ٹرمپ کے اقدامات سے متاثر ہونے والے ہندوستانی طلباء کے معاملے پر مودی خاموش ہیں، کانگریس
اشاعت کی تاریخ: 4th, June 2025 GMT
جے رام رمیش نے مودی حکومت پر تنقید کرتے ہوئے کہا کہ انہوں نے اس بات پر کسی تشویش کا اظہار نہیں کیا ہے کہ کسطرح ہندوستانی طلباء اور انکے خاندان امریکی صدر ٹرمپ کے اقدامات سے بری طرح متاثر ہورہے ہیں۔ اسلام ٹائمز۔ غیر ملکی طلباء کو متاثر کرنے والے امریکی فیصلوں پر تشویش کا اظہار کرتے ہوئے کانگریس نے کہا کہ چین نے اپنے طلباء کو درپیش مشکلات کے بارے میں سخت ردعمل ظاہر کیا ہے لیکن وزیراعظم نریندر مودی اور وزیر خارجہ ایس جے شنکر ہندوستانی طلباء کو ہونے والی پریشانیوں پر مکمل طور پر خاموش ہیں۔ کانگریس کے جنرل سکریٹری انچارج کمیونیکیشن جے رام رمیش نے کہا کہ وزارت خارجہ کے مطابق 2024ء میں تقریباً 3,37,630 ہندوستانی طلباء اعلیٰ تعلیم کے لئے امریکہ گئے اور امریکی کیمپس میں غیر ملکی طلباء میں سے تقریباً ایک تہائی تعداد ہندوستان طلباء کی ہے۔ جے رام رمیش نے کہا کہ اس کا مطلب یہ ہے کہ تقریباً ساڑھے تین لاکھ ہندوستانی خاندانوں نے اپنی محنت کی کمائی کی بچت سے یا قرض لے کر اپنے بچوں کو اعلیٰ تعلیم کے لئے امریکہ بھیجا۔
جے رام رمیش نے کہا کہ ان طلباء کے علاوہ وہ جو اس سے پچھلے سالوں میں گئے تھے، سب کو ایک غیر یقینی مستقبل کا سامنا ہے۔ وہیں 2025ء میں جانے کی منصوبہ بندی کرنے والے طلباء کی ایک بڑی تعداد شاید کبھی اپنی خواہشات کو پورا ہوتا ہوا نہ دیکھ سکے، کیوں کہ ٹرمپ نے اپنے ارادوں کو واضح کر دیا ہے۔ چین نے چینی طلباء کے حوالے سے سخت ردعمل کا اظہار کیا ہے لیکن ہمارے وزیراعظم اور وزیر خارجہ نے بالکل خاموشی اختیار کر رکھی ہے۔ جے رام رمیش نے مودی حکومت پر تنقید کرتے ہوئے کہا کہ انہوں نے اس بات پر کسی تشویش کا اظہار نہیں کیا ہے کہ کس طرح ہندوستانی طلباء اور ان کے خاندان امریکی صدر ٹرمپ کے اقدامات سے بری طرح متاثر ہو رہے ہیں۔
ذریعہ: Islam Times
کلیدی لفظ: ہندوستانی طلباء نے کہا کہ کا اظہار کیا ہے
پڑھیں:
نریندر مودی نے ملک کو خطرے میں ڈال کر اڈانی کے سامنے سر تسلیم خم کردیا، کانگریس
کانگریس ترجمان اجے کمار نے افسوس ظاہر کیا کہ ہندوستانی میڈیا اس معاملے پر خاموش ہے اور ملکی عزت کو ٹھیس پہنچ رہی ہے۔ اسلام ٹائمز۔ کانگریس پارٹی کے ترجمان ڈاکٹر اجے کمار نے بھارتی وزیراعظم نریندر مودی اور صنعتکار گوتم اڈانی کے تعلقات پر شدید حملہ کیا۔ انہوں نے الزام عائد کیا کہ مودی حکومت نے اڈانی کو فائدہ پہنچانے کے لئے نہ صرف ملک کے وسائل کا غلط استعمال کیا، بلکہ قومی مفاد کو بھی داؤ پر لگا دیا ہے۔ نئی دہلی میں واقع کانگریس کمیٹی کے نئے ہیڈکوارٹر میں ایک پریس کانفرنس کے دوران ڈاکٹر اجے کمار نے الزام لگایا کہ نریندر مودی جہاں بھی جاتے ہیں یا اڈانی جہاں چاہتے ہیں وہاں انہیں ٹھیکے مل جاتے ہیں۔ انہوں نے سوال اٹھایا کہ آخر مودی نے اڈانی کے سامنے اس طرح سرنڈر کیوں کیا اور ملک کو خطرے میں ڈال کر اڈانی کے لئے سب کچھ قربان کیوں کر دیا۔
ڈاکٹر اجے کمار نے دعویٰ کیا کہ سرکاری مشینری پوری طرح اڈانی کے کاروبار کو بڑھاوا دینے میں مصروف ہے۔ انہوں نے کہا کہ 2018ء میں حکومت نے ایئرپورٹ کے ٹینڈرز کے لئے ایک اشتہار نکالا، جس میں لکھا گیا تھا کہ ایئرپورٹ چلانے کے لئے تجربے کی ضرورت نہیں۔ انہوں نے الزام لگایا کہ یہ شرط صرف اڈانی کو فائدہ پہنچانے کے لئے رکھی گئی تھی۔ انہوں نے کہا کہ احمدآباد، منگلورو، لکھنؤ، جے پور، گوہاٹی اور ترواننت پورم کے ایئرپورٹ اڈانی کو سونپ دئے گئے، جبکہ ممبئی ایئرپورٹ حاصل کرنے کے لئے جی وی کے کمپنی پر دباؤ ڈالا گیا اور سی بی آئی کی چھاپے مار کارروائیوں کے بعد وہ ایئرپورٹ اڈانی کے حوالے کر دیا گیا۔
ڈاکٹر اجے کمار کے مطابق نریندر مودی نے سرکاری بینکوں کو اڈانی کے لئے اے ٹی ایم بنا دیا ہے۔ انہوں نے بتایا کہ اڈانی پر 40 ہزار کروڑ روپے سے زیادہ کا بینک ایکسپوژر ہے۔ اس کے باوجود بینک آف بڑودہ اور پنجاب نیشنل بینک سے نئے پی وی سی منصوبے کے لئے بات چیت جاری ہے۔ انہوں نے کینیا حکومت کے فیصلے کا بھی ذکر کیا، جس نے اڈانی کا ایک معاہدہ منسوخ کر دیا تھا اور گرفتاری کی تیاری کی تھی لیکن اس کی کوئی خبر ہندوستانی میڈیا میں نہیں آئی۔ اجے کمار نے افسوس ظاہر کیا کہ ہندوستانی میڈیا اس معاملے پر خاموش ہے اور ملکی عزت کو ٹھیس پہنچ رہی ہے۔ پریس کانفرنس میں اجے کمار نے میڈیا کی خاموشی پر بھی سوال اٹھایا اور کہا کہ یہ سب اس لئے ممکن ہو رہا ہے کیونکہ نریندر مودی نے سرنڈر کر دیا ہے۔
پنجاب: سسرالیوں کے تشدد سے بہو جاں بحق، 3 افراد کیخلاف مقدمہ درج