دہلی: سالگرہ پر تحائف کے جھگڑے نے 2 جانیں لے لیں
اشاعت کی تاریخ: 31st, August 2025 GMT
بھارت کے دارالحکومت دہلی کے علاقے روہنی میں ایک دل دہلا دینے والا واقعہ پیش آیا ہے جہاں معمولی گھریلو جھگڑے نے بھیانک رخ اختیار کر لیا۔
پولیس کے مطابق یوگیش نامی شخص نے اپنی بیوی پریا سہگل (34) اور ساس کسوم سنہا (63) کو قتل کر دیا۔ واقعہ اس وقت پیش آیا جب بیٹے کی سالگرہ پر دونوں خاندانوں کے درمیان تحائف کے تبادلے پر تنازع کھڑا ہو گیا۔
مزید پڑھیں: بھارتی اداکار وشال نے 48ویں سالگرہ پر مداحوں کو بڑی خوشخبری سنا دی
پولیس کے مطابق 30 اگست کو سہ پہر 3 بجکر 50 منٹ پر کنک مارگ تھانے میں ایک کال موصول ہوئی کہ سیکٹر 17 روہنی کے ایک فلیٹ میں خاتون اور ان کی بیٹی کو قتل کر دیا گیا ہے۔ پولیس جائے وقوعہ پر پہنچی تو کمرے میں دونوں کی لاشیں خون میں لت پت پائی گئیں۔
کال کرنے والے میگھ سنہا، مقتولہ کسوم کے بیٹے، نے بتایا کہ ان کی والدہ 28 اگست کو اپنی بیٹی پریا کے گھر سالگرہ کی تقریب میں شریک ہونے آئی تھیں اور پھر وہیں رک گئیں تاکہ بیٹی اور داماد کے درمیان تنازع کو سلجھا سکیں۔ تاہم بعد میں ان کا فون بند ملنے پر جب اہل خانہ گھر پہنچے تو دروازے پر خون کے دھبے دیکھے اور اندر داخل ہو کر لاشیں برآمد کیں۔
مزید پڑھیں: گنیز ورلڈ ریکارڈز کی 70ویں سالگرہ، حیرت انگیز تصویری جھلکیاں
پولیس کے مطابق ملزم یوگیش سہگل قتل کے بعد اپنے بچوں کو ساتھ لے کر فرار ہو گیا تھا لیکن بعد میں اسے گرفتار کر لیا گیا۔ جائے وقوعہ سے اس کے خون آلود کپڑے اور وہ قینچی بھی برآمد کی گئی جسے قتل میں استعمال کیا گیا تھا۔ پولیس کے مطابق ابتدائی تفتیش میں واقعے کی وجہ گھریلو جھگڑا ہی سامنے آیا ہے۔
مقتولہ پریا کے بھائی ہمالیہ نے میڈیا کو بتایا کہ والدہ نے انہیں فون پر کہا تھا کہ گھر میں جھگڑا چل رہا ہے اور وہ معاملات کو سلجھا کر واپس آئیں گی لیکن پھر ان کی واپسی نہ ہوئی۔ یہ ناقابلِ یقین ہے، میرا بہنوئی اپنی بیوی اور ماں ساس کو محض ایک جھگڑے پر مار کر بچوں سمیت فرار ہو گیا۔ یہ انتہائی غیر انسانی فعل ہے۔
پولیس نے بتایا کہ فرانزک ٹیم اور کرائم ٹیم نے موقع پر شواہد جمع کر لیے ہیں اور مزید تحقیقات جاری ہیں۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
2 جانیں تحائف جھگڑا دہلی سالگرہ قتل.ذریعہ: WE News
کلیدی لفظ: جھگڑا دہلی سالگرہ قتل پولیس کے مطابق
پڑھیں:
دہلی کی زہریلی ہوا میں سانس لینا مشکل ہورہا ہے، پرینکا گاندھی
کانگریس کی جنرل سکریٹری نے کہا کہ حکومتوں کو فوری طور پر کارروئی کرنی چاہیئے، ہم سب کسی بھی ایسے قدم کی حمایت اور تعاون کرینگے، جو اس خوفناک صورتحال سے نمٹنے میں مددگار ثابت ہوں۔ اسلام ٹائمز۔ وائناڈ سے کانگریس رکن پارلیمنٹ پرینکا گاندھی واڈرا نے بھارت کی دارالحکومت دہلی میں فضائی آلودگی کے مسائل کو اٹھاتے ہوئے وزیراعظم نریندر مودی سے مداخلت کرنے کی اپیل کی ہے۔ کانگریس کی جنرل سکریٹری نے کہا کہ کیرالہ کے وائناڈ اور پھر بہار کے بچھواڑا سے دہلی لوٹ کر سانس لینا حقیقی معنوں میں چونکا دینے والا تجربہ ہے۔ پرینکا گاندھی نے سوشل میڈیا پلیٹ فارم ایکس پر لکھا کہ اب وقت آ گیا ہے کہ ہم سب اپنے سیاسی مفادات سے اوپر اٹھ کر متحد ہوں اور اس کے خلاف کچھ ٹھوس قدم اٹھائیں۔ انہوں نے کہا کہ مرکزی اور ریاستی حکومتوں کو فوری طور پر کارروئی کرنی چاہیئے، ہم سب کسی بھی ایسے قدم کی حمایت اور تعاون کریں گے، جو اس خوفناک صورتحال سے نمٹنے میں مددگار ثابت ہوں۔ پرینکا گاندھی کا کہنا ہے کہ دہلی والے ہر سال اس زہریلی ہوا کو جھیلنے پر مجبور ہوتے ہیں اور ان کے پاس کوئی آپشن نہیں ہوتا ہے۔
انہوں نے کہا کہ سانس سے متعلق بیماریوں میں مبتلا افراد، اسکول جانے والے بچوں کے علاوہ بزرگوں کو فوری طور پر راحت کی ضرورت ہے، ہمیں اس آلودگی سے نمٹنے کے لئے فوری کارروائی کرنی چاہیئے۔ پرینکا گاندھی نے مودی، وزیر ماحولیات بھوپیندر یادو اور دہلی کی وزیر اعلیٰ ریکھا گپتا سے فوری طور پر موثر قدم اٹھانے کی اپیل کی ہے۔ سنٹرل پولوشن کنٹرول بورڈ (سی پی سی بی) کے مطابق اتوار (2 نومبر) کو ہوا کی رفتار کم ہونے کی وجہ سے آلودگی کم پھیلی، جس سے دہلی کی ہوا کا معیار "انتہائی خراب" کے زمرے میں رہا۔ دہلی کا ایئر کوالٹی انڈیکس (اے کیو آئی) ہفتہ کو 303 سے بڑھ کر اتوار کی صبح 386 درج کیا گیا۔ دہلی کے ایئر کوالٹی ارلی وارننگ سسٹم (اے کیو ای ڈبلیو ایس) نے بتایا کہ شمال مغربی سمت سے آنے والی ہواؤں کی رفتار شام اور رات کے دوران 8 کلومیٹر فی گھنٹہ سے کم ہو گئی، جس سے آلودگی کا پھیلاؤ رک گیا۔
پرنس اینڈریو کے جرائم پیشہ لوگوں سے تعلقات اور جنسی زیادتیاں، شاہی محل میں تنازع شدت اختیار کر گیا