آزاد کشمیر: بادل پھٹنے سے تباہی، مکانات، سڑکیں متاثر، مویشی سیلاب میں بہہ گئے
اشاعت کی تاریخ: 9th, July 2025 GMT
مظفرآباد(نیوز ڈیسک)آزاد کشمیر کے ضلع جہلم ویلی کے علاقے ہٹیاں بالا کے نواحی گاؤں گوہرآباد میں طوفانی بارش اور بادل پھٹنے کے باعث بڑے پیمانے پر تباہی پھیل گئی۔ گوہرآباد شرقی اور غربی میں متعدد مکانات مکمل یا جزوی طور پر تباہ ہو گئے، جبکہ سیلابی ریلہ گھروں اور دکانوں میں داخل ہو گیا۔
علاقہ مکینوں کے مطابق خوش قسمتی سے جانی نقصان نہیں ہوا، تاہم درجنوں مویشی تیز بہاؤ میں بہہ گئے۔ شدید بارشوں کے نتیجے میں نوگراں لنک روڈ مکمل طور پر تباہ ہوگئی جبکہ شاہراہ لیپہ بھی لینڈ سلائیڈنگ کے باعث بند ہو گئی، جس سے امدادی سرگرمیوں میں شدید مشکلات کا سامنا ہے۔
سیلابی پانی کے باعث علاقے میں بجلی کی فراہمی معطل ہو گئی ہے۔ گرلز مڈل اسکول سرائی کی عمارت کو بھی نقصان پہنچا ہے، جس سے تعلیمی سرگرمیاں متاثر ہونے کا خدشہ ہے۔
ضلعی انتظامیہ اور امدادی ادارے متاثرہ علاقوں میں بحالی اور امدادی کاموں میں مصروف ہیں، تاہم دشوار گزار راستے اور بند سڑکیں ریسکیو سرگرمیوں میں رکاوٹ بن رہی ہیں۔ مقامی افراد نے حکومت سے فوری امداد اور انفراسٹرکچر کی بحالی کا مطالبہ کیا ہے۔
Post Views: 3.ذریعہ: Daily Mumtaz
پڑھیں:
بیرسٹر سلطان محمود کی زیرصدارت فارورڈ بلاک کی پارلیمانی پارٹی کا اجلاس
اس موقع پر اجلاس میں اس بات کا اعادہ کیا گیا کہ فارورڈ بلاک کی پارلیمانی پارٹی آپس میں متحد ہے اور اس بات کا فیصلہ بھی کیا گیا کہ آئندہ الیکشن میں فارورڈ بلاک مشترکہ لائحہ عمل طے کر کے متفقہ طور پر حکمت عملی وضع کرے گا۔ اسلام ٹائمز۔ صدر آزاد جموں و کشمیر بیرسٹر سلطان محمود چوہدری کی زیرصدارت فارورڈ بلاک کی پارلیمانی پارٹی کا خصوصی اور اہم اجلاس ایوان صدر کشمیر ہاؤس اسلام آباد میں منعقد ہوا۔ اس موقع پر فارورڈ بلاک کی پارلیمانی پارٹی کے اجلاس میں وزیراعظم آزاد کشمیر چوہدری انوارالحق نے بھی شرکت کی جبکہ اس موقع پر اجلاس میں وزیر بہبود آبادی سردار محمد حسین، وزیر مواصلات چوہدری اظہر صادق، وزیر ایلیمنٹری و سکینڈری ایجوکیشن دیوان علی خان چغتائی، وزیر مال چوہدری محمد اخلاق، وزیر صحت نثار انصر ابدالی، وزیر پاور ڈویلپمنٹ آرگنائزیشن چوہدری محمد رشید، وزیر توانائی چوہدری ارشد حسین، وزیر سیاحت سردار فہیم اختر ربانی، وزیر ہائیر ایجوکیشن ظفر اقبال ملک، وزیر خزانہ عبدالماجد خان، وزیر فزیکل پلاننگ و ہاؤسنگ چوہدری یاسر سلطان، وزیر خوراک چوہدری اکبر ابراہیم، وزیر جموں و کشمیر لبریشن سیل بیگم امتیاز نسیم، وزیر آزاد جموں و کشمیر سمال انڈسٹریز کوآپریشن، ٹریول اینڈ ٹریڈ اتھارٹی پروفیسر تقدیس گیلانی، وزیر اطلاعات محمد مظہر سعید، وزیر سپورٹس عاصم شریف بٹ، صدارتی مشیر سردار امتیاز خان اور چوہدری محبوب ایڈووکیٹ نے شرکت کی۔
وزیر زراعت و لائیو اسٹاک سردار میر اکبر ٹریبونل میں اپنی تاریخ کی وجہ سے اجلاس میں شرکت نہیں کر سکے جبکہ ڈپٹی اسپیکر چوہدری ریاض احمد نے مظفرآباد سے اور مشیر زکوٰۃ و عشر صبیحہ صدیق نے لندن سے بذریعہ ویڈیو لنک شرکت کی۔ اس موقع پر اجلاس میں فارورڈ بلاک کی پارلیمانی پارٹی کے اراکین نے صدر آزاد جموں و کشمیر بیرسٹر سلطان محمود چوہدری اور وزیراعظم آزاد کشمیر چوہدری انوارالحق کی قیادت پر مکمل اور بھرپور اعتماد کا اظہار کیا۔ اس موقع پر اجلاس میں اس بات کا اعادہ کیا گیا کہ فارورڈ بلاک کی پارلیمانی پارٹی آپس میں متحد ہے اور اس بات کا فیصلہ بھی کیا گیا کہ آئندہ الیکشن میں فارورڈ بلاک مشترکہ لائحہ عمل طے کر کے متفقہ طور پر حکمت عملی وضع کرے گا۔
دریں اثناء فارورڈ بلاک کی پارلیمانی پارٹی نے مقبوضہ کشمیر میں جاری بھارتی مظالم کی بھرپور مذمت کی اور اعادہ کیا کہ مسئلہ کشمیر کو عالمی سطح پر اُجاگر کرنے کے لئے کوششیں تیز کی جائیں گی اور آزادی کے بیس کیمپ سے مقبوضہ کشمیر کے عوام کو یہ یقین دلایا گیا کہ ہم اُن کی آزادی کی جدوجہد میں اُن کے شانہ بشانہ کھڑے ہیں اور مقبوضہ کشمیر کی آزادی تک ہماری یہ جدوجہد جاری و ساری رہے گی ۔قبل ازیں اجلاس میں اس بات پر بھی زور دیا گیا کہ آزاد کشمیر میں تعمیر و ترقی، عوامی فلاح و بہبود کے منصوبوں کو تیزی سے مکمل کیا جائے تاکہ آزاد کشمیر کو فلاحی ریاست بنایا جا سکے۔
بھارت کیخلاف جنگ میں غیبی مدد آئی، ایران اسرائیل سیز فائر کے پیچھے بھی وردی ہے، محسن نقوی