا امکان ہے جو کہ عوامی صحت اور روزمرہ زندگی پر براہِ راست اثر ڈال سکتا ہے۔
صوبے کے جنوبی اور وسطی علاقوں میں گرمی کی شدت برقرار رہے گی جبکہ بالائی علاقوں میں برف پگھلنے کی رفتار میں بھی اضافہ متوقع ہے، جس کے باعث آبی ذخائر پر دباؤ بڑھنے کا امکان ہے۔
پی ڈی ایم اے نے شہریوں کو خبردار کیا ہے کہ شدید گرمی کے باعث گرد و غبار اور تیز ہواؤں کی صورت حال بھی پیدا ہو سکتی ہے، جس سے فضائی آلودگی اور سانس کی بیماریوں میں اضافہ ہو سکتا ہے۔
مراسلے میں عوام سے اپیل کی گئی ہے کہ وہ غیر ضروری طور پر سورج کی تیز روشنی میں باہر نکلنے سے گریز کریں اور پانی کے استعمال میں اضافہ کریں تاکہ ہیٹ اسٹروک سے بچا جا سکے۔ بزرگ افراد اور بچوں کو بالخصوص صبح 10 بجے سے شام 5 بجے کے درمیان دھوپ میں نہ نکلنے کی ہدایت کی گئی ہے۔
علاوہ ازیں پی ڈی ایم اے نے کسانوں کو بھی متنبہ کیا ہے کہ وہ فصلوں کی کٹائی کے دوران احتیاط برتیں اور جانوروں کا خصوصی خیال رکھیں۔ ادارے نے یہ بھی کہا ہے کہ گرمی کی اس لہر کے دوران عوامی آگاہی مہم جاری رکھی جائے گی تاکہ لوگ بر وقت احتیاطی اقدامات اٹھا سکیں۔
مزید برآں تمام ہیلتھ و میڈیکل سروسز، پیرا میڈیکس اور ریسکیو ڈیپارٹمنٹس کو الرٹ رہنے کی ہدایت جاری کی گئی ہے۔ اس دوران تمام ہیٹ اسٹروک سینٹرز کو فعال رکھا جائے گا تاکہ کسی بھی ہنگامی صورت حال سے فوری نمٹا جا سکے۔
پی ڈی ایم اے کے ترجمان نے عوام کو مشورہ دیا ہے کہ سفر سے قبل اپنی گاڑیوں کے انجن میں پانی اور ٹائروں میں پریشر لازمی چیک کریں تاکہ گرمی کے باعث کسی ممکنہ خرابی سے بچا جا سکے۔ صوبائی حکومت اور متعلقہ ادارے صورتحال پر نظر رکھے ہوئے ہیں اور کسی بھی ایمرجنسی کی صورت میں فوری کارروائی کے لیے تیار ہیں۔
.ذریعہ: Express News
کلیدی لفظ: پی ڈی ایم اے
پڑھیں:
گورنر خیبر پختونخوا نے صوبائی وزراء سے حلف لیا
گورنر خیبر پختونخوا فیصل کریم کنڈی نے نئی صوبائی کابینہ کے اراکین سے حلف لے لیا۔ حلف برداری کی یہ پر وقار تقریب گورنر ہاؤس پشاور میں منعقد ہوئی، جس میں وزیراعلیٰ محمد سہیل آفریدی، اسپیکر صوبائی اسمبلی بابر سلیم سواتی، ارکانِ اسمبلی، پارٹی رہنماؤں اور اعلیٰ حکام نے شرکت کی۔
تقریب کے دوران 10 اراکینِ صوبائی اسمبلی نے بحیثیت صوبائی وزیر اپنے عہدے کا حلف اٹھایا۔ حلف لینے والوں میں مینا خان آفریدی، ارشد ایوب خان، امجد علی، آفتاب عالم آفریدی، فضل شکور خان، خلیق الرحمٰن، ریاض خان، سید فخر جہان، عاقب اللہ خان اور فیصل خان شامل ہیں۔
گورنر فیصل کریم کنڈی نے تمام نئے وزراء کو مبارکباد دیتے ہوئے ان کے لیے نیک تمناؤں کا اظہار کیا اور امید ظاہر کی کہ نئی کابینہ صوبے کی ترقی، امن اور عوامی فلاح کے لیے مؤثر کردار ادا کرے گی۔
تقریب میں چیف سیکرٹری شہاب علی شاہ، آئی جی پولیس ذوالفقار حمید اور مختلف محکموں کے سربراہان سمیت سیاسی و سماجی شخصیات بھی موجود تھیں۔
یاد رہے کہ گزشتہ روز وزیراعلیٰ خیبر پختونخوا سہیل آفریدی نے 13 رکنی کابینہ تشکیل دی تھی، جس میں 10 وزراء، دو مشیر اور ایک معاون خصوصی شامل ہیں۔
مزمل اسلم اور تاج محمد مشیر کی حیثیت سے، جبکہ شفیع جان بطور معاون خصوصی وزیراعلیٰ اپنی ذمہ داریاں سنبھالیں گے۔
لاہور میں فضائی آلودگی برقرار، اے کیو آئی سطح میں اضافہ ہونے کا امکان