ایف آئی اے کی کارروائی؛ افغان شہری کی غیرقانونی دستاویزات پر برازیل جانے کی کوشش ناکام
اشاعت کی تاریخ: 18th, February 2025 GMT
ایف آئی اے امیگریشن نےکراچی ایئرپورٹ پر کارروائی کرتے ہوئے افغان شہری کی غیرقانونی اور مشکوک دستاویزات پر برازیل جانے کی کوشش ناکام بنا دی۔
ترجمان ایف آئی اے کے مطابق افغان شہری امر الدین حاکمی نامی شہری کو آف لوڈ کیا گیا۔ افغان شہری قازقستان کے پاسپورٹ پر برازیل جا رہا تھا۔ امیگریشن کلیئرنس کے دوران مسافر کی دستاویزات کو مشکوک پایا گیا۔ مسافر کے پاسپورٹ پر امیگریشن کی انٹری اسٹیمپ موجود نہیں تھی۔
ابتدائی تفتیش کے مطابق مسافر نے طورخم بارڈر کے راستے غیرقانونی طور پر پاکستان میں داخل ہونے کا انکشاف کیا۔ آئی بی ایم ایس ریکارڈ کے مطابق بھی مسافر کی پاکستان آمد کے حوالے سے کوئی ہسٹری نہیں پائی گئی۔ سکینڈ لائن آفس کے تجزیے کے مطابق مسافر کے پاسپورٹ پر ضروری سیکورٹی فیچر بھی غائب تھے۔ افغان شہری کو گرفتار کرکے انسداد انسانی اسمگلنگ یونٹ کراچی منتقل کردیا گیا۔
ایف آئی اے ترجمان کے مطابق ایک اور کاروائی میں سینیگال میں انسانی اسمگلنگ کا شکار ہونے والے شہری محمد سعید سے پوچھ گچھ جاری ہے۔ مسافر سینیگال سے کراچی براستہ ایتھوپیا ایمرجنسی پاسپورٹ پر پہنچا۔
ابتدائی تفتیش کے مطابق مسافر وزٹ ویزے پر سینیگال گیا تھا۔ مسافر نے سینیگال میں 4 ماہ گزارے۔ مسافر نوید احمد عرف چوہدری تیمور نامی ایجنٹ سے رابطے میں تھا۔ ملزم نے 45 لاکھ روپے کے عوض مسافر کو اسپین بھیجنے کے معاملات طے کیے تاہم سینیگال پہنچنے پر مرزا احسن نامی ایجنٹ نے مسافر سے پاسپورٹ چھین لیا۔
مذکورہ ایجنٹوں نے مسافر کو غیر قانونی طور پر سمندر کے ذریعے یورپ بھجوانے کی کوشش کی۔ مسافر کو مزید پوچھ گچھ اور ایجنٹوں کی نشاندہی کے لیے انسدادِ انسانی اسمگلنگ سرکل کراچی منتقل کر دیا گیا۔ مزید تفتیش جاری ہے۔
.ذریعہ: Express News
کلیدی لفظ: افغان شہری پاسپورٹ پر ایف آئی اے کے مطابق
پڑھیں:
تفتان، غیر قانونی بارڈر کراسنگ کی کوشش کرنیوالے غیر ملکی گرفتار
ترجمان ایف آئی اے کے مطابق ملزمان بنگلہ دیش سے وزٹ ویزے پر پاکستان آئے تھے۔ ملزمان نے ماشکیل بارڈر ضلع چاغی سے بارڈر کراسنگ کی کوشش کی۔ اسلام ٹائمز۔ ایف آئی اے اینٹی ہیومن ٹریفکنگ سرکل تفتان نے کارروائی کرتے ہوئے انسانی اسمگلنگ اور غیر قانونی بارڈر کراسنگ میں ملوث 20 غیر ملکی باشندوں کو گرفتار کرلیا۔ ترجمان ایف آئی اے کے مطابق گرفتار ملزمان کا تعلق بنگلہ دیش سے ہے، جو وزٹ ویزے پر پاکستان آئے تھے۔ ملزمان نے ماشکیل بارڈر ضلع چاغی سے بارڈر کراسنگ کی کوشش کی۔ ترجمان کے مطابق مذکورہ کارروائی فرنٹیئر کور حکام کے تعاون سے عمل میں لائی گئی۔ گرفتار ملزمان سے قانونی دستاویزات طلب کی گئیں تو وہ تسلی بخش جواب پیش نہیں کر سکے۔ ملزمان کو گرفتار کرکے تفتیش کا آغاز کر دیا گیا ہے۔
ملک بھر میں ووٹر کی تعداد کتنی ہوگئی؟ رپورٹ سامنے آگئی