پاکستانی ٹیم کا چیمپئنز ٹرافی کا مختصر سفر، لیکن کیوں؟
اشاعت کی تاریخ: 25th, February 2025 GMT
اسلام آباد (اُردو پوائنٹ ۔ DW اردو۔ 25 فروری 2025ء) آئی سی سی چیمپئنز ٹرافی میں پہلے نیوزی لینڈ اور پھر بھارت کے ہاتھوں شکست کے بعد میزبان ٹیم ایونٹ سے باہر ہوچکی ہے۔البتہ پاکستانی کرکٹ ٹیم کو اپنا آخری گروپ میچ 27 فروری کو بنگلادیش کے خلاف راولپنڈی میں کھیلنا ہے۔ اگر پاکستان کو اس میچ میں بھی شکست کا سامنا کرنا پڑتا ہے تو اس کی ایونٹ میں میچ ہارنے کی ہیٹرک مکمل ہوجائے گی۔
دفاعی چیمپئین پاکستان گزشتہ ہفتے کراچی میں نیوزی لینڈ کے ہاتھوں اپنا پہلا میچ 60 رنز سے ہار گیا تھا۔ اس کے بعد اتوار کو روایتی حریف بھارت کے ہاتھوں چھ وکٹوں سے شکست نے پاکستانی کرکٹ فینز کو شدید مایوس کر دیا۔
پاکستان کے سیمی فائنل میں پہنچنے کے لیے امید کی جو آخری کرن تھی، وہ بھی بنگلہ دیش کی نیوزی لینڈ کے ہاتھوں شکست کے بعد ختم ہو چکی ہے۔
(جاری ہے)
پیر کو کھیلے گئے گروپ میچ میں اگر نیوزی لینڈ بنگلہ دیش سے شکست کھا جاتا تو گرین شرٹس کو ایک اور موقع مل سکتا تھا۔سابق کپتان وسیم اکرم نے اے ایف پی کو بتایا، ''ہم گزشتہ چند سالوں سے ان کھلاڑیوں کو ٹرین کر رہے ہیں لیکن وہ نہ سیکھ رہے ہیں اور نہ ہی ان کا کھیل بہتر ہو رہا ہے۔‘‘
انہوں نے کہا کہ یہ ایک بڑی تبدیلی کا وقت ہے۔
ہمیں اپنے ڈومیسٹک کرکٹ کے نظام کو بہتر کرنے کی ضرورت ہے تاکہ ہم معیاری کرکٹرز پیدا کر سکیں۔پاکستانی کھلاڑیوں کی بین الاقوامی سطح کی کرکٹ کے لیے عدم تیاری کے لیے ڈومیسٹک کرکٹ میں مسابقت کی کمی اور غیر معیاری پچز کو زمہ دار ٹھہرایا جاتا ہے۔
ناقدین کا کہنا ہے کہ پاکستان میں کرکٹ بورڈ، کوچنگ ٹیموں اور سلیکشن پینلز میں بار بار کی جانے والی تبدیلیوں سے بھی اس کھیل کو ناقابل تلافی نقصان پہنچا ہے۔
مبصرین کے مطابق ایسی تبدیلیاں اکثر سیاسی ہوتی ہیں اور ان میں میرٹ کا کوئی عمل دخل نہیں ہوتا۔سابق کپتان راشد لطیف نے اے ایف پی کو بتایا، ''میں پاکستان کرکٹ کی حالت سے بہت افسردہ ہوں۔
ہمیں میرٹ کا خیال رکھنا ہوگا اور کھیل کی انتظامیہ میں پیشہ ور افراد کو لانا ہوگا نہ کہ سیاسی بنیادوں پر لوگوں کی بھرتی کرنا ہوگی۔‘‘
ان کا ماننا ہے کہ پاکستان کرکٹ بورڈ، سلیکشن کمیٹی اور ٹیم کے کپتان کی بار بار تبدیلیاں مناسب سیٹ اپ اور ٹیم بنانے میں ناکامی کا سبب ہے۔
آئی سی سی چیمپئینز ٹرافی کے ایونٹ کو پاکستان پہنچنے میں 29 سال لگے اور اس کے لیے پاکستان میں خصوصی سکیورٹی انتظامات کیے گئے۔ تاہم تمام تیاریوں کی باوجود ٹیم کی تیاری میں کمی نمایاں تھی۔
راولپنڈی میں مقیم 26 سالہ عمر سراج نے کہا، ''ہم پرجوش تھے کہ آخر کار ایک بین الاقوامی ایونٹ ہمارے ملک میں واپس آ یا ہے لیکن یہ خوشی بہت مختصر تھی۔
‘‘"پاکستان کے مداح ہونے کا سب سے مشکل حصہ یہ ہے کہ آپ دوسری ٹیموں کے ہارنے کے لیے دعا کرتے ہیں،" انہوں نے ہنستے ہوئے کہا۔ "یہ تکلیف دہ ہے.
پاکستان کا کسی بھی انٹرنیشنل کرکٹ ایونٹ میں ایسی کارکردگی کا مظاہرہ کرنا کوئی نئی بات نہیں ہے۔ 2023 میں کھیلی گئی ایک روزہ میچوں کی سیریز میں بھی قومی ٹیم پہلے مرحلے میں باہر ہوگئی تھی۔
اس کے علاوہ پچھلے سال امریکہ اور ویسٹ انڈیز میں ہونے والے ٹی ٹوئنٹی ورلڈ کپ میں ایک ہی مرحلے میں پاکستانی کرکٹ ٹیم کا چاروں شانے چت ہوجانا کوئی پرانی بات نہیں۔ اس ایونٹ کا فاتح بھی بھارتے ہی رہا تھا۔پاکستان گزشتہ ماہ ویسٹ انڈیز کے ساتھ ہوم سیریز ڈرا کرنے کے بعد ورلڈ ٹیسٹ چیمپئن شپ کی عالمی رینکنگ میں میں نویں اور آخری نمبر پر رہا۔
ر ب/ ش ر (اے ایف پی)
ذریعہ: UrduPoint
کلیدی لفظ: تلاش کیجئے نیوزی لینڈ کے ہاتھوں کے لیے کے بعد
پڑھیں:
لاہور کے شائقین کرکٹ نے نیا ریکارڈ بنا ڈالا
لاہور کے کرکٹ شائقین نے پاکستان اور جنوبی افریقا کے درمیان سیریز کے تیسرے اور آخری ٹی ٹوئنٹی میں نئی تاریخ رقم کردی۔پاکستان اور جنوبی افریقا کےدرمیان سیریز کا فیصلہ کن میچ ہفتے کو لاہور کے قذافی اسٹیڈیم میں کھیلا گیا۔اس فیصلہ کن مقابلے میں اسٹیڈیم تماشائیوں سے کھچا کھچ بھرا ہوا تھا۔قذافی اسٹیڈیم میں شائقین کرکٹ اتنی بڑی تعداد میں میچ دیکھنے آئے کہ نیا ریکارڈ بن گیا۔ہفتے کو لاہور میں پاکستان اور جنوبی افریقا کا میچ دیکھنے لیے 32 ہزار 437 افراد اسٹیڈیم میں موجود تھے۔اتنی بڑی تعداد میں شائقین کے آنے پر قذافی اسٹیڈیم کی اسکرین پر ہاؤس فل بتایا گیا۔ یہ پاکستان میں کرکٹ کی تاریخ کا سب سے زیادہ کراؤڈ تھا۔ اتنی بڑی تعداد میں آج سے پہلے ہوم گراؤنڈ پر شائقین میچ دیکھنے نہیں آئے۔لاہور کے کرکٹ شائقین نے ایک بار پھر ثابت کر دیا کہ وہ کھیل سے کس قدر والہانہ محبت کرتے ہیں۔واضح رہے پاکستان نے تیسرے ٹی ٹوئنٹی میں جنوبی افریقا کو 4 وکٹوں سے شکست دیکر سیریز 1-2 سے اپنے نام کرلی۔گرین شرٹس نے جنوبی افریقا کا 140 رنز کا ہدف 19 ویں اوور میں 6 وکٹوں کے نقصان پر حاصل کیا اور سیریز 1-2 سے جیت لی۔
سہیل آفریدی کی عمران خان سے پھر ملاقات نہ ہوسکی، توہین عدالت کی درخواست دائر کرنے کا اعلان