وردی کو لٹکا کر مذاق اڑایا گیا، آج یہی وردی پوش جوان سرحدوں پرہمارے لیے لڑ رہے ہیں، مریم نواز
اشاعت کی تاریخ: 14th, May 2025 GMT
فیصل آباد:
وزیراعلیٰ پنجاب مریم نواز نے بھارتی جارحیت کا منہ توڑ جواب دینے پر مسلح افواج کو خراج تحسین پیش کرتے ہوئے کہا کہ وردی کو ڈنڈے پر لٹکا کر مذاق اڑایا گیا، آج یہی وردی پوش جوان سرحدوں پر ہماری حفاظت کے لیے لڑ رہے ہیں۔
وزیراعلیٰ پنجاب مریم نواز نے جی سی یونیورسٹی فیصل آباد میں لیپ ٹاپ اور ہونہاراسکالرشپ فیز ٹو کی تقریب سے خطاب کے دوران کہا کہ پاکستان کو دنیا کی سب سے بڑ ی قوت اور طاقت بنانا چاہتے ہیں، سب کی نیت ٹھیک تھی تو پاکستان کو تاریخی فتح ملی، اگر عوام تقسیم اور قیادت متحد نہ ہوتی تو دشمن کے خلاف تاریخی فتح حاصل نہیں کرسکتے تھے۔
انہوں نے کہا کہ تاریخی فتح نے قوم کو متحد اور یکجان بنا دیا، کامیابی پر فخر نہیں، عاجزی اور اللہ تعالیٰ کا شکر ادا کرتے ہیں، آج میرا اور ہم سب کا سر فخر سے بلند ہے، ہر لحاظ سے بڑے دشمن سے سامنا تھا، مقابلہ کیا اور افواج پاکستان نے جنگ لڑی اور پوری قوم ان کے ساتھ کھڑی تھی۔
مریم نواز کا کہنا تھا کہ ہم نے صرف جنگ ہی نہیں جیتی بلکہ قوم کا روشن مستقبل یقینی بنایا، میں باربار بچوں کو تفریق اور تقسیم کرنے والوں کے بارے میں بتاتی رہی ہوں، میں بچوں سے پہلے بھی کہتی رہی، آج بھی کہتی ہوں کہ نفرت اور تقسیم پھیلانے والوں کی باتوں میں نہیں آنا۔
انہوں نے کہا کہ ہر نوجوان کا قدم ملک و قوم کی سلامتی کے لیے ہونا چا ہیے، سارے ادارے ہمارے اپنے ہیں، لوگ ہمارے اپنے ہیں، اندھی نفرت کا شکار نہیں ہونا چاہیے، وطن کا مستقبل طلبہ کے ہاتھ میں ہے۔
وزیراعلیٰ پنجاب نے کہا کہ وردی کو ڈنڈے پر لٹکا کر مذاق اڑایا گیا، آج یہی وردی پوش جوان سرحدوں پر ہماری حفاظت کے لیے لڑ رہے ہیں، بچوں کا جذبہ دیکھ کر دل کو تسلی، اطمینان اور مسرت ہوتی ہے، اپنے طلبہ پر فخر ہے۔
فیصل آباد میں تقریب کے دوران انہوں نے کہا کہ جنگ جیتنے سے بڑا خوشی کا لمحہ کوئی نہیں ہوسکتا، بچوں سے کہتی ہوں کہ کسی کے اقتدار کی ہوس کا شکار نہ بنیں اور پاکستان کے نوجوانوں نے نفرت کی سیاست کو مسترد کردیا۔
مریم نواز نے کہا کہ جب مشکل گھڑی آتی ہے تو قوم کے بیٹے سینہ تان کر کھڑے ہوتے ہیں، ملک کے مستقبل کے بارے میں شک و شبہات پیدا کرنے والے شرمندہ ہوئے۔
وزیراعلیٰ پنجاب کا کہنا تھا کہ لیپ ٹاپ اور اسکالر شپ طلبہ پر احسان نہیں بلکہ ان کا حق ہے، میں عوام کی امانتوں کی امین ہوں، سب کچھ بیٹے اور بیٹیوں کا ہے، بچوں کے ہاتھ میں لاٹھی اور اسلحہ اچھا نہیں لگتا بلکہ لیپ ٹاپ اچھے لگتے ہیں۔
انہوں نے کہا کہ میں زیادہ سے زیادہ بچوں کو لیپ ٹاپ اور اسکالر شپ دینا چاہتی ہوں، ہمارے بچے لائق، ذہین اور محنتی ہیں، ہمار ا مستقبل انہی سے روشن ہے، لیپ ٹاپ اور اسکالرشپ لینے والے بچوں، ان کے والدین اور اہل خانہ کو مبارک باد پیش کرتی ہوں۔
مریم نواز نے کہا کہ جن جہازوں کو گرایا اور جلایا گیا، انہی جہازوں اور لوگوں نے جنگ لڑی، انڈیا کہتا تھا کہ رافیل طیارہ گرایا نہیں جا سکتا، ہم نے جے ایف تھنڈر سے گرا کر دیکھا دیا۔
انہوں نے کہا کہ قوم کو یقیناً یاد ہوگا، جے ایف تھنڈر کس نے بنایا تھا، نوازشریف نے کہا تھا کہ ہم 9مئی والے نہیں 28 مئی والے ہیں، آج نوجوانوں کا جوش و خروش بتا رہا ہے، ہم 9مئی والے نہیں 10 اور28 مئی والے لوگ ہیں۔
مریم نواز نے کہا کہ 1998 میں لوگ نوازشریف کو ایٹمی دھماکے کا جواب نہ دینے کا کہہ رہے تھے، لوگوں نے نوازشریف کو ایٹمی دھماکے پر پابندیاں لگنے سے ڈرایا لیکن نوازشریف نے کہا کہ دھماکے ضرور کروں گا، میرے وطن کی سلامتی اور دفاع کا معاملہ ہے۔
انہوں نے کہا کہ 28مئی کو ہم نے مقابلہ 5 اور 6 سے جیتا تھا، 10مئی کو مقابلہ 6 زیرو سے جیتا ہے، مجھے یقین ہے کہ میرے بیٹے اور بیٹیاں 10مئی کے جانشین ہیں، سبز ہلالی پرچم نہیں گرنے دیں گے۔
مریم نواز نے کہا کہ فضائیہ کے شاہینوں نے قوم کا سر فخر سے بلند کر دیا، فیصل آباد کے 12ہزار طلبہ کی طرف سے وزیراعظم شہبازشریف، آرمی چیف جنرل عاصم منیر، ایئر چیف ظہیر بابر سندھو کو مبارک باد پیش کرتی ہوں۔
انہوں نے کہا کہ جنگ میں زخمی ہونے والے شہریوں اور جوانوں کی دیکھ بھال کرنے پر سب کو دل کی گہرائیوں سے خراج تحسین اور شاباش پیش کرتی ہوں، شہدا اور غازیوں کی بے مثال خدمت اور دیکھ بھال کرنے والو ں کو بھی خراج تحسین پیش کرتی ہوں۔
فیصل آباد میں لاہور طرز پر ڈیولپمنٹ پلان کا اعلان
وزیراعلیٰ پنجاب مریم نواز نے فیصل آباد میں میٹرو اور الیکٹرک بسیں چلانے کا اعلان کرتے ہوئے کہا ہے کہ لاہور کے طرز پر فیصل آباد میں بھی ڈیولپمنٹ پلان لا رہے ہیں۔
وزیراعلیٰ پنجاب مریم نواز نے جی سی یونیورسٹی فیصل آباد میں لیپ ٹاپ اور ہونہار اسکالرشپ فیز ٹو کی تقریب سے خطاب کے دوران اہم اعلانات کیے اور کہا کہ اگلے سال فیصل آباد میں میٹروبس سروس شروع کی جائے گی اور فیصل آباد میں گرین الیکٹرک بسیں چلائے جائیں گی۔
مریم نواز نے فیصل آباد کے لیے لاہور کی طرز پر فیصل آباد ڈیولپمنٹ پلان لانے اور فیصل آباد ڈیژن کے شہروں کے ساتھ ساتھ گاؤں کو بھی ماڈل ولیج بنانے کا اعلان کیا۔
.ذریعہ: Express News
کلیدی لفظ: مریم نواز نے کہا کہ پنجاب مریم نواز نے انہوں نے کہا کہ فیصل آباد میں پیش کرتی ہوں لیپ ٹاپ اور رہے ہیں تھا کہ کے لیے
پڑھیں:
ٹی ایل پی کیخلاف دیگر صوبوں میں بھی پنجاب جیسی کارروائی کیلئے وفاق سے درخواست کا فیصلہ، کسی شہر میں وال چاکنگ برداشت نہیں کی جائیگی: مریم نواز
لاہور (نیوز رپورٹر) وزیراعلیٰ مریم نواز نے دورہ برازیل سے واپسی پر امن و امان کے لیے مزید ہائی الرٹ رہنے کا حکم دے دیا۔ دہشت گرد، انتہا پسند اور نفرت کے نیٹ ورک پنجاب میں بے بس دکھائی دیئے۔ پنجاب حکومت نے انتہا پسندوں اور دہشتگردی کے نیٹ ورک کے مالیاتی اور جنگی انفراسٹرکچر کو اکھاڑ پھینکا ہے۔ ٹی ایل پی کے ٹھکانوں سے جدید ترین اسلحہ، ہزاروں گولیاں، بلٹ پروف جیکٹس اور جنگی ساز و سامان برآمد ہوئے۔ پنجاب حکومت نے احتجاج کے نام پر نفرت فتنہ پھیلانے والی فنڈنگ روک دی۔ کالعدم انتہا پسند جماعت کے عہدے داروں کے 23 ارب 40 کروڑ کے اثاثے منجمد کردیئے۔92 بینک اکاؤنٹس اور جاز کیش سمیت تمام ڈیجیٹل اکاؤنٹس جام کردیئے ہیں۔ کالعدم انتہا پسند جماعت کے 9 فنانسرز کیخلاف بھی مقدمات درج ہوگئے ہیں۔ مریم نواز کی زیرِ صدارت امن و امان پر غیرمعمولی اجلاس منعقد ہوا۔ اجلاس میں پنجاب حکومت کا باقی صوبوں میں بھی کالعدم انتہا پسند جماعت کے خلاف پنجاب جیسی یکساں کارروائی کیلئے وفاقی حکومت سے درخواست کرنے کا فیصلہ کیا گیا۔ وزیراعلی نے کومبنگ آپریشن مستقل جاری رکھنے کا حکم دیا۔ بریفنگ میں بتایا گیا پنجاب میں مساجد اور آئمہ کرام کے لیے 61 ہزار سے زائد فارم تقسیم کیے گئے۔ پنجاب میں 50 ہزار سے زائد آئمہ کرام نے خود اپنی رجسٹریشن کر کے امن اور قانون کے ساتھ اپنے تعلق کو مضبوط کیا ہے۔ پنجاب میں آئمہ کرام کی 82 فیصد رجسٹریشن مکمل ہوگئی ہیں، اس پر وزیر اعلیٰ نے اطمینان کا اظہارکیا۔ پنجاب میں امن کی مضبوطی کے لیے پانچ بڑے وفاق المدارس نے مساجد/ آئمہ کرام کی رجسٹریشن پر اتفاق رائے کیا ہے۔ مریم نواز نے آئمہ کرام کو پریشان نہ کرنے اور احترام کو ملحوظ خاطر رکھنے کی ہدایت کی ہے۔ وزیراعلیٰ مریم نوازشریف نے کہا کہ آئمہ کرام نماز پڑھاتے ہیں، نہیں چاہتے کہ وہ چندے کیلئے ہاتھ پھیلائیں۔ پنجاب کے کسی شہر میں وال چاکنگ برداشت نہیں کی جائے گی۔ پنجاب حکومت نے تمام ڈپٹی کمشنرز کو صوبہ بھر میں وال چاکنگ پر مکمل پابندی کے مستقل نفاذ کے لئے موثر اقدامات جاری رکھنے کی ہدایت کی ہے۔ پنجاب حکومت نے عوام کی جانب سے انتہاپسندی اور فتنہ انگیزی کو یکسر مسترد کرنے پر اطمینان کا اظہار کیا ہے۔ اجلاس میں پنجاب میں اسلحہ کے حوالے سے ایس او پیز واضح کرنے کا اصولی فیصلہ کیا گیا ہے۔ وزیراعلی نے اسلام آباد حملے کے پیش نظر سرویلنس مزید بڑھانے کی ہدایت کی ہے۔ ڈسٹرکٹ میں ڈرون سرویلنس کی بھی ہدایت ‘ ہراسانی کے واقعات کی ڈرون سرویلنس کرنے کا حکم دیا ہے۔ جبکہ مریم نواز نے بچوں کے جنسی استحصال، بدسلوکی اور تشدد کی روک تھام و بحالی کے عالمی دن پر پیغام میں کہا کہ بچے میری ریڈ لائن ہیں، سب مجھے پیارے ہیں، سب کی حفاظت ہمارا فرض ہے۔ بچوں کے خلاف جرائم ملوث لوگ لوگ سماج کے ناسور ہیں اور پنجاب سے جڑ سے اکھاڑ پھینکے جائیں گے۔ پنجاب میں بچوں کو تحفظ دینے کے لئے پاکستان کا پہلا ورچوئل سینٹر برائے چائلڈ سیفٹی قائم کیا گیا ہے۔ پنجاب کا ورچوئل سینٹر برائے چائلڈ سیفٹی ہزاروں بچھڑے ہوئے بچوں اور بزروگوں کو ان کی فیملیز سے ملا چکا ہے۔ پنجاب میں کسی بچے کے لاپتہ ہونے کی صورت میں ورچوئل سینٹر برائے چائلڈ سیفٹی کے ذریعے فوری رابطہ کیا جاسکتا ہے۔
قومی اسمبلی میں 27 ویں آئینی ترمیم کی تمام 59 شقیں شق وار منظور