معاشی و اقتصادی ترقی کے نئے افق
اشاعت کی تاریخ: 11th, January 2025 GMT
گورنر اسٹیٹ بینک نے کہا ہے کہ ملک اپنے معاشی اہداف کو حاصل کرنے کی راہ پر گامزن ہے اور اس کے قرضوں کی سطح اور ادائیگیوں کے توازن پر قابو پایا گیا ہے۔ توقع ہے کہ جنوری میں مہنگائی مزید کم ہوگی، جب کہ قرضوں کی ادائیگی کی وجہ سے سود کی شرح بھی کم ہوگی۔ برآمدات کو مزید بڑھانے کی ضرورت ہے،کیونکہ اس سے کرنٹ اکاؤنٹ اور ادائیگیوں کے توازن میں بہتری آئے گی۔
بلاشبہ ایک تاریخی مالیاتی سنگِ میل کے طور پر پاکستان نے 944 ملین ڈالر کے بجٹ خسارے کو سرپلس میں بدل دیا ہے۔ معیشت کو متحرک کرنے کی خاطر مرکزی بینک نے شرح سود میں قابلِ قدر کمی کرتے ہوئے اسے 22 فیصد سے کم کرکے 13 فیصد کردیا۔
اس حکمتِ عملی نے نہ صرف قرضوں کے حصول کو آسان بنایا بلکہ کاروباری ماحول کو فروغ دیا، کلیدی شعبوں میں سرمایہ کاری کو تقویت بخشی اور اقتصادی ترقی کے نئے افق وا کیے۔ اگرچہ یہ معاشی اشارے مجموعی ترقی کی ایک امید افزا تصویر پیش کرتے ہیں، حقیقی کامیابی اس مثبت تبدیلی میں پوشیدہ ہے جو عام شہریوں کی زندگیوں کو بہتر بناتی ہے۔
آئی ایم ایف کی پیش گوئی کہ پاکستان کی جی ڈی پی کی شرح 2025 تک 3.
پاکستان اسٹاک ایکسچینج (PSX) 2024 میں معاشی بحالی کی ایک روشن علامت کے طور پر سامنے آئی۔ KSE-100 انڈیکس 100,000 پوائنٹس کی تاریخی حد کو عبور کرتے ہوئے، PSX کی شاندار کارکردگی سرمایہ کاروں کے بڑھتے ہوئے اعتماد، قومی معیشت کے استحکام، اور سرمایہ کار دوست ماحول کو فروغ دینے کے حکومتی عزم کا ثبوت ہے۔ مہنگائی، جو طویل عرصے سے پاکستان میں معاشی عدم استحکام اور عوامی ناراضی کی وجہ رہی، 2024 میں ایک نمایاں کمی کا شکار ہوئی۔ جولائی سے نومبر کے درمیان، مہنگائی کی شرح 29 فیصد سے کم ہو کر 7 فیصد تک آ گئی۔
اس کمی نے گھریلو ضروریات کو کافی ریلیف فراہم کیا، اور اشیائے خورونوش، ایندھن اور دیگر ضروریات کی قیمتوں میں کمی سے عوام کو براہِ راست فوائد حاصل ہوئے۔ سال کے اختتام تک، پاکستان کے زرمبادلہ کے ذخائر 12 بلین ڈالر تک پہنچ گئے، جو معاشی بحالی کے سفر میں ایک اہم سنگِ میل تھا۔ یہ اضافہ بیرونِ ملک مقیم پاکستانیوں کی طرف سے ترسیلاتِ زر، برآمدات میں مضبوط ترقی، اور مالیاتی پالیسیوں پر عمل درآمد کا نتیجہ ہے۔ سال 2024کے دوران پاکستان کی برآمدات میں قابلِ ذکر82 فیصد کا اضافہ ہوا، جو 72 ارب ڈالر کی قابلِ رشک حد تک پہنچ گئیں۔
یہ شاندار ترقی پاکستان کے کلیدی برآمدی شعبوں، بشمول ٹیکسٹائل، زراعت اور آئی ٹی خدمات کی مضبوطی اور لچک کی غماز ہے، جنھوں نے بدلتے ہوئے عالمی تجارتی رجحانات اور سخت مسابقتی دباؤ کے تحت حیران کن کارکردگی کا مظاہرہ کیا۔ اسی دوران، پاکستانی تارکینِ وطن نے 14ارب ڈالر کے ریکارڈ زر بھیجے، جو کہ 33 فیصد کے غیرمعمولی اضافے کی علامت ہیں۔ ڈالرکی اڑان کئی مہینوں سے تھمی ہوئی ہے جس میں ماضی کی طرح اربوں روپے مارکیٹ میں پھینک کر استحکام نہیں لانا پڑ رہا، کہا جا سکتا ہے کہ ڈالرکے مقابلے میں روپے کی قدرکا موجودہ استحکام مصنوعی نہیں بلکہ میرٹ پر ہے۔
اسٹیٹ بینک کے اعداد و شمار کے مطابق گزشتہ برس نومبر میں کرنٹ اکاؤنٹ خسارہ 14 کروڑ 80 لاکھ ڈالرز تھا مگر رواں برس اسی عرصے میں 72 کروڑ 90 لاکھ ڈالرز سرپلس رہا۔ 2015 کے بعد پہلی مرتبہ یعنی تقریباً دس سال بعد کرنٹ اکاؤنٹ سرپلس بلند ترین سطح پر ہے، کرنٹ اکاؤنٹ لگاتار کئی ماہ سے سرپلس ہے، اس کی بڑی وجہ ملکی برآمدات اور ترسیلات ِزر میں اضافہ ہے، مالی سال کے پہلے پانچ ماہ میں بیرونی وصولیوں میں بھی 33 فیصد اضافہ دیکھا گیا جو نومبر تک 15 ارب ڈالرز تک پہنچ گئیں، ترسیلاتِ زر میں 35 فیصد تک اضافہ ریکارڈ کیا گیا ہے۔
کرنٹ اکاؤنٹ سرپلس میں جانا ملکی معیشت کے لیے خوش آیند ہے، خاص طور پر ایک ایسے ملک میں جہاں دو سال قبل بحرانی کیفیت تھی اور غیریقینی صورتحال کے باعث ڈالر کی اڑان نے ملکی معیشت کی چولیں ہلا دی تھیں۔ معاشی ماہرین مرکزی بینک کی جانب سے شرح سود میں کمی کو معاشی استحکام سے تعبیر کررہے ہیں، شرح سود میں کمی سے جہاں تاجروں کے لیے قرضے حاصل کرنا آسان ہوتا ہے وہیں معیشت کا پہیہ زیادہ بہتر طریقے سے چلنے کے امکانات بھی پیدا ہوتے ہیں، مگر بعض ماہرین کا خیال ہے کہ شرح سود میں کمی سمیت معاشی اشاریوں میں بہتری کے فوری اثرات عوام پر مرتب ہوتے نظر نہیں آ رہے۔ پاکستان میں مہنگائی کی شرح 78 ماہ کی کم ترین سطح پر آگئی ہے۔
اگرچہ نمبرز یہ بتا رہے ہیں کہ مہنگائی چھ سال کی کم ترین سطح پر آگئی ہے مگر عوام تک ان کے ثمرات کی منتقلی میں وقت لگے گا، ان تمام اشاریوں خصوصاً مہنگائی میں کمی کے اثرات آنے میں تاخیر کی ایک وجہ انتظامی مشینری کی ناکامی ہے، مقامی سطح پر پرائس کنٹرول کمیٹیاں موثر نہ ہونے کے باعث یہ مثبت اشاریے صرف خبروں تک محدود نظر آتے ہیں۔وزیرِ اعظم شہباز شریف کی جانب سے اعلان کردہ ’’ اُڑان پاکستان‘‘ میں ملکی شرح نمو میں اگلے پانچ سال میں چھ فی صد اضافے کا ہدف مقرر کیا گیا ہے اور آیندہ 10 برس یعنی 2035 تک مجموعی قومی پیداوار (جی ڈی پی) کا سائز ایک کھرب ڈالر تک لے جانے کا ہدف مقرر کیا ہے۔ گزشتہ مالی سال میں مجموعی پیداوار کی شرح تین فی صد سے کم رہی ہے جب کہ پاکستان کا جی ڈی پی لگ بھگ 374 ارب ڈالر رہا ہے۔
معاشی بحالی کے کئی چیلنجز سے دوچار پاکستان کی وفاقی حکومت نے ’ اُڑان پاکستان‘ کا اعلان ایسے وقت میں کیا ہے جب مہنگائی میں کمی اور معاشی اشاریوں میں بہتری ہوئی ہے۔ خوش قسمتی سے عالمی منڈی میں تیل، گیس، کوئلہ، گندم اور دیگر اجناس کی قیمتوں میں کمی یا کم از کم استحکام کے باعث پاکستان کے درآمدی بل پر اس کا بوجھ کم پڑا ہے اور اس سے ملک کے اندر بھی مہنگائی کا زور کم کرنے میں خاطر خواہ مدد ملی ہے۔
یہ بھی حقیقت ہے کہ ملک کے اندر مہنگائی میں کمی کی ایک وجہ یہ بھی ہے کہ گزشتہ چند برسوں میں مہنگائی اس قدر تیزی سے بڑھی ہے کہ پاکستانیوں کی قوت خرید بے تحاشہ کم ہوگئی ہے۔ منڈی میں طلب کم ہونے کے ساتھ رسد بہتر ہونے سے مہنگائی میں کمی دیکھی جا رہی ہے۔ شرح سود کم ہونے سے تاجروں کے لیے قرضے سود پر حاصل کرنا آسان ہوتا ہے۔ یوں معیشت کا رکا ہوا پہیہ چلنے کے امکانات پیدا ہوتے ہیں۔ لوگوں کو غربت سے نکلنے اور معاشی نمو کے اثرات جنم لیتے ہیں۔ دوسری جانب نئی صنعتوں،کاروبار کے قیام یا توسیع کے لیے حالات سازگار نہیں ہیں کیوں کہ بجلی، گیس کی قیمت زیادہ ہے اور شہروں سے باہر بہتر انفرا اسٹرکچر موجود نہیں ہے جب کہ ٹرانسپورٹیشن کی قیمت بھی زیادہ ہے۔
عام لوگوں کو غربت سے نکالنے کے لیے آیندہ 10 سے 15 برسوں تک سالانہ چھ سے سات فی صد معاشی نمو درکار ہے۔ جب کہ اس مالی سال مرکزی بینک نے پاکستان کی معاشی نمو ڈھائی سے تین فی صد کے درمیان رہنے کی توقع ظاہر کی ہے۔ جی ڈی پی کی یہ معمولی شرح نمو ظاہر کرتی ہے کہ نئی ملازمتوں کی فراہمی اور پیداوار میں اضافے کے امکانات زیادہ روشن نہیں ہیں اور ایسے لوگوں کی مشکلات مسلسل جاری رہیں گی، جو غربت کا شکار ہیں یا غربت کی لکیر پر کھڑے ہیں۔ ملک میں صنعتوں کو فروغ اس وقت ممکن ہوگا جب انھیں گیس، بجلی، پانی اور انفرااسٹرکچرکم قیمت پر دستیاب ہو اور نوجوان ہنر مند ہوں تاکہ وہ انڈسٹری میں کام کرسکیں۔
قرضوں کے حجم کو پورا کرنے کے لیے ایکسپورٹ لیڈ گروتھ پالیسی اختیار کرنے سے مقامی سرمایہ کاروں کو پیسہ لگانے کا موقع ملے گا جس سے بیرونِ ملک پاکستانیوں اور پھر دیگر ممالک کے سرمایہ کاروں کو راغب کرنے میں بھی آسانیاں آئیں گی۔ تب ہی ملک میں حقیقی طور پر سرمایہ کاری ممکن ہوسکے گی۔ان خوش کن معاشی اشاریوں سے ہٹ کر ملک میں مہنگی بجلی کا بحران ملکی معیشت کے لیے ایک بڑا چیلنج ہے، اس سے نمٹنے کے لیے حکومت نے آئی پی پیز کے ساتھ بات چیت شروع کر رکھی ہے، اب تک متعدد آئی پی پیز اپنے معاہدوں پر نظر ثانی کرچکے ہیں۔
حکومتی کاوشوں سے بجلی کی فی یونٹ قیمت میں کمی آئی ہے اور حکومتی ذرائع کا کہنا ہے کہ آیندہ تین سے چار ماہ میں بجلی کی فی یونٹ قیمت میں مزید کمی متوقع ہے، حکومت اگر واقعی مہنگی بجلی کے بحران پر قابو پانے میں کامیاب ہوجاتی ہے تو اس کے ملکی معیشت پر انتہائی مثبت اثرات مرتب ہوں گے، صنعتی شعبے کو فروغ ملے گا جس سے روزگار کے مواقعے پیدا ہوں گے۔ پاکستان 2025 کے سفر کا آغاز کرچکا ہے، 2024 کی شاندار کامیابیاں ایک مستحکم اور دیرپا ترقی کے لیے ٹھوس بنیاد فراہم کرتی ہیں۔ یہ بحران سے استحکام تک کا سفر محض اقتصادی بحالی کی داستان نہیں، بلکہ یہ ایک عزم سے بھرپور قوم کی کہانی ہے جو مشکلات کے خلاف اٹھ کھڑی ہوئی اور اپنے مستقبل کو درخشاں بنانے کے لیے تاریخ کا رخ موڑنے میں کامیاب ہوئی۔
ذریعہ: Express News
کلیدی لفظ: مہنگائی میں کمی کرنٹ اکاؤنٹ ملکی معیشت پاکستان کی جی ڈی پی کی قیمت کو فروغ ملک میں ہے اور کے لیے کی ایک کی شرح
پڑھیں:
پاک ترکیہ اقتصادی و اسٹرٹیجک تعاون
پاکستان اور ترکیہ نے ہر قسم کی دہشت گردی کے خاتمے اور مختلف شعبوں میں باہمی تعلقات کو مزید مضبوط بنانے کے عزم کا اعادہ کرتے ہوئے کہا ہے کہ دونوں ممالک کے درمیان زراعت، توانائی، آئی ٹی، انفرا اسٹرکچر، معدنیات سمیت مختلف شعبوں میں اسلام آباد میں طے پانے والے 25 معاہدوں پر عمل درآمد شروع ہوچکا ہے۔
دفاعی تعاون پاک ترکیہ تعلقات میں کلیدی حیثیت رکھتے ہیں، ان خیالات کا اظہار وزیراعظم محمد شہباز شریف اور ترکیہ کے صدر رجب طیب اردوان نے مشترکہ پریس کانفرنس کے دوران کیا۔
بلاشبہ پاکستان اور ترکیہ کے درمیان باہمی تجارت کے وسیع مواقعے موجود ہیں؛ زمینی، فضائی اور سمندری تینوں ذرائع سے تجارت ممکن ہے۔ پاکستان، ترکیہ اور ایران تینوں ممالک نے سامان لانے اور لے جانے کے لیے ریل سروس بھی بحال کردی ہے۔ کئی برس سے ترکیہ اور پاکستان کے درمیان اقتصادی بالخصوص توانائی کے پیداواری شعبوں میں ایک دوسرے سے تعاون اور شراکت داری جاری ہے۔
توانائی کے پیداواری شعبے میں تعلقات و تعاون پہلے سے کہیں زیادہ گہرا ہوچکا ہے جس میں وقت کے ساتھ اضافہ دیکھنے میں آیا ہے، سمندروں میں کھدائی اور زلزلے کی تحقیق سے لے کر اہم معدنیات اور بجلی کی پیداوار کے لیے تکنیکی معلومات کا تبادلہ ہو رہا ہے، دونوں ممالک کے درمیان مفاہمت کی کئی یاد داشتوں پر دستخط ہوئے جو غیر معمولی پیشرفت اور شاندار تجربہ تھا۔ ترکیہ ایک عرصے سے اس قسم کے تعاون اور موقعے کا منتظر تھا جو درحقیقت دہائیوں پر محیط شراکت داری کا نتیجہ ہے اور پاکستان و ترکیہ کے تعلقات وقت کے ساتھ مزید گہرے ہوتے دکھائی دے رہے ہیں۔
ترکیہ اور پاکستان کی دوستی صرف تیل اور گیس کے شعبوں میں شراکت داری یا تعاون تک محدود نہیں، ترکیہ اور پاکستان اہم معدنیات کی کھوج اور ترقی کے لیے بھی تکنیکی معلومات کا تبادلہ کر رہے ہیں۔ دونوں ممالک کے پاس قابل ذکر ذخائر ہیں، جن کی ترقی دونوں ممالک کو فائدہ پہنچانے والی اسٹرٹیجک ویلیو چین پیش کرے گی۔
انیسویں صدی کے وسط میں جب کہ سونے (gold) کی مانگ بڑھ گئی ہے اور اسے اہم معدنیات قرار دیا جاتا ہے، دونوں ممالک کئی ایک دیگر اہم معدنیات کی فراہمی کنٹرول کر سکتے ہیں۔ ترکیہ پاکستان کی ضروریات کو سمجھتا ہے اور یہی وجہ ہے کہ توانائی کی ضروریات پوری کرنے کے لیے پاکستان کے ساتھ تعاون کر رہا ہے۔ گزشتہ دو دہائیوں کے دوران، ترکیہ نے اصلاحات کا احساس کیا ہے جس نے اپنی بجلی کے شعبے میں 100 ارب ڈالر سے زیادہ کی سرمایہ کاری کی ہے۔ نتیجتاً ترکیہ اب ایک ایسی منڈی بن گیا ہے جہاں نئی سرمایہ کاری ہو رہی ہے اور عوام کو سستی بجلی دستیاب ہے۔ آج پاکستان کو بھی اسی طرح کی اصلاحات کی ضرورت ہے۔
ترکیہ کے صدر رجب طیب اردوان مظلوم مسلمانوں کی طاقت اور ان کے حقوق کی ایک مضبوط آواز تصور کیے جاتے ہیں، مسلسل تین بار صدارتی انتخابات جیتنے والے طیب اردوان کی مثبت خارجہ پالیسیوں نے ترکیہ کو عالمِ اسلام میں کھویا ہوا مقام واپس دلانے میں اہم کردار ادا کیا ہے، علاقائی تنازعات ہوں یا عالمی معاملات، انھوں نے ہمیشہ مثبت اور قائدانہ رویہ اختیار کیا۔
دونوں ممالک ایک دوسرے کے مزید قریب آئے ہیں کیونکہ دفاع، معیشت انفارمیشن ٹیکنالوجی، تعلیم، صحت اور مختلف شعبوں میں دو طرفہ تعلقات کو فروغ دینے پر اتفاقِ کرتے ہوئے دو طرفہ تجارتی حجم کو پانچ ارب ڈالر سالانہ تک بڑھانے کے عزم کا اعادہ کیا گیا ہے اور 24 معاہدوں اور مفاہمتی یادداشتوں پر دستخط کیے گئے جن کا مقصد باہمی تجارت کا فروغ بتایا جا رہا ہے۔ تجارتی تعلقات کے فروغ کے علاوہ ترکیہ نے کشمیر کے موقف پر ہمیشہ کھل کر پاکستان کی حمایت کی ہے۔
ترکیہ کے عالمی کردار کی بات کی جائے تو ترکیہ نہ صرف غزہ کے مظلوم مسلمانوں کو امداد پہنچا رہا ہے بلکہ مشکل کی اس گھڑی میں غزہ کے باسیوں کے ساتھ کھڑا ہے۔ دونوں ملکوں کے سربراہان نہ صرف سات اکتوبر 2023 سے غزہ میں جاری اسرائیلی جارحیت اور فلسطینیوں کی نسل کُشی کے خلاف کھڑے ہیں بلکہ فلسطینیوں کو امداد کی فراہمی میں بھی پیش پیش ہیں۔
2005میں آزاد کشمیر کے زلزلہ زدگان کی امداد کے لیے صدر اردوان کی جانب سے، جو تب ترکیہ کے وزیراعظم تھے، 15کروڑ امریکی ڈالر دیے گئے تھے۔ چھ فروری 2023 کو ترکی میں آنے والے زلزلے کے بعد پاکستان نے بھی حقِ دوستی ادا کیا۔ 2018 میں پاکستان میں ترکیہ کی سرمایہ کاری 2.7ارب امریکی ڈالر تک پہنچ چکی تھی۔
پاکستان نے ترکیہ کو ویزا فری ٹریول لسٹ میں شامل کر لیا۔ 2015 کے بعد سے دونوں ملکوں کی تجارت میں نمایاں اضافہ ہوا۔ دونوں ملکوں کے مابین دفاعی تعاون کی تاریخ بھی عشروں پر محیط ہے۔ 1988میں دونوں ملکوں کے مابین دفاعی تعاون کو بڑھانے اور فوجی تربیت کے لیے پاک ترکیہ فوجی مشاورتی گروپ تشکیل پایا تھا۔ 2003 میں طیب اردوان کے دورہ پاکستان کے موقعے پر دونوں ملکوں میں ہائی لیول ملٹری ڈائیلاگ گروپ کی تشکیل بھی مضبوط تعلقات کا بڑا ثبوت ہے۔ 2004میں دہشت گردی اور منظم جرائم کا مقابلہ کرنے کے مقصد سے اس اہم معاہدے کی توثیق کی گئی جس سے انسدادِ دہشت گردی میں معاونت ملی۔
2018 میں پاک بحریہ نے ترکیہ کے ایک اہم دفاعی مینو فیکچرز کے ساتھ شراکت داری سے ایک فلیٹ ٹینکر متعارف کروایا۔ 2018میں ہی ترکیہ کے ساتھ پاک بحریہ کو 30 ٹی 129لڑاکا ہیلی کاپٹروں کی فراہمی کے لیے 1.5ارب ڈالرکا معاہدہ ہوا جو بعد ازاں امریکی پابندیوں کی وجہ سے معطل ہوگیا۔ 2021 میں پہلی اَپ گریڈڈ آبدوز کی فراہمی کے بعد 2023میں ترکیہ نے پاک بحریہ کے لیے دوسر ی اے جی او ایس ٹی اے 90جی کلاس آبدوز کو جدید بنانے کا کام کیا۔ اب ایک اور آبدوزکو جدید بنانے پر کام جاری ہے۔ علاوہ ازیں پاکستان اور ترکیہ کا ففتھ جنریشن فائٹر جیٹ جوائنٹ منصوبہ بھی کامیابی سے آگے بڑھ رہا ہے۔
دفاعی میدان کے علاوہ دونوں ممالک ٹیکنالوجی کے شعبے میں بھی تعاون کرتے رہے ہیں۔ دونوں ممالک مشترکہ جنگی مشقیں بھی کرتے ہیں جس میں اتا ترک اور جناح سیریز مشقیں شامل ہیں۔ انسدادِ دہشت گردی پر تعاون کے حوالے سے بھی دونوں ملکوں کے مابین کئی معاہدات موجود ہیں۔ رجب طیب اردوان نے ہمیشہ پہلے بطور وزیراعظم اور اب بطور صدر، پاکستان کے ساتھ تعلقات مضبوط اور پائیدار بنائے ہیں۔ اس میں کوئی دو آراء نہیں کہ رجب طیب اردوان کے اسٹرٹیجک وژن اور پالیسی اقدامات نے پاکستان اور ترکیہ کے مابین دو طرفہ تعلقات کو مضبوط بنانے میں اہم کردار ادا کیا ہے۔
پاکستان اور ترکیہ کے درمیان ایک آزاد تجارتی معاہدہ (ایف ٹی اے) ممکنہ طور پر صدر اردوان کی خواہش کے مطابق دو طرفہ تجارت کو 584 ملین ڈالر کی موجودہ سطح سے 5000 ملین ڈالر تک بڑھا سکتا ہے۔ پاکستان کی 20 ٰ ممکنہ برآمدات 391 ملین ڈالر سے بڑھ کر 2400 ملین ڈالر تک جا سکتی ہیں جب کہ ترکیہ کی پاکستان کو 20 اشیاکی برآمدات 193 ملین ڈالر سے بڑھ کر 2500 ملین ڈالر تک جا سکتی ہیں۔ تاہم، ایسا معلوم ہوتا ہے کہ صرف ٹیرف کے خاتمے سے اس مقصد کو حاصل کرنے میں مدد نہیں مل سکتی، پاکستان کو ایک بھرپور منصوبہ تشکیل دینے کی ضرورت ہے۔
ترکیہ کو برآمدات کی سب سے زیادہ ممکنہ مصنوعات میں سے کچھ کو پہلے ہی کم ٹیرف کا سامنا ہے۔ پاکستان کی مذاکراتی ٹیم کو اس بات کو یقینی بنانے کی ضرورت ہے کہ ترکیہ کی نان ٹیرف رکاوٹوں اور خاص طور پر ترکیہ کی جانب سے اینٹی ڈمپنگ قوانین کے آزادانہ استعمال سے متعلق خدشات کو ایف ٹی اے میں دور کیا جائے۔ پاکستان کے مینوفیکچرنگ سیکٹر کے مفادات کو مدنظر رکھے بغیر ایک بار پھر مذاکرات میں ناکامی ممکنہ طور پر ایک اور ایف ٹی اے کی طرف لے جا سکتی ہے جس سے پاکستان کی مقامی منڈیوں کو ترکیہ کی برآمدات میں یکساں اضافے کے بغیر ترک درآمدات کے لیے کھول دیا جائے گا۔
ترکیہ پاکستان کے ساتھ اپنے تجربات کا تبادلہ کرنے کے لیے تیار ہے اور پاکستانی قیادت کے عزم کی مکمل حمایت کرتا ہے۔ ترکیہ اور پاکستان کے تعلقات میں حالیہ پیش رفت سے نہ صرف دونوں ممالک کو فائدہ ہوگا بلکہ مقامی معیشتوں اور مجموعی طور پر خطے کے استحکام اور خوشحالی میں بھی اضافہ متوقع ہے۔ ترکیہ اور پاکستان کے درمیان فعال مضبوط اور کثیرالجہتی شراکت داری کے مواقعے موجود ہیں جن سے مستقبل قریب میں استفادہ کرتے ہوئے دوستی و تعاون کے رشتوں کو مزید گہرا بنایا جائے گا۔
حکومت کو اسپیشل انوسٹمنٹ فیسلی ٹیشن کونسل کی طرح برآمد کنندگان کے مسائل کو ایک دفتر میں حل کرنے کا فوری انتظام کرنا چاہیے۔ جو حکام، اہلکار یا طریقہ کار پاکستان کی بین الاقوامی تجارت میں رکاوٹ پیدا کرے اسے تبدیل کردینا ضروری ہے۔ یہ صورتحال برق رفتار فیصلوں اور عمل درآمد کی صلاحیت پیدا کیے بنا بہتر نہیں ہو سکتی۔ حکومت معاشی بحالی کی خاطر برآمدی شعبے کا ہاتھ تھام لے تو مقصد کا حصول مشکل نہیں ہوگا۔
وزیراعظم محمد شہباز شریف کا مالی سال 2025 کے پہلے 9 ماہ میں آئی ٹی برآمدات میں 2.828 بلین ڈالر (گزشتہ سال کے مقابلے 23 فیصد) اضافے کا خیر مقدم