فواد خان کی فلم ’آبیر گلال‘ بھارت میں کب ریلیز ہوگی؟
اشاعت کی تاریخ: 14th, September 2025 GMT
پاکستانی سپر اسٹار فواد خان اور بالی وڈ اداکارہ وانی کپور کی نئی فلم ’آبیر گُلال‘ دنیا بھر میں 12 ستمبر کو ریلیز ہوچکی ہے، تاہم بھارت میں اس کی نمائش تاحال مؤخر ہے۔ تازہ ترین اطلاعات کے مطابق فلم کو بھارت میں 26 ستمبر کو ریلیز کرنے کی تیاری کی جا رہی ہے۔
یہ فلم، جسے پہلے ’ابیر گُلال‘ کے نام سے پیش کیا گیا تھا، فواد خان کی تقریباً 8 سال بعد بھارتی سنیما میں واپسی ہے۔ فلم کی بھارت میں ریلیز کا اعلان ابھی تک سرکاری طور پر نہیں کیا گیا۔
یہ بھی پڑھیں: فواد خان کی فلم ’عبیر گلال‘ کب ریلیز ہو گی، تاریخ سامنے آ گئی
بالی وڈ ہنگامہ کی رپورٹ کے مطابق پروڈیوسرز نے فیصلہ کیا ہے کہ فلم کو بھارت میں بیرون ملک ریلیز کے 2 ہفتے بعد سینما گھروں میں پیش کیا جائے گا۔
فلم کے پروڈیوسرز پرامید ہیں کہ یہ ایک سادہ اور خوبصورت رومانوی کہانی بھارتی شائقین کو اپنی طرف متوجہ کرے گی، خاص طور پر اس لیے کہ 26 ستمبر کو بھارت میں کوئی اور بڑی فلم ریلیز نہیں ہو رہی، جس سے ’آبیر گُلال‘ کو سولو ریلیز کا موقع ملے گا۔
تنازع اور تاخیر کی وجوہات
’آبیر گُلال‘ کی بھارتی ریلیز کو سیاسی کشیدگی نے مشکل بنا دیا تھا۔ یہ فلم 9 مئی 2025 کو بھارت میں ریلیز ہونا تھی لیکن 22 اپریل کو پہلگام حملے اور اس کے بعد پاک بھارت کشیدگی کے باعث یہ ریلیز ملتوی کردی گئی تھی۔
یہ بھی پڑھیں: پہلگام واقعے کے بعد فواد خان کی فلم ’عبیر گلال‘ کے گانے یوٹیوب سے ڈیلیٹ کردیے گئے
فواد خان نے پہلگام حملے کی مذمت کی تھی، تاہم آپریشن سندور کو شرمناک حملہ قرار دیا، جس کے بعد بھارت میں ان کے خلاف شدید ردعمل سامنے آیا۔
سوشل میڈیا پر ان کی فلموں کے بائیکاٹ کا مطالبہ کیا گیا، جبکہ بھارتی حکومت نے پاکستانی فنکاروں کی سوشل میڈیا رسائی پر بھی پابندیاں عائد کر دیں۔ اس تنقید کی زد میں ماہرہ خان اور ہانیہ عامر جیسے دیگر پاکستانی فنکار بھی آئے۔
عالمی ریلیز اور پذیرائی
بھارت میں مشکلات کے باوجود ’آبیر گُلال‘ کو 12 ستمبر کو دنیا بھر میں ریلیز کر دیا گیا۔ فلم کے پروڈیوسرز کو نیا اعتماد اس وقت ملا جب 14 ستمبر کو پاک بھارت ایشیا کپ میچ کے دوران فلم کا ذکر زور پکڑ گیا، ان کا ماننا ہے کہ یہ وقت بھارتی شائقین کو بھی سینما گھروں کی طرف کھینچ سکتا ہے۔
یہ بھی پڑھیں: فلم بائیکاٹ کا خطرہ، پہلگام حملے پر فواد خان کا ردعمل بھی سامنے آگیا
اس رومانوی ڈرامے کی پروڈکشن وِویک بی اگروال، رضا نمازی اور فیروزی خان نے کی ہے جبکہ ہدایت کار آرتی ایس بگدی ہیں۔ موسیقی امیت تریویدی نے ترتیب دی ہے اور نغمے کمار نے لکھے ہیں۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
.ذریعہ: WE News
کلیدی لفظ: کو بھارت میں فواد خان کی آبیر گ لال ستمبر کو کی فلم
پڑھیں:
بھارتی کرکٹ بورڈ نے ایک مرتبہ ایشیا کپ کی ٹرافی کی ڈیمانڈ کردی
نئی دہلی(ویب ڈیسک)بھارتی کرکٹ بورڈ (بی سی سی آئی) نے ایک مرتبہ ایشیاکپ ٹرافی کی ڈیمانڈ کردی اور معاملہ انٹرنیشنل کرکٹ کونسل (آئی سی سی) اجلاس میں اٹھانے کی دھمکی دے دی۔
بھارتی میڈیا رپورٹس کے مطابق بی سی سی آئی کے سیکریٹری دیوا جیت سائیکیا نے ایک بار پھر ایشیاکپ کی ٹرافی کا مطالبہ کرتے ہوئے کہا کہ بھارتی ٹیم کو تاحال ایشیا کپ کی ٹرافی نہیں ملی، حالانکہ ٹورنامنٹ 28 ستمبر کو ختم ہوچکا ہے۔
ان کا کہنا تھا کہ اگر پیر تک ٹرافی بھارت کے حوالے نہیں کی جاتی تو یہ معاملہ 4 نومبر کو ہونے والی آئی سی سی میٹنگ میں اٹھایا جائے گا، مجھے یقین ہے کہ آئی سی سی انصاف کرے گی اور بھارت کو ٹرافی دلانے میں مدد کرے گی۔
یاد رہے کہ بھارت نے دبئی میں ہونے والے ایشیاکپ فائنل میں پاکستان کو شکست دی تھی، تاہم بھارتی ٹیم نے پی سی بی چیئرمین اور اے سی سی صدر محسن نقوی سے ٹرافی وصول کرنے سے انکار کر دیا تھا جس پر ایک اہلکار نے ٹرافی کو اسٹیج سے ہٹا دیا تھا۔
دیوا جیت سائیکیا کا کہنا تھا کہ ٹرافی ابھی تک بی سی سی آئی کے دفتر نہیں پہنچی، حالانکہ تقریباً 10 دن قبل اے سی سی چیئرمین کو باضابطہ درخواست بھیجی جا چکی ہے کہ ٹرافی جلد از جلد بھارت کو دی جائے۔
ذرائع کے مطابق اے سی سی کے صدر محسن نقوی پہلے ہی بھارت کو ٹرافی کے معاملے پر جواب دے چکے ہیں۔
ای میل پر جواب دیتے ہوئے اے سی سی نے کہا کہ بھارت کو ٹرافی چاہیے تو دبئی آکر لے لیں جب کہ محسن نقوی نے دس نومبر کو دبئی میں تقریب رکھنے کی بھی پیشکش کی تھی۔
اس سے قبل، 30 ستمبر کو دبئی میں ایشین کرکٹ کونسل کا اجلاس ہوا، جس میں پاکستان اور بھارتی کرکٹ بورڈ آمنے سامنے آگئے تھے۔
بھارتی کرکٹ بورڈ کی جانب سے مسلسل اصرار کیا جاتا رہا جس پر انہیں جواب دیا کہ فائنل کے بعد اے سی سی صدر محسن نقوی ٹرافی دینے اسٹیج پر موجود تھے، ٹرافی لینے سے انکار بھارتی کرکٹ ٹیم نے کیا۔
محسن نقوی نے واضح کیا کہ اب اگر بھارت کو ٹرافی چاہیے تو ایشین کرکٹ کونسل کے دفتر میں آکر مجھ سے لے لیں، یا پھر تقریب منعقد کرکے اے سی سی صدر سے وصول کرلیں۔
واضح رہے کہ متحدہ عرب امارات میں کھیلے گئے ایشیاکپ 2025 کے دوران بھارتی ٹیم کے کپتان سوریا کمار یادیو نے پاکستان کے خلاف میچ کے دوران پہلے کپتان اور پھر قومی ٹیم سے ہاتھ نہ ملاکر اسپورٹس مین اسپرٹ کی خلاف ورزی کی۔
یہی نہیں، میچ کے بعد پریس کانفرنس کے دوران بھارتی ٹیم کے کپتان نے پہلگام واقعے کا ذکر کرکے کرکٹ میں سیاست لے آئے اور پھر فائنل جیتنے کے بعد بھی اپنی حرکتوں سے باز نہ آئے، ایشین کرکٹ کونسل کے صدر محسن نقوی سے ٹرافی لینے سے ہی انکار کردیا۔
صدر ٹرمپ کا دورہ جاپان، سرمایہ کاری کے بجائے صحت موضوعِ بحث بن گئی