جسٹس سرفراز ڈوگر اسلام آباد ہائیکورٹ کے مستقل چیف جسٹس نامزد
اشاعت کی تاریخ: 2nd, July 2025 GMT
اسلام آباد (خصوصی رپورٹر) جوڈیشل کمشن نے اسلام آباد، پشاور، سندھ اور بلوچستان ہائیکورٹ کے مستقل چیف جسٹس کے لیے ناموں کی منظوری دے دی ہے۔اسلام آباد سپریم کورٹ بلڈنگ میں چیف جسٹس یحیٰی آفریدی کی زیر صدارت جوڈیشل کمشن کا اہم اجلاس ہوا جس میں اسلام آباد، بلوچستان، پشاور اور سندھ ہائیکورٹس کے نئے چیف جسٹسز کی تعیناتی پر غور کیا گیا۔ جوڈیشل کمشن کے اجلاس میں بڑے فیصلے کیے گئے، جس کا اعلامیہ بھی جاری کیا گیا ہے، جوڈیشل کمشن نے 4 ہائیکورٹس کے لیے مستقل چیف جسٹسز اکثریتی رائے سے نامزد کرنے کی منظوری دے دی۔ جوڈیشل کمشن اعلامیے کے مطابق پہلے اجلاس میں چیف جسٹس پشاور ہائیکورٹ کی تعیناتی کا معاملہ زیر غور آیا، جس میں جسٹس ایس ایم عتیق شاہ کو کثرت رائے سے چیف جسٹس پشاور ہائی کورٹ نامزد کر دیا گیا۔ دوسرا اجلاس چیف جسٹس بلوچستان ہائیکورٹ کی تعیناتی کے لیے ہوا، کمشن نے جسٹس روزی خان کو چیف جسٹس بلوچستان ہائیکورٹ بنانے کے لیے نامزد کر دیا۔ جوڈیشل کمشن کا تیسرا اجلاس چیف جسٹس سندھ ہائیکورٹ کی تعیناتی کے لیے ہوا، جسٹس محمد جنید غفار کو چیف جسٹس سندھ ہائی کورٹ نامزد کر دیا گیا ہے۔ چوتھا اجلاس چیف جسٹس اسلام آباد ہائیکورٹ کی تعیناتی کے لیے ہوا، جوڈیشل کمشن نے جسٹس سردار محمد سرفراز ڈوگر کو چیف جسٹس اسلام آباد ہائیکورٹ نامزد کر دیا ہے۔ واضح رہے کہ جسٹس سردار سرفراز ڈوگر کا سنیارٹی لسٹ میں پہلا نمبر ہے جبکہ جسٹس سرفراز ڈوگر کی مستقل چیف جسٹس اسلام آباد ہائی کورٹ تعیناتی اکثریت سے کی گئی ہے۔ ذرائع کے مطابق ان کے حق میں 9 ووٹ پڑے۔ جوڈیشل کمشن کے 4 ممبران نے جسٹس میاں گل حسن اورنگزیب کے حق میں ووٹ دیا، جسٹس جمال مندوخیل نے کسی جج کے حق میں ووٹ نہیں دیا۔ چیف جسٹس یحییٰ آفریدی نے جسٹس میاں گل حسن اورنگزیب کے حق میں ووٹ دیا۔ پی ٹی آئی کے دو ممبران جوڈیشل کمشن علی ظفر اور بیرسٹر گوہر نے بھی جسٹس میاں گل حسن اورنگزیب کے حق میں ووٹ دیا۔ ممبر اسلام آباد ہائی کورٹ بار ایسوسی ایشن ذوالفقار عباسی نے بھی جسٹس میاں گل حسن اورنگزیب کے حق میں ووٹ دیا۔ جسٹس منصور علی شاہ اور جسٹس منیب اختر نے جسٹس محسن اختر کیانی کے حق میں ووٹ دیا۔ جسٹس امین الدین خان، اٹارنی جنرل منصور عثمان اعوان نے جسٹس سردار سرفراز ڈوگر کے حق میں ووٹ دیا۔ وزیر قانون اعظم نذیر تارڑ، پاکستان بار کونسل کے نمائندے احسن بھون نے بھی جسٹس سردار سرفراز ڈوگر کے حق میں ووٹ دیا۔ سینیٹر فاروق ایچ نائیک اور ممبر قومی اسمبلی شیخ آفتاب نے بھی جسٹس سردار سرفراز ڈوگر کے حق میں ووٹ دیا۔ اقلیتی خاتون ممبر جوڈیشل کمشن روشن بروشہ نے بھی جسٹس سردار سرفراز ڈوگر کے حق میں ووٹ دیا۔ ممبر قومی اسمبلی رانا تنویر نے بھی جسٹس سردار سرفراز ڈوگر کے حق میں ووٹ دیا۔ جسٹس ریٹائرڈ شوکت عزیز صدیقی نے بھی جسٹس سردار سرفراز ڈوگر کے حق میں ووٹ دیا۔ ذرائع کے مطابق اجلاس کے دوران سپریم کورٹ کے جج جسٹس منصور علی شاہ نے کارروائی پر اعتراض اٹھایا۔ ان کا مؤقف تھا کہ 26ویں آئینی ترمیم سے متعلق فیصلہ پہلے کیا جانا چاہیے۔ جسٹس منیب اختر نے جسٹس منصور علی شاہ کی رائے سے اتفاق کیا۔ تحریک انصاف کے دو ارکان اور خیبر پی کے کے وزیر قانون نے بھی اس رائے کی تائید کی۔
.ذریعہ: Nawaiwaqt
کلیدی لفظ: ہائیکورٹ کی تعیناتی اسلام ا باد ہائی مستقل چیف جسٹس نامزد کر دیا جوڈیشل کمشن ہائی کورٹ کے لیے
پڑھیں:
چیف جسٹس بلوچستان ہائیکورٹ کا ریٹائرڈ ملازمین کے لیے خوش آئند قدم
بلوچستان ہائیکورٹ کے چیف جسٹس روزی خان بڑیچ نے ریٹائرڈ ملازمین کے حقوق کے تحفظ کے لیے ایک قابلِ تحسین اقدام اٹھا لیا۔ عدالتِ عالیہ میں پنشن برانچ کے قیام کے بعد اس کےثمرات سامنے آنا شروع ہوگئے ہیں۔
نجی میڈیا کے مطابق، بلوچستان ہائیکورٹ سے ریٹائر ہونے والے ایک ملازم کو صرف دس دن کے اندر تمام پنشن واجبات ادا کر دیے گئے، جو ایک بڑی پیش رفت سمجھی جا رہی ہے۔
اس موقع پر ایک مختصر تقریب کا بھی انعقاد کیا گیا جس میں چیف جسٹس روزی خان بڑیچ نے ریٹائرڈ ملازم کو شیلڈ اور تحفہ پیش کیا۔ تقریب میںرجسٹرار عبدالقیوم لہڑی سمیت دیگر عدالتی افسران نے شرکت کی۔
اپنے خطاب میں چیف جسٹس نے کہاکہ عدالتی ملازمین ہمارے نظام کا اہم ستون ہیں، ان کی خدمات کا اعتراف اور بعد از ملازمت تحفظ ہماری ترجیح ہے۔ ہم اس بات کو یقینی بنائیں گے کہ ریٹائرمنٹ کے بعد بھی انہیں مکمل احترام اور مالی سکیورٹی حاصل ہو۔
چیف جسٹس نے مزید کہا کہ پنشن برانچ کا قیام ملازمین کے حقوق کے تحفظ کی جانب ایک تاریخی قدم ہے، اور آئندہ بھی اس سلسلے میں بہتری کے اقدامات جاری رہیں گے۔
یہ پیش رفت بلوچستان ہائیکورٹ کے انتظامی نظم و نسق میں ایک مثبت تبدیلی کی علامت ہے، جسے دیگر اداروں کے لیے بھی ایک مثالی ماڈل قرار دیا جا رہا ہے۔
کپل شرما سے بھتہ مانگنے والا گینگسٹر گرفتار