پی ٹی آئی قافلہ لاہور پہنچ گیا: آج اسی شہر سے تحریک شروع کر رہے ہیں، گنڈا پور
اشاعت کی تاریخ: 13th, July 2025 GMT
لاہور‘ فیروز والہ‘ گوجرانوالہ‘ اسلام آباد‘ پشاور (نوائے وقت رپورٹ + نامہ نگاران + نمائندہ خصوصی + اپنے سٹاف رپورٹر سے + بیورو رپورٹ) تحریک انصاف کی مرکزی قیادت کا قافلہ اسلام آباد سے لاہور پہنچ گیا۔ چیئرمین بیرسٹر گوہر نے کہا کہ گرفتاریاں ممکن نہیں ہیں۔ جمہوریت کو مضبوط کرنے کیلئے سب کو اکٹھا کرنا ہو گا۔ عمر ایوب نے کہا کہ ہم اپنے آئینی اور جمہوری حق کو استعمال کر رہے ہیں۔ تحریک انصاف کے احتجاج کے باعث شاہدرہ موڑ پر پولیس کی بھاری نفری تعینات رکھی گئی۔ اسلام آباد سے آنے والے قافلے میں چیئرمین بیرسٹر گوہر علی خان، اپوزیشن لیڈر عمر ایوب خان، پارٹی چیف وہپ قومی اسمبلی ملک عامر ڈوگر، ایم این اے شاہد خٹک سمیت دیگر شامل ہیں۔ قبل ازیں وزیراعلیٰ خیبر پی کے نے صحافیوں سے گفتگو کرتے ہوئے کہا کہ پنجاب میں ہمارے ارکان معطل کئے گئے، امن کا پیغام لے کر جا رہے ہیں، اپنے معطل ارکان سے اظہارِ یکجہتی کریں گے‘ پنجاب کے عوام نے 8 فروری کے انتخابات میں ہمیں ووٹ ڈالا تھا انہوں نے کہا کہ پنجاب اسمبلی میں ہمارے ایم پی اے معطل کئے گئے ہیں اس پر بھی ان سے اظہارِ یکجہتی کیا جائے گا۔ قاسم اور سلیمان پاکستان الیکشن لڑنے نہیں آرہے اپنے والد سے ملاقات کرنے آرہے ہیں ۔ پنجاب کے لوگوں نے ہمارے لئے بہت قربانیاں دی ہیں‘ بیرسٹر گوہر علی خان نے کہا کہ پنجاب میں ہمارے سب سے زیادہ ایم پی اے ہیں، ہمارے26 ایم پی اے معطل کئے گئے ہیں، ہم نے جلسہ نہیں کرنا صرف اجلاس ہے۔ سینٹ الیکشن پر تبادلہ خیال کرنا ہے۔ علی امین گنڈا پور نے کہا کہ گرفتاریاں ہماری تحریک کا راستہ نہیں روک سکتیں۔ حکومت گھبراہٹ کا شکار ہو چکی ہے‘ کسی فرد کو آئینی حق سے محروم نہیں کیا جا سکتا۔ کارکنوں کی پکڑ دھکڑ حکومت کے اوچھے ہتھکنڈے ہیں۔ تحریک انصاف کے اسلام آباد سے لاہور کیلئے روانہ ہونیوالے قافلے نے ضلع گجرات کی حدود میں داخل ہوتے ہوئے سرائے عالمگیر کے مقام پر ہوٹل میں مختصر قیام کیا میڈیا سے گفتگو کرتے ہوئے وزیراعلیٰ کے پی کے علی امین گنڈا پور ، چیئرمین بیرسٹر گوہر ، اپوزیشن لیڈر ملک احمد خاں بھچر نے کہا کہ عمران خان کے بیٹے خان کو ملنے آ رہے ہیں کو ئی ہاتھ تو لگا کے بتائے کارکنان کی پکڑ دھکڑ دو سال سے دیکھ رہے ہیں ،اس سے کچھ فرق نہیں پڑ تا۔ پی ٹی آئی گوریلہ جماعت نہیںہم جمہوری طرز پر احتجاج اور جلسے جلوس کریں گے۔ سرائے عالمگیر پل اور چناب پل تک راستوں میں پولیس کی بھاری نفری تعینات کی گئی جو قافلوں کے گجرات کے حدود سے نکلنے اور گوجرانوالہ کی حدود میں داخلے کے بعد بھی سڑکوں پر الرٹ رہی تاہم قافلے پرامن طریقے سے واضح رہے کہ ضلع بھر سے کسی بھی مرکزی پارٹی رہنما نے قافلے میں شرکت کی اور نہ ہی پارٹی رہنمائوں کا استقبال کیا۔ وزیراعلیٰ کے پی کے علی امین گنڈاپور کی قیادت میں لاہور آنے والا پارلیمنٹرین کا قافلہ شاہدرہ راوی پل پر پہنچا تو مقامی عہدیداروں اور کارکنوں نے انکا استقبال کرتے ہوئے پھولوں کی پتیاں برسائیں اور زبردست نعرے بازی کی جبکہ وزیراعلیٰ علی امین گنڈا پور سمیت قافلے میں تمام گاڑیاں ٹال ٹیکس دیئے بغیرآگے نکل گئیں۔ کالا شاہ کاکو انٹرچینج پر اہلکاروں نے ٹیکس لینے کی کوشش کی تو وزیر اعلیٰ خیبر پی کے کی سکیورٹی نے دھکے مارے اور قافلہ فیروزوالہ سے لاہور روانہ ہوگیا۔ پاکستان تحریک انصاف کے سینئر رہنما یاسر گیلانی کو دیگر ساتھی کارکنان کے گرفتار کئے جانے کی اطلاع ملی ہے جنہیں نامعلوم مقام پر منتقل کردیا گیا۔ بعدازاں پولیس نے تصدیق کی انہیں رہا کر دیا گیا ہے۔ تحریک انصاف کا قافلہ وزیر اعلیٰ علی امین گنڈا پور کی قیادت میں گوجرانوالہ رکے بغیر لاہور روانہ ہو گیا۔ درجنوں گاڑیوں پر مشتمل قافلے کی گزر گاہوں پر پولیس کی بھاری نفری تعینات تھی۔ چیئرمین پی ٹی آئی بیرسٹر گوہر اور علی امین گنڈا پور کی زیرصدارت پارلیمانی پارٹی کا اجلاس ہوا جس میں تحریک انصاف کی احتجاجی تحریک کے لائحہ عمل پر مشاورت کی گئی۔ اجلاس کے بعد عشایئے سے خطاب کرتے علی امین گنڈا پور نے کہا کہ جب بھی کوئی تحریک لاہور سے چلتی ہے وہ پورے پاکستان میں فتح حاصل کرتی ہے ہمارا لیڈر بے گناہ جیل میں ہے اس پر کوئی کیس نہیں پنجاب کی محبت اور جذبہ ناقابل بیان ہے۔ پنجاب کے عوام کا گرم جوشی سے استقبال قومی یکجہتی کی علامت ہے۔ شاندار استقبال نے دل جیت لیا۔ پنجاب پی ٹی آئی کا دل ہے ہم مشاورت کے ساتھ آگے بڑھیں گے، اب ہمارا لائحہ عمل پاکستان کے حالات کے مطابق ہونا چاہئے۔ پنجاب کا خیبر پی کے سے موازنہ کریں گے تو یہ زیادتی ہو گی۔ بانی پی ٹی آئی آج بھی کہتے ہیں کہ بات کیلئے تیار ہیں۔ متحد ہونے تک کامیابی ہمارا مقدر نہیں بن سکتی۔ لاہور میں پرامن طریقے سے داخل ہوا ہوں۔ ادھر وزیراعلیٰ خیبر پی کے علی امین گنڈا پور نے کہا ہے کہ پاکستان اور افغانستان کے درمیان زبان، نسلی، قبائلی اور مذہبی رشتے موجود ہیں۔ علی امین گنڈاپور سے افغانستان کے سفیر نے ملاقات کی، ملاقات میں وزیراعلیٰ نے افغانستان میں کینسر ہسپتال کے قیام میں معاونت کی پیشکش بھی کی۔ گنڈا پور نے کہا بیرونی طاقتوں کے مذموم عزائم کے خلاف مل کر کام کرنا ہوگا۔ انہوں نے کہا کہ خصوصی وفد افغانستان بھیجنا چاہتے ہیں، وفد اعتماد اور ہم آہنگی کے فروغ میں پل کا کردار ادا کرے گا۔ اس موقع پر افغانستان کے سفیر احمد شکیب نے افغان مہاجرین کا خیال رکھنے پر حکومتِ خیبر پی کے سے اظہار تشکر کیا۔ علی امین گنڈا پور نے کہا کہ آج ہم لاہور سے تحریک شروع کرنے جا رہے ہیں ہم نے 5 اگست تک اس کو پیک پر لیکر جانا ہے یہ سوچنا ہو گا وہ کیسے کرنا ہے۔ پنجاب اسمبلی کے ارکان کو معطل کرنا لاقانونیت ہے۔ اگر ایسا ہی کرنا ہے تو خیبر پی کے سے ان کے چیئرمین صاحبان کو فارغ کر دوں گا۔ مولانا فضل الرحمنٰ کا ایک ایم این اے اور دو ایم پی اے میرٹ پر ہیں باقی سب فارم 47 پر ہیں۔ مولانا فضل الرحمن خود جعلی مینڈیٹ پر ہیں اور یہ ہمارے لئے باتیں کریں گے۔ عوام نے مولانا فضل الرحمن کو مسترد کیا ہوا ہے۔ مولانا فضل الرحمن خیبر پی کے میں تبدیلی لانے کی بجائے اپنے اندر تبدیلی لے آئیں تو بہت اچھا ہو گا۔ انہوں نے لوگوں کو گمراہ کیا اس لئے اپنے حلقے سے نہ جیت سکے پنجاب حکومت کا اس وقت شکریہ ادا کروں گا جب مجھے لاہور میں آئینی حق کے مطابق جلسے کی اجازت دیں گے اگر جلسہ کی اجازت دیں تو صرف شکریہ نہیں بلکہ تحفہ بھی دوں گا۔ وزیراعلیٰ خیبر پی کے نے الٹی میٹم دیتے ہوئے کہا ہے کہ آج سے فیصلہ سازوں کو 90 دن کا وقت دے رہے ہیں اس کے بعد یا تو ہم سیاست چھوڑ دیں گے یا پھر 91ویں دن تم نہیں ہوگے۔ سن لو فیصلہ کرنے والو ہم آپ کو نوے دن کا وقت دے رہے ہیں سدھر جاؤ۔ انہوں نے کہا کہ آج سے ہمارے نوے دن شروع ہو گئے ہیں اس کے بعد 91ویں دن یا تو ہم سیاست چھوڑ دیں گے یا پھر تم نہیں رہو گے۔ عمران خان کی رہائی کیلیے تحریک چلانے کے حوالے سے سب سے ہاتھ اٹھا کر حلف لیا اور نعرے بھی لگوائے۔ انہوں نے کہا کہ مارشل لا لگا کر ملک کی جمہوریت کا ستیاناس کر دیا گیا ہے اور ان کو اپنی کسی بات پر ندامت نہیں الٹا تشدد اور بلیک میل کرتے ہیں، میں فوجی کا بیٹا اور بھائی ہوں، اس لیے کہتا ہوں کہ کچھ لوگوں مداخلت سے ہماری فوج کے معیار کو گرا رہے ہے۔ میں وزیراعلیٰ ہو کر عوام کو جوابدہ ہوں اور اْن کو جواب دینا بھی پڑے گا۔ اس کے علاوہ میں عمران خان کے علاوہ کسی کا حکم نہیں مانوں گا چاہے ہمیں دھمکیاں ہی کیوں نہ دی جائیں۔ انہوں نے کہا کہ بانی پی ٹی آئی بے گناہ جیل میں ہیں اور نظام کی بہتری اور ہمارے مستقبل کی جنگ لڑ رہے ہیں۔ وزیر اعلیٰ نے کہا کہ تمام ملک میں کارکنوں کو پیغام حالت کے مطابق لائحہ عمل بنا کر پارٹی کو پیش کریں، احتجاجی تحریک کولیڈر کرنے کا موقع مقامی قیادت کو دیں۔ ہم تحریک کا اعلان کرتے ہیں اور اپ ہمارے لوگ اٹھا لیتے ہیں، ایسا نہیں چلے گا اور بھائی جان میں تو اب جواب دوں گا، چاہے اس سے میری پارٹی کے لوگ اتفاق نہ کریں، اگر مجھے گولی مارو گے تو تیار رہو اس بات پر بھی کہ گولی تمہیں بھی لگ سکتی ہے اگر تم ناجائز کرو گے ہم بھی ویسا ہی کریں گے۔ وزیراعلیٰ نے کہا کہ مجھے حکومت گرانے کی دھمکی دیتے ہیں، حکومت گرا دو گے تو جاؤ گرادو پہلے کون سا تم لوگوں نے بنا کر دی ہے ہم نے زور بازو پر حکومت بنائی ہے۔
.
ذریعہ
ذریعہ: Nawaiwaqt
کلیدی لفظ: علی امین گنڈا پور نے کہا مولانا فضل الرحمن انہوں نے کہا کہ تحریک انصاف بیرسٹر گوہر خیبر پی کے ایم پی اے کریں گے رہے ہیں کے بعد
پڑھیں:
معاشی سرگرمیوں میں تیزی، کے الیکٹرک صنعتی صارفین کا بجلی استعمال ریکارڈ سطح پر پہنچ گیا
کراچی: ملک میں معاشی سرگرمیوں میں بہتری کے ساتھ کے الیکٹرک صنعتی صارفین کی جانب سے بجلی کے استعمال نے نئی بلند ترین سطح حاصل کر لی۔ مالی سال 2026 کے دوران کے الیکٹرک کے صنعتی فیڈرز پر بجلی کی مجموعی کھپت 6 ارب 8 کروڑ یونٹس (6.08 ارب یونٹس) ریکارڈ کی گئی، جو ادارے کی تاریخ میں کسی بھی مالی سال کے دوران سب سے زیادہ ہے۔
کے الیکٹرک کے جاری کردہ اعلامیے کے مطابق صنعتی بجلی کی طلب میں یہ نمایاں اضافہ ایسے وقت میں سامنے آیا جب پاکستان کی مجموعی قومی پیداوار (جی ڈی پی) کی شرح نمو 3.7 فیصد رہی۔ کمپنی کا کہنا ہے کہ کراچی کی صنعتوں کو مسلسل، قابل اعتماد اور بلا تعطل بجلی کی فراہمی نے صنعتی پیداوار اور معاشی سرگرمیوں کو فروغ دینے میں اہم کردار ادا کیا۔
کے الیکٹرک کے چیف ایگزیکٹو آفیسر سید محمد طہٰ نے کہا کہ صنعتی بجلی کے استعمال میں ریکارڈ اضافہ حکومت پاکستان، اسپیشل انویسٹمنٹ فسیلیٹیشن کونسل (SIFC) اور کراچی کی صنعتی برادری کی مشترکہ کوششوں کا نتیجہ ہے۔ ان کے مطابق سرمایہ کاری کے بہتر ماحول، صنعتی سرگرمیوں میں تیزی اور کاروباری اعتماد میں اضافے نے اس کامیابی کو ممکن بنایا۔
انہوں نے کہا کہ کراچی ملک کی معاشی شہ رگ ہے اور کے الیکٹرک 2013 سے صنعتی فیڈرز کو لوڈشیڈنگ سے مستثنیٰ رکھے ہوئے ہے تاکہ صنعتوں کی پیداوار اور برآمدات متاثر نہ ہوں۔
بی تھری کیٹیگری میں سب سے زیادہ بجلی استعمال
اعلامیے کے مطابق سب سے زیادہ بجلی کا استعمال بی تھری (B3) کیٹیگری میں ریکارڈ کیا گیا، جس میں 501 سے 5 ہزار کلوواٹ تک بجلی استعمال کرنے والی صنعتیں شامل ہیں۔ اس زمرے میں سیمنٹ، اسٹیل، ٹیکسٹائل، کیمیکل اور دیگر بڑے صنعتی شعبے شامل ہیں۔
ماہانہ بنیاد پر جون 2026 میں صنعتی بجلی کی کھپت سب سے زیادہ رہی، جبکہ اپریل 2026 دوسرے نمبر پر رہا۔
گزشتہ سال کے مقابلے میں 20 فیصد سے زائد اضافہ
اعداد و شمار کے مطابق مالی سال 2025 میں صنعتی صارفین نے 5.04 ارب یونٹس بجلی استعمال کی تھی، جبکہ مالی سال 2026 میں یہ مقدار بڑھ کر 6.08 ارب یونٹس تک پہنچ گئی، جو 20 فیصد سے زائد سالانہ اضافہ ظاہر کرتی ہے۔
اس سے قبل مالی سال 2022 میں صنعتی بجلی کی کھپت 5.84 ارب یونٹس ریکارڈ کی گئی تھی، تاہم رواں مالی سال میں یہ ریکارڈ بھی ٹوٹ گیا۔
349 نئے صنعتی کنکشنز فراہم
کے الیکٹرک کے مطابق مالی سال 2026 کے دوران 349 نئے صنعتی کنکشنز جاری کیے گئے، جبکہ 273 صنعتی صارفین نے اپنے بجلی کے لوڈ میں اضافہ کیا، جس سے مجموعی طور پر 168 میگاواٹ اضافی طلب قومی گرڈ میں شامل ہوئی۔
اعلامیے میں کہا گیا کہ حکومت کی جانب سے صنعتوں کو کیپٹو پاور پلانٹس سے قومی گرڈ پر منتقل کرنے کی پالیسی، معاشی بحالی اور صنعتی پیداوار میں اضافے نے بھی بجلی کی طلب بڑھانے میں اہم کردار ادا کیا۔
کمپنی کا مزید کہنا ہے کہ صنعتی فیڈرز کی ریکوری کی شرح تمام صارفین کے مختلف زمروں میں سب سے بہتر رہی، جو بروقت بلوں کی ادائیگی اور لوڈشیڈنگ سے استثنیٰ کے درمیان مضبوط تعلق کو ظاہر کرتی ہے۔
کے الیکٹرک نے اس عزم کا اعادہ کیا کہ کراچی کی صنعتوں اور کاروباری سرگرمیوں کو قابل اعتماد اور بلا تعطل بجلی کی فراہمی آئندہ بھی اس کی اولین ترجیح رہے گی تاکہ ملکی معیشت کی ترقی میں اپنا کردار جاری رکھا جا سکے۔
گلوبل سمٹ میں چینی روبوٹ کو اپنا بتانے والی بھارتی یونیورسٹی کا اسٹال بند، شدید تنقید کا سامنا