اداکارہ نعیمہ بٹ کی طنزیہ ویڈیو وائرل، ڈرامہ انڈسٹری پر تنقید پر مداحوں کی ملی جلی رائے
اشاعت کی تاریخ: 4th, August 2025 GMT
پاکستانی شوبز انڈسٹری کی معروف اداکارہ نعیمہ بٹ نے حال ہی میں ایک طنزیہ ویڈیو شیئر کی ہے جس میں انہوں نے پاکستانی ڈرامہ انڈسٹری میں کام نہ ملنے کے حوالے سے اپنا ردعمل ظاہر کیا۔ یہ ویڈیو سوشل میڈیا پر تیزی سے وائرل ہو گئی اور صارفین کی جانب سے مختلف آراء سامنے آئیں۔ نعیمہ بٹ ان دنوں کسی نئے ڈرامے میں دکھائی نہیں دے رہیں تاہم وہ سوشل میڈیا پر خاصی متحرک ہیں اور اپنے انسٹاگرام اکاؤنٹ پر ویڈیوز پوسٹ کر کے مداحوں سے رابطے میں رہتی ہیں۔ اپنی نئی ویڈیو میں انہوں نے ان افراد کو تنقید کا نشانہ بنایا جو ان پر الزام لگاتے ہیں کہ انہیں ڈراموں میں کام نہ ملنے کی وجہ سے سوشل میڈیا پر ویڈیوز بنانی پڑ رہی ہیں۔ ویڈیو میں اداکارہ نے کہا کہ جس میڈیا میں اداکاراؤں کی لاشیں ملتی ہیں، وہاں کون کام کرنا چاہتا ہے۔ انہوں نے مزید کہا کہ کم از کم ان کا پالتو کتا تو وفادار ہے۔ ان کے اس بیان کو مداحوں کی طرف سے شدید ردعمل کا سامنا کرنا پڑا۔ سوشل میڈیا پر کئی صارفین نے نعیمہ کے انداز کو غیر مناسب قرار دیا۔ ایک صارف نے لکھا کہ انہیں اسی انڈسٹری سے پہچان ملی اور اب اسی پر طنز کیا جا رہا ہے۔ ایک اور صارف نے کہا کہ اگر کسی نے کام دینے سے انکار کیا ہے تو ان کا نام لے کر بات کی جائے، پوری انڈسٹری کو برا کہنا درست نہیں۔ دوسری طرف کچھ افراد نے اداکارہ کے الفاظ کو حسد اور مایوسی کا اظہار قرار دیا اور انہیں منفی سوچ رکھنے والی شخصیت سے تشبیہ دی۔ نعیمہ کی ویڈیو پر جاری اس بحث سے واضح ہے کہ ان کا اندازِ بیان مداحوں میں شدید اختلاف کا باعث بن گیا ہے۔
ذریعہ: Nawaiwaqt
کلیدی لفظ: سوشل میڈیا پر
پڑھیں:
بلاول بھٹو زرداری سے منسوب وائرل ویڈیو کے حقیقت سامنے آ گئی
سوشل میڈیا پلیٹ فارم “ایکس” (سابقہ ٹوئٹر) پر 3 جولائی سےمتعدد بھارتی صارفین نے پیپلز پارٹی کے چیئرمین بلاول بھٹو زرداری کی ایک ویڈیو شیئر کرنا شروع کی، جس میں دعویٰ کیا گیا کہ انہوں نے کہا کہ ہمارے لوگ بھارت کی پارلیمنٹ میں بیٹھے ہیں ۔ تاہم نجی ٹی وی کے مطابق تحقیقات سے معلوم ہوا ہے کہ ویڈیو کی آڈیو میں چھیڑ چھاڑ کی گئی اور اصل مواد کو مسخ کر کے پیش کیا گیا ہے۔
31 جولائی کو ایک بھارتی صارف نے ایک ویڈیو پوسٹ کی جس میں اسکرین کو دو حصوں میں تقسیم کیا گیا: ایک جانب بلاول بھٹو قومی اسمبلی میں اور دوسری جانب بھارتی رکنِ پارلیمنٹ گورو گوگوئی لوک سبھا میں دکھائی دے رہے ہیں۔ اس ویڈیو میں بلاول کو یہ کہتے سنا جا سکتا ہے: کون رات کے اندھیرے میں حملہ کرتا ہے؟ ہم آسانی سے بھارتی وزیراعظم کے سامنے پروپیگنڈہ کر سکتے ہیں، ہمارے لوگ ان کی پارلیمنٹ میں بیٹھے ہیں ۔
پوسٹ کے کیپشن میں کہا گیا کہ ہمارے لوگ بھارت کی پارلیمنٹ میں بیٹھے ہیں — بلاول بھٹو۔ ہیلو گورو گوگوئی صاحب، یہ ‘ہمارے لوگ’ کون ہیں جو بلاول بھٹو کے مطابق بھارتی پارلیمنٹ میں بیٹھے ہیں؟
یہ ویڈیو 1 لاکھ سے زائد مرتبہ دیکھی گئی اور 5,200 سے زائد مرتبہ شیئر کی گئی۔ مزید یہ کہ دیگر بھارتی سوشل میڈیا صارفین اور انسٹاگرام اکاؤنٹس نے بھی یہی ویڈیو شیئر کی، جس سے اس کی وائرل نوعیت ظاہر ہوتی ہے۔
اس کے علاوہ بلاول بھٹو کی تصویر کے ساتھ یہ جعلی بیان بھی گردش کرتا رہا: ہمارے لوگ ان کی پارلیمنٹ میں بیٹھے ہیں — جسے ہندوتوا نظریات کے حامل اکاؤنٹس نے شیئر کیا اور ان پوسٹس کو مجموعی طور پر 6 لاکھ سے زائد مرتبہ دیکھا گیا۔
تاہم ان میں سے کسی بھی پوسٹ میں نہ تو ویڈیو کی مکمل تفصیل فراہم کی گئی، نہ اس کی اصل تاریخ کا ذکر کیا گیا اور نہ ہی مکمل تقریر کا کوئی لنک دیا گیا۔
وائرل ویڈیو کی حقیقت جاننے کے لیے جب اس کا تجزیہ کیا گیا تو واضح ہوا کہ آڈیو اور بلاول کی لبوں کی حرکت میں مطابقت نہیں تھی، وزیراعظم کے الفاظ غلط انداز میں ادا کیے گئے تھے اور ویڈیو میں ہندی زبان کا استعمال کیا گیا، جو بلاول کی عام تقریر میں نہیں ہوتا۔
ریورس امیج سرچ سے معلوم ہوا کہ یہ ویڈیو دراصل 7 مئی 2025 کی ہے، جب بلاول بھٹو نے قومی اسمبلی میں چار روزہ پاک بھارت تنازع پر تقریر کی تھی۔
اپنی اصل تقریر میں بلاول بھٹو نے کہا تھاکہ صرف چور اور بزدل رات کے اندھیرے میں حملہ کرتے ہیں، اگر ان میں تھوڑی سی بھی ہمت ہوتی تو دن کی روشنی میں حملے کا اعلان کرتے
انہوں نے مزید کہا تھا کہ ہم کبھی بھی جنگ کی حمایت نہیں کرتے، لیکن بھارت کو خبردار رہنا چاہیے کیونکہ پاکستان نے ابھی جواب دینا ہے — اور وہ جواب نہ تو رات کے اندھیرے میں دیا جائے گا، نہ جھوٹ پر مبنی ہو گا، بلکہ بین الاقوامی قوانین اور اقوام متحدہ کے چارٹر کے مطابق ہو گا۔
اس تقریر کی تصدیق معتبر اداروں کی رپورٹس سے بھی ہوتی ہے، جن میں کہیں بھی بھارتی پارلیمنٹ یا ہمارے لوگ جیسے کسی بیان کا ذکر نہیں۔
لہٰذا، اس وائرل ویڈیو کی بنیاد پر کیا گیا دعویٰ کہ بلاول بھٹو زرداری نے کہا ہمارے لوگ بھارت کی پارلیمنٹ میں بیٹھے ہیں — مکمل طور پر غلط، جھوٹا اور من گھڑت ہے۔ ویڈیو میں آڈیو کو ایڈیٹ کر کے ایک جعلی بیانیہ گھڑنے کی کوشش کی گئی ہے۔
اسلام آباد میں چینی کا بحران شدت اختیار کر گیا