فلم ستارے زمین پر مودی کا پیغام، دھرو راٹھی نے بھارتی سینسر بورڈ کی کلاس لے لی
اشاعت کی تاریخ: 23rd, June 2025 GMT
بالی وڈ فلم انڈسٹری کے مسٹر پرفیکشنسٹ عامر خان کی فلم ’ستارے زمین پر‘ 20 جون 2025 بروز جمعہ کو سینما گھروں میں نمائش کے لیے پیش کی گئی۔ لیکن ریلیز کے بعد فلم سے زیادہ بھارتی سینسر بورڈ اور مودی کے پیغام پر بات کی جا رہی ہے۔
فلم کی ریلیز سے قبل بھارتی سینسر بورڈ نے عامر خان کی فلم پر کچھ مناظر اور مکالمات پر اعتراض کیا تھا۔ لیکن پھر سینٹرل بورڈ آف فلم سرٹیفیکیٹ نے چھان بین کے بعد بغیر کوئی سین کاٹے منظوری دے دی تھی مگر فلم کے آغاز میں وزیراعظم نریندر مودی کا ایک قول شامل کرنے کی ہدایت کی تھی۔
فلم کے آغاز پر بھارتی وزیراعظم کا قول شامل کیے جانے پر مودی کے سب سے بڑے ناقد معروف یو ٹیوبر دھرو راٹھی نے سوشل میڈیا پر انہیں اور بھارتی سینسر بورڈ کو خوب تنقید کا نشانہ بنایا۔
My Message to Censor Board of India #SitaareZameenPar pic.
— Dhruv Rathee (@dhruv_rathee) June 23, 2025
دھرو راٹھی نے کہا کہ جس فلم کا سیاست سے کوئی لینا دینا نہیں ہے اس فلم میں زبردستی مودی کو شامل کیا گیا۔ انہوں نے کہا کہ ویسے بھی آدھی سے زیادہ ریلیز ہونے والی بھارتی فلموں میں بی جے پی کا پروپیگنڈہ کوٹ کوٹ کر بھرا ہوتا ہے لیکن انہوں نے سیاست سے پاک فلم کو بھی نہیں چھوڑا۔ یو ٹیوبر نے مودی اور سینسر بورڈ کو آڑے ہاتھوں لیتے ہوئے کہا ہے کہ ہر چیز میں پروپیگنڈہ مت کریں ملک کو نارتھ کوریا نہ بنائیں۔
واضح رہے کہ اداکار عامر خان کی نئی فلم ستارے زمین پر نے ریلیز کے پہلے ویک اینڈ پر گھریلو باکس آفس پر شاندار کارکردگی دکھائی، اور تقریباً 60 کروڑ روپے کا بزنس کیا۔ ہدایتکار آر ایس پرسانا کی اس فلم نے جمعہ کو 10.7 کروڑ روپے، ہفتہ کو 20.2 کروڑ روپے، اور اتوار کو 28 کروڑ روپے کی کمائی کی۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
بالی ووڈ دھرو راٹھی ستارے زمین پر عامر خان
ذریعہ
ذریعہ: WE News
کلیدی لفظ: بالی ووڈ دھرو راٹھی ستارے زمین پر بھارتی سینسر بورڈ ستارے زمین پر دھرو راٹھی کروڑ روپے
پڑھیں:
حیسکو میں ایک ارب 6 کروڑ سے زائد کی کرپشن کا انکشاف
حیدرآباد الیکٹرک سپلائی کمپنی (حیسکو) میں تنخواہوں اور الاؤنسز کی مد میں ایک ارب 6 کروڑ سے زائد کرپشن کا انکشاف ہوا ہے۔
قومی اسمبلی کی پبلک اکاؤنٹس کمیٹی کے اجلاس میں آڈٹ حکام نے انکشاف کیا کہ حیسکو میں گھوسٹ ملازمین، ڈبل تنخواہوں کے ذریعے قومی خزانے کو نقصان پہنچایا گیا اور وفاقی تحقیقاتی ادارہ (ایف آئی اے)99 کروڑ 62 لاکھ کی مبینہ کرپشن کی تحقیقات کر رہا ہے۔
آڈٹ حکام نے مزید انکشاف کیا کہ حیسکو کی اندرونی انکوائری میں مزید 6 کروڑ 78 لاکھ روپے کی مشتبہ ادائیگیاں ہوئی ہیں۔
چیئرمین کمیٹی شاہدہ اختر کی زیرصدارت اجلاس میں ایف آئی اے حکام نے بتایا کہ اس معاملے میں ایف آئی آرز کی تعداد 5 ہوگئی تھی، 151 ملزمان تھے جن میں سے 14 کو گرفتار کیا گیا جبکہ دیگر ضمانت پر ہیں، ایک ارب روپے میں سے 13 کروڑ روپے کی ریکوری ہوئی ہے۔
رکن کمیٹی قاسم نون نے کہا کہ 13 کروڑ روپے کچھ بھی نہیں ہیں، سخت ایکشن لیا جائے، سید امین الحق نے کہا کہ گھوسٹ ملازمین کی تصدیق بھی کی گئی کہ وہ موجود ہیں۔
سینیٹر افنان اللہ خان نے کہا کہ وزارت کو چاہیے کہ وہ مداخلت کرے اور ذمہ داران کا تعین کرے۔
چیئرمین کمیٹی شاہد اختر نے کہا کہ یہ تو آڈٹ نے نشان دہی کر دی ہے، لگتا ہے کہ پاور ڈویژن کا کوئی چیک اینڈ بیلنس نہیں ہے، جس پر سی ای او حیسکو نے بتایا کہ 756 ملین روپے کی ذمہ داری بھی فکس ہو چکی ہے۔
شاہدہ اختر نے کہا کہ عدالت کے حکم تک یہ آڈٹ پیرا زیر التوا رہے گا، رکن کمیٹی سید حسین طارق نے سوال کیا کہ حیسکو میں بائیو میٹرک سسٹم کیوں نہیں ہے۔
پاکستان پیپلزپارٹی (پی پی پی) کی رکن شازیہ مری نے کہا کہ ہم ڈسکوز کو یہاں کمنٹس کے لیے نہیں احتساب کے لیے بلاتے ہیں، یہ لوگوں کو چور کہتے ہیں اور اپنی پرفارمنس کے گیت گاتے نہیں تھکتے۔
پبلک اکاؤنٹس کمیٹی نے ہدایت کی کہ 13 کروڑ روپے کی ریکوری کی آڈٹ سے تصدیق کرائی جائے، جو ریکوری رہ گئی ہے وہ معاملہ زیر التوا رہے گا۔
رمضان میں سحر و افطار کے دوران لوڈشیڈنگ نہ کرنے کا حکم، گیس فراہمی کا بھی اعلان